Futingo ti sese so: Mbeto ni asara mo? Mo ku ni kungo? Wala mo fatigué na kungo ni?

TONGANA a tene na mo so a yeke futi ande sese na 21 décembre ti ngu 2012, tongana ti so a fa na yâ ti calendrier ti ambeni mara ti kodoro ti Mexique so a iri ala aMaya, mbeto ayeke sara mo? Wala tongana mo mä so a yeke si ape, bê ti mo ayeke dë? wala a sara ye oko na ndo ti mo ape? Lango ni so ayeke gi tongana ti ambeni lango so azo afa me so asi ti lo lâ oko ape so?

Ka ti “lango ti ndani” so Bible asara tënë ni, mo pensé ti mo nyen dä? (Matthieu 24:3, Fini Mbuki, 2001). Ambeni zo asara mbeto ti tene sese ni agbi ande. Ti ambeni, ala ku kungo ti bâ ye so ayeke si ande na ngoi ni kâ. Ti ambeni zo ni, teti so ala ku ni gbä, bê ti ala anze. Mo pensé so tâ ye la ayeke si ande si ala sara mbeto ni so wala ala yeke ku ni gi kungo so? wala a yeke ti lo gi mbeni senge tënë ti tere la?

Tongana mo bâ tâ ye so Bible atene na ndo ti futingo ti sese so, peut-être bê ti mo ayeke dö. Bible afa aye so ndali ni a lingbi e ku ngoi ni so kungo nga lo fa so teti so ambeni zo ayeke ku ni gbä, ala zi bê ti ala na ndo ni. Bâ fadeso ambeni kiringo tënë ti Bible na ambeni tënë so azo ayeke hunda ka na ndo ti futingo ti sese so.

A yeke gbi ande sese so?

BIBLE ATENE: “[Nzapa aleke] gere ti sese, si a yengi lâ oko pëpe.”​—PSAUME 104:5.

A yeke futi sese so lâ oko ape, ni na wâ ni na mbeni ye nde. Bible atene ti lo so sese ayeke ndo ti duti ti azo, ala yeke duti dä lakue lakue. Psaume 37:29 atene: “Sese ni aga ye ti héritier ti azo ti mbilimbili, na fade ala duti dä lakue.”​—Psaume 115:16; Ésaïe 45:18.

Na peko ti so Nzapa aleke sese, lo tene “a yeke nzoni mingi”, na lo ngbâ ti bâ ni tongaso (Genèse 1:31). Lo pensé lâ oko pëpe ti futi sese ni, me lo mû zendo ti futi gi “azo so ayeke buba sese” ni si ala buba ni biaku biaku ape.​—Apocalypse 11:18.

Peut-être mo hunda tere ti mo na ndo ti 2 Pierre 3:7 so atene: “A bata ayayu na sese ti fadeso ti ku na wâ.” Na mo, versê so afa so a yeke gbi ande tâ lo sese ni so? Tongana a bâ ni nzoni, Bible ayeke sara tënë ti “ayayu”, “sese” nga na “wâ” ngoi na ngoi na lege ti fä. Na tapande, tongana Genèse 11:1 atene: “Sese kue ayeke na yanga oko”, tënë “sese” ni aye ti sara tënë ti azo.

Atënë so angoro 2 Pierre 3:7 afa so ayayu, sese nga na wâ so a sara tënë ni ge ayeke nga na lege ti fä. Na versê 5 nga na 6 ni, a tene so a futi lani ayayu nga na sese ti giriri na lege ti Kota ngu na ngoi ti Noé, me sese so e yeke dö ni so angbâ ti lo. Kota ngu ni afuti ti lo lani asioni zo ti ngoi ni kâ, so Bible airi ala “sese”. A futi nga azo so akomande na ngoi ni kâ, so Bible airi nga ala “ayayu”. (Genèse 6:11) Ti gue oko na atënë so, 2 Pierre 3:7 atene so a yeke futi ande biaku biaku asioni zo nga na asioni ngorogbia ti ala mo bâ mo tene na lege ti wâ.

