‘Yahova Anadzakuwangisani Tani?’

1. Atumiki anango a Mulungu a mu ndzidzi wakale apaswa tani mphambvu?

MAFALA a Mulungu kazinji kene asalonga kuti anthu akukhulupirika akhali amphambvu. Mbwenye midzidzi inango, iwo akhalimbo akusowa mphambvu. Mwacitsandzo, Mambo Dhavidhi midzidzi inango akhali “wakuwanga ninga phiri,” mbwenye midzidzi inango ‘akhagopa.’ (Mas. 30:7) Nzimu wa Mulungu wapasa mphambvu kakamwe Samisoni, mbwenye iye akhadziwa kuti angasowa mphambvu za Mulungu mbadakhala ‘wakusowa mphambvu ninga anthu anango onsene.’ (Aton. 14:5, 6; 16:17) Amuna anewa akukhulupirika akhali amphambvu basi ene thangwi Yahova akhadaapasa mphambvu.

2. Thangwi yanji Paulu alonga kuti akhali wakufewa na wamphambvu? (2 Akorinto 12:9, 10)

² Mpostolo Paulu akhadziwa kuti akhafuna ciphedzo ca Yahova toera akhale na mphambvu. (Lerini 2 Akorinto 12:9, 10.) Ninga azinji a ife, Paulu akhathabukambo na mautenda. (Agal. 4:13, 14) Midzidzi inango iye akhanentsekambo toera kucita pinthu pyadidi. (Aroma 7:18, 19) Pontho midzidzi inango Paulu akhadzudzumika mbakhonda kudziwa pinthu pikhafunika iye kucita. (2 Akor. 1:8, 9) Ngakhale tenepo, mu ndzidzi ukhali iye wakufewa, iye akhali wamphambvu. Munjira ipi? Yahova akhapasa mphambvu Paulu toera apirire nyatwa.

3. Ndi mibvundzo ipi inafuna ife kutawira mu nsolo uno?

³ Yahova apikira kuti anatipasambo mphambvu. (1 Ped. 5:10) Mbwenye nee tisafunika kunyerezera kuti nee tisafunika kucita cinthu toera kupaswa mphambvu. Mwacitsandzo, khala muli na tijela ya cakudya, imwe musafunika kukwata cakudya ceneci mbamucidya, thangwi pyenepi pinacitisa kuti muphedzeke na cakudya ceneci. Munjira ibodzi ene, Yahova ali dzololo toera kutipasa mphambvu inafuna ife, mbwenye tisafunika kucita pinthu toera tikhale na mphambvu ineyi. Yahova asatipasanji toera tikhale na mphambvu? Pontho ninji pinafunika ife kucita toera titambire mphambvu ineyi? Tinatawira mibvundzo ineyi mu ndzidzi unaona ife kuti Yahova apasa tani mphambvu anthu atatu analongwa m’Bhibhlya: Mprofeta Yona, Mariya mai wa Yezu na mpostolo Paulu. Kusiyapo pyenepi, tinaonambo kuti Yahova asapitiriza tani kupasa mphambvu atumiki ace lero.

PFUNDZANI BHIBHLYA, PONTHO CITANI PHEMBERO TOERA MUKHALE NA MPHAMBVU

4. Tinatambira tani mphambvu za Yahova?

⁴ Njira ibodzi yakuti tinakwanisa kuiphatisira toera kutambira nkhombo za Yahova ndi kucita phembero. Yahova anatawira maphembero athu mukutipasa “mphambvu yakupiringana yacibaliro.” (2 Akor. 4:7) Ife tinakwanisambo kukhala na mphambvu tingaleri Bhibhlya mbatinyerezera mwadidi pinaleri ife. (Mas. 86:11) Mphangwa za Yahova zinagumanika m’Bhibhlya ‘zisatipasa mphambvu.’ (Aheb. 4:12) Mungacita phembero kuna Yahova na kuleri Mafalace, imwe munakhala na mphambvu toera kupirira, kupitiriza kukhala akutsandzaya peno toera kucita basa yakunentsa. Onani kuti Yahova aphedza tani mprofeta Yona.

