Mosoro alingbi ti ga ti mo!
1. Ngbanga ti nyen ti gbu li na ndo ti kusala ti pionnier permanent?
1 Mo ye ti wara ngia mingi nga na nzerengo tere na yâ ti fini ti mo? Mo yeke na ngia na mungo maboko na azo? Kusala so mo yeke sara na Jéhovah, mo ye ti sara mingi ahon ni? Tongana mo yeda na ahundango tënë so, andâ mo lingbi ti mû kusala ti pionnier permanent. Biani, a lingbi zo apensé na akusala so Mbeti ti Nzapa ahunda na lo ti sara, tongana tënë ti sewa na tënë ti seni.
2. Fa ambeni mosoro ti yingo so apionnier permanent awara.
2 Tënë ti Salomon so alondo na yanga ti Nzapa afa so kamba ayeke na popo ti tënë nzoni ti Jéhovah na mosoro ti sese (aProv. 10:22). Laso, kozoni kue tënë nzoni ti Jéhovah aga na mosoro ti yingo. Mosoro tongaso asi singo teti apionnier permanent. Na tapande, ala hinga kota ngia so ayeke ti mû ye na amba ti ala teti ‘ala zia l’heure ti ala ahon senge pëpe’ ndali ti aye so ala lingbi ti sara teti ala mveni (aCol. 4:5; Kus. 20:35). Jéhovah abâ na nene ni ngangu kusala ti ala so ala sara na ndoye na lo gonda ni. Ngere ti mara ‘mosoro ti yayu’ tongaso alingbi ti kiri na peko lâ oko pëpe (Mat. 6:20; aHéb. 6:10). Na mbage, teti apionnier ayeke na ‘lê so ayeke nzoni’ na ala zia bê ti ala na Jéhovah ti mû na ala ye so atia ala, songo ti ala na lo akpengba mingi.—Mat. 6:22, 25, 32; aHéb. 13:5, 6.
3. Kangbi wa ayeke na popo ti gingo mosoro ti yingo na gingo mosoro ti mitele?
3 Mingi ni, gingo mosoro ti mitele ague na azo ti tï na yâ ti “nzara nde nde ti buba ye na ti ye so amû vundu”. (1 Tim. 6:9, 10; Jacq. 5:1-3). Me ye so ayeke si lâ oko pëpe na tënë nzoni ti Jéhovah. Teti apionnier permanent amû ngoi ti ala mingi na kusala ni, ye so amû maboko na ala ti luti nzoni na lege ti yingo, na ti zia lê gi na ndo ti aye so ayeke nzoni mingi (aPhil. 1:10). Mbeni ita-koli so ayeke wakode-kua so azia kusala ti lo so amû ngoi ti lo mingi ti mû kusala ti pionnier, atene: “Kua ti nginza ti mbi agbu hon ti mbi ândö mingi. Me kusala ti pionnier ayeke tongaso pëpe. Fadeso, mbi yeke mû maboko na azo na mbi yeke fa na ala tâ tënë. Ti mû maboko na azo ti yeda na tâ tënë anzere mingi.”
4. Tongana nyen apionnier permanent aga na aye ti nzoni na azo?
4 Aye ti nzoni teti azo: Laso, azo mingi ayeke na gbele “lâ ti ye ti ngangu”. (2 Tim. 3:1). Na ndo kue, azo ayeke na tâ bezoin ti beku. Awafango tënë ti Royaume ayeke na ngia ti bâ so lê ti azo so ayeke na beku kozoni pëpe agbian ti ga nzoni tongana ala mä nzoni tënë na ala yeda na ni. So kota ngia si apionnier permanent ayeke na ni ti mû ngbonga 800 na ndo ni ngu oko oko ti sara kusala so asö fini ti zo!—1 Tim. 4:16.
5, 6. Ye wa alingbi ti mû maboko na mo ti ga pionnier permanent?
5 Mo gbu li ti mo na ndo ti tënë ti mungo kusala ti pionnier permanent awe? A hunda ti “zia l’heure ti [mo] ahon senge pëpe” ndali ti gingo aye ti senge senge (aEph. 5:15, 16). Azo mingi asara tongaso, na ala zia lege ti ambeni ye na yâ ti fini ti ala ti wara ngoi na ndo ti kua ti nginza ti ala ti sara kusala ti Royaume mingi. Mo lingbi ti leke yâ ti akusala ti mo ti tene mo lï na popo ti ala?
6 Hunda ndara na tïtî Jéhovah ti leke mbeni nzoni kapa ti kusala (Jacq. 1:5). Ye ti nzoni wa fade mo wara na pekoni? Mosoro mingi na lege ti yingo! Fade Jéhovah airi tënë nzoni na ndo ti mo na mungo na mo ye ti mitele so atia mo (Mat. 6:33). Ala so atara Jéhovah na ndo ti tënë so ayeke wara “ye ti nzoni so ndo alingbi na ni pëpe.”—Mal. 3:10.