Pfunziro 5

Axamwali A mulungu Anadzakhala Maso m’Paradizu

Paradizu nkhabe dzakhala tayu ninga dziko inakhalefe cincino. Cipo na cipo Mulungu afuna kuti dziko yapantsi ikhale yakudzala na pyakunentsa, kutsukwala, kubva kupha na nyatwa. N’tsogolo, Mulungu anadzasanduza dziko yapantsi kukhala paradizu. Kodi Paradizu ineyi inadzakhala tani? Mbationeni pinalonga Bibilya.

Anthu adidi. Paradizu inadzakhala nyumba ya axamwali a Mulungu. Iwo anadzacita pinthu pyadidi kuna unango na nzace. Anadzakhala maso mwakubverana na makhaliro akulungama a Mulungu.—Misangani 2:21.

Kuinjipa kwa pyakudya. M’Paradizu, nkhabe dzakhala njala tayu. Bibilya isati: “Munadzakhala mbeu yakuinjipa [peno: cakudya] m’dziko yapantsi.”—Masalmo 72:16.

Nyumba zadidi na basa yakukomeresa. M’dziko yapantsi ya paradizu, banja ibodzi na ibodzi inadzakhala na nyumba yace ene. Onsene anadzacita basa yakuwapasa kutsanzairwa kwa ndimomwene.—Izaiya 65:21-23.

Ntendere m’dziko yonsene. Anthu nkhabe dzamenyanabve tayu peno kufa ku nkhondo. Mafala a Mulungu asati: “[Mulungu] anadzamalisa nkhondo.”—Masalmo 46:8, 9.

Ungumi wadidi. Bibilya isapikira: “Nee nyakukhala mbodzi [wa m’Paradizu] adzati: ‘Ndiri kuduwala.’” (Izaiya 33:24) Pina nkhabe dzakhalapobve tayu anthu akulamala, maboliboli, madrodro, peno mabewewe.—Izaiya 35:5, 6.

Kubva kupha, kutsukwala na kufa kunadzamala. Mafala a Mulungu asati: “Nkhabe dzakhalapobve kufa, peno kulira, peno kubululira, peno kubva kupha tayu. Pinthu pyakutoma pyamala.”—Apokalipse 21:4.

Anthu akuipa anadzasoa. Yahova asapikira: “Akuipa anadzafudzwa m’dziko yapantsi; akusandukira anzawo, anadzadulwamo.”—Misangani 2:22.

Anthu anadzafunana na kulemedzana. Nkhabe dzakhalapobve kusoa kulungama, kuponderezana, umbirimi na kuidana. Anthu anadzakhala akugumanyana na kudzakhala maso mwakubverana na makhaliro akulungama a Mulungu.—Izaiya 26:9.