A Wa Awafango Tënë ti Nzapa ti Sala Kusala ti Ala
NA YÂ ANZE so ahon ade ti ninga pëpe, awafango ye saki mingi abungbi tele ti wara fango lege. Ti londo na ndangba mbage ti nze ti mai, ngu 2001, ala bungbi tele na ndo sese kue na aKota Bungbi ti District ngbangbo mingi ti aTémoin ti Jéhovah, so li ti tënë ni ayeke “Awafango Tënë ti Nzapa.” A wa azo so aga ti fa ye na ala mveni, ti ga même azo so alingbi mingi ahon, na ti sala kusala ti ala ti awafango ye.
Mo gue lani na mbeni oko ti akota bungbi so? Tongana a yeke tongaso, kite ayeke pëpe so mo yekia lani pendere kobe ti yingo so a mû na ngoi ti abungbingo tele so, teti vorongo ti tâ Nzapa, Jéhovah. Ngbanga ti nyen pëpe ti bungbi na e fadeso ti kiri ti bâ kapa ti fango ye ti kota bungbi ni?
Kozo Lango Ni: Atënë so A Sû na Gbe ti Yingo Ayeke Nzoni Teti Fango Ye
Na lege ti diskur “Zia A Fa Ye na I, I Awafango Tënë ti Nzapa,” président ti kota bungbi ni atene na wâ gango nzoni na azo so aga. Na mandango ye na mbage ti Jéhovah so ayeke “Kota Wafango ye,” Jésus Christ aga Kota Wafango ye nga. (Isaïe 30:20, NW; Matthieu 19:16) Tongana e ye ti gue na li ni tongana awafango Tënë ti Nzapa, a lingbi e nga kue e zia si Jéhovah afa lege na e.
Na pekoni, a yeke mbage so atene “Fango Tënë ti Royaume Alë Anzo Lengo.” Na lege ti atënë so a hunda na awafango Tënë ti Nzapa so ahinga kusala nzoni, a gboto lê mingi na ndo angia na adeba nzoni so kusala ti salango adisciple ayeke ga na ni.
Na pekoni, a mû mbeni diskur so a pusu zo na kusala, so li ti tënë ni ayeke: “ ‘Apendere Ye ti Nzapa’ Adö Bê ti Ala.” Na kozo siècle, “apendere ye” so andu tënë ti Royaume ti Nzapa apusu azo na kusala. (Kusala 2:11) E nga kue e lingbi ti pusu azo na kusala na fango mara ti “apendere ye” tongana afango ye ti Mbeti ti Nzapa na ndo kota ngele, londongo ti awakinda, na fini mbele.
Diskur so a mû na pekoni awa azo kue ti “Wara Ngia na yâ Mbilimbili ti Jéhovah.” (Psaume 35:27) A mû maboko na e ti ngbâ ti tomba peko ti mbilimbili na mandango ti ndoye ye so ayeke mbilimbili na ti ke ye so ayeke sioni, na mandango Bible, na kengo na lege ti kusala angangu so alingbi ti sala sioni na dutingo ti e na lege ti yingo, nga na maïngo be-ti-molenge. Akapa tongaso ayeke mû ande maboko ti bata e yongoro na asioni kamarade, abango ndo ti sese so na ndo mosoro, nga na asalango ngia so andu ye ti pitan na salango ngangu na zo.
Diskur na ndo kota li ti tënë, so li ni ayeke “Ala Wara Ye Kue so Alingbi Tongana Awafango Tënë ti Nzapa,” adabe ti e so Jéhovah ayeke sala kusala na Tënë ti lo, yingo ti lo, nga na bungbi ti lo na sese ti sala si awakua ti lo alingbi kue. Na ndo lege ti sala kusala na Tënë ti Nzapa, wamungo diskur ni awa e tongaso: “Na lege ti fä, ye so e zia na gbele e ayeke ti mû tënë ti Bible so ayeke na ndo kugbe-mbeti ti pete na ndo bê ti awamango e.”
