Bata

Afango Ye So Alingbi ti Sala na Kusala

Lege ti Sala Kusala na Supplément So

Mingi ti afango ye so ge asigigi na yâ angbele numéro ti Kusala ti Royaume. Tara gbâ ni tongana ti so bê ti mo aye na yâ kusala ti fango tënë ti mo, na bâ ye so mo yeke wara na pekoni. Bata supplément so, na bâ ni tongana mo leke tele ti mo teti kusala ni.

Mo lingbi ti zingo nzala ti mbeni zo teti Tënë ti Nzapa tongana tënë ti mo ayeke ndulu. Hunda mbeni tënë so ayeke polele, na pekoni diko kiringo tënë ti Mbeti ti Nzapa so ayeke ndulu. Mo lingbi ti tara afango ye so:

“Tongana mo bâ gigi ti kekereke, mo bâ ni na nzoni lê wala na kite? [Zia zo ni akiri tënë.] Bible afa giriri kozoni aye ti dongo bê so e bâ laso nga ye so ayeke si na pekoni.”​—2 Tim. 3:1, 2, 5; aProv. 2:21, 22.

“Agingo bê ayeke mingi laso na ndo seni ti tele. Mo hinga so Nzapa azê so fade lo yeke hunzi biaku biaku akpale kue ti seni?”​—Es. 33:24; Apoc. 21:3, 4.

“Mo hinga so Bible atene giriri kozoni so na nda ni gi ngorogbia oko si ayeke komande sese kue?”​—Dan. 2:44; Mat. 6:9, 10.

“Mo bâ ti mo so aye ayeke duti tongana nyen tongana Jésus Christ akomande sese ni?”​—Ps. 72:7, 8.

“Azo mingi ahu pono ti tënë ti kangbi nde nde teti so ala yeke koli wala wali, ndali ti lege ti vorongo ti ala, wala mara ti ala. Mo bâ ti mo Nzapa atene nyen na ndo mara sioni bibe tongaso?”​—Kus. 10:34, 35.

“E hinga so Jésus Christ asala aye ti kpene mingi na ngoi ti lo. Tongana mo lingbi ti hunda na lo ti sala mbeni ye ti kpene, a yeke duti so wa?”​—Ps. 72:12-14, 16.

“Azo mingi anze ti mä gi atënë ti akpale. Ala ye nga ti mä tënë na ndo ayorö ni. Me na ndo wa si e lingbi ti wara atâ yorö na akpale ti e?”​—2 Tim. 3:16, 17.

“Mo lingbi ti fa na gigi Royaume so mo sambela ngbanga ni na yâ Sambela ti Seigneur (wala, Babâ ti E)?”​—Apoc. 11:15.

Alege ti To Nda ti Lisoro

Molongo ti ahundango tënë so ge, so a leke ni na lege ti ali ti tënë ti buku Comment raisonner, afa nzoroko ti lembeti na yâ buku ni so a lingbi ti wara dä kiringo tënë ni oko oko:

A yeke azo ti nzoni kue si ague na yayu? (61)

A lingbi zo ague na yayu ti duti na tâ ngia? (62)

Atâ nda ti tënë ayeke dä ti mä na bê na Nzapa? (106)

Nzapa abi bê ti lo biani na ndo ye so asi na e? (107)

Nzapa ayeke tâ zo biani? (108)

Ngbanga ti nyen a yeke kota ye ti hinga na ti sala kusala na tâ iri ti Nzapa? (200)

Jésus Christ ayeke biani Nzapa? (205)

Ye nyen alingbi ti mû maboko si mbeni mariage aga nzoni ahon? (229)

Ngbanga ti nyen sioni awu mingi? (237)

Zo wa akomande sese so: Nzapa wala Satan? (250)

Ngbanga ti nyen e ga mbakoro na e kui? (253)

Dutingo ti akinda ayeke tongana nyen? (255)

Nzapa ayeda na alege ti vorongo kue? (310)

Tongana nyen zo alingbi ti hinga lege ti vorongo wa ayeke nzoni? (316)

Fade Royaume ti Nzapa ayeke sala nyen? (336)

Tongana nyen Satan asala ngangu na ndo sese ti laso? (368)

Ngbanga ti nyen Nzapa azia lege na pasi? (375)

Nda ti fini ti zo ayeke nyen? (434)

Awango ti Fa na Brochure Ahunda

“A yeke na kite oko pëpe so mo yeda so azo mingi amä na bê na Nzapa. Azo kue so amä na bê na lo ayeda so Nzapa ahunda mbeni ye na mbage ti e. Ye so azo alingbi ti mä tele dä pëpe ayeke, Ye wa Nzapa ahunda na e?” Na pekoni fa brochure Ahunda, zi ni na ye ti manda 1, na sala lisoro na ndo ni.

