Hange na akûkû ti Zabolo!

“Ala zi tere ti ala na yâ ti kûkû ti Zabolo.”​—2 TIM. 2:26.

KIRINGO TËNË NI AYEKE SO WA?

Tongana lakue mo yeke kasa azo, nyen la a yeke nzoni mo sara?

Nyen la e lingbi ti manda na ndo ti Pilate na Pierre na ndo ti ziango lege na azo ti sara ngangu na ndo ti e nga na sarango mbeto ti lê ti zo?

Tongana nyen la mo lingbi ti kpe ti sara vundu ahon ndo ni ndali ti siokpari so mo sara?

1, 2. Akûkû wa ti Zabolo e yeke sara tënë na ndo ni na yâ ti article so?

ZABOLO ayeke gi ti gbu awakua ti Jéhovah. Me lo yeke sara ye lakue pëpe tongana mbeni zo ti gingo nyama so ayeke fâ anyama so lo gbu ala. Ye so Zabolo aye biani ti sara na ngoi so lo gbu mbeni zo ayeke ti sara si zo ni asara ye so lo ye.​—Diko 2 Timothée 2:24-26.

² Ti gbu mbeni nyama na fini lê ti lo, zo ti gingo nyama alingbi ti sara kua na mbeni kûkû. Lo yeke tara ti sara si nyama ni asigigi na ndo so lo yeke dä ti ga na ndo so a yeke ngangu pëpe ti gbu lo na kûkû. Wala lo lingbi ti sara kua na mbeni kûkû so lo honde ni na mbeni ndo tongaso si lo gbu na nyama ni. Zabolo ayeke sara kua na mara ti akûkû so ti gbu awakua ti Nzapa na fini lê ti ala. Tongana e ye si lo gbu e ape, a lingbi lê ti e akpengba na e bi bê ti e na aye so afa so mbeni kûkû ti Satan ayeke nduru na e. Na yâ ti article so e yeke bâ tongana nyen e lingbi ti kpe akûkû ota so Zabolo asara kua na ni ti gbu na ambeni zo ti Nzapa. Akûkû ni ayeke (1) tenengo tënë kirikiri, (2) sarango mbeto ti lê ti zo nga ti zia si ambeni zo asara ngangu na ndo ti e, nga (3) sarango vundu ahon ndo ni ndali ti mbeni siokpari so e sara ândö. Article ti peko ayeke sara ande tënë na ndo ti ambeni kûkû ti Satan ni use.

KPE TI SARA TËNË KIRIKIRI

3, 4. Tongana e bata yanga ti e ape, nyen la alingbi ti si na pekoni? Mû mbeni tapande.

³ Ti sara si anyama asigigi na yâ ti ngonda, zo ti gingo nyama alingbi ti bi wâ na yâ ti mbeni mbage ti pere ni tongaso si lo gbu ala na ngoi so ala ye ti kpe. Na lege ti fä, Zabolo aye ti bi wâ na yâ ti congrégation ti aChrétien. Tongana lo wara lege ti sara ni, lo yeke sara si amembre ni asigigi na yâ ti nzoni ndo so ala yeke dä ti gue ti tï na yâ ti akûkû ti lo. Tongana nyen la sân ti hinga e lingbi ti mû maboko na lo na tongaso lo gbu e na yâ ti kûkû ti lo?

⁴ Disciple Jacques ahaka menga na mbeni wâ. (Diko Jacques 3:6-8.) Tongana e bata yanga ti e pëpe, na lege ti fä e lingbi ti komanse ti bi wâ na yâ ti congrégation. Tongana nyen la ye tongaso alingbi ti si? Tara ti bâ ye so: Na ngoi ti bungbi, a sara mbeni tokua a tene mbeni ita-wali aga pionnier permanent. Na peko ti bungbi ni, aita-wali use ayeke sara lisoro na ndo ti tënë ni. Mbeni oko ni afa ngia ti bê ti lo na lo ye ti tene kusala ti pionnier ti ita ni atambela nzoni. Use ni atene ti lo so peut-être ita-wali ni amû kua ti pionnier ndali ti so lo ye ti fa na aita ti congrégation so lo la. Na popo ti aita-wali use so, lo so wa la mo ye ti sara kamarade na lo? A yeke ngangu pëpe ti hinga lo so alingbi ti bi wâ na yâ ti congrégation na lege ti tënë ti yanga ti lo.

