ADESŨA 21
DWEIN 21 Di Kan Hwehwɛ Ahenni No
Kɔso Nea Kuro Bɔ Ɔngɔsɛkye Lé Ne Atee
“Kuro bɔ ɔbaawa ne mmom yeɛ yɛpena ye si atee ɔ.”—HEB. 13:14.
BƆ ADESŨA NE KƆHÃ YENWO DWIRƐ Ɔ
Yekonwu kyɛbɔ edwirɛ bɔ ɔwɔ Hebrifoɛ yeti 13 ne kɔboka yɛ ɛnnɛ, ɔne kyẽabie ɔ.
1. Nzu yeɛ Yesu hane kyɛ ɔkɔto tete Yerusalem kuro ne ɔ?
WAHA ngyẽa kãa maa Yesu Kristo wu ne, ɔhane ngɔmhyɛ bie nwo dwirɛ hyirele ye asuafoɛ nemɔ. Né sɔ ngɔmhyɛ ne bue bɔ olimoa ne fa Yerusalem kuro ne, ɔne ye asɔre awuro bɔ né bɛkɔsɛkye ye nanwo. Ɔbɔle bɛ kɔkɔ kyɛ, mmerɛ bie kɔwa bɔ ‘koɛhonɛfoɛ kɔpɛ Yerusalem nwo koyia ɔ.’ (Luka 21:20) Yesu hahyirele ye asuafoɛ nemɔ kyɛ, sɛ benwu kyɛ sogyafoɛ nemɔ apɛ kuro nanwo ayia a, bɛnwati befi nu ndɛ. Sɔ dwirɛ ne wale nu mmerɛ bɔ Roman sogyafoɛ nemɔ pɛle Yerusalem nwo yiale ne.—Luka 21:21, 22.
2. Kristofoɛ bɔ ne bɛwɔ Yudea ne Yerusalem ne, afutue beni yeɛ somafoɛ Pɔɔlo famane bɛ ɔ?
2 Mmerɛ bɔ né waha afoɛ kãa maa Roman sogyafoɛ nemɔ pɛ Yerusalem nwo yia ne, somafoɛ Pɔɔlo hworɔle krataa bie bɔ ne yenwo hia paa ɔɔmane Kristofoɛ bɔ ne bɛwɔ Yudea ne Yerusalem ne. Ɛhene yeɛ ɛnnɛ bɛfrɛ ye Hebrifoɛ nwomaa ne. Wɔ sɔ krataa nanu ne, Pɔɔlo tuli sɔ Kristofoɛ nemɔ foɛ wɔ kyɛbɔ ne bɛkɔboa bɛnwo bɛkɔma ɔhaw bɔ ne ɔbobɔ ba ne. Yede ɔhaw beni yeɛ ne ɔbobɔ ba ne? Né bɛbaasɛkye Yerusalem. Yeti sɛ ne sɔ Kristofoɛ nemɔ konya ngoa a, ne odikyɛ bɛyakyi b’awuro ne b’adwumamɔ berɛ bɛnwati. Ɛhene ati Pɔɔlo hane Yerusalem nwo dwirɛ kyɛ: “Kuro biala nne aseɛ ye aso bɔ ɔwɔ berɛ afebɔɔ ma yɛ ɔ.” Osa fabokale so kyɛ: “Kuro bɔ ɔbaawa ne mmom yeɛ yɛpena ye si atee ɔ.”—Heb. 13:14.
