E sara si congrégation angbâ na siriri nga na saleté pëpe

NGU oko oko, azo saki mingi mingi ayeke ga na yâ ti da ti Jéhovah so a yeke voro lo na lege ni dä, tongana ti so prophétie ti Bible afa (Mi. 4:1, 2). E yeke na ngia mingi ti yamba ala na yâ ti “congrégation ti Nzapa”. (Kus. 20:28). Ala yeke na ngia so lege azi na ala ti sara na Jéhovah na terê ti e, na ti duti na yâ ti paradis ti e ti yingo so siriri ayeke dä nga so ayeke saleté pëpe. Yingo vulu ti Nzapa nga na awango ti ndara so ayeke na yâ ti Bible la si ayeke mû maboko na e ti bata siriri nga ti sara si congrégation ni aduti saleté pëpe.—Ps. 119:105; Zach. 4:6.

² Ti sara ye alingbi na amama-ndia ti Bible afa so e yü “fini zo”. (aCol. 3:10). E yeke kpe papa nga na akete kete tënë so alingbi ti ga na mango terê ape na popo ti e. Ti bâ aye tongana ti Jéhovah ayeke sara si e yeke hon ndö ti atënë ti kangbi so ayeke ti dunia so, na e yeke sara kua na yâ ti beoko tongana mbeni sewa ti aita na yâ ti dunia kue.—Kus. 10:34, 35.

³ Ye oko, ngoi na ngoi, akpale ayeke londo so alingbi ti buba siriri nga na dutingo beoko ti aita ti congrégation. Nyen la ayeke ka na gunda ni? Mingi ni, a yeke ngbanga ti so aita ni asara ye pëpe alingbi na awango ti Bible. A yeke ti e lakue ti hon ndö ti awokongo ti e ti mitele. Mbeni zo so ayeke na siokpari na terê ti lo pëpe ayeke ti lo dä ape (1 Jean 1:10). Mbeni zo alingbi ti mû mbeni sioni lege so alingbi ti sara si mbeni sioni sarango ye wala mbeni ye so alingbi ti buba songo ti e na Jéhovah alï na yâ ti congrégation. E lingbi ti sara mbeni ye wala ti bi mbeni tënë gï tongaso so azia vundu na bê ti mbeni zo; wala mbeni zo alingbi ti tene mbeni tënë wala ti sara mbeni ye so ason bê ti e (aRom. 3:23). Tongana mara ti akpale tongaso asi, e yeke sara tongana nyen ti leke tënë ni?

⁴ Na ndoye, Jéhovah apensé na aye so kue. Mbeti ti lo, Bible, amû awango so afa tongana nyen ti leke atënë na ngoi so akpale alondo. Na lege ti yingo, aberger ti ndoye, wala a-ancien, ayeke dä ti mû maboko na zo oko oko. Tongana e sara ye alingbi na awango so ala yeke mû na e na yâ ti Bible, e lingbi ti kiri ti duti na nzoni songo na aita ti congrégation nga ti ngbâ ti duti na nzoni iri na gbele Jéhovah. Tongana bungbi asuku na e wala agboto mê ti e ndali ti mbeni sioni ye so e sara, a lingbi e hinga so mara ti sukungo na zo tongaso aye ti fa ndoye so Babâ ti e ti yayu ayeke na ni na mbage ti e.—aProv. 3:11, 12; aHéb. 12:6.

LEGE TI LEKE AKETE KETE KPALE SO AYEKE SI NA POPO TI E

⁵ A lingbi ti si so na ambeni ngoi akete tënë wala akete kpale alondo na popo ti ambeni ita na yâ ti congrégation. A lingbi a leke atënë tongaso hio na lege ti ndoye (aÉph. 4:26; aPhil. 2:2-4; aCol. 3:12-14). Peut-être mo yeke bâ ande so mingi ti akpale so atingbi mo na mbeni mba ti mo Chrétien ayeke akpale so alingbi ti leke ni na sarango ye alingbi na wango so bazengele Pierre amû, so atene: “Ala ndoye terê ngangu na popo ti ala, ngbanga ti so ndoye akanga ndö ti asiokpari mingi.” (1 Pi. 4:8). Bible atene: “Fani mingi e kue e yeke pika gere ti e.” (Jacq. 3:2). Tongana e sara ye alingbi na mbeni wango so Jésus amû, so ayeke ti tene ye kue so e ye azo asara na e, e sara na ala tongaso nga, e lingbi ti pardonné akete faute so amba ti e asara na e nga e girisa na ndö ni.—Mat. 6:14, 15; 7:12.

