Akiringo Tene na Ahundango Tene ti I
◼ Tongana nyen azo ti yambango zo alingbi ti mu maboko na ababâ na mama ti tene amolenge ti ala aduti kpö na ngoi ti abungbi?
Na yâ salango ye ti ala, amolenge ayeke na wâ mingi na a yeke ngangu na ala ti duti na ndo oko a ninga. Na peko ti mbeni bungbi, ala si singo na wâ nga ngoi na ngoi, ala yeke na nzala ti kpe loro na akamarade ti ala na yâ Da ti Royaume, wala mbeni ndo ti bungbi nde, na ndo so ayeke bata akutukutu dä wala na atele ti lege. Tongaso, tongana ti so mbeni mato afa, ‘molenge so a zia lo senge ayeke mu kamela na babâ na mama ti lo.’—aProv. 29:15.
A yeke ye ti mawa ti tene ni, me ambeni na popo ti aita ti e ti koli na ti wali so ayeke mbakoro awara kota kä na tingo ni na peko ti so ambeni molenge so ayeke mu loro apusu ala. Ala ba pasi senge senge, na ye so asala si ababâ na mama ni nga na kongrégation afuta nginza so ala ku tele ti ala na ni pepe. A lingbi a zia amolenge akpe loro na asala ngia pepe na yâ Da ti Royaume wala na gigi ni, teti nzoni ti ala nga teti nzoni ti ambeni zo nde.
Bible amu na ababâ na mama kungba ti manda na amolenge ti ala ti kpe mbito ti ando so e yeke voro Nzapa dä. (Zo-ti. 5:1a) Na ngoi ti abungbi na a-assemblée, a lingbi aita ti yambango zo aba ndo nzoni si ‘ye kue atambela mbilimbili na lege ni.’ (1 aCor. 14:40; aCol. 2:5) A lingbi ala duti na donzi kozo, na ngoi nga na peko ti programme ni, na gigi nga na yâ ni. Tongana mbeni molenge amu loro wala asala ye kirikiri, mbeni oko ti aita ti yambango zo alingbi ti gbu lo yeke, na ti fa na lo ngbanga ti nyen a yeke ngoi ni pepe. Na lege ti nzobe, fade lo yeke sala nga tene ni na ababâ na mama ni na lo yeke hunda na ala ti ba ndo na ndo molenge ti ala. Fade ababâ na mama asala ye tongana ti so alingbi.
E hinga so aforoto na akete molenge alingbi ti toto wala ti sala kete wuluwulu na abungbi ngoi na ngoi. Aita ti yambango zo ayeke si apenze-ngbonga 20 wala ahon so kozoni na tongo nda ti bungbi; tongaso, ala lingbi ti bata andangba molongo ti abanc use ti Da ti Royaume teti ababâ na mama so aye ti duti dä na akete molenge ti ala. Fade atanga ti azo so aga ayeke sala kusala maboko na maboko ti zia aplace so senge teti ala.
Tongana mbeni molenge asala wuluwulu, a lingbi ababâ na mama asala mbeni ye. Tongana ala sala ye pepe na ye so akanga lege na azo ti mä tene nzoni, fade mbeni oko ti aita ti yambango zo ayeke hunda na lege ti ndoye na mbeni oko ti ababâ na mama ni ti sigigi na yâ ti da ni na molenge ni. Tongana e tisa ambeni fini zo na akete molenge ti ala ti ga na abungbi, a lingbi e duti na tele ti ala na e duti ndulu ti mu maboko na ala tongana amolenge ti ala atoto wala asala wuluwulu.
E yeke na ngia ti ba amolenge ti angu nde nde na Da ti Royaume na ti ba nzoni tambela ti ala na yâ da ti Nzapa. (1 Tim. 3:15) Na kpengo mbito ti aye so Jéhovah aleke teti vorongo, ala yeke yekia lo, na azo kue ayeke gonda ala na yâ ti kongrégation.