Mû tapande ti aprophète: Sophonie
1. Na ndo wa la Sophonie ayeke sara lani kua ti lo ti prophète, nga na lege wa lo yeke mbeni nzoni tapande ndali ti e laso?
1 A yeke lani na popo ti ngu 700 ti si na 600 kozoni na ngoi ti e, si vorongo ti Baal amû yâ ti gbata ti Juda kue. A londo ti fâ sioni gbia Amon ade ti ninga pëpe, na fadeso a yeke maseka Josias la aga gbia (2 Chron. 33:21–34:1). Na ngoi ni so, Jéhovah atokua Sophonie ti fa tënë ti fango ngbanga ti Lo. Atâa so Sophonie ayeke lani peut-être mbeni oko ti azo ti sewa ti da ti gbia ti Juda, lo woko pëpe yâ ti tokua ti fango ngbanga ti Jéhovah na ndo ti amokonzi ti Juda (Soph. 1:1; 3:1-4). Legeoko nga, e yeke sara ngangu ti mû tapande ti Sophonie so asara ye na mbeto pëpe nga ti zia pëpe si songo so e yeke na ni na asewa ti e akanga lege na e ti voro Jéhovah (Mat. 10:34-37). Tokua wa la Sophonie afa lani, na ye ti pekoni ayeke so wa?
2. Nyen la a lingbi e sara si a honde ande e na lâ ti ngonzo ti Jéhovah?
2 Gi Jéhovah: A yeke gi Jéhovah oko la alingbi ti sö azo na lâ ti ngonzo ti lo. Ni la, Sophonie atene hio na azo ti Juda ti gi Jéhovah, ti gi mbilimbili nga ti gi tâ be-ti-molenge kozo si lâ ni aga (Soph. 2:2, 3). A yeke nga tongaso na ngoi ti e laso. Legeoko tongana ti Sophonie, e yeke wa azo ti gi Jéhovah, me a lingbi e nga kue e sara ngangu ti leke na bê ti e ti ‘zia lege ti Jéhovah’ lâ oko ape (Soph. 1:6). Nde na so, e yeke gi Jéhovah na lege so e yeke manda Bible nzoni nga e yeke sambela ti wara fango lege ti lo. E yeke gi mbilimbili na sarango si tambela ti e ague oko na afango ye ti Jéhovah. E yeke gi tâ be-ti-molenge na dutingo nduru ti mä yanga ti Nzapa nga ti yeda na afango ye kue so alondo na bungbi ti Jéhovah.
3. Ngbanga ti nyen a lingbi e ngbâ lakue ti duti na nzoni bango ndo na yâ ti kua ti fango tënë?
3 Aye ti nzoni so aga na pekoni: Tokua ti fango ngbanga so Sophonie afa andu bê ti ambeni zo na yâ ti kodoro ti Juda. Me peut-être andu mingi bê ti maseka Josias, so akomanse ti gi Jéhovah na ngoi so lo ngbâ lani gi kete molenge. Ngoi kete na pekoni, Josias aleke mbeni kpengba kapa ti tene a futi ayanda na yâ ti kodoro ni kue (2 Chron. 34:2-5). Laso, atâa so ambeni ngongoa ti Royaume atï na tere ti lege, na ndo ti tênë wala na popo ti akî, ambeni atï na ndo ti pendere sese, amaï na alë lengo (Mat. 13:18-23). E hinga na bê ti e kue so Jéhovah ayeke ngbâ lakue ti iri tënë nzoni na ndo ti angangu so e yeke sara tongana e ngbâ ti lu angongoa ti Royaume mingi.—Ps. 126:6.
4. Ngbanga ti nyen a lingbi e ‘ngbâ ti ku Jéhovah’?
4 Ambeni zo na kodoro ti Juda apensé lani so lâ ti ngonzo ti Jéhovah ayeke ga ande lâ oko ape. Me, Jéhovah adë bê ti azo kue so kota lâ ti lo aga lani nduru awe (Soph. 1:12, 14). Gi ala so akpe na mbage ti lo ti bata tere ti ala si asö kuâ (Soph. 3:12, 17). Na ngoi so e ‘ngbâ ti ku Jéhovah,’ zia e duti na ngia ti sara kua na kota Nzapa ti e nga ti sara kua beoko na aita ti e.—Soph. 3:8, 9.