⁶ Tongana mo bâ so bê ti mbeni zo ason ndali ti mbeni tënë so mo tene wala ndali ti mbeni ye so mo sara, ku ape, mû li ni ti gue ti leke tënë ni. Girisa ape so ye ni andu nga songo ti mo na Jéhovah. Jésus amû lani mbeni wango na adisciple ti lo, lo tene: “Tongaso, tongana mo ga na matabisi ti mo na gbele gbalaka, na kâ mo dabe ti mo so ita ti mo ayeke na mbeni tënë na terê ti mo, zia matabisi ti mo kâ na gbele gbalaka ni na mo gue. Leke tënë na ita ti mo kozoni, na pekoni ga, mo mû matabisi ti mo ni.” (Mat. 5:23, 24). Peut-être mbeni oko la acomprendre mba ti lo nzoni ape. Tongana a yeke tongaso, a yeke nzoni mo zia lege na mba ti mo ni ti tene lo nga kue lo sara tënë. Nzoni lisoro na popo ti aita kue ti congrégation alingbi ti kanga lege na mara ti akpale tongaso ti si, nga a yeke mû lege na ala ti leke akpale so alingbi ti londo na popo ti ala ndali ti siokpari so ayeke na terê ti e.

TONGANA A HUNDA TI MÛ WANGO TI BIBLE

⁷ Na ambeni ngoi, a-ancien alingbi ti bâ so a yeke kota ye ti mû mbeni wango ti leke na bango ndo ti mbeni zo. Me a yeke ka lakue kete ye ape. Na yâ ti mbeti so bazengele Paul asû na aChrétien ti Galatie, lo tene: “Aita, même tongana mbeni zo amû sioni lege sân ti tene lo hinga ni, ala so akpengba awe na lege ti yingo, ala tara ti kiri na zo so na nzoni lege, na ala sara ni na ngangu pëpe. Me, ala wani ala sara hange si ala nga ala tï na yâ ti tara pëpe.”—aGal. 6:1.

⁸ Avizite so a-ancien ayeke sara na kundu ni alingbi ti bata congrégation si aye ti sioni mingi asi na ni na lege ti yingo pëpe nga alingbi ti kanga lege na akota kpale ti si. Ala sara ngangu si kua so ala yeke sara ndali ti congrégation ague oko na zendo so Jéhovah amû na lege ti Ésaïe, atene: “Ala oko oko kue ayeke duti ande tongana ndo ti honde terê dä ndali ti pupu nga tongana ndo ti kpe dä ti bata terê ndali ti ngu-nzapa so apika na kota pupu. Ala yeke duti nga tongana mbeni ngu so asua na yâ ti ndo so ngu ayeke dä pëpe, nga tongana gbe ti dê ti mbeni kota tênë na yâ ti ndo so ahule ngangu.”—És. 32:2.

ZIANGO LÊ NA NDÖ TI AZO SO SARANGO YE TI ALA AYEKE NZONI APE

⁹ Bazengele Paul agboto lê na ndö ti ambeni zo so apeut ti ga na kpale na yâ ti congrégation. Lo tene: “E mû yanga na ala, e tene: Ala gboto terê ti ala yongoro na ita kue so atambela kirikiri na so atambela pëpe alingbi na ngobo so e fa na ala.” Ti vuru lê ti tënë ni, lo tene: “Tongana mbeni zo ake ti mä tënë ti e so ayeke na yâ ti mbeti so, ala zia lê ti ala na ndö ti lo nzoni, ala zia ti sara songo na lo tongaso si kamene asara lo. Ye oko, ala bâ lo tongana mbeni wato pëpe, me ala ngbâ ti gboto mê ti lo tongana mbeni ita.”—2 aThes. 3:6, 14, 15.

¹⁰ Ngoi na ngoi, a lingbi ti si so mbeni zo asara pëpe mbeni kota siokpari so a lingbi ti bi zo na gigi ndali ni; ye oko, lo lingbi ti sara sanka ti aye so Nzapa ahunda na aChrétien ti sara. Na tapande, peut-être lo ye kua kete ape, lo yeke kasa ndo mingi wala lo yeke saleté mingi. Lo “yeke yôro yanga ti [lo] na yâ ti atënë so abâ [lo] pëpe.” (2 aThes. 3:11). Wala a lingbi ti duti mbeni zo so aleke na lege ti mayele ti wara gï aye na mbage ti azo wala so aye gï ti sara angia so a yeke polele so ayeke na lege ni ape. Mara ti asarango ye tongaso alingbi ti buba iri ti congrégation nga ti pusu ambeni Chrétien ti sara mara ti aye ni so.