3. Nzu yeɛ ole “kuro bɔ ye fapem gyi berɛ pindinn” ne, na nzuati yeɛ yɛkɔso yɛnwondɛ ye ɔ?
3 Kristofoɛ bɔ besili gyinayɛɛ kyɛ bɛkɔnwati bekofi Yerusalem ne Yudea ne, ebiaa ebiemɔ gorole bɛnwo, na bɛhane po kyɛ bɛnze nworɛ. Nakoso ɛhene yeɛ olɛle bɛ ngoa ɔ. Ɛnnɛ koso, ɔnate kyɛ yɛmva yɛnwo yɛndo anwonyadeɛ, anaa sona amamuo so kyɛ ɛhene yeɛ ɔkɔye yɛ haw kofi berɛ nati, ebiemɔ goro yɛnwo kyɛ yɛnze nworɛ. Yede, nzu yeɛ ɔmaa yesi sɔ gyinayɛɛ ne ɔ? Ofikyɛ yɛse kyɛ ɔngɔhyɛ ewiase he kɔhɔ ye ayieleɛ. Yesɔ nati, yɛnea “kuro bɔ ye fapem gyi berɛ pindinn” ne atee. Yeɛ ole Nyameɛ Ahennie “bɔ ɔbaawa” ne.a (Heb. 11:10; Mat. 6:33) Edwirɛti mmaammaa bɔ ɔwɔ adesua he anu ne kɔboka yɛ maa yekonwu: (1) kyɛbɔ Pɔɔlo afutue ne bokale tete Kristofoɛ nemɔ maa bɛhɔleso bɛneane “kuro bɔ ne ɔbaawa” ne atee, (2) kyɛbɔ Pɔɔlo bokale bɛ maa bɛboale bɛnwo bɛmane ɛsɛkyelɛ bɔ ne ɔbaawa ne, ɔne (3) kyɛbɔ ye afutue ne kɔboka yɛ ɛnnɛ ɔ.
FA WƆNWO TO YEHOWA SO, OFIKYƐ ƆNGƆYE YE SA WƆ WƆ BO LÉ
4. Nzuati yeɛ ne Kristofoɛ nemɔ nni Yerusalem kuro nanwo angorɛ ɔ?
4 Né Yerusalem te kuro bɔ Kristofoɛ nemɔ nni yenwo angorɛ koraa ɔ. Bɔ yeti yeɛ ɔte sɔ yeɛ ole kyɛ, ɛberɛ yeɛ belimoa bɛtele Kristofoɛ asafo ne wɔ afoɛ 33 Y.B (Yɛ Aberɛ So) ɔ. Afei koso, ɛberɛ yeɛ né akwangyerɛ kue ne wɔ ɔ. Ebieku koso, ne Kristofoɛ nanu pee le awuromɔ ne agyapadeɛ wɔ kuro nanu. Nakoso ɛhe mukoraati si ne, Yesu bɔle ye asuafoɛ nemɔ kɔkɔ kyɛ odikyɛ bɛnwati befi Yerusalem ne Yudea maen nanu koraa.—Mat. 24:16.
5. Sɛɛ yeɛ Pɔɔlo bokale Kristofoɛ nemɔ maa bɛboale bɛnwo bɛmane bɔ ne ɔbaasi ne ɔ?
5 Bɔ ɔkɔyɛ na Pɔɔlo aboka Kristofoɛ nemɔ maa baboa bɛnwo bama bɔ né ɔbaasi ne, ɔmaa benwuni adwene bɔ né Yehowa le ye wɔ Yerusalem kuro nanwo ɔ. Pɔɔlo maa benwuni kyɛ, asɔre awuro ne, asɔfo bɔ bɛsõ wɔ berɛ, ɔne afɔleɛ ahoroɛ bɔ bɛbɔ ye wɔ berɛ ne, né Yehowa nne ndo nu kõ. (Heb. 8:13) Né mmeni pee bɔ bɛwɔ sɔ kuro nanu ne koso apo Mɛsaya ne. Afei koso, né yenwo nhia kyɛ mmenia kɔhɔ Yerusalem kora ne bahora basõ Yehowa, na ne ɔngɔhyɛ bɛkɔsɛkye Yerusalem ne ye asɔre awuro ne.—Luka 13:34, 35.