“Ndali ti akpale mingi so a wara na yâ fini ti sewa laso, mo hunda tele ti mo mbeni lâ awe lingu wa amû lege ti wara tâ ngia ti sewa?” Tongana zo ni akiri tënë awe, fa so na yâ ti Bible, Nzapa afa tâ lingu ti tâ ngia ti sewa. Diko Esaïe 48:17. Nga zi na ye ti manda 8 na yâ brochure Ahunda, na fa ambeni versê ti Bible so afa peko ti tënë ni na so amû nzoni wango ti fa lege na zo oko oko ti sewa ni. Diko molongo ti ahundango tënë so ayeke na tongo nda ti ye ti manda ni. Hunda zo ni wala lo ye ti diko akiringo tënë ni.

“Brochure so ayeke na mbeni mandango ye so afa anzene nzene tënë na ndo ti akota fango ye ti Bible. Na ndo lembeti oko oko, mo yeke wara akiringo tënë na ahundango tënë so agbu bê ti azo a ninga angu ngbangbo mingi. Na tapande, Ye wa Nzapa aleke ti sala teti sese?” Gue na ye ti manda 5, na diko ahundango tënë so ayeke na tongo nda ni. Hunda zo ni so wa anzere na lo mingi, na pekoni diko paragraphe oko wala mingi so alingbi na ni, nga na aversê so alingbi. Fa na lo so lo lingbi ti wara hio tongaso anzoni kiringo tënë na ambeni hundango tënë nde. Hunda na lo ti kiri ti sala lisoro na lo na ndo ti mbeni hundango tënë nde.

“Ti mo, gunda ti salango ngangu kue na yâ a-ekole ayeke nyen? A yeke ngbanga ti so ababâ na mama afa lege na amolenge mbeni pëpe? Wala a lingbi ti duti mbeni ye nde, tongana ngangu ti Zabolo?” Zia zo ni akiri tënë. Tongana lo tene a yeke ngbanga ti ngangu ti Zabolo, diko Apocalypse 12:9, 12. Gboto lê na ndo kusala so Zabolo asala ti maï wusuwusu na ndo sese. Na pekoni zi brochure Ahunda na ye ti manda 4, na hunda zo ni wala lo hunda tele ti lo mbeni lâ awe ndo so Zabolo alondo dä. Diko akozo paragraphe use ni, na sala lisoro na ndo ni. Tongana zo ni atene so salango ngangu na yâ a-ekole ayeke ngbanga ti so “ababâ na mama afa lege na amolenge mbeni pëpe,” diko 2 Timothée 3:1-3 na fa na gigi asalango ye ti azo so asala si kpale so ayeke. Na pekoni, zi brochure Ahunda na ye ti manda 8, diko paragraphe 5 ni, na ngbâ ti sala lisoro ni.

“Mo bi bê ti mo so a yeke na lege ni ti ku ti tene Wasalango ye amû na e hingango ye so e yeke na bezoin ni ti leke na mbeni fini ti sewa so ayeke na ngia?” Tongana zo ni akiri tënë awe, fa brochure Ahunda. Zi ni na ye ti manda 8, na fa so a lingbi ti wara na yâ ni akpengba-ndia ti Bible teti azo oko oko ti sewa. Hunda ti fa na lo tongana nyen ti sala kusala na brochure ni legeoko na Bible ti wara ye ti nzoni so ayeke kota ahon kue.

