NSOLO WA PFUNDZIRO 47
NYIMBO 38 Mulungu Anadzakupasani Mphambvu
“ Iwe Ndiwe Munthu Wakufunika Kakamwe!”
“ Iwe ndiwe munthu wakufunika kakamwe.”—DAN. 9:23.
PINAFUNA IFE KUPFUNDZA
Tinapfundza pinthu pyakuti pinaphedza ale anaoneka ninga akukhonda funika toera kudziwa kuti Yahova asaafuna kakamwe.
1-2. Ninji cinafuna kutiphedza toera kukhala na cinyindiro cakuti Yahova asatifuna?
YAHOVA asafuna kakamwe atumiki ace. Mbwenye anango a iwo nee asakhulupira kuti Yahova asaafunadi. Thangwi yakutsalakanwa mwakuipa, anango asapibva kuti nee ndi akufunika. Kodi imwe musapibvambo tenepo? Ninji cinafuna kukuphedzani toera kukhala na cinyindiro cakuti Yahova asakufunani?
2 Cinthu cibodzi cakuti cinakuphedzani ndi kuleri Bhibhlya mbamuona kuti Yahova asafuna kuti anthu atsalakanwe tani. Yezu akhatsalakana anthu mwadidi na mwacilemedzo. Thangwi yakucita pyenepi, iye apangiza kuna ale akhaoneka ninga akukhonda kufunika kuti ndi akufunika kakamwe kuna Pai wace. (Juw. 5:19; Aheb. 1:3) Mu nsolo uno, tinapfundza pinthu piwiri: (1) Yezu aphedza tani anthu toera kuona kuti iwo ndi akufunika kakamwe kuna Yahova na (2) tinakhala tani na cinyindiro cakuti ife ndife akufunika kakamwe kuna Yahova.—Ajeu 2:7.
YEZU APHEDZA TANI ANTHU KUDZINDIKIRA KUTI NDI AKUFUNIKA KAKAMWE?
3. Yezu atsalakana tani anthu ku Galileya?
3 Mu ndzidzi ukhali Yezu ku Galileya m‘basa yakumwaza mphangwa, anthu azinji anfendezera toera kumbvesera na kuwangiswa mautenda awo. Yezu abvesesa kuti “iwo akhapwazwa na kutsalakanwa mwakuipa ninga mabira akusowa nkumbizi.” (Mat. 9:36; onani nota de estudo.) Atsogoleri a mauphemberi akhatsalakana anthu mwakuipa, akhaaona ninga anthu akukhonda kufunika, pontho akhaacemera ‘anthu akupaswa dzedze.’ (Juw. 7:47-49 onani nota de estudo) Yezu akhaatsalakana mwakukoma ntima, mwacilemedzo, pontho akhaapfundzisa na kuwangisa mautenda awo. (Mat. 9:35) Kusiyapo pyenepi, toera kuphedza anthu azinji, Yezu apfundzisa apostolo ace kumwaza mphangwa, pontho aapasa mphambvu toera ‘kuwangisa atenda.’—Mat. 10:5-8.
4. Tisapfundzanji na njira idatsalakana Yezu anthu akhaoniwa ninga akusowa basa?
4 Thangwi yakutsalakana anthu mwadidi na mwacilemedzo, Yezu apangiza kuti kuna iye na kuna Pai wace anthu anaoniwa ninga akusowa basa ndi akufunika kakamwe. Khala musatumikira Yahova, pontho musapenula khala ndimwe wakufunika, nyerezerani njira idatsalakana Yezu anthu akhaoneka ninga akusowa basa akuti akhafuna kupfundza thangwi ya iye. Kucita pyenepi kunakuphedzani kuona kuti ndimwe wakufunika kakamwe kuna Yahova.
