Aye so asi na aita

◼ Australie: John, mbeni zo so ahinga mbeti mingi, ayeke gue lani na églize na ngoi so lo ngbâ kete me na pekoni lo “mä na bê na Nzapa oko pëpe.” Mbeni ita-koli so ayeke pionnier azia na lo brochure La vie a-t-elle été créée? Na vizite ti peko lo zia na lo brochure L’origine de la vie. Ita ni angbâ lakue ti zia nzara ni na yâ ti bê ti lo na gango na lo afini périodique nga na ambeti kue so asara tënë na ndo ti création wala aprophétie ti Bible. Na ngoi so lo bâ so John ato nda ti dengi mê na tënë ni, ita ni amû na lo buku Bible: A Yeke Tene ti Nzapa Wala ti Azo? Na peko ti so lo diko ni, John wani atene so yâ ti bango ndo ti ni na ndo ti Nzapa ato nda ti woko awe. Na nda ni, ita ni amû na lo buku Bible afa, lo fa na lo lembeti 20 paragraphe 8 nga lembeti 23-24 paragraphe 13-16. Aversê so ayeke na yâ ti ambage so apika bê ti John mingi si lo tene: “A lingbi mbi kiri peut-être mbi manda Bible.”

◼ Mexique: Mbeni koli atene na mbeni wafango tënë so ni mä na bê pëpe so Bible ayeke tënë ti Nzapa. Ita-koli ni atene na lo so ni lingbi ti fa na lo ye so afa so Bible ayeke tënë ti Nzapa. Na peko ti ambeni lisoro so ala sara ni, bê ti koli ni adö ndali ti aye so lo manda na yâ ti Bible. Aye so apika bê ti lo mbilimbili ayeke andia ti Nzapa na ngoi so lo manda ni. Lo tene na wafango tënë ni: “Na tongo nda ni, tongana e yeke diko Bible, awango ti yâ ni akpa atënë so ayeke na yâ ti ambeni buku tongaso na asara ye oko na ndo ti mbi pëpe. Me ti fadeso tongana e diko ni, mbilimbili awango so andu nzoni sarango ye, bê ti mbi adö ngangu mingi.”

◼ États-Unis: Na ngoi so ala yeke mû mbage na fango tënë na ando so azo ayeke dä mingi, mbeni ita-koli na wali ti lo atingbi na mbeni wali so alondo na Taïwan so amä na bê na Nzapa me apensé so Bible ayeke tënë ti amunzu-poto. Lo ga na tere ti table so aita ni azia ambeti na ndo ni ngbanga ti so lo hinga ye so lo lingbi ti sara pëpe atâa so gigi ti lo ayeke nzoni. Lo yeke na beku so Bible alingbi ti mû maboko na lo ti duti na ngia na yâ ti fini ti lo. Ita-koli ni na wali ti lo ato nda ti manda Bible na lo na lege ti buku Bible afa nga na brochure La paix et le bonheur durables : comment les trouver. Ahon ti manda chapitre 2 ti buku ni, ala sara lisoro na ndo ti mbage so ayeke na yâ ti brochure ni so li ni ayeke: “Un guide bénéfique pour tous les humains.” Na peko ti so ala bâ akozo paragraphe omene ti mbage so, bê ti wali ni adö ti tene so Bible ayeke oko mbeti so ayeke tâ nde mingi na tanga ti ambeti ti abungbi ti vorongo nzapa. Na peko ti so ala bâ aprophétie ti Bible so aga tâ tënë awe, lo tene: “Mbi pensé so nde na Bible, mbeni buku oko ayeke dä pëpe so atënë ti yâ ni ayeke tä tënë!”

◼ Japon: Atâa so mbeni koli atene na mbeni ita-koli so ni mä na bê na Nzapa pëpe, ita-koli ni angbâ ti sara anduru vizite na lo, ti fa na lo a-article so ayeke na yâ ti Réveillez-vous! so li ni ayeke “Hasard ou conception ?” Yeke na yeke, koli ni achangé bango ndo ti lo na lo to nda ti yeda so peut-être mbeni Wasarango ye ayeke dä. Fadeso lo mä na bê so Nzapa ayeke dä, na ita-koli ni ayeke manda Bible na lo na yâ ti brochure Nzoni tënë so alondo na Nzapa!

◼ Canada: Mbeni ita-wali amû afini périodique na mbeni wali na ngoi so wali ni ayeke sigigi na yanga-da ti lo ti gue na tere ti oto ti lo. Na ngoi so ita-wali so amû na lo mbeti ni akiri ti bâ lo, wali ni atene na lo polele so tënë ni anzere na lo ape nga lo mä na bê na Nzapa ape. Ita-wali ni adö lege ni azia pëpe me lo ga na wali ni brochure Une vie pleinement satisfaisante : Comment ? Na ngoi so ita-wali ni akiri awara wali ni na yanga-da, lo tene na lo so atâa so lo hinga so wali ni amä na bê na Nzapa pëpe, lo yeke pensé na lo ngbanga ti so lo hinga so wali ni gi lo oko la lo yeke bata amolenge ti lo. Lo fa na lo lembeti 4 paragraphe 6 ti brochure ni, so na yâ ni a fa mbeni hundango tënë ti hinga ndo so e lingbi ti wara anzoni wango dä. Na pekoni, lo wa lo ti diko awango so ayeke na ye ti manda 2 so afa tongana nyen ti bata amolenge. Anzere na wali ni mingi ti mû brochure ni.