Luti ngangu na kpe akûkû ti Satan

“Luti ngangu ti ke amayele ti Zabolo.”​—AÉPH. 6:11.

KIRINGO TËNË NI AYEKE SO WA?

Tongana nyen la mbeni wakua ti Jéhovah alingbi ti kpe si lo tï pëpe na yâ ti kûkû so ayeke kota nzara ti akungba?

Nyen la alingbi ti mû maboko na Chrétien so asara mariage awe si lo gi koli wala wali nde pëpe?

Ngbanga ti nyen mo hinga na bê ti mo biani so ti kpe kota nzara ti akungba na lango-sioni ayeke ga na aye ti nzoni?

1, 2. (a) Ngbanga ti nyen Satan abâ pëpe mawa ti aChrétien so a soro ala ti gue na yayu nga na “ambeni ngasangbaga”? (b) Akûkû ti Satan wa e yeke sara tënë na ndo ni na yâ ti article so?

SATAN ZABOLO ayeke bâ mawa ti azo oko pëpe, mbilimbili azo so ayeke sara na Jéhovah. Satan ayeke tiri na tanga ti aChrétien so a soro ala ti gue na yayu so angbâ na sese ge (Apoc. 12:17). Na mbeto pëpe aChrétien so amû li ni na yâ ti kusala ti fango tënë ti Royaume na ndo ti sese kue afa na azo so Satan la ayeke mokonzi ti dunia so. Zabolo ayeke nga na ndoye pëpe na mbage ti “ambeni ngasangbaga” so ayeke na beku ti fini ti lakue lakue na so ayeke mû maboko na aChrétien so a soro ala ti gue na yayu (Jean 10:16). Satan ayeke na beku so pëpe, ndani la ngonzo asara lo mingi. Atâa beku ti e ayeke ti wara fini na yayu wala ti wara fini na sese, Satan aye nzoni ti e oko ape. Ye so lo ye ayeke ti gbu e.​—1 Pi. 5:8.

² Ti wara lege ti gbu e, Satan ayeke sara kusala na akûkû nde nde. Teti so lo ‘sara si bibe ti azo so amä na bê pëpe avuko,’ ala yeda pëpe na nzoni tënë nga ala lingbi ti bâ akûkû ni so pëpe. Ye oko, Zabolo agbu nga ambeni zo so ayeda na tënë ti Royaume (2 aCor. 4:3, 4). Article so ahon afa tongana nyen e lingbi ti kpe akûkû ti Satan ota: (1) tenengo tënë kirikiri, (2) sarango mbeto ti lê ti zo nga ti zia si ambeni zo asara ngangu na ndo ti e, nga (3) sarango vundu ahon ndo ni ndali ti mbeni siokpari so e sara ândö. Zia e bâ fadeso tongana nyen e lingbi ti dö sese na ambeni kûkû ti Satan use: Kota nzara ti mosoro nga na bê ti zo so ayeke pusu lo ti gi koli wala wali nde.

KOTA NZARA TI MOSORO: KÛKÛ SO AYEKE PETE NDO TI ZO

3, 4. Na lege wa agingo bê ndali ti aye ti ngoi so ague na azo ti tï na yâ ti kûkû so ayeke kota nzara ti akungba?

³ Na yâ ti mbeni oko ti atoli ti Jésus, lo sara tënë ti lê ti kobe so a lu na popo ti akî. Lo tene so mbeni zo alingbi ti mä tënë ni, “me gingo bê ndali ti aye ti ngoi so nga ngangu so mosoro ayeke na ni ti handa zo apete ndo ti tënë ni, na lo wara lege ti lë lengo pëpe.” (Mat. 13:22). Biani, kota nzara ti akungba ayeke mbeni kûkû so wato ti e Satan ayeke sara na kua.

⁴ Aye use la abungbi si “apete ndo ti tënë ni”. Mbeni ayeke “gingo bê ndali ti aye ti ngoi so”. Na “angoi ti akpale so ayeke ngangu na zo ti kanga bê na yâ ni” so, aye mingi alingbi ti sara si mo gi bê ti mo (2 Tim. 3:1). Ngere ti aye so ague na li ni nga warango kua ti nginza so aga ngangu alingbi ti sara si a yeke ngangu ti wara aye so mo yeke na bezoin ni. Mo lingbi nga ti gi bê ti mo na ndo ti gigi ti mo ti kekereke na mo hunda tere ti mo: ‘Mbi gue ande na retraite awe, mbi yeke wara ande oke?’ Mara ti gingo bê tongaso asara si ambeni zo agi ti wara gbâ ti mosoro, ala pensé so nginza ayeke sara si ala duti nzoni.