5. Ninji pinadziwa ife thangwi ya nkazi adadziwa Yezu ku Galileya?
5 Yezu akhapfundzisa misoka ya anthu, pontho akhatsalakana m’bodzi na m’bodzi wa iwo. Mwacitsandzo, mu ndzidzi ukhamwaza iye mphangwa ku Galileya, iye adziwana na nkazi akhali na utenda wakubuluka ciropa mu pyaka 12. (Marko 5:25) Mwakubverana na Mwambo, thangwi ya utenda unoyu, iye akhali wakukhonda cena, pontho munthu akhafuna kunkhuya mbadakhalambo wakukhonda cena. Natenepa, iye nee akhafunika kukhuya anthu, pontho panango akhala ndzidzi uzinji ekhene. Kusiyapo pyenepi, iye nee akhafunika kulambira Yahova pabodzi na anango mu sinagoga ngakhale m’maphwando. (Lev. 15:19, 25) Mwakukhonda penula, nkazi unoyu akhabva kupha, pontho akhapibva ninga wakusowa basa.—Marko 5:26.
6. Nkazi acitanji toera kuwangiswa utenda wace?
6 Nkazi unoyu wakuti akhabuluka ciropa, akhafuna kuti Yezu amuwangise. Mbwenye iye nee aphemba toera kucitirwa pyenepi. Thangwi yanji? Panango akhali na manyadzo thangwi ya utenda wace. Nakuti iye akhali wakukhonda cena, pontho nee akhafunika kukhala pakati pa anthu anango, panango akhagopa kuthamangiswa na Yezu. Iye basi ene akhuya nguwo ya Yezu, mbakhala na cinyindiro cakuti angacita pyenepi anawanga. (Marko 5:27, 28) Iye akhali na cikhulupiro cakuwanga, na thangwi ineyi utenda wace wawanga. Buluka penepo, Yezu abvundza kuti mbani adakhuya nguwo yace; iye atawira pidacita iye. Mphapo Yezu acitanji?
7. Yezu atsalakana tani nkazi wakuti akhanentseka kakamwe? (Marko 5:34)
7 Yezu atsalakana nkazi unoyu mwakukoma ntima na mwacilemedzo. Iye aona nkazi unoyu ‘mbakatetemera thangwi ya kugopa.’ (Marko 5:33) Pidabvesesa Yezu mabvero a nkazi unoyu, iye akhala waufuni mbam’balangaza. Iye ancemera “mwananga;” fala ineyi isapangiza cilemedzo, citsalakano na ufuni. (Lerini Marko 5:34.) Thangwi ya fala ineyi, nota de estudo isalonga kuti: “Ndi ulendo unoyu basi udalembwa m’Bhibhlya wakuti Yezu acemera nkazi ‘mwananga.’ Yezu acita pyenepi thangwi panango aona kuti utenda wa nkazi unoyu ukhali wakupasa manyadzo, pontho amuona ‘mbakatetemera.’” Nyerezerani kuti nkazi apibva tani na njira idatsalakanwa iye na Yezu. Yezu mbadakhonda kukhala wakukoma ntima, nkazi unoyu mbadawanga, mbwenye panango mbadapitiriza kukhala wakutsukwala na wakupasika mulando. Yezu amuwangisa, pontho akhafuna kuti nkazi unoyu apibve kuti ndi wakufunika kakamwe kuna Babace wakudzulu.
8. Ndi nyatwa zipi zikhathimbana na mulongo Maria?
8 Atumiki a Mulungu lero, asanentsekambo thangwi ya mautenda akuti asaacitisa kutsukwala na kupibva ninga akusowa basa. Onani pidacitikira Maria,a mpainiya wa ndzidzi onsene wa ku Brasil. Iye nee abalwa na miyendo, nee djanja ya nkono wabzwere. Iye alonga: “Ine ndikhasingirirwa kuxikola, pontho ndikhatsalakanwa mwakuipa thangwi ya kulamala. Andzanga akhapfundza na ine akhapasa ambuyanga madzina akuipa. Pontho midzidzi inango abaleanga ene akhandinyoza.”
