Towezerani Kucepeseka Kwa Yahova

1. Thangwi yanji kucepeseka kwa Yahova ndi kwakudzumatirisa kakamwe?

TINGAONA pinacita mautongi, tinakwanisa kudzindikira kuti iwo nee ndi akucepeseka. Mbwenye Yahova wakuti ndi wamphambvu zonsene ndi wakucepeseka. (Mas. 113:5-8) Kucepeseka ndi ubodzi mwa makhaliro ace. Nkhabepo munthu wakucepeseka kakamwe ninga Yahova. Mu nsolo uno, tinapfundza pinthu pinai pinacita Yahova pinapangiza kuti iye ndi wakucepeseka. Tinapfundzambo kuti Yezu atowezera tani kucepeseka kwa Pai wace. Kupfundza pyenepi, kunatiphedza toera kukhala na uxamwali wakuwanga na Yahova na kukhala akucepeseka ninga iye.

YAHOVA NDI WAKUDZOLOWEREKA

2. Lemba ya Masalmo 62:8 isatipfundzisanji thangwi ya Yahova? (Onanimbo foto.)

² Kazinji kene, munthu wakudzikuza nee ndi wakudzolowereka. Munthu wakudzikuza asaoneka kukhala waudziwisi kakamwe kupiringana anango, pontho kazinji kene asacita pinthu munjira yakuti inatsukwalisa anango. Na thangwi ineyi, anthu asatoma kunyerezera mwadidi mbadzati kulonga naye peno asancalira. Mbwenye Yahova ndi wakusiyana kakamwe na munthu unoyu. Thangwi yakukhala kwace wakucepeseka, iye asatiphemba kuti tinfendedzere toera timpange mabvero athu na nyatwa zinatamba ife. (Lerini Masalmo 62:8.) Ninga baba waufuni wakuti ndzidzi onsene ali dzololo toera kubvesera nyatwa zinatamba anace, Yahova asafunambo kakamwe kubvesera maphembero a atumiki ace. Iye acitisa kuti anango mwa maphembero anewa, alembwe m’Bhibhlya. Pyenepi pisapangiza kuti Yahova ndi wakudzolowereka, pontho asafuna kutibvesera. (Yos. 10:12-14; 1 Sam. 1:10-18) Mbwenye ndiye tani khala midzidzi inango tisanyerezera kuti nee tathema kucita phembero kuna Yahova thangwi ya madodo mazinji adacita ife nduli?

3. Munakhala tani na cinyindiro cakuti Yahova asafuna kuti ndzidzi onsene mucite phembero?

³ Ife tinakwanisa kucita phembero maseze tinyerezere kuti nee tathema kufuniwa na Yahova. Thangwi yanji tisalonga tenepo? Mu nsangani wa Yezu wa mwana wakutayika, Yezu alandanisa Yahova na baba waufuni wakuti akhali na mwana akhapibva kuti nee athema kutambirwa pontho na anyakubalace. Baba acitanji pidaona iye mwanace wakutcunyuka mbabwerera panyumba? Yezu alonga kuti baba pidaona iye mwanace nakutali, “an’thamangira, an’khumbatira mbampswompswona.” (Luka 15:17-20) Yahova ndi ninga baba unoyu. Iye angabva maphembero a atumiki ace akuti ali akutsukwala thangwi ya mabvero akupasika mulando, thangwi yakucepeseka, iye asaabvesera. (Ciliro 3:19, 20) Thangwi yakutibvera ntsisi, Yahova asatithamangira toera kutibalangaza na kutipasa cinyindiro cakuti iye asatifuna, pontho asatibvera ntsisi. (Iza. 57:15) Yahova ‘asatithamangira’ tani lero? Iye asaphatisira akulu a mpingo, acibale athu na axamwali athu akuti ali mu undimomwene. (Tiya. 5:14, 15) Yahova asacita pyenepi thangwi asafuna kuti tikhale dhuzi na iye.

