Sara kua mingi na yâ ti kota kusala ti kongo lê ti kobe na lege ti yingo

‘Ala duti na ye mingi ti sara na yâ ti kusala ti Seigneur.’​—1 ACOR. 15:58.

1. Tisango ndo wa Jésus amû lani na adisciple ti lo?

NA NGOI so lo yeke hon na yâ ti sese ti Samarie nduru na hunzingo ti ngu 30, Jésus aluti ti wu tere ti lo nduru na gbata ti Sychar. Kâ, lo tene na adisciple ti lo: “Ala yô lê ti ala na nduzu na ala bâ ayaka ni, akobe ni abe awe ti tene a ko ni.” (Jean 4:35). Jésus ayeke sara lani pëpe tënë ti tâ kongo lê ti kobe, me lo yeke sara lani tënë ti kongo lê ti kobe na lege ti yingo. A yeke bungbingo azo so bê ti ala ayeke nzoni, azo so ayeke ga ande adisciple ti lo. Ti tâ tënë ni, Jésus ayeke tisa lani adisciple ti lo ti sara kua ti kongo lê ti kobe so. Kusala ni ayeke lani mingi, me ngoi ni ayeke mingi pëpe!

2, 3. (a) Nyen la afa so e yeke na ngoi ti kongo lê ti kobe ni? (b) Article so ayeke sara tënë na ndo ti nyen?

² Tënë so Jésus atene na ndo ti kongo lê ti kobe so andu mingi ni ngoi ti e. E yeke na yâ ti mbeni ngoi so “akobe” ti yaka ni “abe awe ti tene a ko ni”. Yaka ni ayeke dunia so. Ngu oko oko, a yeke tisa azo kutu mingi ti manda tâ tënë so amû na zo fini, na afini disciple saki na saki ayeke wara batême. E yeke na pasa ti sara kota kusala ti kongo lê ti kobe so na gbe ti fango lege ti Jéhovah Nzapa, Wa ti kua ni. Kusala so mara ni ayeke use pëpe. Mo yeke na “ye mingi ti sara” na yâ ti kusala ti kongo lê ti kobe so?​—1 aCor. 15:58.

³ Na yâ ti angu ota na ndambo ti kusala ti lo na ndo ti sese ge, Jésus aleke adisciple ti lo ti sara kusala ti kongo lê ti kobe. Jésus afa lani akota ye mingi na adisciple ti lo, me na yâ ti article so e yeke bâ gi ambeni ota. Aye ni so oko oko afa mbeni sarango ye so ayeke kota ye mingi teti e na ngoi so e yeke sara kue ti sara kua nzoni na yâ ti kusala ti bungbingo adisciple so a yeke sara na ngoi ti e. Zia e bâ ni oko na oko.

A yeke kota ye ti duti na tâ be-ti-molenge

4. Tongana nyen Jésus afa nene ti dutingo na tâ be-ti-molenge?

⁴ Tara ti bâ ye so: Adisciple ti Jésus apapa fade na popo ti ala ti hinga zo so ayeke kota na popo ti ala. Na bango ala, mo hinga so ala ngbâ ti bâ mba na sioni lê na ala yeke na ngonzo na tere ti mba. Jésus airi mbeni molenge na molenge ni aga aluti na popo ti ala. Lo gboto lê ti ala na ndo ti kete molenge ni na lo tene: “Zo so ayeke sara ande tere ti lo kete tongana kete molenge so, a yeke zo tongaso si ayeke kota mingi na yâ ti royaume ti yayu.” (Diko Matthieu 18:1-4.) Ahon ti duti na bango ndo ti azo ti dunia so, so ayeke bâ kota ti zo na lege ti ngangu so lo yeke na ni ti komande, mosoro ti lo nga na kamba ti kua ti lo, a lingbi adisciple ahinga so ala so ayeke ‘sara tere ti ala kete’ na lê ti amba ti ala la ayeke kota. Jéhovah ayeke iri tënë nzoni na ndo ti ala nga lo yeke sara kusala na ala gi tongana ala yeke na tâ be-ti-molenge.

5, 6. Ngbanga ti nyen a lingbi mo duti na tâ be-ti-molenge si mo bi tere ti mo mingi na yâ ti kusala ti kongo lê ti kobe so? Mû mbeni tapande.

