Ekole ti Kusala ti Théocratie ti Ngu 2002
1 Azo mingi aba tongana ye senge kode ti sala tene. Ye oko, salango tene ayeke mbeni matabisi so alondo na Jéhovah. Lo mu lege na e ti sala tene na ambeni zo, nga ti fa abibe na atene ti bê ti e. Mingi ahon, na lege ni, e lingbi ti sepela Nzapa ti e.—Ps. 22:23 (Ps. 22:22, NW); 1 aCor. 1:4-7.
2 Na Ekole ti Kusala ti Théocratie, a yeke fa lege na akoli, awali, na amolenge ti fa iri ti Jéhovah. (Ps. 148:12, 13) Mbeti-kapa ti ekole ti ngu 2002 aba amara nde nde ti akota tene ti Bible so e lingbi ti wara nzoni dä e mveni nga ti sala kua na ni na yâ fango tene. Na lekengo tele teti ekole nga na mungo mbage ti e dä, e lingbi ti kono hingango ye ti e na kode ti e ti awafango Tene ti Nzapa.—Ps. 45:2 (Ps.45:1, NW).
3 Diko Bible lâ oko oko: Tongana e yeke lakue na Bible ndulu na tele ti e, e lingbi ti gbu ngoi kue so e yeke na ye oko pepe ti sala, ti diko ni. Mingi ti e ayeke na ambeni penze-ngbonga so angbâ senge na yâ lango oko, so e lingbi ti sala kusala na ni na lege so. So tâ ye ti nzoni ti diko lembeti oko na yâ lâ oko oko; a yeke ye kue so a hunda ti ngbâ ti mu peko ti dikongo Bible so a leke ni na yâ mbeti-kapa ti ekole!—Ps. 1:1-3.
4 Kode ti diko Bible nzoni alingbi ti mu maboko na e ti ndu bê ti awamango e nga ti pusu ala ti sepela Jéhovah. A lingbi aita so ayeke sala devoir 2 na ekole atara peko ti devoir ti ala fani mingi na kota go. Surveillant ti ekole ayeke gonda ande azo so na lo yeke mu awango ti maï dikongo Bible.
5 Sala Kusala na Buku Comment raisonner: Devoir 3 na 4 ayeke luti na ndo buku Comment raisonner. Mingi ti e alingbi peut-être ti bi bê ti sala ngangu kue ti sala kusala fani mingi na yâ fango tene na buku so asala nzoni mingi. A lingbi aita-wali asoro ando ti sala lisoro dä so alingbi biani na territoire ti ala. A lingbi surveillant ti ekole abi lê mbilimbili na ndo lege so ala yeke fa ye nga so ala yeke sala kusala na aversê.
6 Zia si Ekole ti Kusala ti Théocratie amu maboko na e kue ti ngbâ ti sala kusala na matabisi ti salango tene so Nzapa amu na e ti fa nzo tene na ti sepela kota Nzapa ti e, Jéhovah!—Ps. 34:2 (Ps. 34:1, NW); aEph. 6:19.