¹¹ Kozoni kue, a lingbi a-ancien atara ti mû wango ti Bible na zo ni so. Me tongana zo ni achangé ape, atâa awango ti Bible so a mû na lo na peko ti terê, a-ancien alingbi ti leke ti tene a mû mbeni diskur na congrégation, so ndani ayeke ti gboto mê ti aita na ndö ti mara ti sarango ye tongaso. Kozoni si a-ancien amû mara ti diskur tongaso, ala yeke sara ye na ndara ti bâ wala ye ni so asi so ayeke biani mbeni ye so alingbi ti buba dutingo ti congrégation. Na yâ ti diskur ni, a yeke mû awango so andu mara ti sarango ye ti kirikiri ni so, me a yeke fa pëpe iri ti ita so sarango ye ti lo ayeke kirikiri so. Me ala so ahinga ye so diskur ni ayeke fa tënë na ndö ni ayeke kpe ti ga nduru mingi na mara ti azo tongaso, atâa so “ala ngbâ ti gboto mê ti lo tongana mbeni ita.”

¹² Peut-être dutingo be-ta-zo ti aita alingbi ti sara si kamene asara ita so sarango ye ti lo ayeke na lege ni ape so, na a lingbi ti pusu lo ti changé. Tongana a bâ polele so zo ni achangé awe, a yeke zia ti bâ lo tongana mbeni zo so a zia lê na ndö ti lo.

LEGE TI LEKE AMBENI KOTA TËNË NA POPO TI E

¹³ Ti duti nduru ti hon na ndö ti atënë so ason bê ti e na ti pardonné zo aye pëpe ti tene so tongana mbeni kota tënë abâ gigi na popo ti e na mbeni zo, e yeke gi bê ti e na ndö ni ape wala e yeke kanga lê dä. Asioni ye so azo ayeke sara ayeke lakue pëpe gï ngbanga ti so siokpari ayeke na terê ti ala. Nga, a yeke nzoni pëpe ti kanga lê na ndö ti akota faute (Lév. 19:17; Ps. 141:5). Ndia ti Moïse afa lani so ambeni siokpari ayeke kota ahon ambeni. A yeke nga legeoko tongaso na yâ ti congrégation ti aChrétien.—1 Jean 5:16, 17.

¹⁴ Jésus afa ambeni ye so a lingbi a sara ti leke na akota kpale so alingbi ti si na popo ti aChrétien. Bâ aye so lo fa lani: “Tongana ita ti mo asara mbeni siokpari, [1] gue mo fa na lo siokpari so lo sara. Zia a duti gï na popo ti ala use. Tongana lo mä mo, mo kiri na lo na nzoni lege awe. Me tongana lo mä mo pëpe, [2] mo mû zo oko wala use na terê ti mo, tongaso si na lege ti tënë ti yanga ti atémoin use wala ota, gere ti tënë kue aluti nzoni. Tongana lo mä ala pëpe, [3] sara tënë ni na congrégation. Tongana lo mä même congrégation pëpe, zia mo bâ lo tongana mbeni zo ti amara nga tongana zo ti rongo nginza ti impôt.”—Mat. 18:15-17.

¹⁵ Na lege ti tapande so Jésus afa na pekoni, na so a sû ni na Matthieu 18:23-35, na bango ni Matthieu 18:15-17 asara tënë ti mbeni siokpari so andu tënë ti nginza wala ti ambeni ye so ayeke ti mbeni zo. Na tapande, tongana mbeni zo ake ti futa bon so lo mû wala lo sara mbeni ye na lege ti nzi. Wala siokpari ni alingbi ti duti mbeni tënë ti mvene so zo ni atene na ndö ti mba ti lo ti buba iri ti mba ti lo ni.

¹⁶ Me tongana mo hinga polele so mbeni zo na yâ ti congrégation asara mara ti siokpari tongaso na terê ti mo, dö terê hio pëpe ti gue ti bâ a-ancien ti tene ala sara mbeni ye ndali ti mo. Tongana ti so Jésus atene lani, sara tënë kozoni kue na lo so mo na lo ayeke na tënë. Tara ti leke tënë ni gï mo na lo use awe, yôro mbeni zo nde dä ape. Girisa ape so Jésus atene pëpe ‘gue gï fani oko mo fa na lo siokpari so lo sara.’ Tongaso, tongana zo ni ake ti yeda so lo sara sioni nga lo ke ti hunda pardon, peut-être a yeke nzoni ti pensé ti kiri ti bâ lo encore. Tongana kode ni so amû lege ti leke tënë ni, zo ni so asara siokpari ni na terê ti mo ayeke duti ande biani na ngia ti bâ so mo sara tënë ni kozo pëpe na ambeni zo wala mo buba iri ti lo na yâ ti congrégation ape. Andâ, mo “kiri na lo na nzoni lege awe.”