5. Tongana e ye ti kpe ti tene tënë kirikiri, a yeke nzoni e sara nyen?

⁵ Tongana nyen la e lingbi ti kpe ti tene tënë kirikiri? Jésus atene: “Yanga ayeke sara tënë ti ye so ayeke mingi na bê.” (Mat. 12:34). Tongaso, kozo ye ni ayeke ti gi ti bâ ye so ayeke na yâ ti bê ti e. A yeke nzoni e kpe ti duti na asioni bibe so ayeke sara si e tene asioni tënë na ndo ti azo. Na tapande, tongana e mä so mbeni ita-koli ayeke sara ngangu ti sara aye mingi na yâ ti congrégation, e yeke pensé so lo sara ni ndali ti so lo ye ti zia ngia na bê ti Jéhovah? Wala e yeke pensé so lo yeke sara ni ndali ti interêt ti lo? Tongana lakue e pensé so aita ti e ayeke sara na Jéhovah ndali ti interêt, a yeke nzoni e dabe ti e so Zabolo atene mara ti tënë so na ndo ti Job so ayeke wakua be-ta-zo ti Nzapa (Job 1:9-11). Ahon ti duti na kite na ndo ti ita ti e, a yeke nzoni e gi ti bâ ndani so e yeke kasa lo. E yeke biani na anzoni raison ti duti na kite na ndo ti lo? Wala sioni bibe ti dunia so asara ngangu na ndo ti e na alango ti nda ni so?​—2 Tim. 3:1-4.

6, 7. (a) Ambeni raison so ndali ni e lingbi ti kasa amba ti e ayeke so wa? (b) Nyen la a yeke nzoni e sara tongana a zonga e?

⁶ Zia e bâ ambeni raison so ndali ni e lingbi ti kasa amba ti e. Mbeni oko ayeke peut-être so e ye ti gboto lê ti azo na ndo ti ye so e sara. Na kasango amba ti e, e ye ti fa so e la e yeke nzoni ahon tanga ti azo kue. Wala e yeke gi ti fa ambeni raison so asara si e sara pëpe mbeni ye so a lingbi e sara ni fade. Atâa a yeke baba wala bê ti ye wala mbeto la asara si e kasa amba ti e, kasango ndo ayeke ga na akpale mingi.

⁷ E lingbi ti bâ so e yeke na nzoni raison ti kasa mbeni zo. Peut-être zo ni atene mbeni tënë so ason bê ti e. Tongana a yeke tongaso, ti sara nga mara ti ye ni so na zo ni ayeke nzoni pëpe. A yeke huru wâ na gbe ti tënë ni. A yeke ye so Zabolo aye ti tene e sara la me pëpe ye so Nzapa aye (2 Tim. 2:26). A yeke nzoni e sara ye tongana ti Jésus. Tongana a yeke zonga lo lani, “lo kiri peko ti zonga ni pëpe.” Me, lo “ngbâ ti zia tënë ti lo kue na maboko ti lo so ayeke fâ ngbanga mbilimbili.” (1 Pi. 2:21-23). Jésus ahinga lani na bê ti lo kue so Jéhovah ayeke leke tënë ni na lege so lo ye nga na ngoi so lo ye. A yeke nzoni e zia nga bê ti e na Nzapa tongaso. Tongana e tene anzoni tënë so akpengba amba ti e, e yeke bata ‘kamba ti siriri so abungbi e oko’ na yâ ti congrégation.​—Diko aÉphésien 4:1-3.

MBETO NGA NA NGANGU SO AZO AYEKE SARA NA NDO TI ZO

8, 9. Pilate adë ngbanga ti kuâ na li ti Jésus ngbanga ti nyen?

⁸ Tongana a gbu mbeni nyama na yâ ti kûkû, lo yeke pëpe na liberté ti gue na ndo so bê ti lo aye. Legeoko nga, zo so asara mbeto ti lê ti zo na lo zia si ambeni zo asara ngangu na ndo ti lo, lo yeke zia si azo ni la afa lege na fini ti lo. (Diko aProverbe 29:25.) Zia e bâ tapande ti azo use so asara mbeto ti lê ti zo na azia si azo asara ngangu na ndo ti ala nga e bâ ye so e lingbi ti manda na lege ti ye so asi na ala.

⁹ Gouverneur ti Rome, Ponce Pilate, ahinga lani so tënë ayeke na li ti Jésus ape nga na bango ni lo ye ti sara sioni na Jésus ape. Pilate atene même so Jésus ‘asara pëpe mbeni ye so alingbi na kuâ.’ Ye oko, Pilate adë ngbanga ti kuâ na li ti lo. Ngbanga ti nyen? Ngbanga ti so lo zia si gbâ ti azo asara ngangu na ndo ti lo (Luc 23:15, 21-25). Ti pusu Pilate ti sara ye so ala ye, ala dekongo, ala tene: “Tongana mo zi koli so, andâ mo yeke kamarade ti César pëpe”! (Jean 19:12). Peut-être Pilate asara mbeto ti tene a zi lo na kua ti lo wala même ti tene a fâ lo tongana lo zi Christ. Ni la, lo zia si azo asara ngangu na ndo ti lo na lo sara ye ti bê ti Zabolo.

