Bango mbadi ayeke sioni ngbanga ti nyen?

Depuis maseka ti lo, Barbaraa ayeke bâ asuma, lo yeke mä ambeni go, na ti lo, lo tene afami ti lo so akui awe la si ayeke sara tënë na lo so. Lo na koli ti lo, Joachim, adiko abuku na ndo ti aye ti magie na ala ga akota zo ti dikongo acarte. Acarte ni afa na ala so ala yeke wara gbâ ti nginza. A yeke tâ tënë teti so tongana ala dë buze, ala wara gbâ ti nginza na pekoni. Mbeni lâ, acarte ni afa na ala nga atene asioni zo ayeke ga na da ti ala na afa na ala ye so a lingbi ala sara ti bata na tere ti ala.

ATÂA so tënë ti magie aga ngbene ye na lê ti ambeni zo awe, azo mingi laso aye ti hinga ye na ndo ti ambeni ye ti ndima so ayeke si. Na ndo kue azo ayeke yü awaraga ti bata na tere ti ala wala ala yeke bi zeke ti hinga na ye so ayeke si na ala ande. Na yâ ti mbeti-sango Focus ti kodoro ti Zamani, na gbe ti tënë so atene “Ordinateur na Lucifer,” e wara tënë so atene: “Internet ayeke sara si azo abâ tënë ti magie na mbeni lê nde.”

Mo hinga ye so Bible atene na ndo ti bango mbadi? Peut-être bê ti mo ayeke dö na mango tënë so lo tene na ndo ni.

Ye so Bible afa na ndo ti tënë ti bango mbadi

Ndia so Nzapa amû lani na azo ti Israël atene: “A lingbi zo oko ayeke na popo ti i pëpe, [so ayeke] wagingo bendo, wala zo so agi nda ti ye na yâ mbinda, wala wadeli, wala zo ti yorö, wala zo ti hundango bendo, wala zo ti fa nda ti yanga ti atoro, wala watoro, wala wagasoroma. Teti zo so asara ye so ayeke zo ti sioni mingi na lê ti L’Éternel.” (Deutéronome 18:10-12). Ngbanga ti nyen la Nzapa ake na bê oko mara ti aye tongaso?

Tongana ti so tapande na tongo nda ti article ni afa, azo mingi amä na bê so azo alingbi ti sara tënë na akuâ na lege ti aye tongana bingo zeke wala na lege ti awagingo bendo, na so atoro ti akuâ ni la atene na ala atënë ni. Mabe tongaso alondo na afango ye ti a-eglize mingi, so afa so na kuâ ti azo toro ti ala ayeke gue na mbeni ndo ti yingo. Me, Bible atene ti lo polele so “akinda [wala akuâ] ahinga ye oko pëpe.” (Zo-ti-fa-tene 9:5). Lo fa ti lo so tongana zo akui a yeke mo bâ mo tene lo tï na yâ ti kota lango, lo hinga ye oko so ayeke pasêe na tere ti lo pëpe (Matthieu 9:18, 24; Jean 11:11-14).b Peut-être mo hunda tere ti mo, mo tene, Ka ti so azo ayeke sara tënë na atoro so, a londo tongana nyen la?

Sarango songo na ayingo

A-Évangile atene so na ngoi so Jésus ayeke lani na sese ge, lo sara tënë na ayingo. Na Marc 1:23, 24, mbeni “sioni yingo” atene na Jésus: “Mbi hinga mo nzoni mingi.” Kite ayeke pëpe so ayingo ahinga mo nga. Me mo, mo hinga ala?

Kozo ti tene Nzapa asara zo, lo sara gbâ ti ayingo, wala a-ange (Job 38:4-7). A-ange ayeke nde mingi na azo, ala yeke kota ahon e (aHébreu 2:6, 7). Ala yeke ngangu mingi nga ala hinga ye mingi, na Nzapa asara ala ti sara ye so bê ti lo aye. Mbeni wasungo Psaume ahe bia atene: “Sara tënë nzoni na L’Éternel, i a-ange ti Lo, i so i yeke na ngangu, i so i sara ye alingbi na tënë ti Lo.”​—Psaume 103:20.

