Wara nzoni na lege ti pendere fango ye so ayeke dä laso!

MBETI ti Nzapa afa Jéhovah tongana Zo so asala ye kue, même e azo nga (Genèse 1:27; Apocalypse 4:11). Teti so Jéhovah ayeke Maître wala Kota Wafango ye, lo fa ye na Adam na Eve, lo fa nga na ala tongana nyen ti duti na fini na yâ pendere yaka ti Eden. Ye so lo ye fade ayeke ti ngbâ ti fa ye na ala na ti bâ lege ti ala lakue lakue (Genèse 1:28, 29; 2:15-17; Esaïe 30:20, 21). So pendere ye!

Mawa ni ayeke so Adam na Eve abi ye kue na ngu. Kengo yanga ti ala asala si tele ti azo nga na salango ye ti ala ato nda ti buba (Genèse 3:17-19; aRomain 5:12). Ti azo so aduti na fini gi ngoi kete na peko ti so Nzapa asala akozo zo, Mbeti ti Nzapa atene: “L’Eternel abâ sioye ti zo ayeke kota na sese; lakue, suma kue ti bibe ti bê ti zo ayeke gi sioni.”​—Genèse 6:5.

A sala fadeso ngu 4 500 awe so Jéhovah atene so zo aye gi ti sala ye ti sioni. Ti laso, ye ni ayeke sioni ahon ndo ni. Azo mingi ayeke tene mvene, ayeke nzi ye wala ayeke sala sioni na amba ti ala sân kamene. Lâ na lâ, akpale ayeke gue na li ni, me bingo bê na mba ayeke kiri ti lo gi na peko. Mbilimbili mango tele ayeke na popo ti azo pëpe, même azo ti sewa oko. A yeke tongaso pëpe? Ye oko, a lingbi ti bi tënë ti aye so na ndo ti Nzapa pëpe, nga a lingbi pëpe ti tene so tënë ti akpale ti laso agbu bê ti lo pëpe. Biani, tënë ti nzoni duti ti azo angbâ lakue ti gbu bê ti Jéhovah. Lo yeke lakue ndulu ti fa ye na ala so ayeke gi lo ti tene lo fa na ala lege ti warango ngia na yâ gigi ti ala. A sala ngu 2 000 awe so lo tokua lani Molenge ti lo, Jésus Christ, na sese. Jésus afa so Jéhovah ayeke na nzara mingi ti fa na azo ye so ala lingbi ti sala ti tene gigi ti ala aga nzoni. Jésus azia lani tapande ti fango ye so ayeke mbilimbili-kue ngbanga ti so a yeke Kota Wafango ye si afa ye na lo na yâ ti angu mingi.

Bungbi ti atâ Chrétien ayeke fa ye na azo

A yeke Jésus Christ si azia na sese bungbi ti atâ Chrétien. Gunda ti salango ye ti ala aluti na ndo ndoye. Ndali ti so ala ye ti sala si iri ti Nzapa awara gonda, azo so ayeke na yâ bungbi ti atâ Chrétien ayeke sala si bibe ti ala nga na kusala ti ala kue ague oko na ye so bê ti Nzapa aye (Matthieu 22:37-39; aHébreu 10:7). Zo so ayeke na gunda ti aye so Jésus afa na ndo salango ye ti azo so ayeke Babâ ti lo, Jéhovah. Na ndo maboko so Nzapa amû na Jésus, Jean 8:29 atene: ‘Lo so ato Mbi, Lo yeke na Mbi. Lo zia Mbi pëpe, teti Mbi sala ye so amû ngia na Lo lakue.’ Biani, Babâ ti Jésus amû maboko na lo lakue nga afa lege na lo na yâ kusala ti lo ti fango tënë. A zia pëpe akozo disciple ti Jésus ti luti gi senge tongaso na gbele akpale ti gigi. Nde na so, Jéhovah afa ye na ala na lege ti Molenge ti lo. Salango ye alingbi na aye so Jésus afa nga mungo tapande ti lo asala si ala yeke lani anzoni zo ahon azo ti ngoi ti ala. Adisciple ti lo ti laso ayeke nga tongaso.—Bâ li ti tënë “Ye so Jésus nga na afango ye ti lo asala na ndo ti azo”, na lembeti 6.

