E yeke na ngia ti bi tere ti e kue na yâ kusala ti Jéhovah!
1 Bazengele Paul ayeke lani na ngia ti ‘mû lo mveni’ kue ti sara kusala ti lo ti Chrétien (2 aCor. 12:15). Legeoko nga laso, aita mingi ayeke sara kusala ti pionnier ngangu. Ambeni so ayeke na akota kungba na yâ sewa ti ala azia mbeni ngoi ti fa tënë yenga oko oko. Ambeni ayeke na angangu kpale ti seni, me atâa so kue ala mû kete ngangu so ala yeke na ni ti maï na akusala ti Royaume. So tâ ngia ti bâ azo ti Jéhovah, atâa ngu ti ala wala dutingo ti ala, ti bi tere ti ala kue na yâ kusala ti lo!
2 E ndoye amba ti e zo: Ti sara na Jéhovah alingbi na ngangu ti e, na lege so e ndoye Nzapa nga na amba ti e, asara si e yeke na nzoni yingo-ti-hinga. Ngbanga ti so Paul amû tere ti lo kue na fango nzo tënë, lo lingbi lani ti tene tënë so na ngia: “Mbi sara tënë ti témoin na i laso, ngbanga ti mênë ti zo oko ayeke na li ti mbi pëpe”. (Kus. 20:24, 26; 1 aThes. 2:8). Ti fa tënë alingbi na dutingo ti e ayeke sara si ngbanga ti mênë ti zo aduti na li ti e pëpe.—Ezéch. 3:18-21.
3 Ti sara kue ti mû maboko na azo ayeke mû na e ngia (Kus. 20:35). Mbeni ita-koli atene: “Na lakui, tongana mbi kiri na yanga-da na peko ti fango tënë, ti tâ tënë ni, mbi nze. Me mbi yeke na ngia, na mbi kiri singila na Jéhovah teti lo mû na mbi ngia so zo oko alingbi ti zi ni pëpe.”
4 E ndoye Nzapa: Kota ye so apusu e ti bi tere ti e kue na yâ kusala ti Jéhovah ayeke so a nzere na Babâ ti e ti yayu. Ndoye ti e na mbage ti Nzapa apusu e ti bata akomandema ti lo, so na yâ ni e yeke na ti so ahunda ti fa tënë na ti sara adisciple (1 Jean 5:3). Même tongana tënë ti e anzere na azo pëpe wala ala ke ni, e yeke ngbâ lakue na ngia ti sara kusala ngangu ndali ti Jéhovah.
5 Ti ndembe so, a yeke ngoi ti kiri na peko pëpe. E yeke na ngoi ti kongo le-kobe (Mat. 9:37). Wafango yaka ayeke sara ka kusala l’heure mingi na ngoi ti kongo le-kobe ndali ti so lo yeke na ngoi mingi pëpe ti ro ni kozoni si ale-kobe ni ato nda ti buba. Ngoi so angbâ ti ko le-kobe na lege ti yingo ayeke nga mingi pëpe. Na girisango pëpe tënë ti ngoi so e yeke na yâ ni laso, zia e kue e ngbâ ti sara ngangu ti bi tere ti e na yâ kusala ti Jéhovah.—Luc 13:24; 1 aCor. 7:29-31.