6. Afutue bɔ Pɔɔlo famane Kristofoɛ nemɔ wɔ Hebrifoɛ 13:5, 6 ne, nzuati yeɛ né ɔkɔboka bɛ paa sɔ mmerɛ ne ɔ?
6 Mmerɛ bɔ Pɔɔlo hworɔle krataa ɔɔmane Hebrifoɛ nemɔ ne, né Yerusalem te kuro bɔ nu yɛ hye paa. Romaniɛ bie bɔ né ɔtworɔ nwomaa sɔ mmerɛ ne hane kyɛ, “sɛ bɛkã kuro bɔ né wale dumaa paa wɔ sɔ porɛ nanu” a, yeɛ né ole Yerusalem. Afoɛ biala, né Yudafoɛ bɔ befi maen pee so ba Yerusalem badi aluolue ahoroɛ, na né ɛhene maa esikaa ba kuro nanu paa. Yesɔ nati, ebiaa ɔmaa Kristofoɛ nanu biemɔ koso fale yenwo nyane esikaa paa. Ɔkɔyɛ kyɛ ɛhene ati yeɛ Pɔɔlo tuli bɛ foɛ kyɛ: “Ɛ́mɔye sikanyeboro befi ɛmɔ brabɔlɛ nu, ná ɛ́mɔma ɛmɔ nye sɔ bɔ ɛmɔanya ɔ.” Ɛhene si ne, edwirɛ bie bɔ Yehowa ahã afa ahyɛ bɛbɔ bɛsõ ye ne bɔ ne, osa hwene b’adwene siele so. Yeɛ ole kyɛ, Yehowa nwa: “Mengoli wɔ ngasi, yeɛ mengɔye me sa wɔ wɔ bo le.” (Kenga Hebrifoɛ 13:5, 6; Deut. 31:6; Edw. 118:6) Kristofoɛ bɔ né bɛwɔ Yerusalem ne Yudea ne, né ɔnzɛkyɛ bɛmaa bɛ wora fi sɔ dwirɛ he lle. Nzuati ɔ? Ofikyɛ sɛ ne bɛsa kã Pɔɔlo krataa ne a, né ɔngɔhyɛ biala bɛkɔnwati bɛkɔyakyi b’awuromɔ, b’adwuma, ɔne nikyeebiala bɔ bele ye ne berɛ. Ɔba sɔ a, ne bɛkɔɔhyɛ abrabɔ foforɛ bo wɔ ebie maen so.
7. Nzuati yeɛ odikyɛ yɛfa yɛnwo yɛto Yehowa so paa ɛnnɛ ɔ?
7 Bɔ yesua yefi nu ɔ: Nzu yeɛ ɔla yɛ nyunu ɔnwondɛ yɛ ɔ? Yeɛ ole “amaneɛnwunɛ piri” bɔ ɔkɔfa ewiase nhyehyɛɛ he kɔwa ye ayieleɛ ne. (Mat. 24:21) Kyɛbɔ tete Kristofoɛ nemɔ yɛle ne, yɛkoso odikyɛ yɛmaa yɛnye da berɛ, na yɛboa yɛnwo. (Luka 21:34-36) Wɔ amaneɛnwunɛ piri nanu ne, ebiaa y’awuro mɔ anaa yɛ nningyein mukoraati kofi yɛsa. Sɛ ɔba sɔ a, odikyɛ yenya Yehowa nu gyidie paa kyɛ ɔngɔyakyi yenu lle. Kesaalae bɔ amaneɛnwunɛ piri ne walle ne po, odikyɛ yɛda y’ali kyɛ Yehowa yeɛ yɛfa yɛnwo yɛto ye so ɔ. Bisa wɔnwo kyɛ: ‘Kyɛbɔ mebɔ me bra, ɔne bɔ ogyi menye so ne, ɔda ye ali kyɛ mefa menwo meto Nyameɛ so, anaa anwonyadeɛ mmom yeɛ menye la so ɔ?’ (1 Tim. 6:17) Bɔ ɔkɔhɔso wɔ “amaneɛnwunɛ piri” nanu ne, ɔkɔtra bɔ ɔtole Kristofoɛ bɔ né bɛwɔ Yerusalem ne deɛ ne koraa. Nakoso bɔ bɛhɔle nu ne, yɛkɔhora yekosua nningyein pee yekofi nu. Yede, sɔ mmerɛ ne, yɛkɔyɛ sɛɛ né yanwu bɔ odikyɛ yɛyɛ ɔ?