¹⁷ Tongana zo so adü tënë ni ayeda na faute ti lo, lo gi ti wara pardon nga ti leke tënë ni, ala bezoin pëpe ti gue na tënë ni ayo. So aye ti fa so siokpari so a sara tënë ni ge, atâa so a yeke kota, andu gï asiokpari so zo alingbi ti leke ni na popo ti lo na mba ti lo.

¹⁸ Tongana mo lingbi pëpe ti kiri na ita ti mo ni na nzoni lege na ngoi so mo gue mo fa na lo siokpari so lo sara, “gï na popo ti ala use”, ge la fadeso mo lingbi ti sara ye so Jésus atene, so ti tene “mû zo oko wala use na terê ti mo,” na kiri mo gue mo sara tënë na ita ti mo ni. A yeke nzoni azo so mo yeke mû ala na terê ti mo aduti nga azo so agi ti kiri na ita ni na nzoni lege. Mingi ni, a yeke nzoni ti mû gï azo so ayeke témoin ti ye ni so asi so. Me tongana atémoin ayeke dä ape, mo lingbi ti hunda na ita oko wala use ti gue ti duti tongana atémoin ti lisoro ti ala ni. Peut-être ala hinga tongana nyen ti leke tënë ni nzoni nga ti bâ wala ye ni so asi ayeke biani mbeni faute. Tongana azo so mo soro ala ti duti atémoin ni ayeke a-ancien, ala yeke sara kua pëpe na iri ti congrégation, teti so a yeke bungbi ti a-ancien la si atokua ala ti leke tënë ni so ape.

¹⁹ Tongana mo sara kue ti sara tënë ni na lo gï mo na lo ala use nga na pekoni mo mû mbeni zo oko wala use na terê ti mo, me mo bâ so tënë ni angbâ ngbango, si mo bâ so mo lingbi pëpe ti hon gï na ndö ni tongaso, a lingbi mo sara tënë ni na a-ancien ti congrégation. Girisa ape so ye so ala yeke gi ayeke ti bata siriri ti congrégation na ti sara si saleté aduti na yâ ni ape. Tongana mo sara tënë ni na a-ancien awe, zia ni na maboko ti ala, na sara confiance na Jéhovah. A lingbi mo zia lâ oko ape si sarango ye ti mbeni zo asara si mo pika gere ti mo wala mo girisa ngia ti mo na yâ ti kua ti Jéhovah.—Ps. 119:165.

²⁰ A-ancien ti kundu ni ayeke gi nda ti tënë ni. Tongana a bâ polele so ita ni asara mbeni kota siokpari na terê ti mo, me lo ye pëpe ti changé na ti leke tënë ni na mbeni lege so alingbi na ni, a-ancien so a soro ala ti sara komite ti ita ni alingbi peut-être ti bi lo na gigi ti bungbi teti so lo ke ti changé sioni sarango ye ti lo. Na sarango tongaso, ala yeke bata kundu ni nga na congrégation ni si ye ti sioni aduti na yâ ni ape.—Mat. 18:17.

LEKENGO ATËNË SO ANDU AKOTA SIOKPARI

²¹ Ti ambeni kota siokpari, na tapande lango-sioni, gingo koli wala wali nde, bungbingo koli na koli wala wali na wali, zongango Nzapa, gango apostat, vorongo yanda nga na ambeni kota siokpari tongaso, gï ti pardonné zo ni alingbi ape (1 aCor. 6:9, 10; aGal. 5:19-21). Teti so mara ti siokpari tongaso alingbi ti buba nzoni duti ti congrégation na lege ti yingo nga na nzoni sarango ye ti aita, a lingbi a fa peko ti tënë ni na a-ancien, na a yeke ti ala ti bâ lege ti tënë ni so (1 aCor. 5:6; Jacq. 5:14, 15). Ambeni zo alingbi ti ga na mbage ti a-ancien ti fa tënë ti mbeni siokpari so ala wani la asara, wala ti sara tënë ti mbeni siokpari ti ambeni zo so ala hinga tënë na ndö ni (Lév. 5:1; Jacq. 5:16). Atâa lege so a-ancien amä na mbeni tënë ti siokpari so mbeni Témoin so awara batême awe asara ayeke tongana nyen, a-ancien use ayeke gi kozoni kue ti bâ wala ye ni asi tongaso biani wala pëpe. Tongana a yeke polele so gere ti tënë ni aluti, na aye ayeke dä so afa so biani zo ni asara mbeni kota siokpari, bungbi ti a-ancien ayeke zia na sese mbeni komite so a-ancien ota tongaso ayeke na yâ ni ti bâ lege ti tënë ni.

