Muli Wakukhunganyika ku Ukondzi wa Mwandzidzidzi?
Ukondzi wa mwandzidzidzi unakwanisa kufuniwa mwakucimbiza pontho mwakukhonda dikhira. (Tgo. 4:14) Natenepa, munthu wandzeru anakhunganyika mwanyapantsi kakamwe. (Mis. 22:3) Kodi mwasankhula kale ntundu wa ukondzi na kulemba pinthu pinafuna imwe kuti picitwe? Toera kukuphedzani, yabuluswa vidyu yakuti Tratamentos Alternativos à Transfusão—Atendendo às Necessidades e aos Direitos do Paciente, khundu yaciwiri ya DVD ya nsolo wakuti Alternativas à Transfusão—Série de Documentários. Munaona imwe vidyu ineyi, yeserani kutawira mibvundzo inatowerera. Nakuti vidyu ineyi iri na pipangizo pyacigwagwa pya operasau, anyakubala asafunika kuphatisira ndzeru pakuona vidyu ineyi na ana ang’ono.
(1) Thangwi yanji akondzi anango asadinga pontho pya ukondzi wakuikha ciropa? (2) Longani pitsandzo pitatu pya maoperasau akunentsa adacitwa nee kuikha ciropa. (3) Thangwi yanji akondzi na madotoro azinji pa dziko yonsene yapantsi asapangiza cifuno cawo ca kukondza anyakuduwala mbakhonda kuikha ciropa? (4) Kupfundza kudacitwa cincino na nyumba za ungumi kwapangizanji thangwi ya kuphatisira ciropa? (5) Ndi zipi ngozwi za kuikha ciropa pa ukondzi? (6) Kodi akondzi azinji a luso afika pa kudzindikiranji mu kulonga pya maphindu a ukondzi wakukhonda kuikha ciropa? (7) Ninji pinacitisa kusowa ciropa m’manungo, pontho ninji cinafunika kucitwa toera kuphedza munthu wakuti ali na utenda wakusowa ciropa m’manungo? (8) Kodi selula yakufwira inacitiswa tani kuti ithimizirike m’manungo a ntenda? (9) Ninji pinacitwa toera ciropa cikhonde tayika maka mu ndzidzi wakucitwa operasau? (10) Kodi ukondzi wakukhonda kuikha ciropa ungakwanise kuphata basa kwa anapiana peno pa ukondzi wa mwandzidzidzi wakuti usaikha umaso pangozwi? (11) Ndi upi ubodzi mwa midida ya makhaliro adidi wakuti ndi wakufunika kakamwe toera kucitisa kuti ukondzi ukhale wadidi?
Nakuti kutawira ukondzi unango udapangizwa mu vidyu ndi cisankhulo ca munthu paekha mwakubverana na cikumbuntima, lekani kudikhira mpaka pa kuthimbana na ukondzi wa mwandzidzidzi toera kudinga pinthu pinafuna imwe peno pinakhonda imwe funa kuti pidzacitwe. Nsolo 7 wa bukhu “Mu ufuni wa Mulungu” na n’thimiziro wa Utumiki Wathu Wa Umambo wa nthanda ya Bingu ya 2006 unadzakuphedzani kucita cisankhulo canu mwakubverana na pinapfundza imwe. Buluka penepo khala mwabatizwa, pangizani pisankhulo pyanu pa phaso ya Diretrizes Antecipadas Relativas a Tratamentos de Saúde e Outorga de Procuração (DPA), pontho khalani na phaso yanu ndzidzi onsene.
[Ntsonga ikulu pa tsamba 3]
Kodi mwasankhula kale ntundu wa ukondzi na kulemba pinthu pinafuna imwe kuti picitwe?