TIE MBANYI BƆ BELI NNINGYEIN NYUNU NE
8. Akwangyerɛ beni yeɛ Yesu famane ye asuafoɛ nemɔ ɔ?
8 Pɔɔlo hworɔle ye krataa ne ɔɔmane Hebrifoɛ nemɔ afoɛ kãa bie si ne, Kristofoɛ nemɔ nwuni kyɛ Roman sogyafoɛ nemɔ aapɛ Yerusalem nwo ayia. Ɛhene maa benwuni kyɛ odikyɛ bɛnwati befi kuro nanu, ofikyɛ ne bɛbaasɛkye ye. (Mat. 24:3; Luka 21:20, 24) Nakoso, nisua yeɛ né bɛkɔnwati bɛkɔhɔ ɔ? Bɔ ne Yesu ahã ahyire bɛ alaa yeɛ ole kyɛ: “Bɛ bɔ bɛwɔ Yudea ne, odi kyɛ bɛnwati bɛkɔ mmokaa nemɔ aso.” (Luka 21:21) Nguro pee yeɛ ne ogua mmokaa so wɔ sɔ mandam nanu ɔ. Yeti nisua deinn yeɛ ne bɛkɔfa bɛnye bekohyire ɔ?
9. Nzuati yeɛ ebiaa ne ɔyɛ se ma Kristofoɛ nemɔ kyɛ bekonwu bokaa horɛ bɔ odikyɛ bɛnwati bɛkɔ so ɔ? (Nea map ne.)
9 Ma yɛnea mmokaa bɔ ne Kristofoɛ nemɔ kɔhora kɔnwati kɔhɔso ne bie: Samaria mmokaa, Galilea mmokaa, Bokaa Hɛmɔn, Lebanon mmokaa, ɔne mmokaa bɔ né ogua Yɔɔdan asue ne si dɔ ne. (Nea map ne.) Nguro bɔ ne ogua sɔ mmokaa nemɔ aso ne, nu biemɔ wɔ berɛ a, ne mmenia susu kyɛ ɛberɛ yeɛ ɔte pá kyɛ ebie kɔnwati kɔhɔ ɔ. Gamla kuro ne sɔa, ne ogua bokaa tendennmaa bie aso, yeti sɛ ebie kɔ berɛ a, ne ɔkɔfɛ paa. Yesɔ nati, ne Yudafoɛ nanu biemɔ adwene yɛ bɛ kyɛ, ɛberɛ yeɛ ɔte pá kyɛ ebie kɔnwati kɔhɔ ɔ. Nakoso Romanfoɛ nemɔ towurale sɔ kuro naso bɛsɛkyele ye, na ɛhene maa kuro nanufoɛ pee wuli.b
Kristofoɛ bɔ né bɛwɔ Yerusalem ne, ne mmokaa pee apɛ bɛnwo ayia, nakoso nna yemu yeɛ ne ɔte pá kyɛ bɛkɔnwati bɛkɔhɔ so ɔ (Nea ngyekyɛmuɛ 9)
10-11. (a) Atee beni yeɛ ɔkɔyɛ kyɛ Yehowa nate so mane Kristofoɛ nemɔ akwangyerɛ ɔ? (Hebrifoɛ 13:7, 17) (b) Mmerɛ bɔ Kristofoɛ nemɔ tiele mbanyi bɔ né beli benyunu wɔ asafo nanu ne, sɛɛ yeɛ ɔbokale bɛ ɔ? (Nea foto ne koso.)
