Chapitre 40

A manda be-nzoni na azo

PEUT-ÊTRE Jésus angba na Naïn, na ndo so lo zingo fade molenge ti koli ti mbeni womua, wala peut-être lo gue na mbeni kodoro ndulu. Mbeni Farizien, so iri ti lo ayeke Simon, aye ti baa mbilimbili koli so asala aye ti kpene mingi so. Tongaso, lo hiri Jésus ti te kobe na lo.

Jésus abaa ngoi so tongana lege ti fa tene na azo so lo yeke tingbi ala ka, tongaso lo yeda na hiringo ndo so, lege-oko tongana kozoni lo yeda ti te kobe na azo ti kamata lapo na azo ti siokpari. Me, tongana lo li na ya da ti Simon, ye so azo asala la ni ti wara gene nzoni, ala sala na lo pepee.

Tongana zo ayu samara, na lo tambela yongoro na lege ti Galilée so ayeke na pupu-sese mingi, gere ti lo amu wa na sese agbu ni. Tongaso, azo ayeke sukula gere ti agene ti ala na ngu so ade pendere ti fa so ala wara ala na ngia. Me tongana Jésus asi asukula gere ti lo pepee. Na zo oko ahunu yanga ti lo pepee tongana lo li da ni, kete ye so azo asala lakue ti wara agene nzoni. Na nga, mbeni ye so azo asala ti fa so ala wara gene nzoni ayeke ti sa yombo na li ti lo, me zo oko asala ni teti Jésus pepee.

Na ngoi so azo ate kobe, mbeni wali so ahiri lo pepee ali yeeke na ya da ni. Azo kue na kodoro ni ahinga lo yeke wasiokpari. Peut-être lo ma kozoni fango tene ti Jésus, na nga hiringo ndo ti lo ti tene ‘azo kue so ayeke na kungba so ane aga na lo ti tene ala wo tele’. Ye so lo baa na ye so lo ma andu be ti lo mingi, tongaso lo ga ndulu na Jésus.

Fadeso wali ni aga na peko ti Jésus so ate kobe na table, na lo duti na sese na gere ti lo. Tongana ngule ti lo ati na ndo gere ti Jésus, lo mboo ala na kua ti li ti lo. Na pekoni lo mu yombo so ayeke na ya ta ti lo, lo sa mafuta ni na ndo gere ti lo na lo hunu gere ti lo. Simon abaa ye so kue, na a nzere na lo oko pepee. Na be ti lo, lo tene: “Tongana zo so ayeke prophète, ka lo hinga wali so andu lo, na lo hinga lege ti lo, teti lo yeke wali ti siokpari.”

Jésus ahinga tene so ayeke na be ti lo, tongaso lo tene: “Simon, mbi yeke na tene ti tene na mo.”

“Wafango ye, mo tene!” atene Simon.

“Mbeni zo ayeke na wakuda use”, Jésus atene. “Kuda ayeke na li ti zo oko denier ngbangbo oku, na kuda ayeke na li ti mbeni zo denier bale oku. Tongana ala yeke na ye ti futa kuda ti ala pepee, zo so azia tene ti kuda ti ala use kue. Tongaso, fadeso zo nyen na popo ti ala andoyee lo ahon?”

Simon akiri tene, peut-être gi senge tongaso teti lo baa pepee so tene ni andu lo: “Be ti mbi atene a yeke zo so kuda ti lo ayeke kota ahon si lo zia tene ti kuda ti lo.”

Jésus ayeda na tene ti lo, lo tene: “Tene so mo tene ayeke mbilimbili.” Na pekoni Jésus abaa wali ni na lo tene na Simon: “Mo baa wali so? Mbi ga na da ti mo; na mo mu ngu na mbi teti gere ti mbi pepee. Me ngule ti wali so asa na gere ti mbi na lo mboo ngule ni na kua ti li ti lo. Mo hunu yanga ti mbi pepee; me tongana mbi li na ya da wali so atonda ti hunu gere ti mbi na lo zia pepee. Mo sa mafuta na li ti mbi pepee; me wali so asa yombo na gere ti mbi.”

Wali ni afa na gigi so lo ke biani ye ti sioni so lo sala kozoni. Jésus ahunzi tene ti lo tongaso: “Teti ye so, mbi tene na mo, siokpari ti lo so ayeke mingi, amu pardon na ni awe, teti ndoyee ti lo ayeke mingi. Me tongana a mu pardon na zo so ayeke na siokpari mingi pepee, ndoyee ti zo so ayeke mingi pepee.”

Jésus akanga le ti lo oko pepee na ndo siokpari, lo ke siokpari kue. Ye so asi na ngoi so afa na gigi so lo baa mawa ti azo so asala ye ti sioni na fini ti ala, me na pekoni ala fa na gigi so ala gbian be ti ala na ala ga na lo ti tene lo de be ti ala. Jésus alungula vundu ti wali so biani tongana lo tene na lo: “A mu pardon na siokpari ti mo awe. (...) Mabe ti mo aso mo awe, mo gue na siriri.” Luc 7:36-50; Matthieu 11:28-30.

▪ Simon awara Jésus tongana nyen?

▪ Zo wa aga na Jésus? Ngbanga ti nyen?

▪ Jésus amu tapande wa? Lo fa so alingbi na azo wa?