Wara ngia gi na yâ ti aye so mo yeke na ni
1 Mbeti ti Nzapa awa e ti mû ye ti mitele na sewa ti e. Me a lingbi aduti pëpe kozo ye so e yeke gi na yâ fini ti e. A lingbi aye ti yingo aga na kozo ndo (Mat. 6:33; 1 Tim. 5:8). Ti zia aye kue na ndo so a lingbi na ni ayeke kete ye pëpe na “lâ ti ye ti ngangu” so e yeke dä (2 Tim. 3:1). Ye nyen ayeke mû ande maboko na e ti sala ni?
2 Duti na bango ndo ti Bible: Tënë ti Nzapa agboto mê ti e so tombango peko ti mosoro alingbi ti ga na kpale na lege ti yingo (Zo-ti. 5:9; Mat. 13:22; 1 Tim. 6:9, 10). Na ngoi ti kpale so e yeke dä, a yeke duti ande sioni mingi ti tene mbeni zo na popo ti e amû ngoi ti lo kue gi teti kua ti nginza wala gi teti aye so andu nginza. Ngbanga ti nyen? Ngbanga ti so akusala ti yingo tongana abungbi, mandango ye, na fango tënë ayeke duti ande na kota ndo pëpe na yâ fini ti lo (Luc 21:34-36). Nde na so, Mbeti ti Nzapa amû wango so: “Tongana e yeke na kobe na bongo, ye so alingbi na e.”—1 Tim. 6:7, 8.
3 A ye ti tene pëpe so a hunda na aChrétien ti duti awanzinga na yâ fini ti ala. Me, wango so amû maboko na e ti hinga tâ bezoin ti e na lege ti mitele: kobe, bongo nga na nzoni da ti lango. Tongana e wara awe aye so zo ayeke na bezoin ni na yâ fini ti lo, a lingbi e tara lakue pëpe ti wara aye ahon ndo ni. Na ngoi so e yeke gbu li na ndo mbeni ye so e ye ti vo, wala na ndo mbeni kua ti nginza nde, a yeke nzoni e hunda tele ti e mveni ‘Mbi yeke biani na bezoin ni?’ Salango tongaso a yeke mû ande maboko na e ti bata wango so asû na gbe ti yingo vulu: “I zia ndoye ti nginza asala i pëpe, a lingbi bê ti i aduti nzoni na ye so ayeke na i”.—aHéb. 13:5.
4 Tongana e zia bê kue na Jéhovah, fade lo yeke mû maboko na e (aProv. 3:5, 6). Atâa so a lingbi e sala kua ngangu ti wara aye so zo ayeke na bezoin ni lâ oko oko, fini ti e kue aluti pëpe gi na ndo aye tongaso. Atâa e yeke na ye mingi wala kete, e yeke zia bê kue na Jéhovah ti mû ye alingbi na abezoin ti e (aPhil. 4:11-13). Ye ti pekoni ayeke so e yeke wara ngia so alondo na Nzapa, nga na ambeni deba nzoni mingi.
5 Mû tapande ti mabe ti ambeni ita: Mbeni ita-wali so ayeke bata gi lo oko molenge ti lo ti wali na yâ tâ tënë azia yeke yeke ti duti na aye mingi na yâ fini ti lo. Atâa so lo yeke lani na ngia ti duti na mbeni pendere da, kozoni lo londo lo gue na yâ ti mbeni dä so akono mingi pëpe, na pekoni lo kiri lo londo lo gue na yâ mbeni dä nde so ayeke kete mingi ahon ti use ni so. Ye so amû lege na lo ti kiri na peko angbonga ti kua ti lo si lo lingbi mû ngoi mingi ahon teti fango tënë. Na peko ti so molenge ti lo ti wali ni akono na asala mariage awe, ita-wali ni ahunda ti gue na retraite hio kamême so ngu ti lo angbâ, atâa so lo hinga nginza ti lo ayeke kiri ande na gbe ni mingi. Ita ti e ti wali ni ayeke fadeso na yâ ti angu mbasambala ti lo tongana pionnier permanent. Lo yeke na vundu oko pëpe teti aye ti mitele so lo zia lege ni lani ti sala si aye ti Royaume aduti na kozo ndo na yâ fini ti lo.
6 Mbeni ancien na wali ti lo ayeke na yâ kusala ti pionnier teti angu mingi. Ala yeke na amolenge ota. Na yâ sewa ti ala, ala manda ti duti na ngia na mungo ye so alingbi na abezoin ti ala, ahon ti kaï gi nzara ti aye so bê ti ala ye. Ita-koli ni atene: E gi ti zia aye mingi pëpe na yâ fini ti e. Atâa so ngoi na ngoi e yeke wara akpale, Jéhovah amû lakue na e aye so e yeke na bezoin ni. . . . Tongana mbi bâ so sewa ni ayeke zia aye ti yingo na kozo ndo, mbi hinga so ye kue ayeke tambela tongana ti so a hunda, na bê ti mbi adë teti a yeke tongaso.” Wali ti lo atene: Ngia asi bê ti mbi tongana mbi bâ so [koli ti mbi] ayeke na akusala mingi na lege ti yingo.” Amolenge ni nga ayeke na ngia so babâ na mama ti ala amû desizion ti sala kusala ti ngoi kue na Jéhovah.
7 Teti so ala kue adö lege ti aye ti mitele azia, na asoro ti mû tele ti ala na kusala ti Nzapa, Bible amû zendo so fade ala yeke wara gbâ ti adeba nzoni fadeso nga na yâ fini ti kekereke.—1 Tim. 4:8.