HUNDA TI AMASEKA
Tongana nyen la mbi peut ti fa lege na conscience ti mbi?
Mo peut ti haka conscience ti mo na nyen?
mbeni carte
mbeni tatara
mbeni kamarade
mbeni juge
Vrai réponse ni ayeke aye osio so kue. Article so ayeke fa raison ni.
Conscience ayeke nyen?
Conscience ayeke mbeni ye so a dü e dungo na ni so ayeke fa na e ye so ayeke na lege ni nga ye so ayeke na lege ni ape. Bible atene so a yeke tongana “ndia so a sara na mbeti na bê ti [zo].” (aRomain 2:15, La Sainte Bible en sango). Nzoni conscience ayeke aidé mo ti bâ wala ye so mo ye ti sara wala mbeni ye so mo sara awe ayeke na lege ni wala ayeke na lege ni ape.
Conscience ti mo ayeke tongana mbeni carte. A yeke fa na mo nzoni lege tongaso si mo kpe aye ti sioni.
Conscience ti mo ayeke tongana mbeni tatara. A yeke fa na mo mara ti zo wa la mo yeke ni biani.
Conscience ti mo ayeke tongana mbeni nzoni kamarade. A peut ti mû na mo nzoni wango, nga tongana mo mä ni ayeke aidé mo ti réussir na yâ ti ye so mo ye ti sara.
Conscience ti mo ayeke tongana mbeni juge. A yeke fâ ngbanga na ndö ti mo tongana mo sara mbeni ye so ayeke na lege ni ape.
Tongana mo yeke na nzoni conscience apeut ti aidé mo ti mû anzoni desizion
Na nduru tënë: Conscience ti mo ayeke mbeni ye so mo yeke biani na bezoin ni (1) ti mû anzoni desizion nga (2) ti hunda pardon ndali ti afaute so mo sara na ti gi ti leke akpale so aga na pekoni.
Ngbanga ti nyen la a lingbi mo fa lege na conscience ti mo?
Bible atene na e ti “duti na nzoni conscience.” (1 Pierre 3:16). Me tongana mo fa lege na conscience ti mo ape a yeke duti ande ngangu na mo ti duti na nzoni conscience.
“Mbi yeke tene lani mvene na babâ na mama ti mbi tongaso si ala hinga ndo so mbi gue dä ape. Na tongo nda ni, a gêné conscience ti mbi, me tongana ngoi ayeke hon ye oko asara mbi encore ape.”—Jennifer.
Me a gue ngbii, conscience ti Jennifer ague na lo ti tene na babâ na mama ti lo ye so passé nga ti zia lege ti tenengo mvene na ala.
Gbu li na ndö ti ye so: Na ngoi wa la conscience ti Jennifer adoit fade ti suku na lo hio?
“Tongana zo ayeke vivre mbeni vie so ayeke na lege ni ape na hondengo ni, a peut ti ga na lo akpale nga bê ti lo ayeke gi lo lakue. Tongana fani oko si conscience ti mo azia si mo mû mbeni sioni desizion, ge a yeke ga fadeso ngangu na mo ape ti mû mbeni sioni desizion encore.”—Matthew.
Ambeni zo ayeke mä conscience ti ala kete ape. Bible atene so ala “dö nzoni lege ti tambela kue ala zia.” (aÉphésien 4:19). Na yâ ti traduction ti La Sainte Bible en sango atene: “Kamene asara ala mbeni pëpe.”
Gbu li na ndö ti ye so: Azo so ka si conscience ti ala agêné ala kete ape ndali ti aye ti sioni so ala sara, eskê gigi ti ala ayeke biani pendere mingi? Akpale wa la nyen nyen ala yeke tingbi ande na ni?
Na nduru tënë: Ti duti na nzoni conscience, a lingbi mo sara si ‘ngangu ti gbungo li ti [mo] aga nzoni ti hinga popo ti ye ti nzoni na ye ti sioni.’—aHébreu 5:14.
Tongana nyen la mo peut ti fa lege na conscience ti mo?