5. Thangwi yanji mprofeta Yona akhafuna ciphedzo toera akhale na mphambvu?

⁵ Mprofeta Yona akhafunika kukhala na mphambvu. Iye akhadathawa thangwi akhagopa basa yakunentsa idapaswa iye na Yahova. Na thangwi ineyi, iye pabodzi na anthu akhali na iye m’bote akhafuna kufa na condzi. Pidaponywa iye m’bara ntsomba ikulu yam’meza, pontho iye akhagopa kakamwe m’mimba mwa ntsomba ineyi. Kuona kwanu, Yona akhanyerezeranji? Kodi akhanyerezera kuti anafa? Kodi iye akhanyerezera kuti nee ndi wakutawirikabve kuna Yahova? Panango Yona akhala wakudzudzumika kakamwe.

6. Mwakubverana na Yona 2:1, 2, 7, ninji pidapasa mphambvu Yona mu ndzidzi ukhali iye m’mimba mwa ntsomba?

⁶ Yona acitanji toera akhale na mphambvu mu ndzidzi ukhali iye m’mimba mwa ntsomba? Acita phembero kuna Yahova. (Lerini Yona 2:1, 2, 7.) Maseze iye nee akhadabvera Yahova, Yona atcunyuka, pontho akhali na cinyindiro cakuti Yahova mbadabvesera phembero yace. Kusiyapo pyenepi, Yona akumbuka malemba adaleri iye nduli. Thangwi yanji tisalonga tenepo? Mu phembero idacita iye inagumanika pa Yona kapitulu 2, mazinji mwa mafala adaphatisira iye asagumanika m’bukhu ya Masalmo. (Mwacitsandzo, onani Yona 2:2, 5 na Masalmo 69:1; 86:7.) Mwakukhonda penula, Yona akhadziwa mwadidi malemba anewa. Iwo ampasa cinyindiro cakuti Yahova mbadamphedza. Yahova apulumusa Yona, pontho mukupita kwa ndzidzi akhala dzololo toera kucita basa idapaswa iye na Yahova.—Yona 2:10–3:4.

7-8. M’bale unango wa ku Taiwan akhala tani na mphambvu mu ndzidzi wa nyatwa?

⁷ Citsandzo ca Yona cinatiphedza mu ndzidzi unatamba ife nyatwa. Mwacitsandzo, m’bale Zhimingb wa ku Taiwan asathabuka na utenda wakugopswa kakamwe. Kusiyapo pyenepi, iye asatcingwa na acibale ace thangwi yakutumikira Yahova. Yahova asampasa mphambvu kubulukira m’phembero na kupfundza Bhibhlya. Iye alonga: “Midzidzi inango ndingathimbana na nyatwa ndisakhala wakudzudzumika kakamwe, pontho nee ndisakwanisa kucita pfundziro ya munthu paekha.” Mbwenye iye nee asabwerera nduli. Zhiming athimiza: “Pakutoma, ndisacita phembero kuna Yahova, buluka penepo ndisaikha maskuta anga n’khutu mbandibvesera nyimbo za Umambo. Kusiyapo pyenepi, ndisaimba mwakukhonda galuza toera ndikhale wakukhurudzika. Buluka penepo ndisatoma kupfundza.”

⁸ Pfundziro ya munthu paekha yaphedza kakamwe Zhiming. Mwacitsandzo, pidamala iye kucitwa operasau, enfermero unango ampanga kuti ciropa cace cikhali cakucepa, natenepa akhafunika kuikhwa ciropa. Ntsiku ibodzi mbadzati kucitwa operasau iye aleri thangwi ya mulongo unango wakuti acitwa operasau ibodzi ene. Mulongo unoyu akhali na ciropa cakucepa kakamwe kupiringana Zhiming; ngakhale tenepo, iye nee atawira kuikhwa ciropa, pontho akwanisa kuwanga. Pidacitikira mulongo unoyu pyawangisa Zhiming toera apitirize kukhala wakukhulupirika.

