Lege ti wara aye ti yingo so mo zia na gbele mo

¹ Mo so mo yeke maseka Chrétien, kite ayeke dä pëpe so ndoye ti mo na mbage ti Jéhovah nga wango ti Jésus so lo mû na aChrétien kue ti ‘gi royaume ti Nzapa kozoni’ asara ngangu na ndo ye so mo ye ti wara na yâ fini ti mo (Mat. 6:33). Peut-être mo zia na gbele mo ti kono yâ ti kusala ti mo na mungo kusala ti pionnier wala na guengo na mbeni ndo so a hunda ti wara awafango tënë dä. Ambeni alingbi ti leke na bê ti ala ti mû mbage na kusala ti lekengo aDa ti Royaume, ti sara kua na Béthel, ti ga pionnier spécial, wala tongana lege ayeke dä, ti gue na akodoro wande ti leke afiliale na ada ti bungbi wala ti ga missionnaire. So ayeke aye so amû tâ ngia na bê na alingbi na gonda biani!

² Ye so ayeke mû maboko na mo ti wara mara ti aye tongaso ayeke ti sû ni na mbeti. Tour ti Ba Ndo ti 15 juillet 2004 atene: “Tongana [mo yeke] na mbeni ye na li ti [mo] si [mo] sû ni na mbeti, ye ni ayeke ga polele na lê ti [mo] na [mo] yeke hinga biani ye so [mo] ye ti sara. Ni la, [mo] lingbi ti sû na mbeti aye so [mo] zia na gbele [mo] nga aye so [mo] yeke sara ti si dä.” Na ndo ni, tongana mo zia ambeni ye na gbele mo ti si dä kozoni, a lingbi ti mû maboko na mo ti bata lê ti mo na ndo kota ye ni.

³ Ambeni ye ti gi ti wara kozoni: Tongana ade mo wara batême pëpe, bâ aye so a lingbi mo sara ti si dä. Peut-être, a lingbi mo gi ti gbu nda ti akozo fango ye ti Bible nzoni. Tongana a yeke tongaso, zia na gbele mo ti manda buku Bible afa nzoni, na mû ngoi ti diko aversê kue so a sû atënë ni pëpe na yâ paragraphe (1 Tim. 4:15). Na tapande, a hunda na sewa ti Béthel nga na aita so asara Ekole ti Galaad ti diko Bible a londo na Genèse ti si na Apocalypse. Zia na gbele mo ti sara tongaso nga. Na peko ti so mo hunzi dikongo Bible awe, ngbâ ti diko ni lâ oko oko (Ps. 1:2, 3). Bâ tongana nyen a yeke mû maboko na mo ti maï na lege ti yingo! Sambela na bê ti mo kue kozoni ti diko wala ti manda Bible, na tongana mo ye ti hunzi ni, kiri mo sambela. Gi lakue ti sara ye alingbi na ye so mo manda.​—Jacq. 1:25.

⁴ Tongana mo wara batême awe, ambeni ye wa mo lingbi ti gi ti wara ni? A yeke nzoni mo maï akode ti mo ti fango tënë? Na tapande, mo lingbi ti zia na gbele mo ti sara kusala nzoni na Mbeti ti Nzapa na fango tënë? (2 Tim. 2:15). Mo lingbi ti kono yâ ti kusala ti mo tongana nyen? Zia na gbele mo ambilimbili ye so mo lingbi ti wara ni hio, so alingbi na ngu ti mo nga dutingo ti mo, na so ayeke mû lege na mo ti wara akota ye so mo gi ni.

⁵ Lo wara ye so lo gi ni: Na ngoi ti kozo vizite ti Tony so lo yeke lani na ngu 19 na mbeni biröo ti aTémoin ti Jéhovah, a mû na lo nzara ti sara kusala na Béthel. Ye oko, sarango ye ti lo ayeke lani kirikiri nga ade lo mû tere ti lo na Nzapa pëpe. Me lo mû desizion ti sara ye alingbi na andia ti Jéhovah, nga lo zia na gbele lo ti ga zo so alingbi ti wara batême. Na peko ti batême ti lo, lo zia na gbele lo ti ga pionnier auxiliaire nga na pekoni pionnier permanent, na lo sû alango so lo ye ti komanse na ni na ndo ti kalendrier ti lo. Tara ti bâ ngia so lo yeke na ni tongana, na peko ti so lo sara kusala ti pionnier teti mbeni ngoi, a tisa lo ti sara kua na Béthel!

⁶ Mo nga kue, mo lingbi ti wara aye so mo zia na gbele mo ti sara na yâ kusala ti Jéhovah na ngoi so mo yeke gi aye ti royaume kozoni. Na yâ sambela, zia “kusala ti mo” na tïtî Jéhovah nga sara ngangu ti wara ni.​—aProv. 16:3; 21:5.

[Ahundango tënë ti manda na ye]

 1. Aye wa amaseka mingi agi ti sara ni na yâ kusala ti Jéhovah?

 2. Ye wa ayeke mû maboko na mo ti wara aye so mo yeke gi ti sara na yâ kusala ti Jéhovah?

 3. Ti lingbi na batême, fa ambeni ye so a yeke nzoni mo sara kozoni.

 4. Ambeni ye wa mbeni Chrétien so aye ti sara kua na Béthel wala ti ga missionnaire alingbi ti gi ti sara ni kozoni?

 5. Tongana nyen ti gi ti wara ambeni ye kozoni amû maboko na mbeni ita-koli ti wara lege ti sara kua na Béthel?

 6. Ye wa alingbi ti mû maboko na mo ti wara aye so mo zia na gbele mo ti sara na yâ kusala ti Jéhovah?