Bible atene so a si na mbeni ngoi ambeni ange asara songo na azo na mbeni lege so Nzapa ake ni. Ala sara tongaso ndali ti nyen? Kozo ange so ake yanga ti Nzapa asara ye na handa si Adam na Ève ague yongoro na Nzapa ti ala, lo so asara ala. Na sarango tongaso, ange ni so asara tere ti lo wani Satan Zabolo, so ti tene wato ti Nzapa nga zo so ayeke diko sioni tënë na ndo ti Nzapa.​—Genèse 3:1-6.

Na pekoni, ambeni ange abâ apendere wali na sese ge, “ala dö tâ ndo ti duti ti ala [so ayeke na yayu] ala zia,” ala mû tere ti zo, na ala ga amû awali ni na ala dü amolenge (Jude 6; Genèse 6:1, 2). A-ange ni so na amolenge ti ala ni asara ye ti ngangu lani mingi na azo, a sara si lani sese “asi na sioye ti ngangu.” Peut-être mo hinga mbaï so afa ye so Nzapa asara lani ti hunzi na asioni zo so na lege ti kota ngu na ngoi ti Noé.​—Genèse 6:3, 4, 11-13.

Kota ngu so asara si a-ange so akiri amû tere ti ala ti yingo na ala kiri na yayu. Me Nzapa ake na ala ti kiri na kozo “ndo ti duti ti ala” ni. Nzapa azia ala na yâ ti mbeni dutingo so ayeke ye ti kamene mingi so Bible ahaka ni na mbeni “kota dû so avuko pitipiti”. (2 Pierre 2:4, 5). Bible airi a-ange ti kpengba-li so “asioni yingo”. (Jacques 2:19). Ala la ayeke fa ye na azo so ayeke tene peko ti mbadi.

Ye so asioni yingo aye

Kozo ye so asioni yingo ayeke gi tongana ala yeke na songo na azo ayeke ti handa azo si ala voro tâ Nzapa, Jéhovah, pëpe. Aye so mingi ti azo so ayeke na songo na ala ayeke wara na pekoni wala apouvoir so ayingo ni amû na ala ayeke gi ti handa na azo si azo awara tâ hingango ye na ndo ti Nzapa pëpe wala alë songo na lo pëpe.

Use ye so asioni yingo ayeke gi, e lingbi ti bâ ni na lege ti handa so Satan, mokonzi ti ala, aga na ni na tere ti Jésus lani. Satan atene lani na Jésus so ni yeke mû na lo “aroyaume kue ti dunia so nga na gloire ti ala.” Me gi tongana Jésus ni asara nyen? Lo tene: “Mo kuku na sese na mo voro mbi.” Ti tâ tënë ni, Satan na asioni yingo aye ti tene azo avoro ala. Me ti Jésus, lo ke ti dö lege ti vorongo tâ Nzapa ti zia.​—Matthieu 4:8-10.

Laso a yeke ngangu ti tene asioni yingo ague vîi vîi vîi tongaso. Me ye so ala yeke sara ayeke so ala yeke gi ti handa azo so lê ti ala ahan pëpe na lege ti aye tongana bingo zeke, dikongo acarte, dikongo yâ ti maboko ti azo nga na horoscope. Hange na aye so! Ala yeke asenge senge ye pëpe so ayeke mû lege na mo ti hinga aye so ayeke na peko ti aye ti ndima so ayeke si. A yeke na lege ti mara ti aye tongaso la si asioni yingo ayeke sara kusala na ni ti handa na azo si ala voro Jéhovah pëpe. Me tongana asioni yingo ni abâ so ye ti ala ni alï ngu, mingi ni ala yeke sara sana na azo so atï na yâ ti gbanda ti ala. Tongana mo kue mo yeke na popo ti azo so, mo lingbi ti sara nyen ti sigigi na gbe ti ngangu ti ala?

