“Ala dabe ti ala na azo so ayeke mû li ni na popo ti ala”

NGBENE ye na Pentecôte ti ngu 33, abazengele be-ta-zo ti Seigneur Jésus Christ asara lani kua tongana mbeni bebungbi ti mû li ni ti fa lege na fini congrégation ti aChrétien so abâ gigi na ngoi ni kâ (Kus. 6:2-4; aHéb. 13:7). Na ngu 49 tongaso, yâ ti bebungbi ni akiri akono, a ngbâ gï na abazengele awe ape. Na ngoi so a mû lani desizion na ndö ti tënë ti fango ganza, na yâ ti bebungbi ni a yeke wara “abazengele nga na a-ancien so ayeke na Jérusalem”. (Kus. 15:1, 2). Kua ti ala lani ayeke ti bâ lege ti atënë so andu aChrétien na ando kue. Ala yeke tokua lani alettre nga na ambela, na aye so kue akpengba lani acongrégation nga asara si adisciple ayeke lani beoko nga ala sara kua maboko na maboko. Acongrégation ni amä lani yanga ti bebungbi ni nga ala woko terê ti ala na gbe ti fango lege ti lo, ye so asara si Jéhovah asara tufa na ndö ti ala nga wungo ti ala ague na li ni.—Kus. 8:1, 14, 15; 15:22-31; 16:4, 5; aHéb. 13:17.

² Na peko ti kuâ ti abazengele, afango ye ti a-apostat amû ndo (2 aThes. 2:3-12). Tongana ti so Jésus atene lani kozo awe na yâ ti parabole ti blé na asioni pere, a lu asioni pere ni (wala aChrétien ti wataka) na popo ti blé (wala aChrétien so a soro ala ti gue na yayu). Teti angu ngbangbo mingi, a zia si groupe ti azo use so kue angbâ ti maï place oko juska na ngoi ti kongo alê ti kobe, wala “ngoi so aye ti mbeni ngoi ayeke gue ti hunzi.” (Mat. 13:24-30, 36-43). Na yâ ti angoi ni so, Jésus angbâ ti bâ na nzoni lê Chrétien oko oko so a soro lo ti gue na yayu. Me mbeni bebungbi, wala mbeni ye, so Jésus ayeke sara kua na ni lani na ndö ti sese ti fa lege na adisciple ti lo ayeke dä ape (Mat. 28:20). Ye oko, lo tene so mbeni changement ayeke si ande na ngoi ti kongo alê ti kobe.

³ “Zo wa mbilimbili si ayeke ngbâa be-ta-zo so ayeke sara ye na ndara?” Hundango ndo so ayeke kozo mbage ti mbeni parabole, wala mbeni tapande, so Jésus Christ amû, so andu tënë ti mbage ti “fä” so lo fa ti sara tënë ti “ngoi so aye ti ngoi so ayeke gue ti hunzi”. (Mat. 24:3, 42-47). Jésus afa so ngbâa ni so ayeke mû ande ngoi ti lo mingi ti mû kobe ti yingo na awakua ti Nzapa “na ngoi ni so alingbi”. Jésus asara kua lani na mbeni groupe ti akoli, me lo sara kua gï na zo oko ape ti mû li ni na ngoi ti akozo Chrétien, legeoko nga ngbâa be-ta-zo so Jésus ayeke sara kua na lo na ngoi ti nda ni so ayeke gï zo oko ape.

“NGBÂA BE-TA-ZO SO AYEKE SARA YE NA NDARA” AYEKE ZO WA?

⁴ Azo wa la Jésus azia ala ti mû kobe ti yingo na adisciple ti lo? A yeke na lege ni ti tene lo zia gï aChrétien so a soro ala ti gue na yayu so angbâ na ndö ti sese ti mû kobe ni. Bible asara tënë ti ala tongana “mbeni bungbi ti aprêtre” so kua ti ala ayeke “‘ti fa anzoni’ ti lo so lo iri ala ti sigi na yâ ti bingo ti ga na yâ ti pendere lumière ti lo.” (1 Pi. 2:9; Mal. 2:7; Apoc. 12:17). Me eskê a yeke aChrétien kue so a soro ala ti gue na yayu, so angbâ na sese, la ayeke ngbâa be-ta-zo ni? Ên-ën. Na ngoi so Jésus asara miracle si lo mû kobe na gbâ ti azo so wungo ti akoli ayeke 5 000 tongaso, a diko wungo ti awali nga na amolenge ape, lo mû kobe ni na adisciple ti lo, na ala la akangbi ni na gbâ ti azo ni so (Mat. 14:19). Lo sara kua lani gï na kete wungo ti azo ti mû kobe na gbâ ti azo. Laso nga kue, lo yeke sara gï tongaso ti mû kobe ti yingo na azo.

