Lawa la bira ti Harmaguédon ayeke si?

‘Mbi bâ ndo, na bâ, azo mingi mingi, so mbeni zo alingbi ti diko wungo ti ala pëpe, ala londo na popo ti amara kue, akete mara kue, azo ti kodoro kue, ayanga ti kodoro kue, ala sigigi na yâ ti kota ye ti vundu si ala ga.’​—APOCALYPSE 7:9, 14.

AYE so ayeke si laso afa so bira ti Harmaguédon aga nduru ti si awe. Nyen la afa ni nyen?

Laso na ndo ti sese mobimba a yeke wara azo so ayeke sara na Jéhovah nga so ayeke kpe andia ti lo so ayeke na yâ ti Bible. Na ngangu ti Nzapa, azo kutu mingi, ti akodoro kue, ti amara kue nga na ti ayanga ti kodoro kue, abungbi oko ala ga mbeni kota sewa ti aita. A-Témoin ti Jéhovah ayeke mara ti sewa so.​—Jean 13:35.

Na yâ ti kete ngoi, Satan ayeke bungbi aturugu ti lo ti ga ti sara kota bira na azo so, so aduti ti ala na yâ ti siriri. Ala kpa azo so mo bâ mo tene mbeni zo ti mû maboko na ala ayeke dä pëpe (Ézéchiel 38:8-12; Apocalypse 16:13, 14, 16). Nyen la afa ni nyen? Bible afa anzene nzene ye so ayeke si ande ti mû maboko na e ti hinga lawa si bira ti Harmaguédon ni ayeke si. Mingi ti aye ni so asi na ndembe so e yeke dä.

Aye so ayeke si fadeso na gbe ti lê ti mo

Adisciple ti Jésus ahunda na lo ti fa na ala ye so ayeke mû lege na azo ti hinga so “nda ti ngoi so” aga nduru (Matthieu 24:3, La Sainte Bible en sango). Jésus afa na ala so na mbeni ngoi “mara ayeke londo na bira na tere ti mbeni mara, na royaume ayeke londo na bira na tere ti mbeni royaume. Fade kota nzara ayeke tï nga sese ayeke yengi, na aye so ayeke si na ando nde nde na peko ti tere.” Lo ngbâ lo tene: “Aye so kue ayeke tongo nda ti aye ti vundu so akpa songo yâ so agbu wali so aye ti dü.” (Matthieu 24:7, 8). Bazengele Paul airi ngoi ni so “lâ ti nda ni,” lo tene a yeke “angoi ti akpale so ayeke ngangu na zo ti kanga bê na yâ ni”. (2 Timothée 3:1). Ti mo, aprophétie so alingbi na ngoi ti e?

Ngbanga ti nyen a tene so ngoi ni so ayeke duti ngangu na azo? Bazengele Jean afa ndani. Lo tene lani so a yeke bi Satan na asioni yingo ti lo na ndo ti sese, na so a yeke ngbâ na ala “ngoi mingi pëpe.” Lo tene nga so “kota ngonzo” ayeke sara Satan na yâ ti kete ngoi so angbâ na lo so (Apocalypse 12:7-12). Mo bâ ape? Azo laso ayeke sara ngonzo mingi nga ala yeke sara sioni na amba ti ala, gi na ndo oko pëpe me na ndo kue.

Jésus atene nga so na yâ ti ngoi ti ngangu so, ambeni zo ayeke sara mbeni kota kusala. Lo tene: “A yeke fa ande nzoni tënë ti royaume [ti Nzapa] na ndo ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” (Matthieu 24:14). Laso, na akodoro ahon 235, aTémoin ti Jéhovah ayeke fa nzoni tënë ti Royaume ti Nzapa na lege ti ambeti so ala sara na ayanga ti kodoro 500 na ndo ni tongaso. Tour ti Ba Ndo na Réveillez-vous! ayeke ambeti so ala sigigi na ni na so a kangbi ni mingi ahon tanga ti ambeti-sango kue ti dunia so. Ala kiri nga peko ti Bible na ayanga ti kodoro 100 tongaso. A yeke na bê ti ala wani si aTémoin ti Jéhovah ayeke sara kusala ti ala ni, a futa ala ndali ni pëpe, nga a yeke na lege ti anginza so azo amû na bê ti ala kue la si a yeke sara na kusala ni so. Mo pensé so kusala ti fango tënë so ague oko na prophétie ti Jésus so ape?

