Tinaphatisira Tani Mphangwa Zakugravarwi
1. Kusiyapo mabukhu akulembwa, ndi api masasanyiro anango akuphindulisa ali na ife?
1 Azinji asakomerwa kuphatisira jw.org peno mphangwa zakugravarwi toera kuleri mafala akutsandzayisa na akulinganira a undimomwene. (Koel. 12:10) Natenepa, kodi mwaphatisira kale mphangwa zakugravarwi? Izo zisaphedza toera kubvesera mphangwa zizinji mu site yathu. Kodi mphangwa zakugravarwi zinakwanisa tani kutiphindulisa?
2. Tinaphatisira tani mphangwa zakugravarwi pa pfundziro ya munthu paekha na ya banja?
2 Pa Pfundziro ya Munthu Paekha na ya Banja: Kubvesera mphangwa zakugravarwi za Bhibhlya, marevista peno mabukhu munacita ife ulendo peno basa ya ntsiku na ntsiku, kunakwanisa kutiphedza toera kuphatisira mwadidi ndzidzi wathu. (Aef. 5:15, 16) Tinakwanisambo kuziphatisira pa kulambira kwathu kwa banja mu kubvesera mbatitowezera m’bukhu yakudhindwa. Kuphatisira mphangwa zakugravarwi kunakwanisa kukhala kwakuphedza pa pfundziro ya munthu paekha khala tisafuna kuthambaruka kuleri peno khala tikupfundza cilongero cinango.
3. Mbani akuti panango anaphindula na mphangwa zakugravarwi mu cisa cathu?
3 Mu Utumiki: Anthu a n’cisa cathu akuti asaona kukhala akuphatika kakamwe, panango asafuna kubvesera mphangwa zakugravarwi. Panango tinadzagumana anthu akuti asalonga cilongero cinango, akuti mbadabvesera mphangwa za Umambo mu ‘cilongero cawo’ cakubalwa naco. (Mach. 2:6-8) M’madziko anango, kubvesera ndi khundu yakufunika kakamwe mu nsambo wawo. Mwacitsandzo, nsambo wa dzindza ya Hmong, anthu akugwesera asapereka mbiri yawo yakale kuna dzindza ipswa mu kuilonga, pontho anawo asabvesera mwadidi mbakoya mphangwa zinapangwa iwo. Misambo mizinji ya ku Afrika anthu asakomerwa kupfundza mbiri mukubvesera.
4. Tisafunika kubvundzikanji toera kuphedza anthu n’cisa cathu?
4 N’cisa canu, mbapidakhala pyakuphindulisa kuliza mphangwa zakugravarwi mu cilongero ca mwanaciro nyumba? Alipo wakuti panango anakomerwa tingantumizira bukhu yakugravarwi mukuphatisira e-mail peno njira zinango? Mbatidakwanisa kukopyari bukhu yakugravarwi mbatiikha mu CD na kuipasa mwanaciro nyumba anapangiza cifuno, panango pabodzi na yakudhindwa? Bukhu yonsene yakugravarwi, bruxura, revista peno tratado inagawira ife munthu mu utumiki, tisafunika kuilemba pa lipoti yathu. Mphangwa zakugravarwi zacitwa toera tiziphatisire pa pfundziro ya munthu paekha, pontho toera kubzwala mbeu za undimomwene wa Umambo.—1 Akor. 3:6.