9. Ninji cidaphedza Maria toera kuona kuti iye ndi wakufunika kakamwe kuna Yahova?
9 Ninji pidaphedza Maria? Pidakhala iye Mboni wa Yahova, abale na alongo mu mpingo am’balangaza, pontho amphedza kuona kuti ndi wakufunika kakamwe kuna Yahova. Iye alonga: “Kadhernu wanga nee ali na matsamba akukwana toera kulemba madzina a abale na alongo onsene adandiphedza.” Ine ndisapereka takhuta kuna Yahova na ntima onsene thangwi yakundipasa abale na alongo aufuni.” Abale na alongo anewa aphedza Maria toera kuona kuti iye ndi wakufunika kakamwe kuna Mulungu.
10. Ndi pinentso pipi pikhatamba Mariya Madhalena, pontho ndi mabvero api akhali na iye? (Onanimbo mafoto.)
10 Onani kuti Yezu aphedza tani Mariya Madhalena. Iye akhali na madimonyo manomwe. (Luka 8:2) Madimonyo anewa akhancitisa kucita pinthu mwakusiyana na anango, na thangwi ineyi anthu akhan’thawa. Mu ndzidzi unoyu, Mariya Madhalena akhapibva kuti ali ekhene, wakusowa citsidzikizo, pontho wakusowa basa. Yezu abulusa madimonyo anewa, pontho Mariya Madhalena adzakhala ntowereri wace wakukhulupirika. Ndi munjira ipi pontho Yezu aphedza Mariya Madhalena kubvesesa kuti iye ndi wakufunika kakamwe kuna Mulungu?
Yezu aphedza tani Mariya Madhalena kupibva kuti akhali wakufunika kuna Yahova? (Onani ndima 10-11)
11. Yezu apangiza tani kuna Mariya Madhalena kuti ndi wakufunika kakamwe kuna Mulungu? (Onanimbo mafoto.)
11 Yezu aphembambo Mariya Madhalena toera amperekere m’maulendo ace a m’basa yakumwaza mphangwa.b Na thangwi ineyi, Mariya Madhalena apitiriza kukhala na mwai wakubva Yezu mbakapfundzisa anthu anango. Yezu aonekerambo kuna Mariya Madhalena pidalamuswa iye muli akufa; Mariya Madhalena akhali m’bodzi mwa anthu akutoma adalonga na iye ntsiku ineyi. Yezu am’phemba toera akapange apostolo kuti iye alamuswa muli akufa. Natenepa Yezu aphedza Mariya Madhalena, toera kuona kuti iye ndi wakufunika kakamwe kuna Yahova!—Juw. 20:11-18.
12. Ninji pidacitisa Lidia kunyerezera kuti nee athema kufuniwa?
12 Lero, ninga Mariya Madhalena, anthu azinji asakhalambo na mabvero mabodzi ene akupibva kuti nee ndi akufunika. Mulongo Lidia anakhala ku Espanya alonga kuti mai wace ampanga kuti mu ndzidzi ukhali iye na mimba yace, akhafuna kuitaya. Lidia alongambo kuti mu ndzidzi ukhali iye mwana, mai wace nee akhantsalakana, pontho akhalonga pinthu pyakuipa thangwi ya iye. Iye alonga: “Ine ndikhafuna kuti anthu anango apangize ufuni kuna ine. Ine ndikhagopa kukhonda funiwabve na anthu anango, thangwi mai wanga ndzidzi onsene akhandipanga kuti ndine munthu wakuipa.”
13. Ninji pidaphedza Lidia kuona kuti ndi wakufunika kakamwe kuna Yahova?
13 Pidatoma Lidia kupfundza Bhibhlya, pinthu pyadzacinja. Kucita phembero, kuleri Bhibhlya, pontho mafala na pinthu pikhacita abale na alongo pyamphedza kubvesesa kuti iye ndi wakufunika kakamwe kuna Yahova. Iye alonga: “Mamunanga ndzidzi onsene asandipanga kuti asandifuna. Iye asandipanga makhaliro anga adidi. Axamwali anga anango asacitambo pibodzi pyene.” Ninga Lidia, panango mu mpingo mwanu muli na munthu anafuna ciphedzo toera aone kuti ndi wakufunika kakamwe kuna Yahova. Alipo anadziwa imwe wakuti asafuna ntundu unoyu waciphedzo?