²² A-ancien ayeke bâ ndo na ndö ti kundu ni, ti bata ni si azo ti sioni aga na kpale pëpe na ataba ni na lege ti yingo. Ala yeke sara nga kue ti sara kua, na kode, na Mbeti ti Nzapa ti suku na azo kue so agirisa lege nga ti tara ti kiri na ala na ndö ti nzoni lege (Jude 21-23). Ye so ala yeke sara ague oko na yanga so bazengele Paul amû lani na Timothée, lo tene: “Na lê ti Nzapa nga na ti Christ Jésus, lo so ayeke fâ ande ngbanga ti ala so ayeke na fini nga na ti akuâ, . . . mo suku na zo, mo kiri zo na nzoni lege, mo wa zo, mo sara ni na kangango bê kue ti ku nga na kode ti fa ye na zo.” (2 Tim. 4:1, 2). Sarango tongaso alingbi ti hunda ngoi mingi, me a yeke nga mbeni ngangu kua so a-ancien ayeke sara. Aita ti congrégation ayeke bâ na nene ni mingi angangu so ala yeke sara, na aita ni ayeke bâ ala tongana azo so “alingbi ti wara gonda fani use”.—1 Tim. 5:17.

²³ Na yâ ti tënë ni kue tongana a-ancien ti komite ni abâ so tënë ayeke na li ti zo ni, kozo ye so ala yeke gi ti sara ayeke ti mû maboko na zo ni ti kiri ti duti na nzoni songo na Jéhovah. Tongana lo changé bê ti lo na a-ancien ni alingbi ti mû maboko na lo, sukungo so ala yeke suku na lo, atâa gï ala na lo wala na devant ti atémoin so asara tënë na ngoi ti komite ni, ayeke gboto mê ti lo nga ayeke pusu ala so ayeke na ngoi ti ngbanga ni so ti sara mbeto ti ye so lo sara (2 Sam. 12:13; 1 Tim. 5:20). Na yâ ti atënë kue so ala yeke bâ na so a mû desizion ti suku gï na wasiokpari ni, a yeke ke na lo ti sara ambeni kua na yâ ti bungbi. Ye so ayeke mû maboko na lo ti kiri ande na ndö ti “alege so ayeke nzoni”. (aHéb. 12:13). Tongana angoi ayeke hon, a yeke zi lege na lo ti sara ambeni kua ni tongana lo fa so lo yeke maï na lege ti yingo.

LEGE TI FA TËNË NI NA CONGRÉGATION

²⁴ Tongana komite so afâ ngbanga ti mbeni ita abâ so ita ni achangé bê ti lo, me so peut-être tënë ti siokpari ni ayeke tï ande na mê ti aita ti congrégation wala ti azo ti gigi, wala tongana a-ancien ti komite ni abâ so ambeni nda ti tënë nde ayeke dä ti gboto mê ti congrégation, a yeke tene mbeni nduru tokua na congrégation na ndö ni na ngoi ti bungbi ti Kusala ti e nga na gigi ti e ti Chrétien. A lingbi a fa tënë ni nduru tongaso: “Mbeni komite asuku na [Iri ti zo ni].”

TONGANA A YEKE TI BI ZO NI NA GIGI TI BUNGBI

²⁵ A lingbi ti si so zo ni alï tâ ngangu mingi na yâ ti siokpari ti lo ni, a sara si lo yeda pëpe na aye kue so a sara ti mû maboko na lo. A lingbi ti bâ polele so, na ngoi ti ngbanga ni, lo sara pëpe “akusala so alingbi biani na changengo bê.” (Kus. 26:20). A yeke sara tongana nyen? Tongana a yeke tongaso, a lingbi a bi lo na gigi ti bungbi ti kanga lege na lo ti ngbâ ti sara songo na aita so angbâ na yâ ti bungbi ti Jéhovah, so ala ngbâ ti ala nzoni. A sara tongaso ti tene asarango ye ti zo so asara siokpari ni aga na kpale pëpe na ndö ti congrégation ni, tongaso si a bata nzoni sarango ye ti congrégation si ye ti sioni asi na ni na lege ti yingo pëpe nga ti tene iri ti congrégation ni abuba pëpe (Deut. 21:20, 21; 22:23, 24). Lani, tongana bazengele Paul amä so mbeni ita ti congrégation ti Corinthe asara mbeni ye ti kamene, lo wa a-ancien ni ti “zia mara ti zo tongaso na maboko ti Satan . . . , tongaso si a bata bibe ti congrégation ni”. (1 aCor. 5:5, 11-13). Paul asara nga tënë ti ambeni zo so ake tâ tënë na ngoi ti lo, na so a bi ala na gigi ti bungbi.—1 Tim. 1:20.