⁵ Juska laso, azo mingi na yâ ti dunia amû fini ti ala kue ti gi ti komande na ndo ti amba ti ala, ti wara mosoro wala ti wara kota ndo. Ye so asara si ala yeke na ngoi mingi pëpe wala ala yeke nga na ngoi pëpe ti manda ye na ndo ti Nzapa na ti sara na lo (Mat. 13:22). Nde na so, azo ti Jéhovah ayeke na ngia ti ‘sara tere ti ala kete’ na lê ti amba ti ala ti tene Wa ti kua ni airi tënë nzoni na ndo ti ala nga si ala nzere na lê ti lo.​—Mat. 6:24; 2 aCor. 11:7; aPhil. 3:8.

⁶ Bâ tapande ti Francisco so ayeke mbeni ancien na Amerika ti mbongo. Na ngoi so lo de maseka, lo zia ti manda mbeti na senda-gi ti mû kusala ti pionnier. Lo dabe ti lo, lo tene: “Na ngoi so mbi ye ti sara mariage, mbi lingbi lani ti wara mbeni kua so asara si mbi na wali ti mbi e yeke duti na kpale ti nginza pëpe. Me, e mû desizion ti duti na aye mingi pëpe na ti tene e use kue e ngbâ ti sara kusala ti ngoi kue. Na pekoni, e dü amolenge na akpale ni akiri aga ngangu. Jéhovah amû maboko na e ti ngbâ na ndo ti desizion ti e.” Na nda ni, Fancisco atene: “Ahon ngu 30 awe so mbi yeke sara kusala ti ancien nga mbi sara ambeni kusala mingi na yâ ti bungbi. Lâ oko vundu agbu e pëpe ndali ti so e soro ti duti na aye mingi pëpe.”

7. Mo tara ti sara ye alingbi na wango so ayeke na aRomain 12:16 so awe? Ye ti nzoni wa aga na pekoni?

⁷ Tongana mo ke “akota ye” ti dunia so na mo yeda ti “mû gi peko ti akete ye”, mo nga kue mo yeke wara aye ti nzoni mingi nga mo lingbi ti sara akusala nde nde na yâ ti kusala ti kongo lê ti kobe.​—aRom. 12:16; Mat. 4:19, 20; Luc 18:28-30.

Sarango kua ngangu aga na aye ti nzoni

8, 9. (a) Fa na nduru tënë toli ti Jésus na ndo ti atalent. (b) Azo wa mbilimbili la toli ti atalent so alingbi ti kpengba ala?

⁸ Mbeni ye so a lingbi e sara si e mû mbage ti e mingi na yâ ti kusala ti kongo lê ti kobe ayeke ti sara kua ngangu. Jésus afa ni na yâ ti toli ti atalent.a A yeke toli ti mbeni koli so kozoni si lo gue na kodoro wande, lo zia aye ti lo na tïtî angbâa ti lo ota. Lo mû na kozo ngbâa ni talent oku na lo mû na use ngbâa ni talent use; na ota ngbâa ni lo mû na lo talent oko. Na pekoni so wa ti angbâa ni ahon, kozo ngbâa ni na use ngbâa ni asara kua ngangu na hio ala ‘dë buze’ na atalent so a mû na ala. Me ota ngbâa ni ayeke “zo ti goigoi”. Lo lu ti lo talent ni na yâ ti sese. Tongana wa ti angbâa ni akiri, lo futa kozo ngbâa na use ngbâa ni na lege so lo zia ala “na ndo ti ambeni ye mingi.” Lo mû na maboko ti ota ngbâa ni talent so lo mû lani na lo so na lo tomba ngbâa ni so na yâ ti da ti lo.​—Mat. 25:14-30.

⁹ Kite ayeke pëpe so mo ye ti mû tapande ti angbâa ti yâ ti toli ti Jésus so, so asara kua ngangu na tongana lege ayeke dä mo yeke bi tere ti mo kue na yâ ti kusala ti sarango adisciple. Me ka tongana dutingo ti mo akanga lege na mo mingi ti sara ye so mo lingbi ti sara? Peut-être kpale ti nginza asara si a lingbi mo sara kua teti angbonga mingi ti bâ lege ti sewa ti mo. Wala peut-être mo ga mbakoro wala mo yeke na kpale ti seni. Tongana mo yeke na yâ ti mara ti aye tongaso, atënë so ayeke na yâ ti toli ti atalent so ayeke kpengba mo.