Bible asara nga tënë ti ambeni ye so ayeke sara si bira ayeke londo na popo ti Jéhovah Nzapa na awato ti lo. Bâ aprophétie ni ota so ayeke si ande na lê ti mo.

Aye so mo ga nduru ti bâ na lê ti mo

Kozo prophétie ni. Bible atene so angorogbia ti dunia so ayeke tene ande: “Siriri na nzoni duti ayeke dä!” Tënë so ayeke kota tënë mingi. Na li ti ala, ala ga nduru ti leke akota kpale kue ti dunia so awe. Me, aye so ayeke si na peko ti tënë so ayeke ga na siriri ti kete ape.​—1 aThessalonicien 5:1-3.

Use prophétie ni. Na pekoni ande, angorogbia ayeke londo na tere ti abungbi ti vorongo Nzapa kue. Na yâ ti Bible, a haka angorogbia so na mbeni nyama ti ngonda. A haka nga abungbi ti vorongo kue ti wataka na mbeni wali so aduti na ndo ti nyama ni si ayeke fa lege na lo (Apocalypse 17:3, 15-18). Nyama ti ngonda so, wala angorogbia ni, ayeke sara ye so bê ti Nzapa aye sân ti tene ala hinga: ala yeke futi abungbi kue ti vorongo so atene ani yeke sara kua na iri ti Nzapa.

Na lege ti fä, bazengele Jean afa ye so ayeke si, lo tene: “Adidi bale-oko so mo bâ, na nyama ti ngonda ni, fade ala ke wali-ndumba so na ala yeke sara si lo ngbâ na ye oko pëpe na ala zia lo tere senge, na fade ala te nyama ti tere ti lo si ala yeke gbi lo kue na wâ. Teti Nzapa azia na yâ ti bê ti ala ti sara ye so ayeke na bê ti lo.”​—Apocalypse 17:16, 17.

Ota prophétie ni. Na peko ti so ala futi abungbi ti vorongo nzapa kue ti wataka, Satan ayeke pusu angorogbia na aturugu ti ala kue ti kiri na tere ti ala so ayeke voro Jéhovah Nzapa. Ye so ayeke zi lege na bira so Bible airi ni Harmaguédon.​—Apocalypse 7:14; Matthieu 24:21.

Ye ni so ayeke sara nyen na ndo ti mo?

Tongana ade mo wara pasa ti gi yâ ti Bible nzoni pëpe, peut-être a yeke ngangu na mo ti mä na bê so aye so a fa ni ge so ayeke si ande. Me a yeke senge ape ti mä na bê so aye ni so ayeke si na anzene nzene ye ti ala kue na so aga nduru ti si awe. Ngbanga ti nyen? Ngbanga ti so na yâ ti Bible e wara gbâ ti aprophétie so aga tâ tënë awe.a

A-Témoin ti Jéhovah ahinga na bê ti ala biani so “bira ti kota lango ti Nzapa, Lo ti ngangu ahon kue” aga nduru ti si awe. Mo lingbi ti mû mbeni ngoi ti gi ti hinga ngbanga ti nyen ala mä na bê na ni tongaso? Nga ti gi ti hinga ndani so a lingbi mo sara mbeto ni pëpe? Hunda na ala ti fa na mo na yâ ti Bible ye so a lingbi mo sara ti duti na popo ti azo so Jéhovah Nzapa ayeke bata ala (Apocalypse 16:14). Ye so mo yeke manda ande so alingbi ti changé bango ndo so mo yeke na ni kozo na ndo ti ye so ayeke ku e azo.

[Kete tënë na gbe ni]

[Tënë na lembeti 8]

Kusala so aTémoin ti Jéhovah ayeke sara ague oko na prophétie ti Bible, ni la ape?