Nyen la ayeke si na ngoi so a yeke futi sese ni?

BIBLE ATENE: “Sese so ayeke hon, na nzara ni kue, me zo so asara ye so Nzapa aye, lo duti lakue lakue.”​—1 JEAN 2:17, La Sainte Bible en sango.

“Sese” so Bible atene ayeke hon so ayeke tâ lo sese ni mveni ape, me dunia so sarango ye ti azo ni ague nde na ye so Nzapa aye. Legeoko tongana ti so mbeni docteur ayeke zi mbeni sioni ye na yâ ti tere ti zo si kobela ti cancer amû yâ ti tere ti lo ape, Nzapa ayeke “zi” nga asioni zo si anzoni zo aduti na ngia na ndo ti sese (Psaume 37:9). “Futingo ti sese,” so ti tene ti dunia so, ayeke duti tâ mbeni ye ti nzoni ndali ti azo.

Pendere tënë so, so andu “futingo ti sese,” e wara ni nga na yâ ti ambeni Bible, so na yâ ni a sara kusala na atënë tongana “ngoi so ayeke gue ti hunzi”, wala “nda ti ngoi so”. (Matthieu 24:3; La Sainte Bible en sango) So a yeke futi ande gi asioni zo, me anzoni zo nga na sese ni mveni ayeke ngbâ ti ala, a yeke na lege ni ti tene mbeni fini dunia abâ gigi na pekoni. Senge ape, ngbanga ti so Bible asara tënë lege mingi ti “ngoi so ayeke ga”.​—Luc 18:30.

Jésus airi ngoi ni so “ngoi so a yeke kiri ti leke aye kue ti ga fini”. Ande kâ, lo yeke sara si azo akiri awara dutingo so Nzapa aleke kozo ndali ti azo (Matthieu 19:28). Na tapande

• Azo kue ayeke duti nzoni na yâ ti paradis na ndo ti sese.​—Ésaïe 35:1; Michée 4:4.

• Azo ayeke sara nzoni kua, na ala yeke wara ngia dä.​—Ésaïe 65:21-23.

• A yeke zi kobela kue na tere ti azo.​—Ésaïe 33:24.

• Ambakoro ayeke kiri ti ga maseka.​—Job 33:25.

• Akuâ ayeke zingo.​—Jean 5:28, 29.

Tongana e sara “ye so bê ti Nzapa aye”, so ti tene ye so lo hunda na e ti sara, mbeto ti futingo ti sese so ayeke sara ande e ape. Nde na so, e yeke ku ni ande kungo.

Nyen la asara si tënë ni agbu bê ti azo laso mingi tongaso?

BIBLE ATENE: “Tongana ala bâ aye so ayeke si, ala nga, zia ala hinga so royaume ti Nzapa aga nduru awe.”​—LUC 21:31.

Na yâ ti mbeni buku ti lo (The Last Days Are Here Again), Pakara Richard Kyle atene so “ande aye ayeke changé gbagburu tongaso, na wusuwusu ayeke tï na ndo kue. Aye ni so ayeke duti ande na gunda ti futingo ti sese so,” mbilimbili na ngoi so awusuwusu ni so ayeke ga ngangu si zo ahinga li ti lo na ni ape.

Dutingo ti aye na yâ ti dunia laso asara si tënë ti futingo ti sese agbu bê ti azo laso mingi. Me tënë so Bible atene na ndo ni ayeke ti lo tâ nde mingi. E tene tongaso ngbanga ti nyen? A yeke pëpe ndali ti asioni ye so asi na ngoi ti ala lani si aprophète asû atënë ti aprophétie so, ên-ën, me Nzapa la si afa na ala aye so ayeke si, so ayeke fa na e so futingo ti sese so ayeke pusu nduru nduru. Bâ ambeni prophétie ni na gi ti bâ wala a yeke ye so asi na ngoi ti e la.