TINAONEKA TANI NINGA MUNATIONERA YAHOVA?
14. Bukhu ya 1 Samweli 16:7, isatiphedza tani kuoneka ninga munationera Yahova? (Onanimbo bokosi yakuti “Thangwi Yanji Yahova Asafuna Kakamwe Atumiki Ace?”)
14 Kumbukani kuti Yahova nee asationa ninga munationera anthu anango. (Lerini 1 Samweli 16:7.) Kuna anthu azinji, munthu wakufunika ndi ule adabalika, ali na kobiri peno adapfundza kakamwe. Mbwenye kuna Yahova ndi pyakusiyana. (Iza. 55:8, 9) Natenepa, wangisirani kuoneka ninga munakuonerani Yahova tayu anthu a dziko ino. Bhibhlya isalonga pya anthu akuti midzidzi inango akhaoneka ninga akusowa basa, ninga Eliya, Noemi na Yana. Mu ndzidzi unaleri imwe thangwi ya iwo, onani kuti Yahova akhapangiza tani kuti akhaafuna. Imwe munakwanisa kulemba n’kadhernu mwanu pinthu pidakucitikirani pidapangiza kuti Yahova asakufunani. Kusiyapo pyenepi, imwe munakwanisa kufufudza m’mabukhu mwathuc mphangwa zakuti zinakuphedzani kuona kuti ndimwe wakufunika kakamwe kuna Yahova.
15. Thangwi yanji Dhanyeli akhali “wakufunika kakamwe” kuna Yahova? (Dhan. 9:23)
15 Yahova asakufunani thangwi yakukhala kwanu wakukhulupirika. Ndzidzi unango, mprofeta Dhanyeli wakuti panango akhali na pyaka pyakupiringana 90, ‘akhali wakuneta kakamwe’ na wakutsukwala. (Dhan. 9:20, 21) Yahova amuwangisa tani? Yahova atuma anju Gabhriyeli toera kukumbusa Dhanyeli kuti iye ndi “wakufunika kakamwe,” pontho maphembero ace akhadabviwa. (Lerini Dhanyeli 9:23.) Ninji pidacitisa Dhanyeli kukhala wakufunika kakamwe kuna Mulungu? Ndi kufuna kwace kucita pinthu pyadidi na kukhulupirika. (Ezek. 14:14) Yahova alembesa pyenepi m’Bhibhlya toera kutibalangaza. (Aroma 15:4) Iye asabvambo maphembero anu, pontho asakufunani thangwi yakucita pinthu pyadidi na kukhala kwanu wakukhulupirika.—Mik. 6:8; Aheb. 6:10.
16. Ninji pinafuna kukuphedzani kuona Yahova ninga Baba waufuni?
16 Onani Yahova ninga Baba wakuti asakufunani. Iye asafuna kukuphedzani, tayu toera kusaka madodo anu. (Mas. 130:3; Mat. 7:11; Luka 12:6, 7) Kunyerezera pyenepi kusaphedza anthu azinji ananyerezera kuti nkhabe funiwa. Onani pidacitikira mulongo Michelle wa ku Espanya. Mamunace ancitisa kupibva ninga wakusowa basa mu pyaka pizinji. Iye alonga: “Ndzidzi onsene ukhapibva ine kuti ndine wakusowa basa, ndikhanyerezera Yahova mbakandikhumbatira, pontho mbanditsalakana mwaufuni na mwacitsidzikizo.” (Mas. 28:9) Mulongo unango anacemerwa Lauren, anakhala ku Africa do Sul, ndzidzi onsene asakumbuka: “Khala Yahova andikwewera kuna iye mwaufuni mbandicitisa kukhala dhuzi na iye na kundiphatisira toera kupfundzisa anango, pyenepi pisapangiza kuti ndine wakufunika kakamwe kuna iye.”—Oze. 11:4.