Li ti tënë ti kozo diskur na mbage ota ti Kota Bungbi ni ayeke “E Fa Ye na E Mveni na Ngoi so E Yeke Fa Ye na Ambeni Zo.” Kozo mbage ni agboto lê ti e so a lingbi e bata oko lege ti tambela ti aChrétien so ayeke na nduzu, so e yeke fa na ambeni zo. Mbage so aga na pekoni awa e ti ‘fa nda ti tâ tënë na lege ni.’ (2 Timothée 2:15) Ti fa ye na e mveni, a lingbi e manda Bible lakue nga nzoni, atâa a sala angu oke si e yeke sala na Nzapa. Ndangba mbage ti diskur so na mbage ota afa so Diable ayeke gi na yâ e amara ti bango ndo tongana baba, bibe ti dutingo na gbe ti yanga-ti-komande oko pëpe, yekiango tele ti zo mveni ahon ndo ni, mbanda, salango bê, suingo bê, batango tënë na bê, nga na kasango ndo lakue. Ye oko, tongana e ke na ngangu Diable, fade lo yeke kpe yongoro na e. Ti ke lo, a lingbi e ga ndulu na Nzapa.—Jacques 4:7, 8.
Diskur so a mû na tâ ngoi ni “Ke na Ngangu Porno so Ayeke Kä ti Sese” afa na e tongana nyen ti luti na gbele mara ti kpale tongaso, so alingbi ti futi dutingo ti e na lege ti yingo. Prophète Habaqouq atene na ndo Jéhovah: “Mo so lê ti Mo ti nzoni-kue alingbi bâ sioye pëpe na sioye anzere na lê ti Mo pëpe, tongaso, teti nyen Mo bâ ala so asala ye na handa? Teti nyen Mo sala tënë pëpe tongana zo ti sioni ahunzi zo so ayeke mbilimbili ahon lo?” (Habakuk 1:13) A lingbi e “ke na bê kue ye so ayeke sioni.” (aRomain 12:9, NW) A wa ababâ na mama ti bi lê na ndo ye so amolenge ti ala ayeke bâ na ndo ti Internet wala na singa-le. Wamungo diskur ni atene so a lingbi ala so porno agboto ala agi mungo maboko na mbage ti mbeni ndeko so ayeke biazo na lege ti yingo. A yeke duti nga ye ti nzoni ti gbu li na ndo ni na ti manda na li aversê tongana Psaume 97:10; Matthieu 5:28; 1 aCorinthien 9:27; aEphésien 5:3, 12; aColossien 3:5 na 1 aThessalonicien 4:4, 5.
Diskur so aga na pekoni, “Zia Siriri ti Nzapa Abata I,” adë bê ti e so tongana gingo bê ane na ndo e, e lingbi ti bi anengo kungba ti e na ndo Jéhovah. (Psaume 55:23 [55:22, NW]) Tongana e zi bê ti e na lo na yâ sambela, fade Jéhovah ayeke mû na e “siriri ti Nzapa,” dengo bê so zo ayeke na ni, so aga na lege ti songo ti ngele so e yeke na ni na lo.—aPhilippien 4:6, 7.
Kozo lango ni ahunzi na yâ ngia na lege ti diskur “Jéhovah Aleke Azo ti Lo Pendere na Lege ti Lumière,” so afa gango tâ tënë ti Esaïe chapitre 60. Na yâ bingo ti sese ti fadeso, “awande,” so ti tene azo mingi so asi singo ti ambeni ngasangbaga, ayeke wara lumière ti Jéhovah legeoko na aChrétien so a sa yingo na ndo ti ala. Na salango tënë na ndo aversê 19 na 20, wamungo diskur atene: “Fade Jéhovah “akui” mbeni pëpe, tongana lâ, wala “alï” mbeni pëpe, tongana nze. Fade lo ngbâ ti leke awakua ti lo pendere na sango lumière na ndo ti ala. So tâ pendere beku teti e so e duti na alâ ti nda ni ti sese so ayeke na yâ bingo!” Na hunzingo ti diskur ni, wamungo diskur ni afa sigingo ti buku Prophétie ti Isaïe, Lumière Teti Azo Kue, Mbage Use. Mo hunzi dikongo fini buku so awe?