9. Munacitanji mungasowa mphambvu thangwi ya nyatwa? (Onanimbo foto.)

⁹ Mu ndzidzi wa nyatwa, kodi musanentseka toera kucita phembero mbamulonga pinakudzudzumisani? Peno musafewa manungo toera kupfundza Bhibhlya? Kumbukani kuti Yahova asabvesesa mwadidi pinakucitikirani. Natenepa, maseze mulonge pinthu pyakucepa m’phembero, khalani na cinyindiro cakuti Yahova anakupasani pyonsene pinafuna imwe. (Aef. 3:20) Khala ndi pyakunentsa kuna imwe kuleri na kupfundza Bhibhlya thangwi muli kubva kupha, mwaneta, peno muli wakudzudzumika, imwe munakwanisa kubvesera audhyu ya Bhibhlya peno audhyu ya mabukhu athu. Imwe munakwanisambo kubvesera nyimbo zathu peno kuona vidhyu mu jw.org. Yahova asafuna kukupasani mphambvu, pontho iye anacita pyenepi mungacita phembero kuna iye mbamusaka mitawiro ya maphembero anu m’Bhibhlya na pinthu pinango pinakupasani iye.

ABALE NA ALONGO ANAKWANISA KUKUPASANI MPHAMBVU

10. Abale na alongo athu asatipasa tani mphambvu?

¹⁰ Yahova anakwanisa kuphatisira abale na alongo toera kutipasa mphambvu. Iwo anakwanisa ‘kutibalangaza kakamwe’ m’midzidzi ya nyatwa peno kutiphedza toera kucita basa yakunentsa idapaswa ife. (Akol. 4:10, 11) Ife tisafuna kakamwe axamwali makamaka “m’midzidzi ya nyatwa.” (Mis. 17:17) Tingasowa mphambvu, abale na alongo anakwanisa kutiphedza toera tikhale na mphambvu na akuwanga mwauzimu. Onani kuti Mariya mai wa Yezu apaswa tani mphambvu na anango.

11. Thangwi yanji Mariya akhafuna ciphedzo toera akhale na mphambvu?

¹¹ Mariya akhafunika kukhala na mphambvu toera kucita cifuno ca Yahova. Panango Mariya adzudzumika kakamwe pidapangwa iye na anju Gabhriyeli kuti mbadakhala na mimba maseze nee akhadamanga banja. Iye nee akhadakuza kale mwana, mbwenye akhafunika kutsalakana khombwani wakuti mbadadzakhala Mesiya. Kusiyapo pyenepi, nakuti cipo akhadapita m’mabonde, mbadapanga tani Zuze kuti akhali na mimba?—Luka 1:26-33.

12. Mwakubverana na Luka 1:39-45, Mariya atambira tani mphambvu?

¹² Mariya agumana tani mphambvu toera kucita basa ineyi yakunentsa kakamwe? Iye aphemba ciphedzo ca anango. Mwacitsandzo, iye aphemba anju Gabhriyeli toera ampange mphangwa zinango thangwi ya basa ineyi. (Luka 1:34) Buluka penepo, iye aenda kaona Elizabheti “ku cisa ca mapiri” ca Yuda. Ulendo unoyu wamphedza kakamwe. Elizabheti asimba Mariya, pontho na ciphedzo ca Yahova alonga profesiya yakuwangisa kuna Mariya thangwi ya mwana akhafuna kubalwa. (Lerini Luka 1:39-45.) Mariya alonga kuti Yahova “acita pinthu pyamphambvu na nkono wace.” (Luka 1:46-51) Yahova aphatisira anju Gabhriyeli na Elizabheti toera kupasa mphambvu Mariya.

