Mo yeke pionnier permanent kozo?
1. Azo mingi awara pasa ti sara kua ti nyen? Me ti ambeni a hunda ti tene ala sara nyen?
1 Na yâ ti angu mingi so ahon, azo saki mingi awara pasa ti “fa ye na ti fa nzoni tënë” tongana apionnier permanent (Kus. 5:42). Ye oko, ndali ti araison nde nde ambeni azia kua ni. Tongana mo yeke pionnier permanent kozo, mo kiri mo bâ dutingo ti mo awe ti bâ wala mo lingbi ti kiri ti sara kua ni?
2. Ngbanga ti nyen a yeke nzoni azo so azia kua ti pionnier akiri abâ dutingo ti ala?
2 Dutingo ti zo ayeke changé changengo: Peut-être ye so asara lani si mo zia kua ti pionnier so ahon awe. Na tapande, tongana lani mo zia kua ti pionnier ngbanga ti so mo lingbi lani pëpe ti wara angbonga 90 na yâ ti nze oko, me so fadeso a kiri na angbonga ni na 70 awe so mo lingbi ti kiri ti sara kua ni? Ngbene ye so mo zia kua ti pionnier, akpale so mo wara na lege ti kua ti mo ti nginza wala na lege ti kungba ti mo ti sewa akiri na peko awe? Mbeni ita-wali so azia lani kua ti pionnier ndali ti akpale ti seni akiri amû kua ni na ngoi so lo yeke na ngu 89. Na yâ ti ngu oko tongaso lo si na hôpital pëpe na lo bâ so seni ti lo amû lege na lo ti kiri ti sara kua ti pionnier.
3. Tongana nyen azo ti yâ ti sewa alingbi ti sara kua maboko na maboko ti mû lege na mbeni zo ti sewa ni ti sara kua ti pionnier?
3 Peut-être kozo mo yeke pionnier pëpe, me mbeni zo ti sewa ti mo azia lani kua ti pionnier ti bâ lege ti mbeni zo ti sewa ni, na tapande babâ wala mama so aga mbakoro awe (1 Tim. 5:4, 8). Tongana a yeke tongaso, mo wala mbeni zo na yâ ti sewa ni alingbi ti sara mbeni ye ti mû maboko na zo so azia kua ti pionnier so? Ngbanga ti nyen ti sara lisoro na ndo ni na popo ti ala pëpe? (aProv. 15:22). Tongana azo ti yâ ti sewa ayeke sara kua maboko na maboko ti tene mbeni oko asara kua ti pionnier, a yeke duti mbeni ye ti nzoni mingi.
4. Tongana mo lingbi pëpe ti kiri ti mû kua ti pionnier fadeso, nyen la mo lingbi ti sara?
4 Tongana dutingo ti mo ti fadeso amû lege na mo pëpe ti kiri ti sara kua ti pionnier, zia si mo nze pëpe. So mo yeda ti sara tongaso amû ngia na Jéhovah (2 aCor. 8:12). Ti fadeso, sara kua na akode ti fango tënë so mo wara na ngoi so mo yeke sara lani kua ti pionnier. Zia tënë ti nzara ti sarango kua ti pionnier na yâ ti sambela ti mo, na zia lê ti mo azi na ndo ti aye so alingbi ti mû lege na mo ti gbian dutingo ti mo (1 Jean 5:14). Peut-être na ngoi so alingbi, Jéhovah ayeke zi na mo “mbeni kota yanga-da . . . ti sara kusala” tongaso si mo kiri mo wara ngia na yâ ti kua ti pionnier permanent.—1 aCor. 16:9.