Fango ye wa alingbi ti sala si gigi ti mo aga nzoni?

A SI na mo awe ti bâ so akpale ahon ndo ti mo, mo bâ mo tene akpale ni agbu mo na go? Ye oko, bâ so mo ye ti leke ambeni kpale ni, me mo leke ni na lege ni pëpe. So pasi! Tapande so aye ti fa atene a dü zo oko pëpe na ngangu ti leke akpale ti lo kue na lege ni, wala ti mû gi anzoni desizion lakue. Nda ni la si a yeke kota ye ti tene zo awara nzoni fango ye. Me, na ndo wa la mo lingbi ti wara nzoni fango ye si a leke mo ti luti na gbele akpale?

Akota zo nga na amaseka mingi abâ ti ala so kota ye ayeke ti manda ye na ekole. Ambeni wandara atene so “tongana mo wara mbeni diplôme ti kota da-mbeti pëpe, mo lingbi lâ oko pëpe ti wara nzoni kua ti nginza.” Ye oko, aye mingi ayeke dä so zo ayeke na bezoin ti wara ni me so a hunda pëpe ti wara diplôme si. Na tapande, mandango mbeti ayo ayeke mû maboko na mo ti duti nzoni babâ wala mama? Ti duti nzoni koli wala nzoni wali ti da? Nga ti duti nzoni kamarade? Ti bâ ni nzoni, ambeni zo so azo a gonda ala ndali ti akota diplôme so ala wara, mo lingbi ti bâ so salango ye ti ala nga na dutingo ti sewa ti ala anzere pëpe. Même ambeni ayeke fâ tele ti ala.

Ambeni abâ ndo na mbage ti abungbi ti vorongo nzapa ti wara fango lege, me na pekoni vundu asala ala ndali ti so ala wara pëpe tâ fango ye so alingbi ti mû maboko na ala ti luti na gbele akpale ti ala. A yeke ye so asi lani na Emiliaa, mbeni wali na kodoro ti Mexique. Lo tene: “A sala ngu 15 awe, mbi bâ so mbi na koli ti mbi, e lingbi pëpe ti ngbâ ti duti koli na wali. Lakue gi papa. Mbi sala gbä ti tene lo ke sämba. Mingi ni, mbi yeke zia akete molenge ti e gi ala oko na da ti gue ti gi koli ti mbi. Ye ni ahon tâ ndo ti mbi lani. Fani mingi mbi gue na église ti gi mbeni ye ti leke na kpale so. Atâa so ngoi na ngoi a yeke diko Bible kâ, mbi mä lâ oko pëpe mbeni wango so andu tâ kpale ti mbi; nga zo oko aga ndulu na mbi pëpe ti fa na mbi ye so mbi lingbi ti sala. Kete ngoi so mbi mû lani ti duti na yâ ti église na ti tene peko ti asambela lege mingi asala ye oko na mbi pëpe.” Ambeni awara vundu mingi tongana ala yeke bâ so akota zo ti église ti ala azia nzoni tapande pëpe. Ye so asala si azo mingi abâ pëpe abungbi ti vorongo nzapa tongana nzoni ndo so alingbi ti fa ye na azo si gigi ti ala aga nzoni.

Na bango ye so, mo lingbi ti hunda tele ti mo: ‘Ti tene gigi ti mbi aga nzoni, a lingbi mbi wara fango ye wa?’ Atâ Chrétien alingbi ti kiri tënë na kota hundango ndo so? A yeke bâ tënë so na yâ article ti peko.

[Kete tënë na gbe ni]