Fango ye so ague na zo na fini
1 Ti bâ nzerengo tere ti azo tongana ala hinga tâ tënë so alondo na yâ Mbeti ti Nzapa amû ngia na bê mingi! Biani, ti fa na azo hingango ye ti Nzapa nga na aye so lo leke ti sara ndali ti azo ayeke mbeni ye so amû ngia mingi. Mara ti fango ye tongaso alingbi ti gue na zo na fini ti lakue lakue.—Jean 17:3.
2 Nda ni so a hon fango ye ti azo. Laso azo ayeke manda aye nde nde na alege nde nde (Zo-ti. 12:14). Me hingango ye ti ala ayeke ye oko pëpe tongana a haka ni na “kota kusala ti Nzapa”. (Kus. 2:11). Ye so azo ayeke fa na amba ti ala apusu ala nduru na Wasarango ala pëpe nga a mû lege na ala pëpe ti hinga ye so Jéhovah aleke ti sara. A mû nga maboko na azo ni so pëpe ti hinga ye so asi tongana zo akui wala ngbanga ti nyen zo ayeke bâ pasi mingi. Fango ye ti ala ni amû beku oko na zo pëpe. A sara nga si azo aduti nzoni na yâ ti sewa ti ala pëpe. Gi fango ye ti Nzapa si ayeke mû atâ kiringo tënë na akota tënë so andu fini ti zo.
3 Fango ye ti Nzapa ayeke sara si azo ayeke wara nzoni sarango ye, mbeni ye so atia azo mingi laso. Azo so ayeda na afango ye ti Bible na ala sara ye alingbi na ni, Mbeti ti Nzapa ayeke zi biaku na yâ ti bê ti ala tënë ti mara nga tënë ti yengo kodoro ti mo zo mveni ngangu (aHéb. 4:12). A pusu azo ti zia alege kue ti sarango ngangu na amba ti ala nga ti “yü zo-ti-fini”. (aCol. 3:9-11; Mi. 4:1-3). A mû nga ngangu na azo gbani gbani ti hon ndo ti asioni sarango ye so alï ala ngangu, asarango ye so Nzapa ake.—1 aCor. 6:9-11.
4 Ngbanga ti nyen ti ku pëpe? Kota Wafango ye na e ayeke gboto lê ti e na ndo nene ti ngoi so e yeke dä. Na yâ ti atënë ti lo ti fango ngbanga so lo tënë giriri, ambeni tënë ayeke dä so alingbi tâ na ngoi ti e na so a lingbi e fa ni na ndo kue (Apoc. 14:6, 7). Atënë ni ayeke so: Christ ayeke komande fadeso na yayu, a ga nduru ti futi abungbi ti vorongo kue ti wataka, nga Royaume ti Nzapa aga nduru ti futi angorogbia kue ti sese so (Dan. 2:44; Apoc. 11:15; 17:16). Ni la, a lingbi azo asara ye hio ti yeda na Gbia so ayeke komande fadeso na iri ti Nzapa, ti sigigi na yâ ti Kota Babylone na ti di iri ti Jéhovah na yâ mabe (Ps. 2:11, 12; aRom. 10:13; Apoc. 18:4). Zia e mû mbage ti e kue ti fa na azo hingango ye so ayeke gue na ala na fini.