“Ndali ti akpale kue so e wara na yâ fini ti laso, mo bâ so sambela alingbi ti mû biani maboko na e? [Zia zo ni akiri tënë.] Azo mingi atene so sambela amû na ala ngangu ti bibe. [Diko aPhilippien 4:6, 7.] Ye oko, mbeni zo alingbi ti tene so Nzapa amä sambela ti lo pëpe. [Zi brochure Ahunda na ye ti manda 7.] Brochure so afa tongana nyen sambela alingbi ti ga na ye ti nzoni mingi na e.”

“E yeke sala lisoro na azo ti tele ti da ti e na ndo ngbanga ti nyen alege ti vorongo ayeke mingi tongaso na ndo ti sese. Ye oko, Bible ayeke gi oko. Ti mo, ngbanga ti nyen yâ ti alege ti vorongo ayeke kirikiri? [Zia zo ni akiri tënë. Zi brochure Ahunda na ye ti manda 13, na diko akozo hundango tënë ni.] Fade mo yeke wara anzoni kiringo tënë na ahundango tënë so na dikongo ye ti manda so.”

Tongana mo zia Tour ti Ba Ndo na Réveillez-vous! na tïtî mbeni zo, hunda na lo wala mo lingbi ti diko na lo mbeni ndulu paragraphe. Tongana lo yeda, zi brochure Ahunda na ye ti manda 5. Fa ahundango tënë so ayeke na tongo nda ti ye ti manda ni, na hunda na lo ti mä kiringo tënë na kozo hundango tënë ni na ngoi so mo yeke diko kozo paragraphe ni. Na peko ti dikongo paragraphe ni, hunda tënë ni na zia zo ni akiri tënë. Fa na lo brochure ni, na tongana lo yeda ti mû ni, leke ti kiri mbeni lâ ti mä akiringo tënë ti lo na ahundango tënë use so aga na peko.

Awango ti Fa na Buku Hingango Ye

Na Bible na maboko, to nda ni na tenengo: “Laso e yeke kangbi bibe ti mbeni versê na azo kue ti vaka ti mo. A tene . . . ” Diko Jean 17:3, nga na pekoni hunda: “Mo bâ ye so a zê na e ti wara tongana e yeke na mara ti hingango ye so ayeke na lege ni? [Zia zo ni akiri tënë.] Na ndo wa si zo alingbi ti wara mara ti hingango ye tongaso?” Tongana zo ni akiri tënë awe, fa buku Hingango Ye, na tene: “Buku so afa hingango ye so ague na fini ti lakue lakue. Lo yeke sala ni na kiringo tënë na atënë mingi so azo ayeke hunda na ndo Bible.” Fa li ti atënë ni, na hunda zo ni wala lo hunda tele ti lo mbeni lâ awe na ndo ambeni kota li ti tënë so.

“Mo hunda tele ti mo mbeni lâ awe wala Nzapa abi bê biani na ye ti kirikiri nga na pasi so angoro e wala so e mveni e wara? [Zia zo ni akiri tënë.] Bible adë bê ti e so Nzapa andoye e na so lo yeke mû ande maboko na e na yâ angoi ti kpale.” Diko ambage ti Psaume 72:12-17. Zi buku Hingango Ye na chapitre 8, na fa so a mû kiringo tënë so adë bê na mbeni hundango tënë so azo kutu mingi ahunda: Ngbanga ti nyen Nzapa azi lege na pasi? Tongana lege ayeke dä, sala lisoro na ndo ti ambeni bibe ti Bible so ayeke na paragraphe 3 ti si na 5, wala sala ni na vizite ti peko.

“Mingi na popo ti e aglisa mbeni zo so e ndoye lo mingi na yâ kuâ. Mo hunda tele ti mo mbeni lâ awe wala fade e yeke kiri ti bâ ala? [Zia zo ni akiri tënë.] Jésus afa so lege ayeke dä ti zi azo ti e so e ndoye ala mingi na gbe ti kui. [Diko Jean 11:11, 25, 44.] Même tongana tënë so aninga asiècle mingi awe, a fa na gigi ye so Nzapa azê ti sala teti e.” Zi buku Hingango Ye na foto so ayeke na lembeti 85, na diko kete tënë ti foto ni. Na pekoni fa foto so ayeke na lembeti 86, na sala tënë na ndo ni. Leke gunda ti mbeni fini vizite na hundango na lo: “Mo ye ti hinga ngbanga ti nyen azo aga mbakoro na akui?” Kiri ti sala lisoro na ndo chapitre 6.