5. Na lege wa “ngangu so mosoro ayeke na ni” alingbi ti handa zo?

⁵ Mbeni ye so Jésus asara tënë ni ayeke “ngangu so mosoro ayeke na ni ti handa zo”. Ye so nga na gingo bê alingbi ti gue na e ti tï na yâ ti kûkû so ayeke kota nzara ti akungba. Bible atene so “nginza ayeke ye ti bata zo”. (Zo-ti. 7:12). Ye oko, a yeke na lege ti ndara pëpe ti tomba peko ti mosoro. Azo mingi abâ na nda ni so tongana ala sara kua mingi ti wara mosoro, ala yeke tï na yâ ti kûkû so ayeke kota nzara ti akungba. Ambeni aga même ngbâa ti mosoro.​—Mat. 6:24.

6, 7. (a) Na lege wa place ti kua ti mo alingbi ti zia nzara ti mosoro na yâ ti mo? (b) Ye wa a lingbi mbeni Chrétien agbu li dä na ngoi so a hunda lo ti sara kua ahon ngbonga so lo yeke sara ka?

⁶ Mo lingbi ti komanse ti sara nzara ti ga zo ti mosoro sân ti hinga ni. Na tapande, gbu li na ndo ti ye so. Patron ti mo aga atene na mo: “Mbi yeke na mbeni nzoni tënë ndali ti mo! Ndokua ti e awara mbeni kota contrat ti kua. Ye so aye ti tene so na yâ ti anze so ayeke ga, mo yeke sara ande kua mingi ahon angbonga so mo yeke sara ka. Me mbi tene na mo so a yeke futa ande mo nzoni mingi.” Mo yeke sara ye tongana nyen na mango tënë so? Biani, a yeke kota ye ti tene mo mû na sewa ti mo aye so ala ayeke na bezoin ni na lege ti mitele, me kusala ti mo ayeke gi so pëpe (1 Tim. 5:8). Ambeni ye ayeke dä so a lingbi mo pensé nga na ndo ni. Ngbonga oke la mo yeke sara ande na ndo ti angbonga ti kua so mo yeke sara ka? Kua ti mo ayeke kanga lege na mo ti sara na Nzapa nga ayeke sara si mo manke abungbi nga na vorongo Nzapa na yâ ti sewa?

⁷ Gbu li na ndo ti ye so ayeke kota mingi na lê ti mo. A yeke gbâ ti nginza wala songo ti mo na Jéhovah? Mo yeke ke ti zia aye ti Royaume na kozo ndo na yâ ti fini ti mo ndali ti so mo ye ti wara gbâ ti nginza? Mo lingbi ti bâ tongana nyen la kota nzara ti akungba ayeke sara ngangu na ndo ti mo tongana mo bi bê ti mo pëpe na songo so mo na sewa ti mo ayeke na ni na Jéhovah? Tongana ye so ayeke si na mo na ndembe so la, tongana nyen la mo lingbi ti kpe si kota nzara ti akungba apete ndo ti mo pëpe?​—Diko 1 Timothée 6:9, 10.

8. Atapande wa ti Bible alingbi ti mû maboko na e ti bâ lege so e yeke sara ye na fini ti e?

⁸ Tongana e ye pëpe ti tene kota nzara ti akungba apete ndo ti e, ngoi na ngoi a lingbi e bâ lege so e yeke sara ye na fini ti e. A lingbi e ga pëpe tongana Ésaü so abâ aye ti yingo na nene ni pëpe (Gen. 25:34; aHéb. 12:16). Nga a lingbi e duti pëpe tongana zo ti mosoro so Jésus ahunda na lo ti kä aye ti lo kue, ti mû nginza ni na awayere na ti mû peko ti lo. Ahon ti sara ni, koli so ‘ahon na vundu na bê ti lo, ngbanga ti so lo yeke na aye mingi.’ (Mat. 19:21, 22). Amosoro ti koli so ayeke tongana mbeni kûkû so agbu lo. Lo lingbi fade ti ga disciple ti Jésus, koli so ayeke kota ahon tanga ti azo kue! Me lo yeda pëpe na kota pasa so. A lingbi e sara hange si e girisa pëpe pasa so e yeke na ni ti duti adisciple ti Jésus Christ.