4. Yezu apangiza tani kuti akhali wakudzolowereka?

⁴ Yezu asatowezera tani Pai wace? Yezu ndi wakucepeseka ninga Pai wace. Na thangwi ineyi, anthu nee akhagopa kunfendedzera dhuzi, pontho nee akhagopa kuncita mibvundzo. (Marko 4:10, 11) Pikhaphemba Yezu maonero awo, iwo akhalonga pikhanyerezera iwo. (Mat. 16:13-16) Pikhacita iwo madodo, nee akhagopa kuti Yezu anaipirwa; iwo akhadziwa kuti Yezu ndi wadidi, wakupirira na wantsisi. (Mat. 17:24-27) Thangwi yakutowezera mwadidi Pai wace, Yezu acitisa kuti anyakupfundzace adziwe mwadidi makhaliro a Yahova. (Juw. 14:9) Iwo akhaona kuti Yahova akhali wakucepeseka, wakudzolowereka na wakusiyana kakamwe na atsogoleri a mauphemberi a ndzidzi unoyu akuti akhali akudzikuza, aukali na akukhonda dzolowereka.

5. Kucepeseka kusatiphedza tani toera kukhala akudzolowereka?

⁵ Tinatowezera tani Yahova? Tingakhala akucepeseka, ife tinakhala akudzolowereka. Kucepeseka kunatiphedza toera tikhonde kukhala na makhaliro akuti anacitisa anthu kukhala kutali na ife. Makhaliro anewa ndi bibvu, kudzikuza peno kukoya kuipirwa muntima. Kucepeseka kunatiphedza kukhala akukoma ntima, akupirira na akulekerera. Anewa ndi makhaliro anafuna kucitisa anthu kukhala dhuzi na ife. (Akol. 3:12-14) Ndi pyakufunika kakamwe kuti akulu a mpingo akhale akudzolowereka. Mbwenye toera iwo akulise n’khaliro unoyu, asafunika kumala ndzidzi uzinji mbakacedza na abale na alongo. Natenepa, akulu a mpingo asafunika kuwangisira toera kugumanika pa misonkhano ku Nyumba ya Umambo, m’mbuto mwakuphatisira vidhyukonferensya mwakusowa mathangwi. Iwo asawangisira toera kumwaza mphangwa nyumba na nyumba pabodzi na abale na alongo. Akulu a mpingo angakhala akudzolowereka, abale na alongo asakhala akusudzuka toera kucedza nawo.

YAHOVA NDI WAKULINGANIRA

6-7. Longani pinthu pinapangiza kuti Yahova ndi wakulinganira, pontho ali dzololo toera kucinja maonero ace.

⁶ Anthu akudzikuza asanyerezera kuti asadziwa pyonsene, pontho nee asafuna kucinja maonero awo. Yahova nee ali tenepo, maseze iye asadziwa pinthu pyonsene. Thangwi yakukhala wakucepeseka, iye ndi wakulinganira, pontho asakhala dzololo toera kubva maonero a anango. Onani pidacita iye na Miriamu, m’bale wace Mose. Miriamu na Aroni akhalonga mwakuipa Mose, wakuti akhaimirira Yahova. Mwandimomwene Miriamu akhapangiza kusowa cilemedzo kuna Yahova. Na thangwi ineyi, Yahova aipirwa na Miriamu mbancitisa kukhala na matanya. Buluka penepo, Aroni aphemba Mose toera aphedze Miriamu. Mose aphemba kuti Yahova amuwangise. Yahova acitanji? Mbadakhala munthu wakudzikuza nee mbadabvesera pyenepi mbacinja maonero ace. Yahova nee acita pyenepi. Nakuti ndi wakucepeseka, iye akhala wakulinganira mbawangisa Miriamu.—Num. 12:1-15.

⁷ Yahova apangizambo kucepeseka munjira idatsalakana iye mambo Ezekiya. Yahova aphatisira mprofeta Izaiya mbapanga mambo kuti mbadafa. Natenepa Ezekiya alira mbaphemba toera akhonde kufa. Yahova abva phembo yace mban’thimizira pyaka 15 pya umaso. (2 Ama. 20:1, 5, 6) Yahova ndi wantsisi kuna anthu, pontho thangwi yakucepeseka, iye ali dzololo toera kuabvesera.