10 Bɛbɔ ne beli asafo ne nyunu sɔ mmerɛ ne, Yehowa nate bɛso mane Kristofoɛ nemɔ akwangyerɛ. Eusebius bɔ ne ɔtworɔ abakɔsɛm ne hane bɔ osili sɔ mmerɛ nanwo dwirɛ kyɛ: “Asafo bɔ ne ɔwɔ Yerusalem ne, Nyameɛ nate mmrienzua bɔ ne beli benyunu naso mane bɛ ahyɛdeɛ kyɛ, . . . bɛnwati befi kuro nanu bɛhɔ Pella bɔ ɔte kuro bie bɔ ɔwɔ Perea ne kora ne kõɛ ne asi.” Né Pella te nekaa pá bɔ né odikyɛ Kristofoɛ nemɔ nwati kɔ ɔ. Sɛ efi Yerusalem ɛkɔ berɛ a, ne ɔnwalle, yeti ne ɔnyɛ se kyɛ ebie kɔnwati kɔhɔ berɛ ɔ. Afei koso, bɛbɔ ne bɛte sɔ kuro naso ne, ne benu pee te maenmaensofoɛ. Yeti ne bɛngɔfa ngondii bɛngɔteta Romanfoɛ nemɔ.—Nea map ne.
11 Kristofoɛ bɔ bɛnwati bɛhɔle mmokaa naso ne, betiele Pɔɔlo afutue bɔ yenwa, “ɛ́mɔyɛ sotie bɛ́ma ɛmɔ mbanyi mɔ” bɔ bɛwɔ asafo nanu ne. (Kenga Hebrifoɛ 13:7, 17.) Sɔ sotie bɔ bɛyɛle nati, benyane ngoa. Ɔnate kyɛ bɛhɔleso bɛfale bɛnwo bɛtole “kuro bɔ ye fapem gyi berɛ pindinn,” bɔ yeɛ ole Nyameɛ Ahennie naso nati, Yehowa koso anyakyi benu lle.—Heb. 11:10.
Né Pella te nekaa bɔ ɔte pá kyɛ bɛkɔnwati bɛkɔhɔ ɔ, na ne ɛberɛ koso anwa (Nea ngyekyɛmuɛ 10-11)
12-13. Sɛɛ yeɛ Yehowa ahɔso aboka ye mmenia wɔ mmerɛ bɔ nningyein nu ayɛ se nanu ɔ?
12 Bɔ yesua yefi nu ɔ: Yehowa nate mbanyi bɔ beli nningyein nyunu wɔ asafo nanu naso fa akwangyerɛ pɔtee ma ye mmenia. Nneasoɛ pee wɔ Bible nanu bɔ ɔmaa yenwu kyɛbɔ Yehowa ahɔso afa mmrienzua bɔ bedi nahorɛ naso ahyire ye mmenia atee wɔ anwokyere mmerɛ nu ɔ. (Deut. 31:23; Edw. 77:20) Ɛnnɛ koso, bɛbɔ beli nningyein nyunu wɔ asafo nanu ne, yenwu adanzeɛ pee bɔ okyire kyɛbɔ Yehowa fa bɛso yɛ adwuma ɔ.
13 COVID-19 anwonyerɛ ne wale ne sɔa, ‘mbanyi’ bɔ beli nningyein nyunu wɔ asafo nanu ne, bɛmane yɛ akwangyerɛ bɔ yehia ɔ. Sɔ mmerɛ ne, mbanyi nemɔ sa hane akwangyerɛ bɔ ne ɔkɔmaa bɛkɔboka aliemaamɔ maa bɛkɔsõ Yehowa ɔ. Anwonyerɛ ne yele ye ti bosome kãa bie si ne, yɛyɛle nhyiamu wɔ dwudwolɛ kɔbo 500 nu. Ebiemɔ neane bie wɔ intanɛt ne TV so, na ebiemɔ koso tiele bie wɔ radio so. Nhyiamu sɔa de, ne yɛyɛlle bie lle. Yeti, nikyeebiala bɔ ne yehia na wamaa yahora yasõ Yehowa ne, yɛsa hane ye. Ɛhe maa yɛyɛle kõ. Yedé yedi paa kyɛ, ɔmva yenwo ne bɔ okosi biala ne, Yehowa kɔhɔso kɔboka mbanyi nemɔ maa bekosi gyinayɛɛ pá. Sɛ gyidie bɔ yekonya ye, ɔne sotie bɔ yɛkɔyɛ yɛkɔma Yehowa ne la ahameɛ a, subaen foforɛ beni yeɛ yehia na waboka yɛ maa yasisi gyinayɛɛ pá wɔ amaneɛnwunɛ piri bɔ nningyein nu kɔyɛ se nanu ɔ?