⁵ Tongaso, “zo ti batango ye so ayeke be-ta-zo na so ayeke sara ye na ndara” ayeke mbeni kete groupe ti aita-koli so a soro ala ti gue na yayu, so ayeke sara kua ti lekengo kobe ti yingo nga ti mungo ni na azo na ngoi so Christ ayeke duti dä (Luc 12:42). Na ngoi ti lâ ti nda ni so, aita-koli so a soro ala ti gue na yayu so abungbi aga “ngbâa be-ta-zo so ayeke sara ye na ndara” asara kua place oko na kota ndokua ti e. Laso, aita-koli so la abungbi aga Bebungbi ti aTémoin ti Jéhovah.

⁶ Christ ayeke sara kua na bebungbi so ti sigi na ambeti so asara tënë na ndö ti aprophétie ti Bible so aga tâ tënë awe nga ti fa na e na ngoi so alingbi, tongana nyen la e lingbi ti sara ye alingbi na amama-ndia ti Bible na yâ ti fini ti e ti lâ oko oko. A yeke na lege ti acongrégation ti aTémoin ti Jéhovah la si e yeke wara akobe ti yingo so (És. 43:10; aGal. 6:16). Na ngoi ti giriri, mbeni ngbâa so wa ti lo ayeke na confiance na lo, so ti tene mbeni zo ti batango ye, ayeke mbeni zo so a zia lo ti bâ ndo na ndö ti akua so a yeke sara na yâ ti mbeni da. Legeoko nga, a mû na ngbâa be-ta-zo so ayeke sara ye na ndara kua ti bango ndo na ndö ti azo ti kua ti Christ. Tongaso, ngbâa be-ta-zo ni ayeke bâ nga ndo na ndö ti aye tongana nginza, ada, akungba, kua ti fango tënë, kapa ti akota bungbi ti lango oko na ti lango ota, sorongo ambeni ita ti sara akua nde nde na yâ ti bungbi nga sigingo na ambeti so asara tënë na ndö ti Bible. Aye so kue ayeke ndali ti nzoni ti “azo ti kua” ni.—Mat. 24:45.

⁷ Me azo wa la ayeke “azo ti kua” ni? Na nduru tënë, a yeke azo kue so ayeke te kobe ti yingo ni. Na tongo nda ni, azo ti kua ni kue ayeke lani gï ala so a soro ala ti gue na yayu. Na pekoni la si azo mingi mingi so ayeke ti “ambeni taba” aga na ndö ni (Jean 10:16). Agroupe use so kue la ayeke te kobe ti yingo so ngbâa be-ta-zo ayeke mû ni.

⁸ Na ngoi ti kota ye ti vundu, na ngoi so Jésus ayeke ga ti fâ ngbanga na ndö ti sioni dunia so nga ti sara ye alingbi na fango ngbanga ni, lo yeke zia ande ngbâa be-ta-zo “na ndö ti aye ti lo kue.” (Mat. 24:46, 47). Azo so abungbi si aga ngbâa be-ta-zo so ayeke wara ande futa ti ala na yayu. Ala yeke bungbi na tanga ti amba ti ala so a soro ala, ti tene wungo ti ala kue asi 144 000, ti komande legeoko na Christ na yayu. Atâa so na ngoi ni so ande ngbâa be-ta-zo so ayeke sara ye na ndara ayeke duti dä encore ape, Jéhovah na Jésus ayeke sara ande kua na azo so a soro ala ti sara kua tongana “amokonzi” ti fa lege na azo so ayeke ngbâ na ndö ti sese na gbe ti Royaume so Christ ayeke Gbia ni.—Ps. 45:16.