²⁶ Tongana komite so afâ ngbanga ti mbeni ita so asara mbeni sioni ye, me so ake ti changé sioni sarango ye ti lo ni, abâ so a lingbi a bi gï lo na gigi ti bungbi, a yeke nzoni a-ancien ti komite ni afa na lo desizion so ala mû, na ala fa polele nda ti tënë wala anda ti tënë so ayeke na yâ ti Bible so apusu ala ti mû desizion ni so. Na ngoi so komite ni afa na wasiokpari ni desizion ti bingo lo na gigi ti bungbi, komite ni ayeke tene nga na lo so tongana lo bâ ti lo so a fâ ngbanga ni tâ na lege ni oko ape, na si lo ye ti tene a kiri a bâ tënë ti lo ni, lo lingbi ti sû mbeni mbeti so na yâ ni lo fa anda ti tënë so apusu lo ti hunda ti tene a kiri a bâ tënë ti lo ni. A yeke zia na lo lango mbasambala ti sara ni, ti londo na lango ni so komite ni afa desizion ti ala na lo. Tongana lo sû mbeti ti hunda ti tene a kiri a bâ tënë ti lo ni, a lingbi bungbi ti a-ancien ni abâ surveillant ti circonscription, na surveillant ni ayeke soro ambeni ancien nde so alingbi, ti duti na yâ ti komite so ayeke kiri ti bâ tënë ni. Komite ni ayeke sara kue ti bâ tënë ni na yâ ti alango mbasambala so aga na peko ti so ala wara na mbeti ti zo so asara siokpari ni. Tongana ita ni so asara siokpari ahunda ti tene a kiri a bâ tënë ti lo, a yeke fa pëpe na congrégation desizion ti kozo komite ni, so ayeke ti bingo lo na gigi ti bungbi. Ye oko, na yâ ti ngoi ni so, a yeke gbanzi na zo ni ti kiri tënë nga ti sambela na bungbi wala ti sara akua na yâ ti congrégation.

²⁷ Ti zia lege na zo so a bi tënë na li ti lo ti kiri ti fa atënë ti bê ti lo ayeke mbeni ye so afa so a sara ye na lo na nzoni bê. Ndani la, tongana lo ke na mbana ti ga na gbele use komite ni so aga ti bâ tënë ti lo, na si a sara ye kue so a lingbi ti sara ti wara lo, me kue gbä, a lingbi a fa na congrégation so a bi lo na gigi ti bungbi.

²⁸ Me tongana zo so asara sioni ye ni aye pëpe ti tene mbeni komite nde akiri abâ tënë ti lo, a lingbi komite so afâ ngbanga ti lo afa na lo ndani so a yeke nzoni lo changé bê ti lo nga aye wa la lo lingbi ti sara ti kiri na bungbi ande. Ye so ayeke mû maboko na zo ni nga ayeke sarango ye na nzoni bê, na a lingbi a sara ni na beku so lo yeke changé lege ti lo mbeni lâ ti kiri na bungbi ti Jéhovah.—2 aCor. 2:6, 7.

LEGE TI FA TËNË NI NA CONGRÉGATION

²⁹ Tongana a bâ so a lingbi a bi na gigi ti bungbi mbeni zo so ake ti changé sioni sarango ye ti lo, a yeke fa tënë ni nduru na congrégation tongaso: [Iri ti zo ni] ayeke Témoin ti Jéhovah encore ape.” Ye so alingbi ti gboto mê ti aita so angbâ be-ta-zo ti zia ti sara songo na zo ni so.—1 aCor. 5:11.

TONGANA ZO NI WANI LA AZI TERÊ TI LO NA BUNGBI

³⁰ Tongana a sara tënë ti zo so “azi terê ti lo na bungbi,” a ye ti sara tënë ti mbeni Témoin so awara batême awe me so na bê ti lo wani lo ke ti ngbâ Chrétien na lege so lo tene so lo ye ti ngbâ Témoin ti Jéhovah encore ape. Wala lo zi terê ti lo na bungbi na lege ti asarango ye ti lo, na tapande tongana lo lï na yâ ti mbeni bungbi ti azo ti dunia so, so aye so ala yeke gi ague nde na afango ye ti Bible; mara ti bungbi tongaso ayeke na gbe ti ngbanga ti Jéhovah Nzapa.—És. 2:4; Apoc. 19:17-21.