9, 10. Na bango tënë so Bible atene, a lingbi e duti na bango ndo wa na ndo ti aye ti mitele?

⁹ Tongana e ye si ngangu so mosoro ayeke na ni ahanda e pëpe, a lingbi e mä wango ti Jésus so. Lo tene: “Ala gi bê ti ala lâ oko pëpe, ti tene: ‘E yeke te ande nyen?’ wala ‘E yeke nyon ande nyen?’ wala ‘E yeke yü ande nyen?’ Aye so kue, a yeke aye so amara ayeke gi ni gingo na bê ti ala kue. Me Babâ ti ala so ayeke na yayu ahinga so ala yeke na bezoin ti aye so kue.”​—Mat. 6:31, 32; Luc 21:34, 35.

¹⁰ Tongana e ye ti tï pëpe na yâ ti kûkû so ayeke kota nzara ti akungba, a lingbi e duti tongana Agur, mbeni zo so asû Bible, so atene: “Mo mû nzinga wala mosoro na mbi pëpe; Mo mû na mbi kobe so alingbi na mbi.” (aProv. 30:8). Agur ahinga so lo yeke na bezoin ti nginza ti bata tere ti lo, me lo hinga nga so mosoro ayeke na ngangu ti handa zo. A lingbi e hinga so gingo bê ndali ti aye ti ngoi so nga na ngangu so mosoro ayeke na ni ti handa zo alingbi ti sara si e buba songo ti e na Jéhovah. Tongana e gi bê ti e ahon ndo ni ndali ti aye ti mitele, e yeke duti peut-être pëpe na ngoi, ngangu wala nzara ti zia aye ti Royaume na kozo ndo na yâ ti fini ti e. Tongaso, a lingbi e sara hange si e tï pëpe na yâ ti kûkû ti Satan so ayeke kota nzara ti akungba.​—Diko aHébreu 13:5.

GINGO KOLI WALA WALI NDE: DÛ SO A KANGA YE NA NDO NI

11, 12. Nyen la alingbi ti sara si mbeni Chrétien atï na yâ ti lango-sioni na mbeni mba ti lo ti place ti kua?

¹¹ Ti gbu mbeni kota nyama, awagingo nyama ayeke zi peut-être dû na ndo so nyama ni ayeke hon ka dä. Mingi ni ala yeke kanga yanga ti dû ni na akete kete keke nga ala tuku sese kete na ndo ni. Mbeni oko ti atara ti Satan so asara kua nzoni mingi ayeke tongana kûkû so. A yeke lango-sioni (aProv. 22:14; 23:27). Ambeni Chrétien atï na yâ ti kûkû so na ziango lege na ambeni ye so asara si a yeke pëpe ngangu na ala ti sara lango-sioni. Ambeni Chrétien so asara mariage awe asara lango-sioni na pekoni so ala to nda ti sara nzara ti mbeni zo so ayeke koli wala wali ti ala pëpe.

¹² Mbeni zo alingbi ti komanse ti sara nzara ti mbeni zo so lo na lo asara kua place oko, me so ayeke koli wala wali ti lo pëpe. Mingi ti awali nga na akoli so asara lango-sioni, ala sara ni na mbeni mba ti ala ti place ti kua. Kua ti mo ahunda ti tene mo na azo so ayeke amba ti mo koli wala wali pëpe la asara ni? Tongana a yeke tongaso, songo ti mo na ala ayeke tongana nyen? Mo zia ambeni katikati ti tene ala tï mba pëpe? Na tapande, na peko ti alisoro so mbeni ita-wali asara lakue na mbeni koli na place ti kua ti lo, lo lingbi peut-être ti fa atënë ti bê ti lo na koli ni, na même ti fa na lo akpale so lo yeke na ni na yâ ti mariage ti lo. Ti mbeni, na pekoni so mbeni ita-koli na mbeni wali so lo na lo asara kua place oko aga akota kamarade, ita-koli ni alingbi ti tene: “Lo yeke bâ ka apensé ti mbi na nene ni nga lo yeke mä mbi tongana mbi sara tënë. Lo yeke ne ka mbi. Tongana fade a sara na mbi tongaso na yanga-da, ka a yeke nzoni mingi!” Mo bâ tongana nyen la a yeke ngangu pëpe na aChrétien so ti tï na yâ ti lango-sioni?

13. Tongana nyen la na yâ ti congrégation mbeni zo alingbi ti komanse ti sara nzara ti mbeni zo so ayeke koli wala wali ti lo ape?

