Gi alege ti fa tënë
1 Na popo ti aChrétien, mo yeke wara azo so dutingo ti ala ayeke nde nde. Ye oko, e kue e leke na bê ti e ti sepela Jéhovah (Ps. 79:13). Tongana kpale ti seni wala ambeni kpale nde amû lege na e ti fa tënë mingi pëpe, tongana nyen e lingbi ti gi alege ti fa tënë?
2 Na yâ akua ti lâ oko oko: Jésus ayeke mû ândö angoi kue so lo yeke tingbi na azo lâ oko oko ti fa tënë. Tongana lo yeke hon na mbeni ndo ti futango lampo, lo fa tënë na Matthieu; tongana lo yeke hon na lege, lo fa tënë na Zachée; na ngoi so lo yeke wu tere, lo fa tënë na mbeni wali ti Samarie (Mat. 9:9; Luc 19:1-5; Jean 4:6-10). Na yâ ti akua ti e ti lâ oko oko, e lingbi nga ti sara si asenge lisoro aga alisoro na ndo Bible. Tongana lakue e yeke na Bible, atract wala abrochure na tere ti e, a yeke pusu e ti duti nduru ti fa tënë ti beku ti e.—1 Pi. 3:15.
3 Ka tongana mo lingbi ti tambela ayo pëpe na tongaso a ga ngangu na mo ti gue da na da, mo lingbi ti sara nyen? Duti nduru ti gbu alege kue so azi na mo ti fa tënë na ngoi so azo ti kaïngo kobela aga ti bâ mo wala tongana mo wara tere na ambeni zo nde (Kus. 28:30, 31). Tongana dutingo ti mo asara si mingi ni mo ngbâ gi na yanga-da, lege ayeke dä ti tene mo pika singa na ambeni zo wala mo sû mbeti ti fa tënë? Mbeni ita-wali ayeke tokua mbeti lakue na afami ti lo so ayeke aTémoin pëpe. Lo yeke zia lakue na yâ ti ambeti ni awango ti Bible nga na aye so asi na lo na fango tënë.
4 Na place ti kua nga na ekole: Nzara ti sepela Jéhovah ayeke pusu e ti gi alege kue ti lu nzara ti tâ tënë na bê ti azo na place ti kua nga na ekole. Mbeni molenge-koli ti ngu miombe so ayeke wafango tënë afa na yâ klase ti lo ye so lo diko na yâ ti Réveillez-vous! na ndo ti nze. Tongana wafango ye ni ahinga ndo so molenge ni awara asango so dä, lo to nda ti mû Tour ti Ba Ndo na Réveillez-vous! lakue. Na place ti kua ti e, tongana lakue e zia buku Bible afa na ndo so azo alingbi ti bâ ni, a lingbi ti sara si ambeni zo ahunda atënë na ndo ni na a zi lege na e ti fa tënë.
5 Gbu li kete: Mo lingbi ti gi alege ti fa tënë na ngoi so mo yeke sara akua ti mo ti lâ oko oko? Na ngoi so e sara ye kue so dutingo ti e amû lege na e ti sara, zia e gi lege ti “mû sacrifice ti merci na Nzapa” lâ oko oko.—aHéb. 13:15.