Use Lango Ni: Ala Lingbi Kue ti Fa Nda ti Tënë na Ambeni Zo
Na peko ti lisoro so a sala na ndo versê ti use lango ni, e mä na kota nzala ni use diskur na mbage ota ti kota bungbi ni, “Awakua so na Lege ti Ala Ambeni Zo Aga Awamabe.” Awamungo diskur ni afa na gigi oko na oko akapa ota so andu mungo maboko na azo ti ga awamabe: kangbingo tokua ti Royaume, lengo nzala ti tënë ni so ala wara, nga fango na azo so asala nzala ti tënë ni ti bata ye so Christ akomande. Na lege ti ahundango tënë nga na ahakango peko ti aye so asi biani, e wara lege ti bâ mbilimbili tongana nyen e lingbi ti fa ye na ambeni zo ti ga adisciple.
Diskur so aga na pekoni ayeke na ndo li ti tënë “Zia Dutingo Ndulu na Nzapa na ndo Gbungo Ngangu ti Mo.” Wamungo diskur ni afa so ye so na nda ni ayeke kota ye mingi ayeke ‘gbungo ngangu ti e ti si na nda ni.’ (Matthieu 24:13) A lingbi e sala kusala na aye kue so Nzapa amû (sambela, mandango ye e mveni, abungbi, nga na kusala ti fango tënë) ti maï dutingo ndulu ti e na Lo. A lingbi e kpe anzala nga akusala ti sese si asala ngangu wala afuti pëpe mungo tele ti e na Nzapa.
Tongana nyen azo so asala kusala na vundu na ayeke na kungba so ane ala alingbi ti wara hungo tele laso? Diskur “Warango Dengo Bê na Gbe ti Joug ti Christ” amû kiringo tënë na hundango tënë so. Jésus atisa na nzobe adisciple ti lo ti ga na gbe ti joug ti lo na ti manda tënë ti lo. (Matthieu 11:28-30) E lingbi ti ga na gbe ti joug ti Jésus na mungo tapande ti fini ti lo so ye ayeke na yâ ni mingi pëpe nga so ayeke na lege ni. Atënë so a hunda na ala so azia aye mingi pëpe na yâ fini ti ala amû lege si akpengba tënë ti yâ ti diskur so aga nzoni ahon.
Mbeni oko ti akpengba mbage ti akota bungbingo tele ti aTémoin ti Jéhovah ayeke batême ti afini wakua ti Nzapa so amû tele ti ala na lo. Ita so amû diskur “Batême Asala si Amatabisi ti Fango Ye Aga Mingi Ahon” atene na wâ gango nzoni na ala so aye ti wara batême, na lo tisa ala ti wara mbage na yâ amatabisi ti kusala so ayeke kota ahon. Afini wafango Tënë ti Nzapa so awara batême awe na so asala ye alingbi na aye so a hunda na yâ ti Mbeti ti Nzapa alingbi ti gi ti yô akungba nde nde na yâ kongregation.
Kozo li ti tënë ti diskur so a mû na peko ti bekombite ayeke “Mû Tapande ti Kota Wafango Ye.” Na yayu, teti angu so a diko pëpe, Jésus abâ na amanda nzoni ye so Babâ ti lo asala; na lege so, lo ga Kota Wafango ye. Na ngoi so lo de na sese, lo sala kusala na akode ti fango ye so alë lengo tongana ahundango tënë so alï mingi nga atapande so akpengba pëpe me so apika bê. Jésus asala si fango ye ti lo aluti lakue na ndo Tënë ti Nzapa, na lo sala tënë na wâ, nga na ngangu. Bê ti e apusu e pëpe ti mû tapande ti Kota Wafango ye so?