¹³ Na yâ ti congrégation nga a lingbi ti si so mbeni zo asara nzara ti zo so ayeke koli wala wali ti lo pëpe. Bâ mbeni ye so asi. Daniel na wali ti lo Saraha ayeke apionnier permanent. Daniel ayeke nga mbeni ancien so ayeke sara kua kue so a mû na lo na yâ ti congrégation. Lo manda Bible na ambeni maseka-koli oku, ota na popo ti ala awara batême. Aita-koli so awara batême fini fini so ayeke na bezoin ti tene a mû maboko na ala mingi. Teti so Daniel ayeke na aye mingi ti sara na yâ ti congrégation, ngoi na ngoi Sarah la amû maboko na ala. Me Sarah nga kue ayeke na bezoin ti tene a bi bê na lo na lo wara mungo maboko na mbage ti aita so Daniel amanda Bible na ala so. Ye ni aga tongana mbeni sioni kûkû. Daniel atene: ‘Teti anze mingi wali ti mbi amû ngangu ti lo kue ti mû maboko na azo, tongaso lo yeke na bezoin ti tene a mû maboko na lo na lege ti yingo nga ti dë bê ti lo. Na yâ ti ngoi ni so mbi bâ lege ti lo pëpe na ye ti sioni aga na pekoni. Wali ti mbi asara lango-sioni na mbeni maseka-koli so mbi manda lani Bible na lo. Mbi yeke lani na akua mingi ti sarango ni, a sara si mbi bâ pëpe so songo ti lo na Jéhovah awoko.’ Mo lingbi ti sara tongana nyen ti kpe mara ti kpale so?

14, 15. Nyen la alingbi ti mû maboko na aChrétien so asara mariage awe ti kpe ti gi koli wala wali nde?

¹⁴ Ti kpe ti gi koli wala wali nde, a lingbi mo gbu li nzoni na ndo ti ye so aye ti tene ti duti be-ta-zo na koli wala wali ti mo. Jésus atene: “Ye so Nzapa abungbi ni na gbe ti joug oko, zia mbeni zo akangbi yâ ni pëpe.” (Mat. 19:6). A lingbi mo pensé pëpe so akusala ti mo na yâ ti congrégation ayeke kota mingi ahon wali wala koli ti mo. Hinga nga so ti zia wali wala koli ti mo ti hon ndali ti akua so ayeke nga kota ye pëpe alingbi ti sara si mariage ti mo awoko nga alingbi ti pusu mo ti tï na yâ ti kota siokpari.

¹⁵ Tongana mo yeke ancien, a lingbi mo bâ lege ti congrégation. Bazengele Pierre atene: “Ala bata angasangbaga ti Nzapa so lo zia na maboko ti ala; zia a gbu ala gbungo na ngangu pëpe ti sara ni, me zia ala sara ni na bê ti ala wani; ala bata angasangbaga ni na bibe ti warango ye na lege ti likisi pëpe, me na bê ti ala kue.” (1 Pi. 5:2). A lingbi mo girisa pëpe ti bâ lege ti amembre ti congrégation so a mû na mo ti bâ lege ti ala. Me, a lingbi mo dö pëpe kusala ti mo ti koli ti wali mo zia ndali ti kua ti mo ti ancien. A yeke na lege ni pëpe ti mû maboko na aita na yâ ti congrégation na ti bi bê pëpe na wali ti mo so ayeke na yanga-da. Daniel atene: ‘Girisa pëpe ti bâ lege ti sewa ti mo ndali ti gbâ ti akua so mo yeke na ni na yâ ti bungbi.’

16, 17. (a) Nyen la aChrétien so asara mariage awe alingbi ti sara na place ti kua ti fa so ala ye pëpe ti tene mbeni zo atï ala? (b) Fa ambeni article so alingbi ti mû maboko na aChrétien ti kpe ti gi koli wala wali nde.