Mbeni oko ti akota ye so a lingbi ti hinga na bungbi ti atâ Chrétien ayeke so fango ye ti bungbi ni ayeke lï na yâ ti li ti azo nga a ndu bê ti ala si ala gbian ye so ayeke tâ na gbe ti bê ti ala (aEphésien 4:23, 24). Ti mû gi mbeni tapande, bâ ye so Jésus afa na ndo tënë ti dutingo be-ta-zo na koli wala wali ti mo. Lo tene: “I mä awe tënë so A tene giriri, A lingbi mo sala lango-sioni pëpe. Me Mbi tene na i, zo so abâ mbeni wali na nzara ti wali ni asala lo—na yâ bê ti lo, lo sala lango-sioni na lo awe.” (Matthieu 5:27, 28). Na lege ti tënë so, Jésus ayeke fa na adisciple ti lo so a lingbi ala bata bê ti ala si sioni alï dä pëpe. Lo ye nga ti fa so même tongana ade zo asala ye ti sioni pëpe, me lo yeke na abibe nga na anzara so ayeke na lege ni pëpe, ye ti sioni alingbi ti ga na pekoni. A yeke tâ tënë so asioni bibe alingbi ti gue na zo ti sala aye so ayeke zia vundu na bê ti Nzapa nga na bê ti amba ti lo.

Ni la, Mbeti ti Nzapa amû wango so: “I tambela na lege ti sese so pëpe, me i changé lege ti i na lege ti bibe ti fini, si i lingbi hinga ye so Nzapa aye, ye so ayeke nzoni, ye so alingbi na lê ti Lo, na ye so alingbi kue.” (aRomain 12:2). Peut-être mo yeke hunda tele ti mo: ‘Fango ye alingbi ti changé bibe ti zo biani?’ Ti changé bibe ti mbeni zo aye ti tene ti yôro akpengba-ndia nga na awango ti Mbeti ti Nzapa na yâ ni si a pusu bibe ti zo ni ti sala ye ti nzoni. Ye ni ayeke si tongaso tongana zo ayeda na fango ye so Nzapa amû na yâ ti Mbeti ti lo.

Ye so apusu zo ti gbian

“Tënë ti Nzapa ayeke na fini, na a yeke na ngangu ti sala ye.” (aHébreu 4:12). Teti so Tënë ti Nzapa angbâ lakue ti sala ngangu na ndo ti azo, a ye ti fa so a yeke ga ngbele ye pëpe. Tënë ti Nzapa alingbi ti pusu zo ti gbian salango ye ti lo, ti ga na yâ bungbi ti atâ Chrétien nga ti ga mbeni zo so lo yeke nzoni ahon ti kozo. Atapande so ayeke na gbe ni ge afa atene ye so zo amanda na yâ ti Bible ayeke nzoni mingi.

Emilia, so e sala tënë ti lo na kozo article, atene: “Ngangu so mbi oko mbi sala lani ti leke akpale ti yâ ti sewa ti mbi alingbi pëpe. A yeke na ngoi so aTémoin ti Jéhovah ato nda ti manda Bible na mbi awe si mbi ga ti bâ so ye alingbi ti ga nzoni na yâ sewa ti mbi, na tongaso mbi to nda ti gbian bango ndo ti mbi. Mbi manda ti kanga bê na ti sala ngonzo hio pëpe. Na pekoni, koli ti mbi kue abungbi na mbi ti manda Bible. Ti ke sämba ayeke lani kete ye na lo pëpe, me lo wara lege ti sala ni. Ye so amû lege na e ti kiri ti leke mariage ti e nzoni. Ti fadeso, e yeke aChrétien so ayeke na ngia na e yeke yôro apendere kpengba-ndia ti Mbeti ti Nzapa na yâ bê ti amolenge ti e.”—Deutéronome 6:7.