8. Ndi pinthu pipi pinapangiza kuti Yezu ndi wakulinganira? (Marko 3:1-6)

⁸ Yezu asatowezera tani Pai wace? Pikhali Yezu pa dziko yapantsi, ndzidzi onsene iye akhawangisira kucitira anango pyadidi. Mwacitsandzo, Yezu akhawangisa anthu ntsiku ya Sabudu, maseze atsogoleri a mauphemberi akhaona pyenepi ninga pyakukhonda thema. (Lerini Marko 3:1-6.) Lero, Yezu wakuti ndi nsolo wa mpingo ali kupitiriza kukhala wakulinganira. Mwacitsandzo, munthu angacita madawo makulu mu mpingo, Yezu asapirira munthu unoyu mbampasa mwai toera acinje makhaliro ace.—Apok. 2:2-5.

9. Tinakwanisa tani kunyerezera na kucita pinthu munjira yakulinganira? (Onanimbo mafoto.)

⁹ Tinatowezera tani Yahova? Ninga Yahova, tisafunika kukhala akucepeseka mbatiwangisira toera kukhala akulinganira munjira yakunyerezera na yakucita pinthu. (Tiya. 3:17) Anyakubala anatowezera Yahova, nee asadikhira kuti anawo acite pinthu pyakuti nee anakwanisa kupicita. Mwakubverana na pinalonga Genesi 33:12-14, Yakobe atowezera Yahova. Kusiyapo pyenepi, anyakubala akuti ndi akucepeseka na akulinganira, nee asalandanisa mwana m’bodzi na unango. Akulu a mpingo asafunikambo kukhala akulinganira. Mwacitsandzo, nkulu wa mpingo nee anakakamira maonero ace, mbwenye anaphedzera maonero a akulu a mpingo azinji khala ali kubverana na pinalonga Bhibhlya. (1 Tim. 3:2, 3) Ife tonsene tisafunikambo kuwangisira toera kubvesesa maonero a anango, ngakhale tikhale na maonero akusiyana. (Aroma 14:1) Undimomwene ndi wakuti tonsene mu mpingo tisafunika kuwangisira toera ‘anthu onsene adziwe kuti ndife akulinganira.’—Afil. 4:5.

YAHOVA NDI WAKUPIRIRA

10. Yahova apangiza tani kupirira?

¹⁰ Imwe panango mwadzindikira kuti anthu akudzikuza nee asakomerwa kudikhira. Kudzikuza kusaacitisa kukhonda kukhala akupirira. Mbwenye Yahova ndi wakusiyana na anthu anewa. Iye ndi wakupirira kupiringana anthu onsene. Mwacitsandzo, mu ntsiku za Nowa, Yahova alonga kuti mbadadikhira pyaka 120 toera kufudza anthu akuipa. (Gen. 6:3) Natenepa, Nowa akhala na mwai wakukuza anace, pontho na ciphedzo ca banja yace amanga arka. Pa ulendo unango, Yahova abvesera mwakupirira mu ndzidzi ukhacita Abhrahamu mibvundzo thangwi yakufudzwa kwa Sodhoma na Gomora. Munthu wakudzikuza, panango mbadalonga: ‘Ndiwe ani toera kundicita mibvundzo ineyi?’ Mbwenye thangwi yakukhala wakucepeseka, Yahova abvesera Abhrahamu mwakupirira.—Gen. 18:20-33.