10. Ngbanga ti nyen Pierre atene so ni hinga Christ ape?

¹⁰ Bazengele Pierre ayeke lani mbeni kota kamarade ti Jésus. Lo tene dandara so Jésus ayeke Messie (Mat. 16:16). Pierre angbâ lani be-ta-zo na ngoi so ambeni disciple amä pëpe yâ ti mbeni tënë so Jésus atene, na ala dö lo azia (Jean 6:66-69). Nga na ngoi so awato aga ti gbu Jésus, Pierre amû épée ti kanga lege si a gbu Maître ti lo pëpe (Jean 18:10, 11). Me na pekoni, Pierre asara mbeto ti lê ti zo na lo tene même so lo hinga Jésus Christ ape. Mbeto ti lê ti zo ayeke tongana mbeni kûkû, na Pierre atï na yâ ni teti mbeni kete ngoi. Lo yeke pëpe na ngangu ti sara ye so ayeke na lege ni nga ti duti be-ta-zo na Jésus.​—Mat. 26:74, 75.

11. Asioni ye wa a lingbi e gi ti dö sese na ni?

¹¹ A lingbi aChrétien kue adö sese na ngangu so azo ayeke sara na ndo ti ala ti pusu ala ti sara aye so Nzapa ake. Apatron ti e na ambeni zo alingbi ti tara ti pusu e ti sara ye ti likisi wala ti sara lango-sioni. A-Chrétien so ayeke a-élève alingbi ti tingbi na amba ti ala amaseka so ayeke gi ti pusu ala ti triché na ngoi ti akizama, ti bâ porno, ti nyon manga, ti nyon mbangi, ti nyon sämba ahon ndo ni, wala ti sara lango-sioni. Tongaso, nyen la alingbi ti mû maboko na e ti kpe kûkû so ayeke mbeto ti lê ti zo nga na ngangu so azo ayeke sara na ndo ti e ti sara ye so Jéhovah ake?

12. Nyen la asara si Pilate na Pierre asara mbeto nga ala zia si azo asara ngangu na ndo ti ala?

¹² Zia e bâ ye so asara si Pilate na Pierre asara mbeto nga ala zia si azo asara ngangu na ndo ti ala. Pilate ahinga ye mingi na ndo ti Christ ape. Me, lo hinga so tënë ayeke na li ti Jésus ape nga so Jésus ayeke mbeni senge zo ape. Me Pilate asara tere ti lo kete ape nga lo ndoye tâ Nzapa ape. A yeke ngangu pëpe na Zabolo ti gbu lo na fini lê ti lo. Pierre ayeke na tâ hingango ye nga lo ndoye Nzapa. Ye oko, na ambeni ngoi, lo sara tere ti lo kete pëpe, lo sara mbeto ti lê ti zo nga lo zia si azo asara ngangu na ndo ti lo. Kozo si a gbu Jésus, Pierre apika kate, lo tene: “Atâa atanga ni kue agirisa lege, mbi yeke girisa ti mbi lege pëpe!” (Marc 14:29). Tongana Pierre azia fade bê ti lo na Nzapa tongana ti so mbeni zo ti sungo psaume asara lani, ka lo yeke leke tere ti lo nzoni mingi ndali ti atara so lo yeke tingbi na ni. Zo ti sungo psaume so ahe bia, a tene: “L’Éternel ayeke na tere ti mbi; mbeto asara mbi pëpe; zo alingbi sara nyen na mbi?” (Ps. 118:6). Na ndangba bï ti Jésus na sese, lo mû Pierre na ambeni bazengele use lo na ala ague na yâ ti yaka ti Gethsémané. Ye oko, ahon ti tene lê ti Pierre na amba ti lo angbâ na zingo ni, ala tï na lango. Jésus azingo ala na lo tene: “Ala lango pëpe, ala ngbâ ti sambela si ala tï na yâ ti tara pëpe.” (Marc 14:38). Me Pierre akiri atï na lango, na pekoni lo sara mbeto ti lê ti zo nga lo zia si azo asara ngangu na ndo ti lo.