Ye so atâ Chrétien ayeke fa alingbi ti sala si zo azia lege ti aye ti sioni nga na ye ti pitan. Na a yeke ye so asi na mbeni koli so iri ti lo ayeke Manuel.a Tongana lo yeke ândö na ngu 13, lo lango na da mbeni pëpe na lo to nda ti nyon mbangi. Na pekoni, lo yeke nyon ambeni mara ti ambangi so ayeke ngangu mingi ahon ti so lo nyon kozo. Ti wara nginza nga na ndo ti lango, lo yeke sala pitan na amba ti lo koli nga na awali. Ngoi na ngoi, ti wara kobe ti yanga ti lo, lo yeke gbu azo na ngangu ti mû ye ti ala. Mbangi ayeke sala lo lakue. A kanga lo lege mingi ndali ti aye ti ngangu so lo sala. Mbeni lâ, a kanga lo ngu osio; me na yâ ti da ti kanga kâ lo yôro tele ti lo na yâ ti kua ti kango angombe ti bira na ambeni ye tongaso. Na peko ti so lo mû wali, Manuel angbâ ti bâ pasi mingi ndali ti aye so lo yeke sala. Lo tene: “Na mbeni ngoi, mbi na wali ti mbi e lango na yâ ti ngbele da ti batango akondo. Mbi ngbâ ti dabe ti mbi na ambeni ngoi so wali ti mbi ayeke tö ye lani gi na ndo ti abrique. Ndali ti pasi so e yeke bâ, afami ti mbi wani ahanda wali ti mbi ti tene lo ke mbi.”

Ye oko, nyen la asala si gigi ti Manuel achangé? Lo tene: “Mbeni zo so mbi hinga lo aga na yanga-da ti e na lo fa tënë ti Nzapa na mbi. Mbi yeda ti tene lo kiri lakue ti bâ mbi ti tene mbi fa na lo so mbeni Nzapa so ayeke bi bê na zo ayeke ti lo dä pëpe. Mbi bâ ti mbi so, dutingo ti mbi lani afa biani so Nzapa ayeke bi bê ti lo na zo pëpe. Ye so apika bê ti mbi ayeke so Témoin ni ahinga ti kanga bê nga lo yeke kpe zo. Tongaso, mbi yeda ti gue na bungbi na Da ti Royaume. Atâa so ambeni zo so ayeke kâ ahinga mbi na aye so mbi yeke sala, ala bala mbi na ngia na yanga ti ala. Ala sala si mbi bâ tele ti mbi tongana mbeni zo so ayeke na yâ ti bungbi ni awe. Na a yeke lani mbeni ye so akpengba mbi mingi. Ye ni andu mbi  mingi, na tongaso mbi zia lege ti kango ambangi ni na mbi gi mbeni kua so ayeke nzoni. Nze osio na peko ti so mbi to nda ti manda Bible, mbi ga wafango tënë so ade ti mû batême pëpe, nga nze osio na pekoni mbi ga Témoin ti Jéhovah.”

Fango ye ti atâ Chrétien asala nyen na Manuel nga na sewa ti lo? Manuel atene: “Tongana a fa atënë ti Bible na mbi pëpe, ka mbi kui a ninga awe. Nzoni salango ye so Jésus afa asala si nzoni mango tele akiri na yâ sewa ti mbi. Amolenge use so mbi yeke na ala alingbi pëpe ti bâ mara ti pasi so mbi bâ na ngoi so mbi de maseka. Tele ti mbi anzere mingi, nga mbi kiri singila mingi na Jéhovah ngbanga ti nzoni duti so ayeke na popo ti mbi na wali ti mbi fadeso. Ambeni zo so ahinga mbi kozo agonda mbi, nga ala tene na mbi so nzoni salango ye ni la mbi yeke na ni fadeso.”

Na popo ti aChrétien, nzoni salango ye ague gere oko na dutingo na saleté pëpe. John, so lo lango na mbeni vaka so azo ti mawa ayeke dä mingi na Afrika ti Mbongo, aga ti bâ so a lingbi lo nga kue lo sala ye tongaso. Lo tene: “A yeke si so dimanche oko molenge ti e ti wali asukula ngu pëpe, na zo oko ayeke zi yanga na lo na ndo ni pëpe.” Wali ti lo ahinga nzoni mingi so saleté angoro da ti ala kue, me lo sala mbeni ye pëpe. Ye oko, ye so a fa na ala na yâ ti Bible asala si ala gbian. John azia lege ti kua ti nzingo akutukutu, na lo to nda ti bâ lege ti sewa ti lo nzoni. Lo tene: “E manda so e so e yeke aChrétien, a lingbi tele ti e nga na bongo ti e aduti na saleté pëpe. Versê so mbi ye ni mingi ayeke 1 Pierre 1:16, so awa e ti ga nzoni-kue ngbanga ti so Jéhovah Nzapa ayeke nzoni-kue. Ti fadeso, atâa so da ti e ayeke gi mbeni senge da, e yeke sala kue ti tene a duti pendere.”