10. Tongana nyen wa ti angbâa ti toli so afa so lo sara ye na lege ni? Tongana nyen la ye so akpengba mo?

¹⁰ Bâ so wa ti angbâa ti yâ ti toli ni ahinga so ngangu ti angbâa ti lo ni ayeke nde nde. Lo fa ni na lege so lo mû atalent ni na “zo oko oko alingbi na ngangu ti lo”. (Mat. 25:15). A yeke na lege ni so kozo ngbâa ni awara gbâ ti talent na ndo ti ti lo ahon ti use ni. Me wa ti angbâa ni ahinga so ala use kue asara kua ngangu. Ni la lo tene ala ‘yeke anzoni ngbâa nga ala yeke be-ta-zo’ na lo futa ala alingbi tere (Mat. 25:21, 23). Legeoko nga, Jéhovah Nzapa, Wa ti kua ti kongo lê ti kobe ni, ahinga so dutingo ti mo ayeke sara ye mingi na ndo ti ye so mo lingbi ti sara na yâ ti kusala ti lo. Lo hinga so mo yeke sara ngangu ti sara na lo na âme ti mo kue na lo yeke futa mo alingbi na ni.​—Marc 14:3-9; diko Luc 21:1-4.

11. Fa tongana nyen so sarango kua na bê kue atâa na yâ ti aye ti ngangu alingbi ti ga na aye ti nzoni.

¹¹ Tapande ti Selmira, mbeni ita-wali so ayeke na Brésil, afa so a yeke gi pëpe na ngoi so aye atambela nzoni na yâ ti fini ti zo si lo lingbi ti sara kusala ti Nzapa na ngangu ti lo kue. Azo ti nzi afâ koli ti lo asara ngu 20 awe na gi lo oko la lo yeke bata amolenge ti lo ota. Lo yeke sara kua ti yâ ti da na ndo ti mbeni zo. Kua ni amû angbonga mingi. Nga ti gue na kua ni wala ti kiri, a lingbi lo mû bus wala taxi so yâ ni ayeke si mata mata. Atâa akpale so kue, lo leke yâ ti kapa ti lo tongaso si lo lingbi ti sara kusala ti pionnier. Ngoi kete na pekoni, azo use na popo ti amolenge ti lo amû nga kusala ti pionnier. Lo tene: “Tongana angu ayeke hon, mbi manda Bible na azo ahon 20, na ala ga tongana afami ti mbi. Juska laso, ala ye mbi mingi na e na ala e yeke akamarade. A yeke mbeni ye so zo alingbi ti vo na nginza pëpe.” Biani, Wa ti kua ti kongo lê ti kobe ni airi tënë nzoni na ndo ti ngangu so Selmira asara!

12. Tongana nyen e lingbi ti fa so e sara kusala ti fango tënë na bê ti e kue?

¹² Tongana aye so asi na yâ ti fini ti mo akanga lege na mo ti fa tënë angbonga mingi, mo lingbi ti sara kue ti sara kua mingi na yâ ti kua ti kongo lê ti kobe na sarango si fango tënë ti mo alë lengo. Tongana mo sara kue ti sara ye alingbi na anzoni wango so a yeke mû yenga na yenga na Bungbi ti Kusala, mo yeke maï akode ti mo ti fango tënë nga mo yeke gi alege nde nde ti fa tënë (2 Tim. 2:15). Nga tongana lege ayeke dä, mo lingbi ti changé yâ ti kapa ti mo wala ti dö ambeni ye so ayeke kota ye pëpe ti zia tongaso si lakue mo fa tënë legeoko na congrégation.​—aCol. 4:5.

13. Kpengba ye wa ayeke pusu zo ti sara kusala na ngangu ti lo kue na ti ngbâ ti sara ni?

¹³ Girisa pëpe so tongana zo andoye Nzapa na lo yeke nduru ti kiri singila na lo, a yeke pusu lo ti sara kua na ngangu ti lo kue (Ps. 40:9). Na yâ ti toli ti Jésus so, ota ngbâa ni ayeke na mbeto ti wa ti lo, lo bâ lo tongana mbeni zo so ahunda ye na lo ahon ndo ni nga so asara ye na lege ni pëpe. Ye so asara si, ahon ti tene ngbâa ni asara kusala na talent ni ti sara si aye ti wa ti lo ni akiri awu, lo mû ti lo talent ni lo lu na yâ ti sese. Ti kpe bibe ti sarango ye na goigoi tongaso, a yeke nzoni e gi ti lë mbeni kpengba songo na Jéhovah, Wa ti kua ti kongo lê ti kobe ni na e bata songo ni so. Soro mbeni ngoi ti manda ye nga ti gbu li na ndo ti apendere ye so a hinga Jéhovah na ni, aye tongana: ndoye, kangango bê ti ku nga nzoni bê. Na sarango ye so, bê ti mo ayeke pusu mo ti sara na Jéhovah na ngangu ti mo kue.​—Luc 6:45; aPhil. 1:9-11.

