Dziko Yapantsi Inadzakhala Paraizu

Anthu a mitundu yakusiyana-siyana akudya pabodzi m’Paraizu

Yahova anadzamalisa nyatwa zidatomesa Sathani. Yahova aikha Yezu ninga Mambo pa dziko yonsene yapantsi. Mu utongi wace, dziko yapantsi inadzakhala paraizu.—Danyele 7:13, 14; Luka 23:43.

Yahova asapikira pinthu ipi:

PANADZAKHALA NA PYAKUDYA PYAKUNJIPA: ‘Mataka ene anadzapereka pyakumera; Mulungu, Mulungu wathu, anadzatipasa nkhombo.’ ‘Munadzakhala mbeu yakunjipa mu dziko yapantsi; Padzulu pa mapiri panadzakhala na pyakudya pizinji.’—Masalmo 67:6; 72:16.
NKHABE KUDZAONEKABVE NKHONDO: ‘Bwerani kudzaona mabasa a Yahova, pyakudzumisa pidacita iye pa dziko yapantsi. Ndiye anamalisa nkhondo pa dziko yonsene yapantsi.’—Masalmo 46:8, 9.
ANTHU AKUIPA NEE ANADZAONEKABVE: ‘Anyakudawa anadzaphiwa. Thimize pang’ono anyakuipa nee anadzaonekabve; ungasaka kunakhala iwo, nee unadzaaonabve.’—Masalmo 37:9, 10.
UTENDA, KUTSUKWALA NA KUFA, PINADZAMALA: ‘Pa ndzidzi unoyu maboliboli anadzaona pontho, madhrodho anadzabva na makutu awo. Anyampfutete anadzafamba mbanumpha ninga mbawala, mabewewe anadzakhuwa na kusekera.’—Izaiya 35:5, 6.

“Pontho iye ene Mulungu anadzakhala pabodzi na iwo. Iye anadzapukuta misozi yonsene m’maso mwawo, pontho nkhabe kudzaonekabve kufa, nee kutsukwala, nee kulira, nee kubva kupha. Thangwi pyakale pyamala.”—Apokalipse 21:3, 4.

Mwakusiyana na Sathani pabodzi na madimonyo ace, Yahova nkhabe longa uthambi. Pyonsene pinapikira iye pisakwanirisika. (Luka 1:36, 37) Yahova asakufunani, pontho iye asafuna kuti imwe mudzakhale m’Paraizu inafuna kucita iye. Natenepa sakani Mboni za Yahova toera mupfundze pizinji thangwi ya undimomwene unagumanika m’Mafala a Mulungu. Mungaphatisira undimomwene wa m’Bhibhlya nee munanyengezwa, nee munadzagopa madimonyo, pontho munadzadziwa pizinji. Ntsogolo, imwe munadzasudzulwa mu ubitcu wa madawo na kufa. Ninga mudalonga Yezu: “Imwe munadzadziwa undimomwene, pontho undimomwene unadzakusudzulani.”—Juwau 8:31, 32.