• Abira, kota nzara, yengingo ti sese, akobela ti futi kodoro.​—Matthieu 24:7; Luc 21:11.

• Sarango sioni so amû ndo.​—Matthieu 24:12.

• Bubango ti sese so azo ayeke buba na ni.​—Apocalypse 11:18.

• Azo so aye gi tere ti ala wani, so aye nginza nga na angia me so aye Nzapa ape.​—2 Timothée 3:2, 4.

• Yâ ti asewa so abuba.​—2 Timothée 3:2, 3.

• Sanka ti azo ndali ti aye so afa atene a ga nduru ti futi sese so.​—Matthieu 24:37-39.

• Fango nzoni tënë ti Royaume ti Nzapa na ndo ti dunia mobimba.​—Matthieu 24:14.

Jésus atene tongana e “bâ aye so kue,” zia e hinga so futingo ti sese so aga nduru awe (Matthieu 24:33). Ti aTémoin ti Jéhovah, e azo e yeke na ngoi ni so, ni la si ala yeke fa tënë ti mabe ti ala na azo na yâ ti akodoro 236.

So azo atrompé tere ti ala na alango ni afa so futingo ti sese so ayeke si lâ oko ape?

BIBLE ATENE: “Na ngoi so azo ni ayeke tene: ‘Siriri na nzoni duti ayeke dä!’ mo ye ti bâ, futingo ayeke ga gi hio tongaso na ndo ti ala gi tongana ti so songo yâ ayeke gbu mbeni mama ti ngo; na ala yeke kpe ande oko pëpe.”​—1 ATHESSALONICIEN 5:3.

Bible ahaka futingo ti sese so na tongo nda ti songo yâ ti mbeni mama ti ngo, so yâ ti lo ni ayeke mû lo gi gbagburu, na lo lingbi ti kpe ni ape. Ti Bible nga, ngoi so ayeke gue ngbii ti si na futingo, lo haka ni na ngo. A yeke tongana ti mama ti ngo so ahinga so tongana lango ti dungo molenge ni ayeke pusu nduru nduru, yâ ti lo ayeke son nga lo ngangu ngangu. Docteur ti lo afa peut-être lango so lo yeke dü na molenge ni. Me atâa so lango ni asi me lo de ti dü ape, mama ni ahinga so ngoi ni angbâ na lo mingi ape. A yeke nga tongaso na alango so azo ayeke fa me so futingo ni ade ti si ape. So kue achangé ti lo ye oko pëpe na aye so afa so e yeke na “alango ti nda ni”.​—2 Timothée 3:1.

Me peut-être mo hunda tere ti mo, mo tene: ‘So aye afa polele so futingo ti sese so ayeke pusu nduru nduru, nyen la si gbâ ti azo abâ ti ala ni ape so?’ Bible afa so tongana lâ ti futingo sese so ayeke pusu nduru, mingi ti azo ayeke mû ni tongana ye ti ngia. Ti ala, aye so afa so e yeke na lâ ti nda ni, ala yeke mä na bê na ni ape, me ala yeke he ni na ngia, ala tene: “A londo na ngoi so akotara ti e akui, aye kue angbâ tâ gi tongana ti so a yeke na tongo nda ti sarango dunia.” (2 Pierre 3:3, 4). Ye so e lingbi ti tene so ayeke so aye afa polele so e yeke na lâ ti nda ni, me mingi ti azo abâ ti ala ni tongaso ape.​—Matthieu 24:38, 39.

Aye so e londo ti bâ afa gi ambeni ye so Bible afa so afa so futingo ti sese so aga nduru awe.a Mo ye ti hinga ye mingi na ndo ni? Bâ aTémoin ti Jéhovah, na yeda ti tene ala manda Bible na mo senge senge na yanga-da ti mo, wala na mbeni ndo nde so alingbi na mo, wala même na téléphone. Ye so mo lingbi ti mû ndali ni ayeke gi ngoi ti mo, na mo yeke bâ ande nzoni dä mingi.