Dikongo ye tâ na lege ni

BIBLE atene so ye so bê ti Nzapa aye ayeke ti tene mara ti azo nde nde kue “ahinga tene-biani mbilimbili.” (1 Tim. 2:4). Ti sala ye alingbi na ni, tongana e yeke diko Bible na kota go, a lingbi nzara ti e ti fa tâ hingango ye asala ngangu na ndo lege so e yeke diko na ye.

Kode ti dikongo Bible na kota go nga na ambeti so afa nda ti Bible ayeke kota ye teti amaseka nga teti akangba. Teti so e yeke aTémoin ti Jéhovah, e yeke na kungba ti kangbi legeoko na azo hingango ye na ndo Jéhovah nga na ndo asalango ye ti lo. Mingi ni, ye so andu dikongo ye na mbeni zo wala na mbeni kete bungbi ti azo. E yeke diko nga ye na yâ ti sewa. Na Ekole ti Kusala ti aChrétien, ambilimbili lege ayeke zi teti aita-koli na aita-wali, amaseka na akangba, ti wara wango si ala diko ye na kota go nzoni ahon ti kozo.

Dikongo Bible na gbele azo, wala na kongregation, ayeke mbeni ye so a lingbi a bâ ni na nene ni mingi. Bible alondo na Nzapa. Nga, “Tënë ti Nzapa ayeke na fini, na a yeke na ngangu . . . na a fa nda ti bibe na a fa nda ti ye so bê aye.” (aHéb. 4:12). Tënë ti Nzapa ayeke na mbeni hingango ye so mbeni ye ti lingbi na ngele ni ayeke dä pëpe, so zo alingbi ti wara na mbeni ndo nde pëpe. A lingbi ti mû maboko na mbeni zo ti hinga oko tâ Nzapa na ti lë nzoni songo na lo, nga ti hon ndo ti akpale ti gigi. A fa nga lege so ayeke gue na fini ti lakue lakue na yâ fini sese ti Nzapa. Tongaso, a lingbi e zia na gbele e ti sala kue ti diko Bible nzoni ahon ti kozo.​—Ps. 119:140; Jér. 26:2.

Lege ti diko ye tâ na lege ni. Ambage ti nzoni dikongo ye ayeke nde nde mingi, me maïngo kode ti diko ye tâ na lege ni ayeke kozo kapa ni. So aye ti tene ti sala ngangu ti diko tâ gi ye so ayeke na lê ti mbeti ni. Sala hange ti hulu ndo ti atënë wala ambage ni, wala ti diko atënë ni na lege ni pëpe ngbanga ti so ala kpa tele na ambeni tënë nde.

Ti diko atënë ni na lege ni, a lingbi mo gbu nda ti aye so angoro ni. Ye so ayeke hunda ande ti leke tele nzoni mingi. Tongana ngoi ayeke hon, na mo yeke maï kode ti bi lê na ndo atënë so ayeke ga na ti bâ tongana nyen abibe ni ayeke tingbi tele, mo yeke diko ande ye tâ na lege ni ahon ti kozo.

Aye so akangbi popo ti atënë nga na akpoto so ayeke na ndo ni ayeke kota ye mingi teti ayanga ti kodoro so a yeke sû na mbeti. Aye so akangbi popo ti atënë alingbi ti fa ndo so a lingbi mo luti dä kete, ngoi oke a lingbi mo luti kete nga peut-être nene ti kiri na go ti mo kete na gbe ni. Na ambeni yanga ti kodoro, tongana zo agbian go ti lo pëpe tongana ti so aye so akangbi popo ti atënë ahunda, hundango tënë alingbi ti kpa hundango tënë mbeni pëpe, wala nda ti tënë ni alingbi ti gbian kue. Biani, na ambeni ngoi, kusala ti aye so akangbi popo ti atënë andu gi andia ti yanga ti kodoro ni. Na ayanga ti kodoro mingi, a yeke ngangu ti diko ye tâ na lege ni tongana zo asala hange pëpe na akpoto so ayeke na ndo ti atënë ni: ala so zo abâ na lê ti mbeti ni nga na ala so zo ahinga ni na bango aye so angoro atënë ni. Aye so ayeke sala ngangu na ndo totongo ti atënë so ala yeke na ndo ni. Sala kue ti hinga nzoni mingi lege so a yeke sala kusala na aye so akangbi popo ti atënë nga na akpoto so ayeke na ndo ni na yanga ti kodoro ti mo. Ye so ayeke kota ye mingi ti diko ye si azo agbu nda ni. Dabe mo so a lingbi ye so mo gi ayeke ti fa abibe, me pëpe gi ti tene peko ti atënë.

A hunda tarango peko ti ye fani mingi tongana mo ye ti maï kode ti dikongo ye tâ na lege ni. Diko gi mbeni paragraphe oko, na sala ni fani mingi mingi juska mo lingbi ti sala ni sân ti girisa lege. Na pekoni, gue na paragraphe ti peko. Na nda ni, sala ngangu ti diko gbâ ti alembeti na mo hulu ndo ti atënë pëpe, mo diko ni nde pëpe na mo kiri mo diko ni fani mingi pëpe. Tongana mo mû peko ti akapa so awe, hunda na mbeni zo ti bâ dikongo ye ti mo na ti fa na mo ando so kue mo girisa lege dä.

Ti ambeni zo, kpale ti lê nga ti wâ so aza nzoni pëpe asala si a yeke ngangu na ala ti diko ye. Tongana lege ayeke dä ti hon ndo ti aye so, ala yeke maï ande biani dikongo ye ti ala.

Tongana ngoi ayeke hon, a lingbi ti hunda na aita-koli so ayeke diko ye nzoni mingi ti diko aye ti manda na gbele kongregation, na Mandango Buku ti Kongregation nga na Mandango Tour ti Ba Ndo. Me ti yô kungba so nzoni, a hunda ye mingi ahon gi ti lingbi ti diko peko ti atënë na lege ni. Ti ga mbeni nzoni zo ti dikongo ye na gbele azo na yâ ti kongregation, a lingbi mo maï anzoni kode ti dikongo ye mo mveni lakue. Ye so andu hingango so lê ti tënë oko oko ayeke na mbeni kusala ti sala. Tongana mo hulu na ndo ti ambeni, mo lingbi pëpe ti gbu nda ti ye so a yeke tene. Tongana mo diko atënë ni nzoni pëpe, même na ngoi so mo yeke diko ye na mo mveni, yâ ti tënë ni ayeke ba ande. Tongana zo abi bê pëpe na akpoto so ayeke na ndo ti atënë ni wala lo bâ pëpe aye so angoro ni, lo yeke diko ande ye ni nzoni pëpe. Sala ngangu ti gbu nda ti lê ti tënë oko oko na yâ ye so angoro ni. Bâ nga tongana nyen aye so akangbi popo ti atënë asala ngangu na ndo nda ti tënë ni. Dabe mo so, mingi ni, a yeke fa abibe na lege ti bungbi ti atënë. Bi bê na ye so, si na ngoi ti dikongo ye na kota go mo diko bungbi ti atënë, me pëpe gi lê ti tënë oko oko. Gbungo nda ti ye so mo yeke diko ayeke kota ye mingi ti lingbi ti fa tâ hingango ye na azo na lege ti dikongo ye na ala.

A yeke lani na mbeni ancien so ayeke na kode mingi si bazengele Paul atene: “Zia bê ti mo na tënë ti diko mbeti na azo.” (1 Tim. 4:13). A yeke biani mbeni ndo so e kue e yeke wara ande lege ti maï dä.