KURO ALIEMAAMƆ DWIRƐ, NA SÕ BƐ WƆFOƐ
14. Kyɛbɔ Hebrifoɛ 13:1-3 kã ne, mmerɛ bɔ né ɔka kãa maa bɛsɛkye Yerusalem ne, subaen beni yeɛ ne odikyɛ Kristofoɛ nemɔ nya ye ɔ?
14 Sɛ amaneɛnwunɛ piri ne hyɛ yebo a, sɔ mmerɛ ne yeɛ yenwo kohia kyɛ yɛda ɔdɔ ali yekyire yɛnwo paa ɔ. Sɛ ɔba sɔ a, odikyɛ yesuesua bɔ Kristofoɛ bɔ ne bɛwɔ Yerusalem ne Yudea ne yɛle ne. Bɛlale ɔdɔ ali behyirele bɛnwo mmerɛ biala. (Heb. 10:32-34) Nakoso ɔka kãa maa bɛsɛkye Yerusalem ne de, ne odikyɛ ‘bekurokuro bɛnwo dwirɛ paa kyɛ aliemaamɔ,’ na ‘bede ɛwɔfoɛ mɔ wɔ b’awuro.’c (Kenga Hebrifoɛ 13:1-3.) Sɔ ala yeɛ yɛ koso, mmerɛ bɔ ɔka kãa maa ewiase he kɔ ayieleɛ ne, odikyɛ yekuro aliemaamɔ dwirɛ paa ɔ.
15. Mmerɛ bɔ ne Kristofoɛ nemɔ nwati fi Yerusalem ne, nzuati yeɛ ne odikyɛ bɛda ɔdɔ ali bekyire bɛnwo ɔ?
15 Roman sogyafoɛ nemɔ bɛɛpɛle Yerusalem nwo beyiale ne, besale besi bɛhɔle. Ɛhene maa Kristofoɛ nemɔ nyane yenwo atee bɔ bɛkɔfa bɛkɔnwati ɔ. Nakoso, nningyein kãa bie yeɛ bɛhora bɛfale ɔ. (Mat. 24:17, 18) Yeti mmerɛ bɔ ne bɛnate atee so bɛkɔ Pella, ɔne mmerɛ bɔ bedwuli dɔ ne, né odikyɛ bɛboka bɛnwo. Bɔ ɔte yeɛ ole kyɛ, né benu pee ‘kohia mmokalɛ paa.’ Yeti ɛhene maa Kristofoɛ nemɔ nyane yenwo atee bɔ bɛkɔfa bɛkɔla ɔdɔ ali bekoyire bɛnwo, na bɛne beliemamɔ ahyɛ nningyein kãa bɔ bele ye ne ɔ.—Tito 3:14.
16. Aliemaamɔ bɔ bɛnwo ahyere bɛ ne, yɛkɔyɛ sɛɛ ne yahyire kyɛ yekuro bɛ dwirɛ? (Nea foto ne koso.)
16 Bɔ yesua yefi nu ɔ: Yekuro yeliemamɔ dwirɛ paa, yeti sɛ bɛnwo kyere bɛ a, yɛboka bɛ. Ɔnate kõɛ ti, aliemaamɔ biemɔ atu afi bɛ maen nu, na ebiemɔ wora atorɛngyɛm bɔ osisi ne amaa bɛnwo ahyere bɛ paa. Bɛbɔ bɛte sɔ ne, aliemaamɔ boka bɛ maa bɛsa kã bɔ behia ɔ, na besa bɛboka bɛ maa bɛkɔso bɛsõ Yehowa. Aliemaa brasua bie bɔ ofi Ukraine bɔ ɔnate kõɛ nati watu wafi ye kuro hane kyɛ: “Yehowa nate aliemaamɔ so aboka yɛ wɔ atee pee so. Bɛbokale yɛ paa wɔ Ukraine, ɔne mmerɛ bɔ ne yɛwɔ Hungary ne, na kesaalae po bɔ yɛwɔ Germany wa ne, bɛyakyilli yɛ nu.” Sɛ yɛsõ aliemaamɔ wɔfoɛ, na yɛboka bɛ maa benya bɔ behia a, ne yɛma atee maa Yehowa fa yɛ yɛ adwuma.—Any. 19:17; 2 Kor. 1:3, 4.