³¹ Na ndö ti azo so ake ti ngbâ Chrétien lani na ngoi ti bazengele Jean, lo tene: “Azo so alondo lani na popo ti e si ala sigi, me ala yeke lani ti e pëpe. Tongana ala yeke lani ti e, ka ala ngbâ na popo ti e.”—1 Jean 2:19.

³² Tongana mbeni zo azi terê ti lo na bungbi, dutingo ti lo na gbele Jéhovah ayeke nde mingi na ti mbeni Chrétien so azia ti fa tënë aninga. Mbeni zo alingbi ti zia ti fa tënë teti so lo yeke manda Bible lakue pëpe; wala akpale so asi na lo na yâ ti gigi ti lo wala aye ti ngangu so a sara na lo alingbi ti sara si lo yapu na yâ ti kua ti Jéhovah tongana ti kozo ape. A-ancien nga na ambeni ita nde ti congrégation ni ayeke ngbâ lakue ti mû maboko na ita tongaso na lege ti yingo.—aRom. 15:1; 1 aThes. 5:14; aHéb. 12:12.

³³ Me tongana mbeni zo so ayeke Chrétien kozo azi terê ti lo na bungbi na bê ti lo wani, a yeke tene mbeni nduru tokua na congrégation, a tene: “[Iri ti zo ni] ayeke Témoin ti Jéhovah encore ape.” A yeke bâ mara ti zo tongaso tongana zo so bungbi abi lo na gigi.

KIRINGO NA MBENI ZO NA BUNGBI

³⁴ A lingbi ti kiri na mbeni zo so a bi lo na gigi ti bungbi wala mbeni zo so lo wani lo zi terê ti lo na bungbi tongana lo fa polele so lo changé bê ti lo ni awe nga lo fa teti mbeni ngoi awe so lo zia lege ti sioni sarango ye ti lo. Lo fa so lo yeke na nzara ti lë nzoni songo na Jéhovah. A-ancien ayeke zi lê ti ala nzoni na ziango si ngoi ahon kamême, peut-être anze mingi, ngu oko wala même ahon so alingbi na ye so zo ni asara lani, ti mû lege na zo ni so a bi lo na gigi so ti fa so lo changé bê ti lo biani. Tongana bungbi ti a-ancien awara mbeti ti mbeni zo so a bi lo na gigi so ahunda ti kiri, ala yeke zia na sese mbeni komite ti kiringo na zo na bungbi, komite ni ayeke sara lisoro na zo ni. Komite ni ayeke gi ti bâ aye so afa biani so zo ni asara “akusala so alingbi biani na changengo bê”, na a yeke na ala ti mû desizion ti kiri na lo na bungbi na ngoi ni so wala pëpe.—Kus. 26:20.

³⁵ Tongana a bi zo ni so na gigi lani na yâ ti mbeni congrégation nde, si lo hunda ti kiri na bungbi, bungbi ti a-ancien ti fini congrégation so lo yeke dä ayeke zia na sese mbeni komite so ayeke sara lisoro na lo ti bâ lege ti tënë ni. Tongana a-ancien so asara komite ni abâ so zo ni alingbi ti kiri na bungbi, ala yeke tokua mbeti na bungbi ti a-ancien ti congrégation so abi zo ni lani na gigi dä ti fa na ala so ala ye ti kiri na zo ni na bungbi. Akomite ni use kue ayeke sara kua maboko na maboko ti bâ wala a bâ atënë ni kue awe, tongaso si ala mû mbeni desizion so ayeke na lege ni. Bungbi ti a-ancien ti congrégation so abi lani zo ni na gigi ayeke zia na sese mbeni komite ti kiringo na zo na bungbi ti bâ lege ti tënë ni, na a yeke komite ni so la ayeke mû desizion ti kiri na zo ni na bungbi.

LEGE TI FA TËNË NI NA CONGRÉGATION

³⁶ Tongana komite so ayeke bâ tënë ti zo so a bi lo na gigi wala so azi terê ti lo na bungbi abâ so biani zo ni achangé bê ti lo awe na so a peut ti kiri na lo na bungbi, a yeke sara tokua na yâ ti congrégation so abi lani zo ni na gigi dä ti fa so a kiri na lo na bungbi awe. A yeke sara nga tokua ti kiringo ti lo na bungbi na yâ ti congrégation so lo yeke fadeso dä. A lingbi a tene gï, a tene: “A kiri na [Iri ti zo ni] na bungbi tongana Témoin ti Jéhovah awe.”