13. Mulongo unango wa ku Bolivia aphedzwa tani na abale na alongo?

¹³ Ninga Mariya, imwe munakwanisambo kupaswa mphambvu na abale na alongo. Mulongo Dasuri wa ku Bolivia akhafuna kukhala na mphambvu. Pidaphatwa pai wace na utenda wakusowa ukondzi mbabhaxari ku nyumba ya ungumi, Dasuri akhala na basa ya kuntsalakana. (1 Tim. 5:4) Midzidzi inango pyenepi pikhali pyakunentsa. Dasuri alonga: “Kazinji kene ndikhaona kuti nee mbidakwanisa kupitiriza kuatsalakana.” Mbwenye pakutoma Dasuri nee aphemba ciphedzo. Iye alonga: “Ine nee ndikhafuna kupasa basa abale na alongo. Ine ndakumbuka kuti ndi ‘Yahova anafuna kundipasa ciphedzo cinafuna ine.’ Buluka penepo ndadzindikira kuti ndingakhonda kuphemba ciphedzo ca anango, ndikuyesera kumalisa nyatwa zanga ndekhene.” (Mis. 18:1) Dasuri alembera axamwali ace matsamba toera kufokotoza pinthu pikhancitikira. Iye alonga: “Abale na alongo andiwangisa kakamwe. Iwo abweresa cakudya ku nyumba ya ungumi, pontho andibalangaza na mavesi anango a m’Bhibhlya. Ndi pyakutsandzayisa kakamwe kudziwa kuti ife nee tiri tekhene. Ife tisacita khundu ya banja ikulu ya Yahova yakuti iri dzololo toera kutiphedza, kulira pabodzi na ife na kutiphedza toera kupitiriza kutumikira Yahova pabodzi.”

14. Thangwi yanji tisafunika kutawira ciphedzo ca akulu a mpingo?

¹⁴ Yahova asaphatisirambo akulu a mpingo toera kutipasa mphambvu. Iwo ndi miyoni inaphatisira Yahova toera kutiwangisa na kutibalangaza. (Iza. 32:1, 2) Natenepa, mungakhala wakudzudzumika cedzani na akulu a mpingo thangwi ya pinthu pinakudzudzumisani. Tawirani ciphedzo cawo angafuna kukuphedzani. Thangwi Yahova asaaphatisira toera kukupasani mphambvu.

CIDIKHIRO CANU CA NTSOGOLO CINAKUPASANI MPHAMBVU

15. Ndi cidikhiro cipi ciri na Akristu onsene?

¹⁵ Mapikiro anagumanika m’Bhibhlya thangwi ya ntsogolo asatipasa mphambvu. (Aroma 4:3, 18-20) Akristu anango ali na cidikhiro cakukhala pa dziko yapantsi mparaizu kwenda na kwenda, pontho anango anadzakhala kudzulu. Cidikhiro cathu cisatipasa mphambvu toera kupirira nyatwa, kumwaza mphangwa zadidi na kucita mabasa akusiyana-siyana mu mpingo. (1 Ates. 1:3) Cidikhiro ceneci capasambo mphambvu mpostolo Paulu.

16. Thangwi yanji mpostolo Paulu akhafuna ciphedzo toera akhale na mphambvu?

¹⁶ Paulu akhafuna ciphedzo toera akhale na mphambvu. Mu tsamba idalembera iye Akorinto, iye alandanisika na combo ca dongo. Iye ‘apfinywa kakamwe, amala ndzeru, atcingwa, pontho agwiswa pantsi.’ Kusiyapo pyenepi, midzidzi inango umaso wace ukhali pangozwi. (2 Akor. 4:8-10) Paulu alemba mafala anewa mu ndzidzi wa ulendo wace wacitatu wa umisionaryo. Pontho pidamala iye kulemba mafala anewa, atamba nyatwa zinango zizinji. Iye amenywa kakamwe, atcingwa, amangwa, pontho alobzweka m’bara.