“A yeke nzoni ala ga nzoni-kue”

14. Mbeni kpengba ye wa a lingbi azo so aye ti duti azo ti kongo lê ti kobe asara?

¹⁴ Na mungo mbeni tënë so ayeke na yâ ti mbage ti Mbeti ti Nzapa so a sû ândö na Hébreu, bazengele Pierre afa ye so bê ti Nzapa aye teti awakua ti lo so ayeke na sese ge, lo tene: “Ti gue oko na Lo so ayeke nzoni-kue so airi ala, zia ala nga aga azo so ayeke nzoni-kue na yâ ti sarango ye ti ala kue, ngbanga ti so a sû na Mbeti ti Nzapa, a tene: ‘A yeke nzoni ala ga nzoni-kue, ngbanga ti so mbi yeke nzoni-kue.’” (1 Pi. 1:15, 16; Lév. 19:2; Deut. 18:13). Tënë so afa so a lingbi azo ti kongo lê ti kobe ni aduti na sioni oko pëpe na lê ti Nzapa. E lingbi ti sara ye alingbi na kpengba wango so na sarango ambeni ye si a sukula e na lege ti fä si e ga nzoni-kue. E yeke sara ni tongana nyen? Na ziango si tënë ti Nzapa so ayeke tâ tënë amû maboko na e.

15. Tënë ti Nzapa so ayeke tâ tënë ayeke na ngangu ti sara nyen ndali ti nzoni ti e?

¹⁵ A haka tënë ti Nzapa so ayeke tâ tënë na ngu so ayeke zi asaleté. Na tapande, bazengele Paul atene so congrégation ti aChrétien so a soro ala ti gue na yayu ayeke nzoni-kue na lê ti Nzapa ayeke tongana wali ti Christ so ayeke nzoni-kue, so a sukula lo na ‘ngu na lege ti tënë ti Nzapa si lo lingbi ti duti nzoni-kue na sioni oko pëpe na tere ti lo.’ (aÉph. 5:25-27). Ngoi kete kozoni, Jésus afa nga so tënë ti Nzapa so lo yeke fa ni ayeke na ngangu ti sara si zo aga nzoni. Lo tene na adisciple ti lo: “Ala ga nzoni awe ndali ti tënë so mbi fa na ala.” (Jean 15:3). Biani, tënë ti Nzapa so ayeke tâ tënë ayeke na ngangu ti sara si zo aga nzoni na lê ti Nzapa. Tongana e zia si tënë ti Nzapa so ayeke tâ tënë asara si e ga nzoni, Nzapa ayeke yeda na vorongo so e yeke voro na lo.

16. Ti ngbâ ti duti nzoni-kue na lê ti Nzapa, a lingbi e sara nyen?

¹⁶ Tongaso, ti ga azo ti kongo lê ti kobe na yâ ti yaka ti Nzapa, a lingbi e zi kozoni kue na yâ ti fini ti e aye kue so ayeke sioni na lê ti Nzapa. Biani, ti ngbâ lakue ti fa so e lingbi na kusala ti zo ti kongo lê ti kobe so, a lingbi e sara ye lakue ague oko na afango ye ti Jéhovah. (Diko 1 Pierre 1:14-16.) Tongana ti so e yeke sara hange lakue si saleté aduti na tere ti e pëpe, legeoko nga a lingbi e yeda lakue ti tene tënë ti Nzapa so ayeke tâ tënë asara si e ga nzoni-kue. Ye so ahunda ti diko Bible nga ti gue na abungbi. A hunda nga ti sara kue ti sara ye alingbi na atënë so Nzapa ayeke dabe ti e na ni. Sarango tongaso ayeke mû lege na e ti gi ti hon ndo ti awokongo ti e wani nga ti ke aye ti dunia so ayeke sara si zo aga sioni (Ps. 119:9; Jacq. 1:21-25). Ni la, bê ti e adë ti hinga so tënë ti Nzapa so ayeke tâ tënë alingbi ti ‘sukula e si e ga nzoni’ même tongana e sara kota siokpari.​—1 aCor. 6:9-11.