TONGANA ZO NI AYEKE MBENI KETE MOLENGE SO AWARA BATÊME AWE

³⁷ Tongana mbeni kete molenge so awara batême awe la asara mbeni kota siokpari, a lingbi a sara tënë ni na a-ancien. Tongana a-ancien ayeke leke tënë ti kota siokpari so mbeni kete molenge so ade na gbe ti babâ na mama ti lo asara, a yeke nzoni babâ na mama ti lo so awara batême awe aduti dä. A lingbi ala sara kua maboko na maboko na a-ancien ti komite ni; me ala yeke tara pëpe ti sara si a gboto pëpe mê ti molenge ti ala so asara sioni, tongana a doit ti sara ni. Legeoko tongana ti so a yeke sara na mbeni kota zo so asara siokpari, komite so afâ ngbanga ni ayeke sara kue ti suku na molenge ni na ti kiri na lo na ndö ti nzoni lege. Ye oko, tongana molenge ni ake mungo maboko ni, a yeke bi lo na gigi ti bungbi.

TONGANA ZO NI AYEKE MBENI WAFANGO TËNË SO ADE TI WARA BATÊME APE

³⁸ Ka tongana a yeke mbeni wafango tënë so ade ti wara batême ape la si asara mbeni kota siokpari, a yeke sara tongana nyen? Teti so ade lo wara batême ape, a lingbi biani pëpe ti bi lo na gigi. Peut-être a yeke ngbanga ti so lo gbu nda ti andia so ayeke na yâ ti Bible nzoni ape; tongaso, wango so a yeke mû na lo na nzoni bê alingbi ti sara si lo kiri na ndö ti “alege so ayeke nzoni”.—aHéb. 12:13.

³⁹ Me tongana mbeni wafango tënë so ade ti wara batême ape asara kota siokpari na lo changé bê ti lo ape, atâa so a-ancien use awara lo na atara ti mû maboko na lo, a lingbi a sara tënë ni na congrégation. Na nduru tënë, a yeke tene: “[Iri ti zo ni] so ade ti wara batême ape ayeke wafango tënë encore ape.” Tongaso, congrégation ayeke bâ zo ni tongana zo ti gigi. Atâa so a bi lo na gigi ti bungbi ape, aChrétien ayeke sara hange ti ga nduru na lo (1 aCor. 15:33). Lo yeke bi rapport ti kusala ti lo encore ape.

⁴⁰ Tongana angoi ayeke hon, mbeni zo so ayeke lani wafango tënë so ade ti wara batême ape so a zi fango tënë na maboko ti lo alingbi ti hunda ti kiri ti ga wafango tënë. Tongana a si tongaso, a-ancien use ayeke kiri ti wara terê na lo ti bâ wala lo gue na li ni na lege ti yingo. Tongana a bâ so lo lingbi ti kiri ti ga wafango tënë, a lingbi ti sara nduru tokua so na congrégation: “A kiri a yeda na [Iri ti zo ni] so ade ti wara batême ape ti ga wafango tënë.”

JÉHOVAH AYEKE SARA TUFA NA NDÖ TI VORONGO NZAPA SO SIRIRI AYEKE DÄ NGA SO SALETÉ AYEKE DÄ APE

⁴¹ Azo kue so ayeke na yâ ti congrégation ti Nzapa laso alingbi biani ti duti na ngia na yâ ti paradis ti yingo so Jéhovah amû na awakua ti lo. Apere asi singo na ndo ti tengo pere ti e na lege ti yingo, nga e yeke na gbâ ti ngu ti tâ tënë so ayeke dë bê ti e. Na lege ti aye so a leke na yâ ti bungbi ti Jéhovah na gbe ti komandema ti Christ, Jéhovah ayeke bâ lege ti e nzoni (Ps. 23; És. 32:1, 2). So e yeke na yâ ti paradis ti yingo na yâ ti angoi ti wusuwusu ti lâ ti nda ni so, a sara si e duti nzoni.

⁴² Tongana e sara si siriri ayeke na yâ ti congrégation nga si saleté ayeke dä ape, e yeke ngbâ ti za lumière ti tâ tënë ti Royaume (Mat. 5:16; Jacq. 3:18). Na lege ti tufa ti Nzapa, e yeke duti ande na ngia ti bâ gbâ ti azo so ayeke manda ti hinga Jéhovah nga e na ala kue e yeke bungbi ti sara ye so Jéhovah aye.