17. Munakhala tani na cinyindiro cakuti ndimwe wakutawirika kuna Yahova? (Mas. 5:12) (Onanimbo foto.)
17 Khalani na cinyindiro cakuti imwe ndimwe wakutawirika kuna Yahova. (Lerini Masalmo 5:12.) Dhavidhi alandanisa kukhala wakutawirika kuna Yahova na “Xango ikulu” yakuti isatsidzikiza anthu akulungama. Kudziwa kuti ndimwe wakutawirika kuna Yahova, pontho kuti iye anakuphedzani, pinakwanisa kukhala ninga xango yakuti inakutsidzikizani mu ndzidzi unakhala imwe na mabvero akuipa thangwi ya imwe ene. Mphapo munadziwa tani kuti ndimwe wakutawirika kuna Yahova? Ninga taona, ife tinakwanisa kukhala na cinyindiro ceneci mu ndzidzi unaleri ife Bhibhlya. Thangwi Yahova asaphatisira Bhibhlya toera kutipanga pinanyerezera iye thangwi ya ife. Kusiyapo pyenepi, Yahova asaphatisira akulu a mpingo, axamwali athu a pa ntima na anthu anango toera kutikumbusa kuti ndife akufunika kakamwe kuna iye. Mphapo munacitanji anthu angakusimbani?
Kukumbuka kuti ndife akutawirika kuna Yahova kunatiphedza kukunda mabvero akuphonyeka (Onani ndima 17)
18. Thangwi yanji musafunika kutawira mungasimbwa na anango?
18 Tawirani mungasimbwa na anthu anakufunani, pontho na ale anakudziwani. Kumbukani kuti Yahova anakwanisa kuphatisira anthu anewa toera kukuphedzani kubvesesa kuti ndimwe wakutawirika kuna iye. Michelle adalongwa pa ndima 13 alonga: “Mwapang’ono na pang’ono ndiri kukwanisa kutawira anthu anango angandisimba. Kucita pyenepi ndi kwakunentsa kuna ine, mbwenye ndisadziwa kuti Yahova asafuna kuti ndicite pyenepi.” Mwaufuni, akulu a mpingo aphedza Michelle toera kuona kuti asafuniwa kakamwe na Yahova. Cincino iye ali kutumikira ninga mpainiya, pontho ali kuphedzera mabasa a ku Bheteli na panyumba.
19. Thangwi yanji munakwanisa kukhala na cinyindiro cakuti ndimwe wakufunika kakamwe kuna Mulungu?
19 Yezu asatikumbusa mwaufuni kuti ife ndife akufunika kakamwe kuna Babathu wakudzulu. (Luka 12:24) Tinakwanisa kukhala na cinyindiro cakuti ndife akufunika kakamwe kuna Yahova. Na thangwi ineyi, lekani kuduwala pyenepi, pontho musafunika kucita pyonsene pinakwanisa imwe toera kuphedzambo anango kupibva kuti Mulungu asaafuna.
NYIMBO 139 Nyerezerani Kuti Muli mu Dziko Ipswa
a Madzina anango acinjwa.
b Pyenepi pisapangiza kuti Mariya Madhalena akhacita khundu ya nsoka wa akazi akhafamba pabodzi na Yezu. Akazi anewa akhaphatisira kobiri yawo toera kutsalakana Yezu na apostolo ace.—Mat. 27:55, 56; Luka 8:1-3.
c Mwacitsandzo, imwe munakwanisa kuleri nsolo 24 wa bukhu yakuti Achegue-se a Jeová na malemba anagumanika m’bukhu yakuti Malemba Toera Kuaphatisira mu Umaso Wathu Wacikristu pa nsolo wakuti “Kupenula.”