‘Mafala Awa . . . Akoyeni Muntima Mwanu’
Anyakubala ndi ninga akumbizi. Iwo asafunika kuonera mwadidi anawo, akuti anakwanisa kutayika na kuphatwa mwakucimbiza na pikala. (Mis. 27:23) Kodi anyakubala anacita tani basa ineyi? Iwo asafunika kupambula ndzidzi wakucedza na anawo ntsiku zonsene toera adziwe piri m’manyerezero na m’mitima yawo. (Mis. 20:5) Pontho, anyakubala asafunika kuumba anawo na pinthu pyakukhonda kupya na moto toera akhale na cikhulupiro cakuwanga. (1Akor. 3:10-15) Vidyu ‘Estas Palavras Têm de Estar sobre o Seu Coração,’ isagomezera kufunika kwa kulambira kwa banja kwakukhonda phonya. Onani pabodzi ninga banja, buluka penepo tawirani mibvundzo inatowera.
(1) Ninji cidacitisa banja ya Roman kukhonda ikha manyerezero ku pinthu pyauzimu? (2) Thangwi yanji pidayesera m’Bale Roman kucita pakulambira kwa banja pyacimwanika? (3) Ndi n’dida upi wa m’Malemba unapereka mwai wadidi toera kupembera mu kukuza ana? (Deut. 6:6, 7) (4) Ninji cinafuna kuphedza banja toera kucedza mwadidi? (5) Kodi ana asafuna kuti anyakubalawo acitenji? (6) Kodi m’Bale na Mulongo Barrow akhala tani citsandzo cadidi kwa banja ya m’bale Roman? (Mis. 27:17) (7) Nsolo wa banja usafunika kucitanji mwanyapantsi toera kulambira kwa banja kukhale kwakuphindulisa? (8) Kodi m’Bale Roman atoma tani kusasanyira pinthu kwa banja yace? (9) Thangwi yanji kulambira kwa banja mwakukhonda phonya nkhwakufunika? (Aef. 6:4) (10) Ndi maonero api anango akuphedza pakulambira kwa banja? (11) M’Bale Roman apangiza tani kukhurudzika na kukhala dzololo mukhaphedza iye Marcus toera kupasa ntengo kufunika kwa kucita pinthu pyadidi? (Yer. 17:9) (12) M’Bale na Mulongo Roman aphedza tani Rebecca toera kucita cisankhulo cadidi thangwi yauxamwali wace na Justin? (Mko. 12:30; 2 Tim. 2:22) (13) M’Bale na Mulongo Roman apangiza tani cikhulupiro pakucita macinjo mu umaso wawo? (Mat. 6:33) (14) Vidyu ineyi isagomezera tani kwa misolo ya mabanja kufunika kwa kupereka pinthu pyauzimu kuna mabanja awo? (1 Tim. 5:8) (15) Ninga nsolo wa banja, mwatonga kucitanji?
CIDZINDIKIRO KWA MISOLO YA MABANJA: Drama ineyi ya ntsiku zino yacitwa pa nsonkhano wa gawo wa caka 2011. Kodi imwe mukhadaona kufunika kwa kusasanyira kulambira kwanu kwa banja? Ndiye tani cincino? Khala pasafunika kusasanyira, taphata miyendo, phemberani na kucita macinjo toera mugumanire banja yanu nkhombo zakukhonda mala.—Aef. 5:15-17.