Ti fa lege na conscience ti mo, mo yeke na bezoin ti wara mbeni tapande wala mbeni idée na ndö ti ye so mo doit ti sara. Ambeni zo ayeke mû peko ti tapande ti:
azo ti sewa ti ala wala ti sarango ye ti azo ti kodro ti ala
amba ti ala
azo so azo ahinga ala mingi
Me, ye so Bible afa na ndö ti lege so e doit ti vivre na ni ayeke nzoni mingi ahon atapande so kue. Ye so a-étonné e ape ndali ti so a sû Bible na “gbe ti yingo ti Nzapa,” Lo so acréé e nga so ahinga ye so ayeke nzoni ndali ti e.—2 Timothée 3:16.
Bâ ambeni tapande ti amama-ndia ni.
MAMA-NDIA: “E ye ti sara ye mbilimbili na yâ ti aye kue.”—aHébreu 13:18.
Tongana bê ti mo apusu mo ti triché na ngoi ti mbeni devoir, ti tene mvene na babâ na mama ti mo wala ti nzi, tongana nyen la mama-ndia so ayeke sara kua na ndö ti conscience ti mo?
Tongana conscience ti mo apusu mo ti sara ye mbilimbili na yâ ti aye kue, aye ti nzoni wa la mo yeke wara laso nga na yâ ti gigi ti mo ti kekereke?
MAMA-NDIA: “Kpe yongoro na lango-sioni.”—1 aCorinthien 6:18.
Tongana bê ti mo apusu mo ti bâ pornographie wala ti bungbi koli na wali kozo na mariage, tongana nyen la mama-ndia so ayeke sara kua na ndö ti conscience ti mo?
Tongana conscience ti mo apusu mo ti kpe yongoro na lango-sioni, aye ti nzoni wa la mo yeke wara laso nga na yâ ti gigi ti mo ti kekereke?
MAMA-NDIA: “Ala sara nzoni na mba, ala bâ mawa ti zo mingi, ala pardonné mba.”—aÉphésien 4:32.
Tongana mo wara tënë na mbeni ita ti mo wala na mbeni kamarade ti mo, tongana nyen la mama-ndia so ayeke sara kua na ndö ti conscience ti mo?
Tongana conscience ti mo apusu mo ti pardonné zo nga ti sara nzoni bê na zo, aye ti nzoni wa la mo yeke wara laso nga na yâ ti gigi ti mo ti kekereke?
MAMA-NDIA: “Jéhovah . . . [a]ke zo kue so aye sarango ye ti ngangu na zo.”—Psaume 11:5.
Tongana mo yeke soro afilm, a-émission nga na ajeu vidéo, tongana nyen la mama-ndia so ayeke sara kua na ndö ti mo?
Tongana conscience ti mo apusu mo ti ke angia ti ngangu, aye ti nzoni wa la mo yeke wara laso nga na yâ ti gigi ti mo ti kekereke?
VRAI MBAÏ: “Mbi yeke na akamarade so ayeke joué lani ajeu vidéo ti ngangu, na mbi nga kue mbi yeke joué ajeu ni so. Na pekoni, babâ ti mbi atene na mbi so mbi doit ti joué mara ti ajeu ni so encore ape. Tongaso, mbi joué ni gï na temps so mbi gue na ndö ti akamarade ti mbi. Tongana mbi kiri na yanga-da, mbi yeke sara tënë na ndö ni ape. Babâ ti mbi ayeke hunda mbi ti hinga nyen la apassé, me mbi yeke tene na lo so ye oko ayeke dä ape. Mbeni lâ, mbi diko Psaume 11:5, na tongana mbi pensé na ye so mbi yeke sara, a sara mbi nzoni ape. Mbi bâ so a lingbi mbi zia lege ti jouengo mara ti ajeu vidéo ni so. Na ti so, mbi zia lege ni vrai. Tapande ti mbi apusu mbeni oko ti akamarade ti mbi ti zia lege ti jouengo ajeu vidéo ti ngangu so.”—Jeremy.
Gbu li na ndö ti ye so: Na ngoi wa la conscience ti Jeremy akomanse ti sara kua, nga na ngoi wa la lo komanse ti mä conscience ti lo? Nyen la mo manda na ndö ti mbaï ti Jeremy?
Bata tënë so: Conscience ti mo ayeke fa zo wa la mo yeke ni nga nyen la ayeke kota ye na lê ti mo. Conscience ti mo atene nyen na mo na ndö ti mo wani?