NGBANGA TI NYEN LA A LINGBI E ‘DABE TI E NA AZO SO AYEKE MÛ LI NI’?

⁹ Araison ayeke mingi so ndali ni a lingbi e ‘dabe ti e na azo so ayeke mû li ni’ nga e sara confiance na ala. Ngbanga ti nyen la a yeke nzoni ti tene e sara tongaso? Bazengele Paul atene: “Azo so ayeke bâ ndo na ndö ti ala tongana azo so ayeke na tënë ti kiri na ni na Nzapa, si ala sara kua ti ala na ngia me na demango terê pëpe, ndali ti so ye ni ayeke sara ande nzoni na ala pëpe.” (aHéb. 13:17). A yeke kota ye mingi ti tene e mä yanga ti azo so ayeke mû li ni nga ti woko terê ti e na gbe ti fango lege ti ala, ndali ti so ala yeke bâ ndo na ndö ti e ti bata e na lege ti yingo nga ti bâ ndo na ndö ti nzoni duti ti e.

¹⁰ Na 1 aCorinthien 16:14, Paul atene: “Zia aye kue so ala sara, ala sara ni na ndoye.” Ndoye la ayeke na gunda ti adesizion so a yeke mû ndali ti awakua ti Nzapa. Na ndö ti ndoye ni, 1 aCorinthien 13:4-8 atene: “Ndoye ahinga ti kanga bê ti ku nga lo sara nzoni na zo. Ndoye asara kota bê pëpe, lo pika kate na ndö ti ye pëpe, lo zia si baba ahon ndö ti lo pëpe, lo sara ye ti songo bê ti zo pëpe, lo gi gï aye so anzere na lo pëpe, lo yeke sara ngonzo hio hio pëpe. Lo yeke diko pëpe sioni so a sara na lo. Lo wara ngia na yâ ti ye ti kirikiri pëpe, me lo wara ngia na yâ ti tâ tënë. Lo kanga bê na gbele aye kue, lo mä na bê na aye kue, lo zia beku na ndö ti aye kue, lo gbu ngangu na yâ ti aye kue. Ndoye ayeke hon lâ oko pëpe.” Teti so ndoye la si ayeke na gunda ti adesizion kue so a yeke mû ni ndali ti nzoni ti awakua ti Jéhovah, e yeke na araison kue ti bâ terê ti e so e yeke nzoni na gbe ti fango lege so. Na ndö ni, ye so afa na gigi ndoye so Jéhovah ayeke na ni na mbage ti azo ti lo.

¹¹ Tongana ti ngoi ti akozo Chrétien, akoli so Jéhovah azia ala ti mû li ni na ndö ti awakua ti lo ayeke mbilimbili-kue ape. Ye oko, Jéhovah asara kua ândö na azo so ayeke mbilimbili-kue ape ti sara ye so bê ti lo aye. Na tapande, Noé aleke lani mbeni arche nga lo fa lani so a yeke futi dunia ti ngoi ti lo (Gen. 6:13, 14, 22; 2 Pi. 2:5). Jéhovah asoro lani Moïse ti fa lege na azo ti lo ti tene ala sigi na Égypte (Ex. 3:10). Jéhovah amû yingo ti lo lani na ambeni koli so ayeke mbilimbili-kue ape ti sû Bible (2 Tim. 3:16; 2 Pi. 1:21). Jéhovah ayeke sara kua laso na akoli so ayeke mbilimbili-kue ape ti bâ ndo na ndö ti kua ti fango tënë nga na ti sarango adisciple. Me ye so asara pëpe si e ke ti sara confiance na bungbi ti lo. Nde na so, e kiri e wara ngangu ndali ti so e hinga e tene sân mungo maboko ti Jéhovah, bungbi ni apeut lâ oko ape ti sara mara ti akua kue so lo yeke sara so. Na yâ ti akpale mingi so ngbâa be-ta-zo ahon dä nga so lo gbu ngangu na yâ ni, lo fa na gigi so yingo ti Nzapa ayeke na ndö ti lo. Laso, Jéhovah asara gbâ ti tufa na ndö ti mbage ti bungbi ti lo so ayeke na ndö ti sese. Tongaso, na bê ti e kue e yeke mû maboko na bungbi so nga e yeke sara confiance na ni.