Mbeni diskur ni nde so azingo zo, “Mo Yeke Ndulu ti Sala na Ambeni Zo Nde?” awa e ti mû tapande ti Jésus na salango na ambeni zo. (Jean 13:12-15) Wamungo diskur ni awa polele akoli so ayeke na akode ti duti tongana Timothée na gbungo angoi kue ti mû maboko na ambeni zo. (aPhilippien 2:20, 21) A wa ababâ na mama ti mû tapande ti Elkana na Hanna na mungo maboko na amolenge ti ala ti zia na gbele ala ti lï na yâ kusala ti ngoi kue. Nga, a wa apendere ti mû peko ti atapande ti Jésus Christ na pendere Timothée, na dutingo ndulu ti sala na ambeni zo. (1 Pierre 2:21) Atënë ti ala so awara ye ti nzoni na yâ salango na ambeni zo apusu nga e na kusala.
Kota li ti tënë ti ota diskur na mbage ota ayeke “Wara Nzoni Mingi Ahon na Lege ti Fango Ye ti Théocratie.” Kozo wamungo diskur ni agboto lê na ndo nene ti kono yâ ti ngoi so e yeke mû ti gbu li ngangu na ndo mbeni ye. Ti sala ye alingbi na ye so, e lingbi ti to nda ni kozoni kue na akete ngoi ti mandango ye; na pekoni e tara ti kono yâ ti ala. Lo wa nga azo so aga ti gi aversê ti Bible na ti mû a-note na ngoi ti abungbi. Use wamungo diskur ni agboto lê ti e na ndo nene ti ngbâ lakue ndulu na “tapande ti nzo tënë.” (2 Timothée 1:13, 14) Ti bata tele ti e na gbele afango ye ti ada-singa na alimon so andu pitan, asenda-ndara ti azo, akota zo ti kasango ndo, na afango ye ti a-apostat, a lingbi e vo ngoi teti mandango ye na gango na bungbi. (aEphésien 5:15, 16) Ndangba wamungo diskur na mbage ota so afa nene ti sala ye alingbi na aye so e manda si e lingbi wara ye ti nzoni kue na lege ti fango lege ti théocratie.—aPhilippien 4:9.
Bê ti e adö biani ngangu na ngia ti mä diskur “Afini Ye so A Leke Teti Guengo na Li ni ti E na Lege ti Yingo”! E wara ngia ti mä so na yâ ngoi kete, fade a yeke sigigi na mbeni fini buku so iri ni ayeke Wara Nzoni na Lege ti Ekole ti Kusala ti Théocratie. E yeke lani na kota nzala ti wara buku so na ngoi so wamungo diskur ni ayeke fa angbongboro tënë ti yâ ni. Na ndo mbage ti buku ni so a sala tënë ti ambeni kpengba wango na ndo mungo diskur, wamungo diskur ni atene: “Fini buku so abâ pëpe ambage 53 so ti nzoni dikongo mbeti, ti nzoni salango lisoro wala ti nzoni fango ye tongana mbeni buku ti da-mandango mbeti, me na lutingo na ndo akpengba-ndia ti Mbeti ti Nzapa.” Fade buku ni ayeke fa tongana nyen aprophète, Jésus, na adisciple afa na gigi lani anzoni kode ti fango ye. Biani, kite ayeke pëpe so buku so, nga na afini ye so a leke na yâ ti Ekole ti Kusala ti Théocratie, ayeke mû ande maboko na e ti duti awafango Tënë ti Nzapa nzoni ahon.