Aliemaamɔ bɔ ɔnate kõɛ ti batu bafi bekuro ne, bekohia yɛ mmokalɛ paa (Nea ngyekyɛmuɛ 16)
17. Nzuati yeɛ odikyɛ yesua kyɛ yekohuro aliemaamɔ dwirɛ, na yasõ bɛ wɔfoɛ ɛnnɛ ɔ?
17 Sɛ amaneɛnwunɛ piri ne hyɛ yebo a, aliemaamɔ kohia yɛ mmokalɛ paa kɔtra ɛnnɛ po. (Hab. 3:16-18) Ɛhene ati, Yehowa kyirekyire yɛ maa yesua kyɛbɔ yekohuro bɛ dwirɛ, na yasõ bɛ wɔfoɛ ɛnnɛ ɔ. Ofikyɛ sɔ subaen nemɔ nwo kohia yɛ paa kyẽabie.
NZU YEƐ YƐNEA YE ATEE Ɔ?
18. Kristofoɛ bɔ bɛnwati befili Yerusalem ne, yɛkɔyɛ sɛ né yasuesua bɛ?
18 Kristofoɛ bɔ bɛnwati befili Yerusalem bɛhɔle mmokaa so ne, benyane ngoa mmerɛ bɔ bɛsɛkyele kuro ne. Ɔwɔ nu kyɛ bɛyakyili nningyein pee wɔ bɛ sĩ, nakoso Yehowa anyakyi benu lle. Yede, yɛ koso ɛ? Nningyein bɔ okosisi kyẽabie ne, nna yemu yeɛ yɛse ɔ. Nakoso kɔkɔbɔ bɔ Yesu famane yɛ kyɛ yɛboa yɛnwo yesie ne de, yɛse. (Luka 12:40) Afei koso, afutue bɔ Pɔɔlo famane Kristofoɛ nemɔ bɔ ɔwɔ Hebrifoɛ nwomaa nanu ne, ɔbokale bɛ paa. Sɔ ala yeɛ yɛkoso sɛ yɛfa yɛyɛ adwuma a, ɔkɔboka yɛ ɔ. Asa koso, Yehowa bɔbɔ ahyɛ yɛ bɔ kyɛ ongoli yɛ ngasi, na ɔngɔye ye sa wɔ yɛ bo lle. (Heb. 13:5, 6) Yeti ɛmɔma yɛyere yɛnwo paa kyɛ yɛkɔhɔso yɛkɔnea kuro bɔ ɔngɔsɛkye lé, bɔ yeɛ ole Nyameɛ Ahennie ne atee. Sɛ yɛyɛ sɔ a, yɛsa kɔhã nhyiraa bɔ ɔkɔtena berɛ daa ne, na yɛnye kɔgye paa!—Mat. 25:34.
DWEIN 157 Asomdwee Kɔwa!
a Tete ne, ɔhene yeɛ ne ɔtaa di kuro bie aso ɔ. Yeti kuro bɔ ɔte sɔ ne, né bɛkora bɛkã kyɛ ɔte ahennie.—Gye. 14:2.
b Mmerɛ bɔ Kristofoɛ nemɔ nwati fili Yerusalem ne Yudea wɔ afoɛ 67 Y.B ne, wangyɛ biala yeɛ sɔ dwirɛ ne sili ɔ.
c Edwirɛ ‘ɛmɔhurohuro bɛnwo dwirɛ kyɛ aliemaa mɔ’ ne, ɔkora kyire ɔdɔ bɔ mmenia bɔ bɛwɔ abusua bie nu le ma bɛnwo ɔ. Nakoso Pɔɔlo fa yɛle adwuma fahyirele ɔdɔ bɔ yele yɛma aliemaamɔ bɔ yɛne bɛwɔ asafo nanu ne.