AYE SO E YEKE SARA TI FA SO E SARA CONFIANCE NA NGBÂA NI

¹² Ala so a zia ala ti mû li ni na yâ ti congrégation ayeke fa so ala sara confiance na ngbâa ni na lege so ala yeke yeda na ngia ti sara akua ti ala nga ti sara ni gï tongana ti so a hunda (Kus. 20:28). Teti so e yeke awafango tënë ti Royaume, e yapu ti fa tënë da na da, ti kiri ti bâ azo so e fa tënë na ala nga ti manda Bible na ala na yanga-da ti ala (Mat. 24:14; 28:19, 20). Ti tene e wara ye ti nzoni mingi na lege anzoni kobe ti yingo so ngbâa be-ta-zo ayeke mû na e, e yeke leke abungbi ti e kue nga e yeke gue na abungbi ni kue. Ye so abâ nga akota bungbi ti e ti lango oko na ti lango ota. E yeke wara aye ti nzoni mingi na lege ti atënë so e yeke tene ti wa terê na popo ti e na ngoi so e bungbi oko na aita ti e na ngoi ti abungbi ni so.—aHéb. 10:24, 25.

¹³ E yeke fa nga so e sara confiance na bungbi ni tongana e yeke mû a-offrande ti mû maboko na ni (aProv. 3:9, 10). Tongana e bâ so ye amanke aita ti e na lege ti mitele, hio, e yeke gi ti mû maboko na ala (aGal. 6:10; 1 Tim. 6:18). Tâ ndoye so e yeke na ni na mbage ti aita ti e la apusu e ti sara tongaso, na e yeke gi alege kue ti fa na Jéhovah nga na bungbi ti lo so e bâ na nene ni anzoni ye kue so lo na bungbi ti lo ayeke sara na e.—Jean 13:35.

¹⁴ E yeke fa nga so e sara confiance na bungbi ni tongana e yeda na adesizion so lo mû nga e sara ye alingbi na ni. Ye so andu nga ti tene e sara terê ti e kete, e sara ye alingbi na fango lege ti azo so a zia ala ti bâ ndo na ndö ti e, na tapande asurveillant ti circonscription nga na a-ancien. Aita so nga ayeke na popo ti “azo so ayeke mû li ni”, so a lingbi e mä yanga ti ala nga e woko terê ti e na gbe ti ala (aHéb. 13:7, 17). Ni la, atâa tongana e hinga nzoni kue ape ndani so a mû ambeni desizion, e hinga so tongana e yeda na ni, a yeke ga ande na e ye ti nzoni so ayeke ninga. Ye ti peko ni ayeke so Jéhovah ayeke sara tufa na ndö ti e ndali ti so e sara ye alingbi na atënë ti lo so alondo na Bible nga na bungbi ti lo. Na sarango tongaso, e fa so e mä yanga ti Maître ti e, Jésus Christ.

¹⁵ Biani, araison ayeke mingi so ndali ni a lingbi e sara confiance na ngbâa be-ta-zo so ayeke sara ye na ndara. Satan, so ayeke nzapa ti aye ti ngoi so, ayeke gi alege kue ti buba iri ti Jéhovah nga na bungbi ti lo (2 aCor. 4:4). Zia si e tï pëpe na yâ ti akûkû ti Satan (2 aCor. 2:11). Lo hinga so a ngbâ na lo ngoi mingi pëpe ti tene a bi lo na yâ ti kota dû so alï mingi, na lo yeke gi alege kue ti handa gbâ ti awakua ti Jéhovah ti tene ala dö lege ti Jéhovah azia (Apoc. 12:12). Me na ngoi so Satan ayeke sara ngangu mingi ti handa e, zia e kiri e ga nduru mingi na Jéhovah. Zia e sara confiance na Jéhovah nga na Bebungbi so lo yeke sara kua na ni ti fa lege na azo ti lo laso. Tongana e sara tongaso, beoko ayeke duti na yâ ti sewa ti e ti aita kue.