¹⁶ Gbâ ti anzoni wango ayeke na yâ ti Tour ti Ba Ndo na Réveillez-vous ! ti mû maboko na aChrétien so asara mariage awe ti kpe ti gi koli wala wali nde. Na tapande, Tour ti Ba Ndo ti lango 15 ti septembre 2006 amû wango so: ‘Na place ti kua wala na mbeni ndo nde, sara hange na aye so alingbi ti gue na mo ti ye tere mingi na mbeni zo so ayeke koli wala wali ti mo pëpe. Na tapande, tongana mo yeke koli si ngoi ti kua ahunzi awe na mo na mbeni wali angbâ ti sara kua, a lingbi ti sara si mo tï na yâ ti tara. Teti so mo yeke koli wala wali so asara mariage awe, a yeke nzoni tënë ti yanga ti mo na sarango ye ti mo afa so mo ye ti gi mbeni zo nde pëpe. Nga, teti so mo yeke zo so abata tënë ti Nzapa, mo yeke ye pëpe ti gboto lê ti zo na ndo ti mo na sarango ngia ti koli na wali, nga mo yeke yü bongo na mo yeke leke li ti mo kirikiri pëpe. . . . Ti zia afoto ti koli wala wali ti mo nga na ti amolenge ti mo na ndo ti kusala ti mo ayeke dabe ti mo so sewa ti mo ayeke kota ye na lê ti mo na amba ti mo ti place ti kua ayeke hinga ni. Leke na bê ti mo ti sara mbeni ye oko pëpe so agboto mbeni zo ti gi ti lë songo na mo nga mo ke tongana mbeni zo agi ti sara ni na mbage ti mo.’

¹⁷ Article “La fidélité conjugale: que signifie-t-elle vraiment?” na yâ ti Réveillez-vous! ti avril 2009 amû wango ti tene mo kpe ti pensé na yâ ti li ti mo ti bungbi koli na wali na mbeni zo so ayeke koli wala wali ti mo pëpe. Article ni afa nga so tongana mo yeke na mara ti abibe ni so, a yeke duti ngangu pëpe ti tene mo gi koli wala wali nde (Jacq. 1:14, 15). Tongana mo sara mariage awe, a yeke nzoni ti tene ngoi na ngoi mo na koli wala wali ti mo akiri adiko a-article so asara tënë na ndo ti tënë so. Jéhovah la azia gere ti mariage na sese nga mariage ayeke nzoni-kue. Ti mû ngoi ti sara lisoro na koli wala wali ti mo na ndo ti mariage ayeke mbeni nzoni lege ti fa so mo bâ na nene ni aye so ayeke nzoni-kue.​—Gen. 2:21-24.

18, 19. (a) Akpale wa gingo koli wala wali nde ayeke ga na ni? (b) Aye ti nzoni wa zo ayeke wara tongana lo yeke be-ta-zo na koli wala wali ti lo?

¹⁸ Tongana bê ti mo apusu mo ti to nda ti sara nzara ti mbeni koli wala wali so ayeke ti mo ape, gbu li na ndo ti akpale so lango-sioni wala gingo koli wala wali nde ayeke ga na ni (aProv. 7:22, 23; aGal. 6:7). Azo so asara lango-sioni anzere na lê ti Jéhovah pëpe nga ala zia vundu na bê ti koli wala wali ti ala nga na ala mveni. (Diko Malachie 2:13, 14.) Me, gbu li na ndo ti aye ti nzoni so azo so abata nzoni tambela ayeke wara. Ala yeke na beku ti fini ti lakue lakue nga fini ti ala ti laso ayeke nzoni mingi; ala yeke nga na nzoni yingo-ti-hinga.​—Diko aProverbe 3:1, 2.

¹⁹ Mbeni zo ti sungo psaume ahe bia, a tene: “Siriri ayeke mingi na azo so andoye Ndia ti Mo [Nzapa], na ala pika gere ti ala na ye oko pëpe.” (Ps. 119:165). Tongaso, ndoye tâ tënë nga ‘sara hange mingi na tambela ti mo si a duti tongana ti awabuba pëpe, me tongana ti awandara’ na yâ ti ngoi ti sioni so (aÉph. 5:15, 16). Laso, Satan ayeke sara kusala na akûkû mingi ti gbu atâ wakua ti Nzapa. Me e yeke na anzoni gbakuru ti bata na tere ti e. Jéhovah amû na e aye so e yeke na bezoin ni ti “luti ngangu” nga ti “mingo wâ ti akokora kue ti Zo ti sioni.”​—aÉph. 6:11, 16.

[Kete tënë na gbe ni]

[Foto na lembeti 26]

Kota nzara ti akungba alingbi ti pete ndo ti zo na lege ti yingo. Zia si a si na mo pëpe

[Foto na lembeti 29]

Ti gi ti zia nzara ti mo na yâ ti mbeni zo wala ti yeda na ni ayeke gue na mo ti gi koli wala wali nde