“Mo hunda tele ti mo mbeni lâ awe ngbanga ti nyen azo aye ti duti na fini aninga?” Tongana zo ni akiri tënë awe, zi buku Hingango Ye na chapitre 6, na diko paragraphe 3. Sala lisoro na ndo ti aversê so a fa pekoni. Na kiringo na ndo ti ahundango tënë use so ayeke na hunzingo ti paragraphe ni, hunda na zo ni wala lo ye ti wara akiringo tënë ni. Tongana lo yeda, bâ aparagraphe so aga na peko, so ayeke mingi pëpe.

“E yeke hunda na azo tongana ala mä na bê na ye so . . . ” Diko Genèse 1:1, nga na pekoni hunda: “Mo yeda na tënë so?” Tongana zo ni ayeda, na pekoni tene: “Mbi nga mbi yeda na ni. Ye oko, mo tene ti mo so tongana Nzapa aleke aye so kue, lo yeke nga na gunda ti ye ti sioni?” Na peko ti so mo mä kiringo tënë ti lo awe, diko Zo-ti-fa-tene 7:29. Zi buku Hingango Ye na chapitre 8, na diko paragraphe 2. Tongana lo yeda pëpe na tënë ti Genèse 1:1, wa lo ti gi ye so afa so Wasalango ye ayeke dä.​—Bâ buku Comment raisonner, alembeti 72-74.

“Mo yeda so, teti so anzoni lege ti salango ye agbian hio mingi laso, a lingbi e wara mbeni ye so afa lege na e nzoni na yâ fini? [Zia zo ni akiri tënë.] Atâa so a yeke buku so aninga ahon tanga ti abuku kue, Bible amû anzoni wango teti fini ti laso nga teti fini ti sewa so ayeke na ngia.” Na pekoni zi buku Hingango Ye na chapitre 2, na diko paragraphe 10 nga na kozo tënë ti paragraphe 11, nga 2 Timothée 3:16, 17.

“Mo ye ti hinga gigi ti kekereke ti e na ti sese? [Zia zo ni akiri tënë.] Bible asala tënë ti gigi ti kekereke na lege ti mbeni ndulu tënë oko: Paradis! A yeke na ndo so si Nzapa azia kozo koli na kozo wali tongana lo leke ala. Bâ tënë so a fa na ndo ye so sese alingbi ando ti duti ni.” Zi buku Hingango Ye na lembeti 8, na diko paragraphe 9, na gbe ti kete li ti tënë “Fini na ya Paradis.” Na pekoni, sala lisoro na ndo atënë ti paragraphe 10, na diko versê so a fa pekoni, Esaïe 55:10, 11. Hunda ti kiri ti sala tanga ti lisoro ni na ndo fini na yâ Paradis so akiri a leke ni, na ti bâ aparagraphe 11-16.

Tongana mo kiri ti bâ azo so mo zia na tïtî ala Tour ti Ba Ndo na Réveillez-vous!, mo lingbi ti tene:

“Na ndangba gango ti mbi, mbi yeke lani na ngia ti zia na tïtî mo mbeni numéro ti Tour ti Ba Ndo. Peut-être mo bâ so kota li ti tënë ni kue ayeke Tour ti Ba Ndo Afa Tene ti Royaume ti Jéhovah. Laso mbi ye ti fa na mo ye so Royaume ni ayeke na ye so lo lingbi ti duti teti mo na sewa ti mo.” Na pekoni zi brochure Ahunda na ye ti manda 6, na tongana zo ni ayeke na ngoi, diko ni na sala lisoro na ndo ni.

“Mbi sala vizite na mo a ninga pëpe na mbi zia Tour ti Ba Ndo na Réveillez-vous! na tïtî mo. Ambeti so apusu azo ti yekia Bible na akpengba-ndia ti tambela ti lo. Teti mbi bâ so a yeke kota ye ti tene zo oko oko agbu nda ti Tënë ti Nzapa, mbi kiri ti fa na mo mbeni ye so ayeke mû ande maboko na mo ti sala ni.” Fa brochure Ahunda wala buku Hingango Ye, na hunda wala lo ye ti manda Bible.