Ota Lango Ni: I Ga Awafango Ye Teti Ngoi Ni
Na peko ti mbeni lisoro na ndo versê ti ndangba lango ni, azo kue adengi mê na ndangba diskur na mbage ota ti kota bungbi ni, “Prophétie ti Malachie Aleke E Teti Lâ ti Jéhovah.” Malaki afa tënë ti prophétie ti lo ndulu na angu ngbangbo oko na pekoni so aJuif asigigi na Babylone na akiri na ndo ti ala. Ala kiri atï na yâ ti kengo tënë ti mabe na sioni, ala bi kamela na ndo iri ti Jéhovah na batango pëpe andia ti lo ti mbilimbili, nga na mungo na sadaka anyama so lê ti ala abuba, so azin, na so ayeke na kobela. Na ndo ni, ala yeke kangbi tele na awali ti lâ ti pendere ti ala, peut-être ti sala mariage na awali païen.
Kozo chapitre ti prophétie ti Malaki adë bê ti e na ndoye ti Jéhovah teti azo ti lo. A gboto lê na ndo nene ti duti na kpengo mbito ti yekiango zo, nga na bê ti kiri singila teti aye so ayeke nzoni-kue. Jéhovah aku na mbage ti e ti tene e sala na lo na bê kue, na vorongo lo ngbanga ti ndoye ti kion pëpe so e yeke na ni na mbage ti lo. A lingbi kusala ti e ti nzoni-kue aduti pëpe gi mbeni senge ye so e sala gi tongaso, na e yeke na tënë ti kiri na gbele Nzapa.
Na salango kusala na use chapitre ti Malaki ti tingbi na ngoi ti e, use wamungo diskur na mbage ota so ahunda: “E yeke bata biani si a wara pëpe ‘ye ti kirikiri na yanga ti e’?” (Malaki 2:6, NW) A lingbi ala so amû li ni na yâ fango ye abâ nzoni si ye so ala yeke tene aluti ngangu gi na ndo Tënë ti Nzapa. A lingbi e ke mara ti salango ye na handa tongana kangbingo tele na lege ni pëpe na koli wala wali ti e.—Malachie 2:14-16.
Na gbotongo lê na ndo kota li ti tënë “Fade Zo Wa Asö Kuâ na Lâ ti Jéhovah?” ndangba wamungo diskur na yâ diskur na mbage ota ni amû maboko ti leke e teti lâ ti Jéhovah. Wamungo diskur ni atene: “So tâ dengo bê si ayeke teti awakua ti Jéhovah ti hinga so Malachie chapitre 3, versê 17, awara kota gango tâ tënë ti lo na ndo ala! Lo tene: ‘Fade ala yeke ti Mbi, Jéhovah ti aturugu atene, même mosoro ti Mbi mveni na lâ ni so Mbi leke; na fade Mbi sala be-nzoni na ala, legeoko tongana babâ asala be-nzoni na molenge ti lo mveni so asala kusala ti lo.’”
Mbeni kpengba mbage ti kota bungbi ni ayeke drame “Yekia Ngangu ti Komande ti Jéhovah,” so agboto lê na ndo amolenge ti Qorah. Atâa salango ye ti babâ ti ala ti ke yanga ti Moïse na Aaron, ala ngbâ be-ta-zo na Jéhovah nga na ala so asala kusala na iri ti Lo. Na ngoi so Qorah na ala so amû peko ti lo akui, amolenge ti Qorah asö fini ti ala. Diskur so aga na pekoni, “Na Be-biani, Duti na Gbe ti Ngangu ti Komande ti Nzapa,” atingbi tënë ti yâ ti drame ni na e oko oko kue. Wamungo diskur ni agboto lê na ndo ambage omene so na yâ ni Qorah na ala so amû peko ti lo asala kusala ti ala pëpe: ala mû mbage pëpe na be-biani na ngangu ti komande ti Jéhovah; ala zia lege na baba, nzala ti wara kota ndo, na mbanda ti hon ndo ti ala; ala bâ gi awokongo ti ala so Jéhovah ahiri na kusala; ala maï mbeni bibe ti kasango ndo; ala wara ngia pëpe na yâ matabisi ti kusala ti ala; na ala zia lege si akamba ti songo na ti sewa aga kozo na dutingo be-ta-zo ti ala na Jéhovah.