11. Mwakubverana na 2 Pedhru 3:9, Yahova ali kupangiza tani kupirira lero?

¹¹ Lero, Yahova asapitiriza kukhala wakucepeseka na wakupirira. Iye ali kudikhira mwakupirira ntsiku idakhazikisa iye toera kusasanyira pinthu. Mphapo thangwi yanji iye ndi wakupirira? “Thangwi iye nkhabe funa kuti munthu afudzwe, mbwenye asafuna kuti anthu onsene atcunyuke.” (Lerini 2 Pedhru 3:9.) Kodi kupirira kwa Yahova kusaphedza? Inde. Thangwi anthu azinji a mitima yadidi ali kupfundza thangwi ya iye, pontho ali kukhala axamwali ace. Ife tisadikhira kuti anthu azinji acitembo pibodzi pyene. Mbwenye kupirira kwa Yahova kuli na madire. Yahova asafuna anthu, na thangwi ineyi, iye nee anasiya pinthu pyakuipa kupitiriza kwenda na kwenda.—Abha. 2:3.

12. Yezu ali kutowezera tani kupirira kwa Yahova?

¹² Yezu asatowezera tani Pai wace? Kutomera kale kakamwe, Yezu ali kutowezera kupirira kwa Pai wace. Kutomera kale, Yezu asaona Sathani mbakapambizira Yahova na atumiki ace akukhulupirika mpaka lero. (Gen. 3:4, 5; Yobe 1:11; Apok. 12:10) Yezu asaonambo anthu azinji mbakathabuka pano pa dziko yapantsi. Dziwani kuti Yezu asafuna kakamwe “kufudza mabasa a Dyabo.” (1 Juw. 3:8) Ninji cinaphedza Yezu kudikhira mwakupirira kutawiriswa na Yahova toera kufudza mabasa a Dyabo? Cinthu cibodzi mwa pinthu pinamphedza ndi kucepeseka. Thangwi yakucepeseka, Yezu asasiya pyonsene m’manja mwa Yahova, thangwi asadziwa kuti ndi Yahova basi adathema kusankhula ndzidzi wakucita pyenepi.—Mabasa 1:7.

13. Yezu apangiza tani kupirira kuna apostolo ace, pontho thangwi yanji acita pyenepi?

¹³ Pikhali Yezu pa dziko yapantsi, iye apangizambo kupirira kuna apostolo. Mwacitsandzo, mu ndzidzi ukhaketesana iwo kuti mbani nkulu, Yezu nee aipirwa, pontho nee aluza cidikhiro. M’mbuto mwace, iye apitiriza kukhala wakupirira. (Luka 9:46; 22:24-27) Yezu akhali na cinyindiro cakuti mukupita kwa ndzidzi, apostolo ace mbadacinja. Kodi imwe mwacita kale madodo mabodzi ene mwakubwereza-bwereza? Khala ndi tenepo, imwe musapereka takhuta thangwi yakukhala na mambo wakucepeseka na wakupirira.

14. Ninji cinafuna kutiphedza toera kukhala akupirira?

¹⁴ Tinatowezera tani Yahova? Toera kunyerezera na kucita pinthu ninga Yahova, tisafunika kukhala “na manyerezero a Kristu.” (1 Akor. 2:16) Tinabvesesa tani mwadidi manyerezero a Kristu? Ndi pyakukhonda nentsa. Ife tisafunika kuleri bukhu ya Mateu, Marko Luka na Juwau. Buluka penepo, tisafunika kukhala na ndzidzi wakunyerezera pidaleri ife m’mabukhu anewa mbationa kuti ndi api manyerezero a Yezu. Pontho tisafunika kuphemba Yahova toera atiphedze kutowezera kucepeseka, kupirira na njira yakunyerezera ya Yezu. Tingapfundza mwadidi mbatikhala na manyerezero ninga a Kristu, ife tinatowezera mwadidi kakamwe Yahova mbatikhala akupirira kuna anango na ife ene.—Mat. 18:26-30, 35.