17. Mwakubverana na 2 Akorinto 4:16-18, ninji cidaphedza Paulu toera kupirira nyatwa?

¹⁷ Paulu akhali na mphambvu thangwi akhanyerezera cidikhiro ca ntsogolo. (Lerini 2 Akorinto 4:16-18.) Iye apanga Akristu a ku Korinto kuti maseze manungo ace ‘akhamala’ iye nee mbadasiya kuti pyenepi pintsukwalise. Paulu akhanyerezera pinthu pya ntsogolo. Cidikhiro cace cakukhala na umaso wakukhonda mala kudzulu ‘cikhabweresa mbiri yakukhonda mala,’ pontho cikhamphedza toera kupirira nyatwa zonsene zikhatamba iye. Paulu akhanyerezera mwadidi cidikhiro ceneci, pontho thangwi ya pyenepi, iye akhali ‘na mphambvu ntsiku zonsene.’

18. Cidikhiro caphedza tani m’bale Tihomir na banja yace?

¹⁸ M’bale Tihomir wa ku Bulgaria, asakhala na mphambvu thangwi ya cidikhiro ca ntsogolo. Pyaka pingasi nduli, m’bale wace wango’ono anacemerwa Zdravko alowa thangwi ya cidengwa. Pidapita ndzidzi ungasi, Tihomir atsukwala kakamwe. Toera akwanise kupirira, iye, mwanace na nkazace asanyerezera pya cidikhiro ca kulamuswa kwa anthu muli akufa. Iye alonga: “Mwacitsandzo, ife tisacedza kuti tinaonana kupi na Zdravko, ndi cakudya cipi cinafuna ife kumphikira, mbani anafuna kucemerwa toera adzadye pabodzi na ife, iye angalamuswa muli akufa, pontho tinampanganji thangwi ya ntsiku zakumalisa.” Tihomir alonga kuti kunyerezera cidikhiro ca ntsogolo kusapasa mphambvu banja yace toera apitirize kupirira na kudikhira ndzidzi unafuna Yahova kulamusa m’bale wace muli akufa.

19. Musafunika kucitanji toera mukhale na cidikhiro cakuwanga? (Onanimbo foto.)

¹⁹ Munakhala tani na cidikhiro cakuwanga? Khala imwe muli na cidikhiro cakukhala pa dziko yapantsi kwenda na kwenda, lerini pinalonga Bhibhlya thangwi ya Paraizu, pontho nyerezerani pinthu pyenepi. (Iza. 25:8; 32:16-18) Nyerezerani kuti umaso unakhala tani mu dziko ipswa. Nyerezeranimbo kuti muli mwenemo. Pontho nyerezerani anthu anafuna imwe kuona, pinafuna imwe kubva na mabvero anafuna kukhala na imwe. Toera kukuphedzani kunyerezera kuti Paraizu inakhala tani, onani m’mabukhu mwathu mafoto anapangiza paraizu peno onani mavidhyu a nyimbo ninga No Mundo Que Aí Vem, Dziko Ipswa Iri Dhuzi Kakamwe peno Nyerezerani Dziko Yadidi. Tingapitiriza kunyerezera cidikhiro ca kukhala mu dziko ipswa, nyatwa zathu zinadzakhala “za ndzidzi wakucepa na zakululupa.” (2 Akor. 4:17) Cidikhiro cidakupasani Yahova cinakuphedzani toera mukhale na mphambvu.

20. Tingakhala akufewa, tisafunika kucitanji toera tikhale na mphambvu?

²⁰ Maseze tikhale akusowa mphambvu, “Mulungu anadzatipasa mphambvu.” (Mas. 108:13) Yahova atipasa kale pinthu pinafuna ife toera tikhale na mphambvu. Natenepa mungafuna ciphedzo toera kucita basa idapaswa imwe, kupirira nyatwa peno kupitiriza kukhala akutsandzaya, citani phembero kuna Yahova, pontho citani pfundziro ya munthu paekha toera kugumana citsogolero cace. Tawirani ciphedzo ca abale na alongo. Pitirizani kukhala na cidikhiro cakuwanga. Mungacita pyenepi, ‘munawangiswa na mphambvu zonsene, mwakubverana na mphambvu za mbiri yace, toera mukwanise kupirira mwadidi, mwakukhurudzika na mwakukomerwa.’—Akol. 1:11.