Aphale Na Atsikana—Phindulani Na Mwai Wakukhala Pa Xikola

¹ Kodi musabva tani kuenda pontho ku xikola pakumala nzidzi wa kupuma wa kumala kwa caka? Kodi musafunisisa kuphindula na caka cipswa ca xikola? Kodi munadzaphatisira miyai inakupasani xikola towera kugawana undimomwene na apfunzisi pabodzi na anzanu anapfunza na imwe? Tisanyindira kuti imwe musafuna kucita pinakwanisa imwe ku xikola.

² Khalani Nyakupfunza Wadidi: Mungakhala akukhunganyika mwadidi na akuteya makutu munapfunza imwe m’sala, munadzaphindula kakamwe. Khalani waphinga m’kucita basa yakucitira kunyumba, mbwenye lekani kutawirisa kuti basa yanu ya xikola idzudzumise mabasa a Mulungu.

³ Tomani caka cipswa ca xikola m’kuleri bruxura As Testemunhas de Jeová e a Educação. Mungamala, imwe peno anyakubala anu asafunika kupasa bruxura ineyi apfunzisi anu onsene. Adziwiseni kuti mabvunzo onsene anafuna kudzakhala na iwo anadzatawirwa. Pyenepi pinadzaaphedza kudziwa mwadidi midida na pikhulupiro pyanu na kubverana na imwe pakuphatisira pidapfunza imwe. Pyenepi pinadzacitisambo apfunzisi anu kukhala na cibaso cakuti imwe pabodzi na anyakubala anu musafuna kubverana na iwo munakuphedzani iwo kukhala na mapfunziro akufunika kakamwe.

⁴ Khalani Mboni Yadidi: Thangwi yanji nkhabe ona xikola ninga cisa canu ca kupereka umboni wantsusukano? Nkati mwa caka cino ca xikola, munakhala na miyai yakupambulika ya kupereka umboni. Imwe muna cidziwiso cakudzumatirisa cauzimu cakuti mungacigawira anango, ‘munadzapulumusika mwekha, na munadzapulumusambo ale anakubverani.’ (1 Tim. 4:16) M’kukoya nkhaliro Wacikristu wa citsanzo cadidi na kupereka umboni m’nzidzi onsene wakuthema, munadzaphindula na munadzaphindulisambo anango.

⁵ Mbale unango wamphale apereka umboni mwantsusukano kwa anyakupfunza anzace ku xikola. Pakati pa ale adatawira pakhali Nkatolika na okhonda kukhalapo kwa Mulungu wakuti akhaseka ale anakhulupira Mulungu, pabodzi na mphale wakuti akhali dzimwera na wakufumali fodya kakamwe. Kwa onsene, mbale unoyu wamphale akwanisa kuphedza anzace akukwana 15 kufika pa m’kuperekeka na kubatizwa!

⁶ Natepa aphale na atsikana, perekekani kuti mupfunze na mupereke umboni ku cisa canu cakupambulika. Mukacita tenepa munadzaphindula kakamwe na kuenda kwanu ku xikola.