YAHOVA ASAPASA NKHOMBO ANTHU AKUCEPESEKA

15. Longani pinthu pinapangiza kuti Yahova asapasa nkhombo anthu akucepeseka. (Masalmo 138:6)

¹⁵ Lerini Masalmo 138:6. Nyerezerani basi. Yahova, wankulu kakamwe kudzulu na dziko yapantsi, asapasa nkhombo anthu akucepeseka na akupwazika. Yahova aona anthu azinji akuti nee akhatsalakanwa mwadidi na anthu anango. Anango a iwo ife nee tisaadziwa mwadidi, mbwenye Yahova acitisa kuti alembwe m’Bhibhlya. Mwacitsandzo, Yahova atsogolera Mose toera kulemba dzina ya nkazi unango anacemerwa Dhebhora. Iye atumikira mwakukhulupirika banja ya Izaki na Yakobe mu pyaka 125. Ife nee tisadziwa pizinji thangwi ya nkazi unoyu wakukhulupirika. Mbwenye Yahova atsogolera Mose toera kulemba m’Bhibhlya kuti Dhebhora akhali munthu wakufunika kakamwe. (Gen. 24:59; 35:8) Mukupita pyaka pizinji, Yahova asankhula Dhavidhi wakuti akhali m’phale, pontho akhali nkumbizi toera kukhala mambo wa Izraeli. (2 Sam. 22:1, 36) Pidapita ndzidzi ungasi pakumala kubalwa kwa Yezu, Mulungu atuma aanju kuna nsoka wa akumbizi akucepeseka mbaadziwisa kuti Mesiya akhadabalwa ku Bhetelehemu. Unoyu ukhali mwai ukulu kakamwe kuna iwo, thangwi iwo akhali akutoma kudziwa mphangwa zenezi. (Luka 2:8-11) Zuze na Maria pidakwata iwo Yezu mbaenda naye ku templo, Yahova apasa mwai Simeoni na Yana, akuti akhali ankhalamba, toera kuona Yezu. (Luka 2:25-30, 36-38) Ndi pyakutsandzayisa kudziwa kuti “maseze Yahova ali kudzulu, iye asaona munthu wakucepeseka.”

16. Yezu asatsalakana tani anthu ninga pai wace?

¹⁶ Yezu asatowezera tani Pai wace? Ninga Babace, Yezu akhafuna anthu akuti akhapwazwa na anango. Iye apfundzisa undimomwene thangwi ya Umambo wa Mulungu kuna ale akuti “akhali anthu ene pyawo akuti nee apfundza kakamwe.” (Mabasa 4:13; Mat. 11:25) Iye awangisa atenda, pontho aacitisa kupibva kuti asafuniwa na asalemedzwa. (Luka 5:13) Mbadzati kufa, Yezu atsuka miyendo ya apostolo ace. Basa ineyi ikhacitwa na anyabasa a panyumba. (Juw. 13:5) Mbadzati kuenda kudzulu, Yezu apasa atowereri ace onsene, kuphatanizambo ife lero, basa yakufunika kakamwe yakupfundzisa anthu undimomwene toera adzakhale na umaso wa kwenda na kwenda.—Mat. 28:19, 20.

17. Tinalemedza tani anthu onsene? (Onanimbo foto.)

¹⁷ Tinatowezera tani Yahova? Ife tisalemedza anango tingamwaza mphangwa kuna anthu onsene, mwakukhonda tsalakana kunakhala iwo, ntundu wawo, peno khala apfundza peno nkhabe. Pontho tisalemedza abale na alongo athu tingaaona ninga akulu kupiringana ife, ngakhale tikhale na maluso peno miyai yakuti iwo nee ali nayo. (Afil. 2:3) Yahova asatsandzaya kakamwe tingakhala akucepeseka ‘mbatikhala akutoma’ pakulemedzana unango na ndzace munjira ineyi na munjira zinango.—Aroma 12:10; Sof. 3:12.

18. Thangwi yanji musafunika kutowezera kucepeseka kwa Yahova?

¹⁸ Tingacita pyonsene pinakwanisa ife toera kutowezera kucepeseka kwa Babathu waufuni, ife tisakhala akudzolowereka, akulinganira na akupirira kakamwe. Kusiyapo pyenepi, tisafuna na kulemedza anango ninga pinacita Yahova. Pontho lekani duwala kuti tingawangisira toera kutowezera kucepeseka kwa Yahova, tinakhala akufunika kakamwe kuna iye.—Iza. 43:4.