Leke na bê ti mo laso ti kono kusala ti mo
1 Ngoi ti Mémorial oko oko ayeke zi ka lege na e ti ‘mû merci mingi na Jéhovah’. (Ps. 109:30). Ti fa singila ti mo na Nzapa so atokua lani Jésus ti mû fini ti lo na sandaga ndali ti e, mo yeke kono ande kusala ti mo na mars? Ngoi ti tene mo leke tere ti mo ndali ni la.—aProv. 21:5.
2 Kua ti pionnier auxiliaire: Na ngu so ahon, tere ti aita anzere mingi ti mä so lege azi na ala na nze ti avril ti fa tënë l’heure 30 wala 50 tongana pionnier auxiliaire. Mbeni ita-koli atene: “Mbi yeke na lycée, na mbi bâ so a yeke ngangu na mbi ti mû kua ti pionnier permanent. Me mbi yeke mû kua ti pionnier auxiliaire teti l’heure 30 na mbi yeke sara kue ti sara l’heure 50 na nze ti avril.” Mbeni ita-wali so ayeke sara kua ti nginza na ndapre juska na lakui atene: “L’heure 30? Me mbi lingbi ti sara ni-aa!” Na ngoi so a sara lani tënë ti changement so, mbeni ita-wali so ayeke pionnier ândö, me so fadeso lo yeke na ngu 80 na ndo ni, atene: “Ngoi so mbi yeke ku ni kungo so la! Jéhovah ahinga so lani kua ti pionnier ayeke ye so anzere na mbi mingi!” Aita so alingbi lani pëpe ti mû kua ti pionnier auxiliaire aleke lani na bê ti ala ti fa tënë mingi.
3 Nze ti mars ayeke duti ande mbeni nzoni ngoi ti mungo kua ti pionnier auxiliaire ngbanga ti so lege ayeke kiri ti zi na e ti fa tënë l’heure 30 wala 50. Na ndo ni, ti to nda ni na samedi 17 mars, e yeke mû ande mbage na kota kapa ti tisango azo ti bungbi legeoko na e ti sara Mémorial na lango 5 ti avril. Kite ayeke pëpe so kua ti pionnier na nze ti mars ayeke nzere ande na aita mingi, na ye so ayeke sara si ala yeke mû kua na avril nga na mai teti l’heure 50.
4 Tongana ti peko ala bungbi ti voro Nzapa na yâ ti sewa, ala lingbi ti sara lisoro na ndo ni ti bâ wala zo kue ti yâ ti sewa ni alingbi ti kono kusala ti lo na nze ti mars, avril na mai? (aProv. 15:22). Hunda na Jéhovah ti mû maboko na ala na yâ ni (1 Jean 3:22). Tongana mo kono kusala ti mo ti fango tënë, mo yeke mû gonda na Jéhovah nga ngia ti mo ayeke kono.—2 aCor. 9:6.
[Ahundango tënë ti manda na ye]
1. Ngoi ti Mémorial ayeke zi ka lege na e ti sara nyen, nga tongana nyen e lingbi ti leke tere ti e ndali ni?
2. Na avril ti ngu so ahon a kiri na ngbonga ti apionnier na gbe ni. Mo sara ti mo tongana nyen?
3. Araison wa e yeke na ni ti mû kua ti pionnier auxiliaire na mars, avril nga na mai?
4. E lingbi ti kono kusala ti e tongana nyen? Ye ti pekoni ayeke so wa?