13. Tongana nyen la e lingbi ti dö sese na ngangu so amba ti e ayeke sara na ndo ti e ti pusu e ti sara ye ti sioni?

¹³ E lingbi ti manda nyen na lege ti tapande ti Pilate na ti Pierre? A lingbi e duti na tâ hingango ye, e sara tere ti e kete, e ndoye Nzapa, nga e kpe mbeto ti Jéhovah tongaso si e zia pëpe si azo asara ngangu na ndo ti e nga si e sara mbeto ti lê ti zo pëpe. Tongana mabe ti e aluti na ndo ti tâ hingango ye, e yeke duti na mbeto pëpe ti sara tënë na ndo ti aye so e mä na bê na ni. A yeke mû maboko na e ti dö sese na ngangu so azo ayeke sara na ndo ti e nga ti sara mbeto ti lê ti zo pëpe. A lingbi e zia bê ti e na ndo ti ngangu ti e wani ahon ndo ni pëpe. Me, a yeke nzoni e sara tere ti e kete na e hinga so e yeke na bezoin ti ngangu ti Nzapa tongaso si e dö sese na ngangu so azo ayeke sara na ndo ti e. A lingbi e sambela ti wara yingo ti Jéhovah. Nga zia si yengo so e ye na Jéhovah apusu e ti sara ye alingbi na aye so lo fa nga ti kpe ti bi zonga na ndo ti iri ti lo. Na ndo ni, a lingbi e leke tere ti e ndali ti ngangu so amba ti e alingbi ti sara na ndo ti e kozoni si e tingbi na tara ni. Na tapande, a lingbi e sambela na amolenge ti e nga e leke ala kozoni si ala hinga ye so ala lingbi ti sara na ngoi so amba ti ala aye ti pusu ala ti sara ye ti sioni.​—2 aCor. 13:7.a

KPE TI SARA VUNDU AHON NDO NI

14. Zabolo aye si e pensé tongana nyen na ndo ti afaute so e sara ândö?

¹⁴ Mbeni kûkû ni ayeke kûkû so a leke ni na mbeni nengo keke wala nengo tênë so a zia ni na nduzu na place so anyama ayeke hon ka dä. Zo ti gingo nyama ni ayeke zia mbeni kete kamba na tere ni nga tongana nyama so lê ti lo ahan pëpe adö kamba ni, keke ni wala tênë ni ayeke tï na ndo ti lo akungbi yâ ti abio ti lo. Tongana e sara vundu ahon ndo ni ndali ti mbeni siokpari so e sara, e yeke bâ tere ti e mo bâ mo tene mbeni nengo keke wala nengo tênë la atï na ndo ti e. Na tapande, tongana e pensé na ndo ti mbeni faute so e sara ândö, e lingbi ti bâ so ‘tere ti e amboko mingi’, wala vundu ahon ndo ti e. (Diko Psaume 38:4-6, 9.) Satan aye si e pensé so siokpari ti e ayeke mingi na e lingbi pëpe ti tene Jéhovah asara nzoni bê na e nga so e lingbi pëpe ti sara ye alingbi na aye so Jéhovah ahunda na e.

15, 16. Tongana nyen la mo lingbi ti kpe ti tï na yâ ti kûkû so ayeke sarango vundu ahon ndo ni ndali ti siokpari so mo sara?

¹⁵ Mo lingbi ti sara nyen ti kpe kûkû so ayeke sarango vundu ahon ndo ni ndali ti siokpari so mo sara ândö? Tongana mo sara mbeni kota siokpari, gi ti leke songo ti mo na Jéhovah hio. Bâ a-ancien ti mû maboko na mo (Jacq. 5:14-16). Sara ye kue so mo lingbi ti sara ti leke kpale ni (2 aCor. 7:11). Tongana a se mo, zia si bê ti mo anze pëpe. Sengo ndo ayeke mbeni ye so afa so Jéhovah aye mo (aHéb. 12:6). Sara ngangu ti kiri ti tï pëpe na yâ ti siokpari ni nga bâ si mo sara pëpe aye so ague na mo ti tï na yâ ti siokpari ni so. Tongana mo changé bê ti mo na mo zia ngbene lege ti mo, wala mo kiri mo komanse ti sara aye so anzere na Nzapa, a lingbi mo duti na mabe so lo lingbi ti pardone asiokpari ti mo na lege ti sandaga ti Jésus Christ.​—1 Jean 4:9, 14.