Ye so mo lingbi ti sara ti sigigi na yâ ni

Handa tere ti mo ape! Ayingo so ayeke sara songo na azo ayeke awato ti Nzapa, lo yeke futi ala ande (Jude 6). Ala yeke azo ti mvene nga ala yeke handa azo, ala tene ala la ayeke azo so akui so. Mo yeke sara nyen tongana mo mä so mbeni kamarade ti mo ayeke mbeni kota zo ti mvene, so lo ye gi sioni ti mo? Hinga ape mo sara kamarade na mbeni zo na lege ti Internet, me mo ga ti mä so lo yeke gi ti lango gi na azo kirikiri, mo yeke sara tongana nyen? Me ti asioni yingo, sarango songo na ala ayeke tâ sioni mingi. Sara kue ti sigigi na gbe ti ala, me tongana nyen?

Na kodoro ti Éphèse lani, ambeni zo so asara magie amanda na yâ ti Mbeti ti Nzapa so Nzapa ake sarango magie. Atâa so abuku ti ala na ndo ti amagie ni ayeke ti ngere mingi, “ala zö ni na lê ti azo kue.” (Kusala 19:19, 20). Laso aye so andu mbadi ayeke pëpe gi aye so ayeke na yâ ti abuku, wala azeke wala ambeni ye tongaso, me a ndu nga aye tongana CD, Internet, angia ti vidéo. Ni la, zi tere ti mo na aye kue so akpa ye so ayeke sara si mo wara songo na asioni yingo.

Kiri mo bâ tapande ti Barbara na Joachim, so e sara tënë ti ala fade. Carte ti ala ni atene na ala so ambeni sioni wali ayeke ga na da ti ala, na a lingbi ala mä ala pëpe wala tongana awali ni amû na ala mbeni ye, ala mû ni ape. Tongana Connie na Gudrun, aTémoin ti Jéhovah, asi na yanga-da ti ala ti fa na ala nzoni tënë ti Nzapa, Joachim na Barbara ayeda ti mä ala. Lisoro ti ala ni ague atï na ndo ti bango mbadi, na aTémoin ti Jéhovah ni azi ndani polele na ala na lege ti aversê ti Bible. Na peko ti lisoro ti ala ni, Joachim na Barbara ayeda ti tene lakue Connie na Gudrun aga asara lisoro na ala na ndo ti Bible.

Hio na pekoni Joachim na Barbara afâ yâ ti songo ti ala na asioni yingo ni. Me aTémoin ni atene na ala so desizion so ala mû so ayeke son bê ti asioni yingo ni ande. A yeke biani ye so asi la. Joachim na Barbara awara angangu kpale na pekoni nga asioni yingo ni asara pasi na ala mingi. Teti mbeni ngoi, lakue na bï, ala yeke lango gi na yâ ti mbeto juska ala gue na mbeni da nde awe si ala wara kamême siriri. Na yâ ti atara so kue, ala girisa pëpe atënë so ayeke na aPhilippien 4:13, so atene: “Mbi wara ngangu ti sara aye kue ndali ti lo so lo mû ngangu ni na mbi.” Teti so ala gbu ngangu dä, Jéhovah airi tënë nzoni na ndo ti ala, na a si na mbeni ngoi asioni yingo ni azia lege ti ala. Laso Joachim na Barbara ayeke voro tâ Nzapa, Jéhovah, na ala yeke na ngia mingi.

Bible atene na zo kue so aye ti wara tënë nzoni ti Jéhovah, a tene: “Ala duti na gbe ti Nzapa; me ala ke Zabolo, na fade lo yeke kpe yongoro na tere ti ala. Ala ga nduru na Nzapa, na fade lo yeke ga nduru na ala.” (Jacques 4:7, 8). Jéhovah alingbi ti mû maboko na mo ti sigigi na gbe ti asioni yingo na lo yeke sara ni, gi tongana mo ye si. Tongana Joachim na Barbara akiri abâ tongana nyen so ala sigigi na gbe ti asioni yingo so, na bê kue ala yeda na tënë so ayeke na Psaume 121:2, so atene: “Ye ti bata mbi alondo na L’Éternel [“Jéhovah,” FD].”

[Akete tënë na gbe ni]

[Tënë na lembeti 11]

Bango mbadi ayeke kanga lege na zo ti duti na nzoni songo na Nzapa

[Tënë na lembeti 12]

“Ala ga nduru na Nzapa, na fade lo yeke ga nduru na ala.”​—JACQUES 4:8