Mo lingbi ti wara pendere fango ye

Atapande so e bâ na nduzu ge ayeke aye so asi mingi. Kua ti fango Bible na azo asala si gigi ti azo saki mingi aga nzoni ahon ti kozo. Teti so ala yeke sala ye na lege ti nzi pëpe nga ala yeke sala kua ngangu, apatron ti ala ayeke ne ala mingi. Ala ga anzoni voizin, anzoni kamarade nga ala yeke bi bê na nzoni duti ti amba ti ala. Ala leke na bê ti ala ti ke aye so ayeke sioni nga na abango ndo so ayeke ti mitele. Tongaso, ala yeke bâ lege ti seni ti ala, bibe ti ala nga na bê ti ala si a duti nzoni. A hon ti mû aye so ala yeke na ni ti sala gi na aye ti sioni, ala yeke mû ni ti bata na tele ti ala nga na sewa ti ala (1 aCorinthien 6:9-11; aColossien 3:18-23). Aye ti nzoni so azo awara na peko ti so ala bata aye so Jéhovah afa na yâ ti Bible, afa biani so ti sala ye tongana ti so a hunda na atâ Chrétien ayeke nzoni mingi. Nga, bungbi ti atâ Chrétien ayeke mû pendere fango ye na azo laso. Ni la, na ndo zo so ayeke kpe andia ti Nzapa, Bible atene: “Ye kue so zo so asala aga nzoni.”​—Psaume 1:3.

A nzere na e mingi ti hinga so Jéhovah, Nzapa ti Ngangu Ahon Kue, aye na bê ti lo kue ti fa ye na e. Lo mveni lo tene: “Mbi yeke L’Eternel Nzapa ti mo, Lo so awa mo si mo ga nzoni, Lo so afa na mo lege so a lingbi mo tambela dä.” (Esaïe 48:17). Biani, Jéhovah ayeke sala kusala na tapande nga na afango ye ti Molenge ti lo Jésus ti fa lege so na e. Afango ye ti Jésus agbian fini ti azo mingi so ahinga lo na ngoi so lo yeke lani na ndo sese. Gi oko mara ti ye so la ayeke si na azo so ayeke bata afango ye ti lo laso. Ngbanga ti nyen mo mû mbeni ngoi ti manda ye mingi na ndo ti afango ye so pëpe? A yeke nzere ande mingi na aTémoin ti Jéhovah ti ndo so mo lango dä ti mû maboko na mo ti wara pendere fango ye tongaso.

[Kete tënë na gbe ni]

[Encadré/Foto na lembeti 6]

Ye so Jésus nga na afango ye ti lo asala na ndo ti azo

Teti so lo yeke mokonzi ti azo ti rongo nginza ti lampo, Zachée aga lani zo ti mosoro ndali ti so lo yeke nzi nginza ti asenge zo. Me na salango ye alingbi na afango ye ti Jésus, Zachée agbian salango ye ti lo so.​—Luc 19:1-10.

Saul ti Tarse azia ti sala ye ti ngangu na aChrétien, na pekoni lo ga Chrétien nga na nda ni lo ga bazengele Paul.​—Kusala 22:6-21; aPhilippien 3:4-9.

Ambeni Chrétien ti Corinthe ayeke ândö ‘azo ti pitan, azo ti sambelango ayanda, azo so asala lango-sioni, akoli so asala lango-sioni na ambeni koli, azo ti nzi, azo so bê asala ala, angbâa ti sämba, awazonga, na azo ti gbungo ye na ngangu’. Me tongana ala lï na yâ vorongo ti atâ Chrétien awe, ‘A sukula ala, Nzapa abata ala nde teti Lo mveni, A diko ala azo ti mbilimbili na lege ti iri ti Seigneur Jésus Christ’.​—1 aCorinthien 6:9-11.

[Foto na lembeti 7]

Bible alingbi ti fa na mo tongana nyen ti sala si gigi ti mo aga nzoni