Atënë so ayeke tâ na lege ni

NGBANGA ti nyen mbeni Chrétien alingbi ti tene mbeni tënë so ayeke tâ tënë pëpe? Peut-être lo yeke tene gi peko ti mbeni ye so lo mä me lo mû ngoi pëpe ti hinga aye so asi biani. Wala lo kono yâ ti tënë ni ngbanga ti so, sân ti tene lo hinga ni, lo diko mbeti ni na lege ni pëpe. Tongana e bi bê mbilimbili na ndo salango tënë tâ na lege ni, même na yâ ti akete kete ye, azo so ayeke mä e ayeke bâ ande so ala lingbi ti zia bê ti ala na tâ tënë ti ambage ti tënë ti e so ayeke kota mingi.

Na fango tënë. Ndali ti so ala bâ so a lingbi ala kiri amanda ye mingi, mbito ayeke sala ambeni zo ti to nda ti fa tënë. Me ala yeke bâ hio so ala lingbi ti fa tënë nzoni, atâa ala hinga gi akozo gere ti tâ tënë. Tongana nyen? Kota ye ni ayeke lekengo tele.

Kozo ti gue na fango tënë, hinga nzoni ye so mo ye ti sala tënë na ndo ni. Gi ti hinga kozoni atënë so azo alingbi peut-être ti hunda. Gi anzoni kiringo tënë so aluti na ndo ti Bible. Ye so ayeke leke mo ande ti kiri tënë na lege ni na gingo bê pëpe. Mo yeke gue ti manda Bible na zo? Kiri mo bâ nzoni ye ti manda ni. Sala kue ti bâ so mo hinga so akiringo tënë na atënë so a hunda na yâ ti mbeti ni aluti na ndo ti Mbeti ti Nzapa.

Ka tongana zo ti lisoro wala zo so mo na lo ayeke sala kua place oko ahunda mbeni tënë so mo ku tele ti mo na ni pëpe? Tongana mo hinga nda ti tënë ni nzoni pëpe, kpe ti tene gi mbeni tënë tongaso. “Zo ti mbilimbili agi bê ti lo si lo kiri tënë.” (aProv. 15:28). Mo lingbi ti wara mungo maboko so alingbi na mo na yâ ti buku Comment raisonner à partir des Écritures wala “Sujets de conversations bibliques”, tongana a yeke na yanga ti kodoro ti mo. Tongana mo yeke na ambeti so pëpe, hunda ti gi nda ti aye na ti kiri ande. Tongana zo ni so ahunda tënë ni na bê ti lo kue, a yeke duti ngangu na lo pëpe ti ku tâ kiringo tënë ni. Ti tâ tënë ni, tâ be-ti-molenge so mo yeke na ni alingbi peut-être ti ndu bê ti lo.

Ti sala kusala na awafango tënë ti kode alingbi ti mû maboko na mo ti maï kode ti mo ti fa nda ti Tënë ti Nzapa na lege ni. Bâ aversê wa ala yeke sala na kusala nga tongana nyen ala yeke fa nda ni. Yeda na tâ be-ti-molenge na awango nga na aye kue so ala hunda na mo ti leke yâ ni. Apollos, disciple so ayeke na wâ mingi, awara ye ti nzoni na lege ti maboko so ambeni zo amû na lo. Luc afa Apollos tongana zo so “ahinga tënë mingi,” lo hinga “tënë ti Mbeti ti Nzapa mingi” nga “yingo ti lo ayeke na nzara ti sala ye”. Lo yeke mbeni koli so lo fa “nda ti tënë ti Jésus na lege ni”. Ye oko, lo gbu nda ti aye kue pëpe. Tongana Priscille na Aquila abâ ye so, ala “kamata lo na tele ti ala, na ala fa nda ti lege ti Nzapa na lo si lo hinga nzoni ahon ti kozoni.”​—Kus. 18:24-28.

“Gbu tâ tënë ngangu.” A lingbi afango ye ti e na abungbi afa na gigi so e yeke bâ na nene ni mingi kusala ti kongregation so ayeke “pilier na gere ti tene-biani.” (1 Tim. 3:15). Ti gbu tâ tënë ngangu, a yeke kota ye ti tene e hinga nda ti aversê so e ye ti sala na kusala na yâ adevoir ti e. Bâ aye so angoro ni nga ye so ala ye ti tene.

Azo alingbi ti tene peko ti ye so mo tene na mbeni bungbi ti kongregation. Tâ tënë, ‘e kue e pika gere ti e lege mingi.’ (Jacq. 3:2). Me mo yeke wara ande ye ti nzoni na maïngo akode so ayeke sala ande si atënë ti mo ayeke tâ na lege ni. Aita-koli mingi so ayeke na Ekole ti Kusala ti aChrétien ayeke ga ande mbeni lâ a-ancien. “A hunda ye mingi” na mbage ti ala so a mû na ala mara ti kungba tongaso (Luc 12:48). Tongana, na bango ye na nene ni pëpe, mbeni ancien amû sioni wango so aga na akota kpale na azo ti kongregation, Nzapa alingbi peut-être ti ke ancien so (Mat. 12:36, 37). Ni la, a lingbi a hinga ita-koli so alingbi ti ga ancien tongana zo so ‘agbu tâ tënë ngangu, tongana a ndu tënë ti kode ti lo ti fango ye.’​—Tite 1:9, NW.

