E Fa Nda ti Tene ti Nzapa na Lege Ni
1 Tongana lo yeke fa tene na mbeni zo ti komande, “Philippe alungula yanga ti lo, lo to nda ni na ndo ni so na yâ [mbeni] Mbeti ti Nzapa, lo fa na lo Tene-nzoni ti Jésus.” (Kus. 8:35) Philippe “afa nda ti tene-biani na lege ni.” (2 Tim. 2:15) Ye oko, laso, asurveillant so ague na ndo nde nde aba so mingi ti awafango tene ayeke sala kusala mingi pepe na Bible tongana ala yeke fa tene. Mo yeke sala kusala na Bible na yâ kusala ti mo ti fango tene?
2 Tene ti Nzapa ayeke lingu ti aye kue so e yeke mä na bê dä nga so e yeke fa. (2 Tim. 3:16, 17) A yeke ye so agboto azo na mbage ti Jéhovah na a fa ye na ala teti fini. Nda ni la, a yeke kota ye mingi ti tene e sala kusala na Bible na yâ kusala ti e ahon ti sala gi aye na ndo atene so a nzere na e. (aHéb. 4:12) Ngbanga ti so mingi ti azo ahinga tene mingi pepe na ndo Bible, a lingbi e diko ni ti fa na ala fango lege so alingbi, so Mbeti ti Nzapa a mu, nga gigi ti kekereke so ayeke na yâ ni teti azo kue.
3 Diko na yâ Bible polele: Mo lingbi ti tara ti gue na fango tene sân bozo. Mo lingbi ti zia ambeti so mo soro ti mu na azo na yâ mbeni kete bozo na mo gbu Bible na maboko wala mo zia ni na yâ ti bozo ti bongo ti mo. Na pekoni, tongana mo to nda ti sala lisoro na mbeni zo, mo lingbi ti sigigi na Bible ni sân ti tene zo ni a ba so mo ye ti sala kota diskur. Leke tele ti mo nzoni na mbeni lege so wamango mo alingbi ti mu peko ti mo legeoko na yâ Bible ti mo. Peut-être mo lingbi ti hunda na lo ti diko mbeni versê na kota go. Bê ti lo ayeke pika ande mingi tongana lo lingbi ti ba ye so Bible atene ahon gi ti mä ni na mbage ti mo. Biani, ti mu maboko na lo ti gbu nda ti ngbongboro tene ti versê ni, gboto lê ti lo na ndo atene so afa na gigi abibe ni.
4 Mbeni fango ye na versê oko: Na peko ti so mo fa tele ti mo awe, mo lingbi ti tene: “Azo ayeke gi alingu nde nde ti fa lege na yâ fini ti ala. Ye wa so mo ba ayeke nzoni lingu ti fango lege so alingbi ti mu maboko? [Zia lo kiri tene.] Mo bi bê ti mo tongana nyen na ndo tene so? [Diko aProverbe 2:6, 7, na zia lo kiri tene.] Vundu ni ayeke so ndara ti azo afa na gigi so ala lingbi kue pepe, na a sala si azo mingi ahinga pepe ye ti sala. Ye oko, ndara ti Nzapa afa lakue na gigi ye so a lingbi ti zia bê na ndo ni, nga ayeke ga na nzoye.” Na pekoni fa mbeti so mo ye ti zia ni, na gboto lê na ndo mbeni tapande oko ti ndara ti Nzapa so alingbi ti mu maboko na lo.
5 Jésus asala la ni kusala na Mbeti ti Nzapa ti mu maboko na azo ti bê ti mbilimbili. (Luc 24:32) Na lege ti Mbeti ti Nzapa, Paul afa nda ti aye so lo yeke fa. (Kus. 17:2, 3) Ziango bê ti e nga na ngia so e wara na yâ kusala ayeke gue ande na li ni na ngoi so e yeke fa nda ti Tene ti Nzapa na kode mingi ahon.