17. Ti ngbâ ti duti nzoni-kue, awango ti Bible wa a lingbi e mû pekoni?

¹⁷ Mo yeda ti tene tënë ti Nzapa so ayeke tâ tënë asara si mo ga nzoni-kue? Na tapande, tongana a gboto lê ti mo na ndo ti akpale so asioni ngia ti dunia so ayeke ga na ni, mo yeke sara ye tongana nyen? (Ps. 101:3). Amba ti mo ti ekole na ti place ti kua so ayeke voro Jéhovah pëpe, mo yeke mû ngoi mingi ti tambela na ala? (1 aCor. 15:33). Mo yeke sara ngangu biani ti hon ndo ti awokongo ti mo so alingbi ti sara si mo ga sioni na lê ti Nzapa? (aCol. 3:5). Mo yeke kpe ti yôro tere ti mo na yâ ti atënë ti poroso ti dunia so na atënë ti yengo kodoro ti zo so amû yâ ti mingi ti amandako ti angia ti awanguru?​—Jacq. 4:4.

18. Na lege wa dutingo nzoni-kue na lê ti Nzapa ayeke mû maboko na e ti duti azo ti kongo lê ti kobe so alë lengo na yâ ti kusala ni?

¹⁸ So mo ngbâ lakue ti mä yanga na ndo ti atënë tongaso ayeke ga na aye ti nzoni mingi. Jésus ahaka adisciple ti lo so a soro ala ti gue na yayu na akete maboko ti keke ti vigne, lo tene: “Maboko ti keke ti vigne oko oko kue so ayeke na tere ti mbi si alë pëpe, [Babâ ti mbi a]yeke zi ni. Nga maboko ni oko oko kue so alë, lo yeke leke ni ti ga nzoni si a lingbi ti lë mingi.” (Jean 15:2). Tongana mo yeda ti tene ngu ti tâ tënë so ayeke na yâ ti Bible asukula mo, mo yeke lë même mingi.

Aye ti nzoni laso nga teti ngoi so ayeke ga

19. Adisciple ti Jésus asara lani kue ti sara kusala ti kongo lê ti kobe, aye ti nzoni wa ala wara na pekoni?

¹⁹ Na Pentecôte ti ngu 33, yingo vulu amû ngangu lani na adisciple so ayeke be-ta-zo na so asara ye alingbi na afango ye ti Jésus ti fa tënë “juska na ambage ti sese so ayeke tâ yongoro.” (Kus. 1:8). Ala sara kusala lani tongana amembre ti bebungbi, amissionnaire, asurveillant so ague na ando nde nde nga ala sara lani aye mingi ti sara si a fa nzoni tënë “na création kue so ayeke na gbe ti yayu”. (aCol. 1:23). Ala wara lani aye ti nzoni mingi nga ala sara si azo awara ngia.

20. (a) So mo bi tere ti mo kue na yâ ti kusala ti kongo lê ti kobe na lege ti yingo, aye ti nzoni wa mo wara? (b) Mo leke na bê ti mo ti ngbâ ti sara nyen?

²⁰ Biani, na dutingo na tâ be-ti-molenge, na sarango kua na ngangu ti e kue, nga na sarango ye alingbi na afango ye ti Bible, e yeke ngbâ lakue ti bi tere ti e mingi na yâ ti kota kusala ti kongo lê ti kobe na lege ti yingo so ayeke gue na li ni na ndembe so. Na ngoi so azo mingi ayeke bâ pasi nga ala yeke na vundu ndali ti so fini ti ala aluti gi na ndo ti tombango peko ti aye ti sese so nga ndali ti so ala ye aye ti ngia mingi, e yeke ti e na ngia nga na nzerengo tere (Ps. 126:6). Kota ye so ahon atanga ni kue, a yeke so ‘ngangu kua so e sara ayeke ngbâ senge senge pëpe.’ (1 aCor. 15:58). Jéhovah Nzapa, Wa ti kongo lê ti kobe ni, ayeke futa e teti lakue lakue ndali ti ‘kusala ti e nga na ndoye so e fa teti iri ti lo’.​—aHéb. 6:10-12.

[Kete tënë na gbe ni]

Mo dabe ti mo na ni?

Na ngoi so mo yeke sara ngangu ti bi tere ti mo mingi na yâ ti kusala ti kongo lê ti kobe . . .

• ngbanga ti nyen a yeke kota ye ti duti na tâ be-ti-molenge?

• tongana nyen mo lingbi ti gi ti sara kua na ngangu ti mo kue na ti ngbâ ti sara ni?

• ngbanga ti nyen a yeke kota ye ti ngbâ ti duti nzoni-kue na lê ti Nzapa?

[Foto na lembeti 25]

Ti duti na tâ be-ti-molenge ayeke mû maboko na e ti gi ti duti na aye mingi pëpe si fini ti e aluti gi na ndo ti kua ti Royaume