Sala hange si afango nda ti tënë ti mo ague oko na “tapande ti nzo tënë” so asigigi polele na yâ ti tâ tënë kue ti Bible (2 Tim. 1:13). A lingbi ye so azia mbito na bê ti mo pëpe. Peut-être mo de ti hunzi ti diko Bible kue pëpe. Ngbâ ti sala ngangu dä. Me na oko ngoi ni, bâ nzoni tongana nyen awango so ayeke ga alingbi ti mû maboko na mo ti gi nda ti atënë so mo ye ti sala na kusala na yâ fango tënë ti mo.

Kozoni kue, hunda tele ti mo: ‘Tënë ni ague oko na ye so mbi hinga awe na yâ ti Bible? A yeke gboto ande lê ti azo so ayeke mä mbi na ndo Jéhovah? Wala a yeke yä na nduzu ndara ti sese so, ye so alingbi ti sala si ndara so afa lege na azo ni?’ Jésus atene: “Tënë ti Mo ayeke tene-biani.” (Jean 17:17; Deut. 13:1-5; 1 aCor. 1:19-21). Na pekoni, sala kusala nzoni na agbakuru ti gingo na nda ti ye so bungbi ti ngbâ be-ta-zo na ti ndara amû ni. Aye so ayeke mû ande maboko na mo ti gbu nda ti aversê mbilimbili, me nga ti sala kusala na ala tâ na lege ni. Tongana mo zia adevoir ti mo aluti na ndo “tapande ti nzo tënë”, na mo zia bê ti mo na bungbi so Jéhovah ayeke sala na kusala ti fa nda ti aversê nga ndo so a lingbi ti sala na kusala, atënë ti mo ayeke duti ande tâ na lege ni.

Gi ti hinga tâ tënë ti asango. Asango, atënë ti yanga ti azo so a fa pekoni nga aye so asi na azo alingbi ti mû maboko na mo tongana mo yeke sala kusala na tapande wala mo yeke fa tongana nyen ti sala ye alingbi na ambeni tënë. Mo lingbi ti hinga tongana nyen so aye so ayeke tâ tënë? Mbeni oko lege ni ayeke ti mû aye so na ando so zo alingbi ti zia bê ti lo dä. Girisa pëpe ti bâ wala asango ni alingbi na ngoi ni. Wungo ti aye nga aye so senda-ye awara alingbi ti ga ngbele ye; na tongana azo ayeke hinga mbaï nga na ayanga ti kodoro ti giriri nzoni ahon ti kozo, a lingbi a kiri a bâ yâ ti aye so azo ahinga kozo. Tongana mo ye ti sala kua na asango na yâ ti ambeti-sango, televizion, radio wala atënë na ndo ti Internet, sala hange ngangu. A-Proverbe 14:15 amû wango so: “Zo so li ti lo ayeke dä pëpe, lo yeda na tënë kue, me zo ti ndara abata lege ti lo nzoni.” Hunda tele ti mo: ‘Azo mingi ahinga so ye so mbi wara tënë ni dä ayeke tene ka tâ tënë? A lingbi ti hinga tâ tënë ti aye so na mbeni lege nde?’ Tongana mo yeke na kite na ndo tâ tënë ni, pusu ni yamba.

Nde na gingo ti hinga tâ tënë ti aye so mo wara asango dä, bâ nzoni tongana nyen mo ye ti sala kusala na asango ni. Sala kue ti bâ si atënë ti yanga ti azo so a fa pekoni wala wungo ti aye so mo yeke sala na kusala ague oko na aye so a mû ala dä. Na yâ ngangu ti mo ti sigigi na atënë ti mo polele, sala hange si tënë “ambeni zo” aga pëpe “mingi ti azo,” wala “azo mingi” aga pëpe “azo kue” nga “na yâ ti ambeni ye” aga pëpe “na yâ ti aye kue.” Tongana mo kono yâ ti atënë ahon ndo ni, wala mo fa wungo ti aye ahon ndo ni, wala kota ti aye ahon ndo ni, ye so alingbi ti sala si azo adë kite na tâ tënë ti mo.

Tongana tënë ti mo ayeke lakue na lege ni, azo ayeke hinga ande mo tongana zo so amû tâ tënë na nene ni. Ye so ayeke mû nzoni iri na aTémoin ti Jéhovah kue. Me kota ye ni ahon so, a yeke ga na gonda na Jéhovah, “Nzapa ti tene-biani”.​—Ps.31:⁠6.