Tongana mo fa angbele buku kue ti lembeti 192, mo lingbi ti tara fango ye so:

“Azo agboto lê mingi na ndo nene ti nzoni fango ye. Ti mo, mara ti fango ye wa a lingbi zo awara ti duti na ngia ti kota ahon na ti tene ye atambela nzoni na yâ fini ti lo? [Zia zo ni akiri tënë. Na pekoni diko aProverbe 9:10, 11.] Buku so [fa li ti tënë ti buku so mo yeke mû] aluti na ndo ti Bible. A fa oko lingu ti hingango ye so ague na fini ti lakue lakue.” Fa mbeni mbilimbili tapande na yâ buku ni, na wa zo ni ti diko buku ni.

Ambeni Mbeti Nde

A lingbi ti wara afango ye so alingbi ti sala na kusala teti ambeni buku na abrochure na yâ Index des publications de la Société Watch Tower na gbe ti:

Afango Ye

Molongo na Lege ti Mbeti

Hundango Ye Polele

Ti to nda ti mbeni mandango Bible, tara ti sala kusala na mbeni oko ti ahundango ye polele so ge:

“Mo hinga so gi na yâ apenze-ngbonga kete mo lingbi ti wara kiringo tënë na akota tënë ti Bible? Na tapande, . . . ” Na pekoni, hunda tënë so ayeke na tongo nda ti mbeni oko ti aye ti manda na yâ brochure Ahunda so mo bâ a yeke nzere na zo ni.

“Mbi luti na mo ge ti fa na mo kapa ti e ti mandango Bible senge senge na azo. A mû gi ndulu na apenze-ngbonga oku ti fa tongana nyen a yeke sala ni. Mo yeke na apenze-ngbonga oku?” Tongana zo ni ayeda, mû brochure Ahunda na ye ti manda 1 ti fa tongana nyen a yeke manda brochure ni, na diko gi versê oko wala use so mo leke. Na pekoni, hunda: “Lawa si mo yeke duti ande na apenze-ngbonga 15 ti tene e bâ ye ti manda ti peko?”

“Azo mingi ayeke na Bible; ye oko, ala hinga pëpe so lo kiri tënë na akota hundango tënë so e yeke hunda na ndo gigi ti e ti kekereke. Na lege ti ye ti mandango na ye so [brochure Ahunda wala buku Hingango Ye] teti ngbonga oko wala yenga oko, mo lingbi ti wara kozo hingango ye ti Bible gi na yâ ti anze kete. Mbi yeke duti na ngia ti fa na mo tongana nyen kapa ni ayeke tambela.”

“Mbi ga ti bâ mo ti hunda na mo ti manda Bible senge senge na da. Tongana mo mû lege na mbi, mbi ye ti fa na mo gi na yâ apenze-ngbonga kete tongana nyen, na yâ ndulu na akodoro 200, azo asala lisoro na ndo ti Bible na da ti ala, legeoko na sewa ti ala. E lingbi ti sala lisoro na ndo ti ye so mo mveni mo soro. [Fa li ti atënë ti buku Hingango Ye.] So wa anzere na mo biani?” Zia zo ni asoro ye so lo ye. Zi buku ni na chapitre so lo soro, na to nda ti manda ye na kozo paragraphe ni.

“Mbi yeke manda Bible na azo senge senge na mbi yeke na mbeni ngoi na yâ kapa ti mbi teti ambeni wamandango ye nde. Mbi yeke sala kusala na ye ti manda na Bible so. [Fa buku Hingango Ye.] Mandango ye ni aninga gi anze kete na amû akiringo tënë na ahunda tënë tongana: Ngbanga ti nyen Nzapa azia lege na pasi? Ngbanga ti nyen e ga mbakoro na e kui? Ye nyen asi na azo so e ndoye ala, so akui? Na tongana nyen mo lingbi ti ga ndulu na Nzapa? Mo ye mbi fa na mo tongana nyen a yeke manda ye ni?”

Tongana mo wara mbeni nzoni fango ye so alë lengo, ngbâ ti sala kusala na ni! Leke gi ni alingbi na mbeti so a yeke fa na yâ ti nze ni.