Kota li ti tënë ti kota diskur ni ayeke: “Azo Wa Ayeke Fa Tâ Tënë na Amara Kue?” Tâ tënë so a sala lisoro na ndo ni ayeke pëpe tâ tënë gi tongaso, mê tâ tënë na ndo ye so Jéhovah aleke ti sala, na so Jésus Christ asala tënë ti témoin na ndo ni. Wamungo diskur ni asala tënë ti tâ tënë so andu atënë ti mabe, tâ tënë na ndo lege ti vorongo Nzapa, na tâ tënë na ndo tambela ti zo oko oko. Lege so a haka aChrétien ti kozo siècle na aTémoin ti Jéhovah laso akpengba bibe ti e so ‘Nzapa ayeke na popo ti e biani.’—1 aCorinthien 14:25.
Na peko ti mbeni ndulu tënë na ndo article ti Tour ti Ba Ndo ti yenga ni, diskur ti kongo nda ni, “Zia E Sala Kusala ti E ti Fango Ye Fade Fade,” apusu awafango Tënë ti Nzapa kue so aga, ti sala ye alingbi na ye so ala mä. Mbeni ndulu tënë so a mû ti kiri ti fa atënë so a bâ na programme ni agboto lê na ndo nene ti sala kusala na Mbeti ti Nzapa na yâ fango ye, alege so na yâ ni e lingbi ti ga awafango ye so alingbi kue, nga na nene ti zia bê kue na yâ tâ tënë so e fa na ambeni zo. Wamungo diskur ni awa e ti sala si ‘azo kue alingbi ti bâ guengo na li ni ti e’ na ti ‘sala hange lakue na e nga na fango ye ti e.’—1 Timothée 4:15, 16.
So tâ kobe ti yingo si e wara na Kota Bungbi ti District “Awafango Tënë ti Nzapa”! Zia e mû tapande ti aKota Wafango ye ti e, Jéhovah na Jésus Christ, na fango na ambeni zo tënë ti Nzapa.
[Encadré/Afoto na lembeti 28]
Afini Mbeti Ti Kaï Ambilimbili Bezoin So Atia
Azo so aga na Kota Bungbi ti District “Awafango Tënë ti Nzapa” awara na kota ngia ambeti use so ayeke duti ye ti mungo maboko mingi na yâ fango tâ tënë ti Mbeti ti Nzapa na azo na yâ ambeni mbage ti sese. Tract so li ti tënë ni ayeke Mo Yeke na Mbeni Yingo so Alingbi ti Kui Pepe? ayeke duti ande mbeni kpengba ye ti kusala so ayeke mû maboko na zo ti to nda ti alisoro na ala so ayeke na yâ ti akodoro so ayanga so azo ni ayeke tene azia pëpe kangbi na popo ti “âme” na “yingo.” Fini tract ni afa polele so ngangu ti yingo ayeke nde na zo ti yingo, na azo ayeke ga pëpe azo ti yingo tongana ala kui.
Na hunzingo ti use lango ti kota bungbi ni, a fa sigingo ti brochure Une vie pleinement satisfaisante: comment?. A leke brochure so ti to nda ti amandango Bible na ala so abi bê pëpe na ndo mbeni Wasalango ye so ayeke na alengo nga na ndo mbeni buku so a sû ni na gbe ti yingo ti Nzapa. Mo wara lege awe ti sala kusala na afini mbeti so na yâ kusala ti mo ti fango tënë?
[Afoto na lembeti 26]
Na Milan, Italie, nga na akota bungbi na ndo sese kue, azo ngbangbo mingi awara batême
[Foto na lembeti 29]
Drame “Yekia Ngangu ti Komande ti Jéhovah” andu bê ti azo so aga