¹⁶ Ambeni zo angbâ ti sara vundu ahon ndo ni ndali ti asiokpari so Jéhovah apardone ni awe. Tongana ye so asi na mo, dabe ti mo so Jéhovah apardone Pierre na tanga ti abazengele atâa so ala dö Jésus azia na ngoi so lo yeke tâ na bezoin ti ala mingi. Jéhovah apardone même mbeni koli so a bi lo na gigi ti congrégation ndali ti so lo sara tâ kota lango-sioni me na pekoni lo changé bê ti lo (1 aCor. 5:1-5; 2 aCor. 2:6-8). Bible asara tënë ti azo so asara akota siokpari me so achangé bê ti ala na Nzapa apardone ala.​—2 Chron. 33:2, 10-13; 1 aCor. 6:9-11.

17. Nyen la ngere so a futa ti zi na azo alingbi ti sara teti mo?

¹⁷ Jéhovah ayeke pardone asiokpari so mo sara ândö na lo yeke girisa na ndo ni tongana mo changé bê ti mo biani na mo yeda na nzoni bê ti lo. Pensé pëpe so sandaga ti Jésus alingbi pëpe ti kanga ndo ti asiokpari ti mo. Tongana mo pensé tongaso, mo yeke tï na yâ ti mbeni oko ti akûkû ti Satan. Atâa ye wa Zabolo aye ti tene mo mä na bê na ni, ngere so a futa ti zi na azo alingbi ti kanga ndo ti asiokpari ti azo kue so atï na yâ ti siokpari me so achangé bê ti ala (aProv. 24:16). Ti mä na bê na ngere so a futa ti zi na azo alingbi ti mû maboko na mo ti zia ti sara vundu ahon ndo ni ndali ti asiokpari so mo sara nga mo lingbi ti wara ngangu ti sara na Nzapa na bê ti mo kue, na bibe ti mo kue nga na âme ti mo kue.​—Mat. 22:37.

E HINGA NZONI MINGI AYE SO SATAN AYE TI SARA

18. Tongana nyen la e lingbi ti kpe akûkû ti Zabolo?

¹⁸ Ti Satan, atâa kûkû wa la e tï dä, so abâ lo pëpe, me ye so agbu bê ti lo ayeke ti wara gi e awe. Teti so e hinga nzoni mingi aye so Satan aye ti sara, e lingbi ti kpe ti tene Zabolo agbu e (2 aCor. 2:10, 11). E yeke tï pëpe na yâ ti akûkû ti lo tongana e sambela ti wara ndara ti gbu ngangu na yâ ti atara. Disciple Jacques atene: “Tongana ndara amanke mbeni zo na popo ti ala, zia lo ngbâ ti hunda ni na Nzapa, teti Nzapa ayeke mû ye na azo kue na lo yeke suku ngbanga ni pëpe; na a yeke mû ni na lo.” (Jacq. 1:5). Tongana e ye ti tene Jéhovah amû na e ndara ti gbu ngangu na yâ ti atara, a lingbi e manda Bible e wani lakue nga e sara ye alingbi na aye so Bible afa. Ambeti so ngbâa be-ta-zo so ayeke sara ye na ndara asigigi na ni azi lê ti e na ndo ti akûkû ti Zabolo nga amû maboko na e ti kpe ni.

19, 20. Ngbanga ti nyen a yeke nzoni e ke ye so ayeke sioni?

¹⁹ Sambela nga na mandango Bible ayeke mû maboko na e ti ye mingi ye so ayeke nzoni. Me a yeke nga kota ye ti manda ti ke ye so ayeke sioni (Ps. 97:10). Ti gbu li na ndo ti akpale so tombango peko ti anzara ti mitele ayeke ga na ni alingbi ti mû maboko na e ti kpe ni (Jacq. 1:14, 15). A lingbi e manda ti ke ye ti sioni na ti ndoye ye ti nzoni. Tongaso, aye so Satan ayeke sara kusala na ni ti gi ti gbu e ayeke nzere na e pëpe ndali ti so e ke ni.

²⁰ E kiri singila mingi so Nzapa amû maboko na e tongaso si Satan alingbi pëpe ti gbu e na yâ ti akûkû ti lo. Jéhovah ayeke sara kua na yingo ti lo, tënë ti lo nga na bungbi ti lo ti zi e “na maboko ti Zo ti sioni.” (Mat. 6:13). Na yâ ti article ti peko, e yeke bâ tongana nyen ti kpe ambeni kûkû use so Zabolo asara kua na ni ti gbu na awakua ti Nzapa na fini lê ti ala.

[Kete tënë na gbe ni]

[Foto na lembeti 21]

Tenengo tënë kirikiri alingbi ti bi wâ na yâ ti congrégation

[Foto na lembeti 24]

Mo lingbi ti sigigi na gbe ti sarango vundu ahon ndo ni ndali ti siokpari so mo sara ândö