Adevoir so a bâ ngoi ni na a kangbi yâ ni nzoni

ATÂA so a lingbi mo bi bê mingi na ndo nzoni ti fango ye ti mo, a yeke nzoni mo bâ nga ngoi so a mû teti adevoir ti mo. A leke abungbi ti e ti to nda ni na ti hunzi na ambeni mbilimbili ngoi. Ti sala ye tongaso, a hunda ti tene azo kue so ayeke na mbage na yâ programme ni asala kusala maboko na maboko.

Na ngoi so a sû na Bible, azo abâ lani fini nde mingi na azo ti akodoro mingi laso. A yeke sala lani tënë ti ngoi tongana “ndulu na l’heure ota” wala “ndulu na l’heure bale-oko”. (Mat. 20:3-6; Jean 1:39). Lani azo ayeke gi bê ti ala mingi pëpe na ndo salango akusala ti ala na yâ mbeni mbilimbili ngoi. Na yâ ambeni kodoro ti sese laso, azo ayeke bâ ye ni tongaso nga.

Ye oko, atâa so asalango ye ti kodoro ni wala aye so anzere na zo mveni alingbi ti sala si azo aluti ngangu mingi pëpe na ndo tënë ti ngoi, e lingbi ti wara ye ti nzoni mingi tongana e manda ti bi bê na ni mbilimbili. Tongana azo mingi ayeke na mbeni mbage na yâ ti mbeni programme, a lingbi ala bi bê na ngoi so a mû teti mbage oko oko. A lingbi ti sala kusala na kpengba-ndia so na ndo kangbingo ngoi teti ambage ti abungbi. Kpengba-ndia ni atene: “A lingbi i sala ye kue mbilimbili na lege ni.”​—1 aCor. 14:40.

Lege ti ngbâ na yâ ti ngoi so a mû. Kota ye ni ayeke ti leke tele. Mingi ni, azo so ayeke na kpale na ngoi aleke tele ti ala kozoni nzoni pëpe. Ala lingbi peut-être ti zia bê ti ala na ala mveni ahon ndo ni. Wala ala lingbi peut-être ti pusu na peko lekengo tele ti ala juska na ngoi so devoir ni aga ndulu. Ti ngbâ na yâ ti ngoi so a mû, a yeke nzoni mo bâ na nene ni kozoni kue devoir ti mo nga mo duti ndulu ti leke tele nzoni.

Devoir ti mo ayeke ti diko ye? Kozoni kue, kiri mo bâ Ye ti manda 4 ti si na 7, so andu salango tënë so asua nzoni, lutingo kete, lutingo na ndo ti akota tënë nga gbotongo lê na ndo angbongboro tënë. Na pekoni, sala ye alingbi na wango so na ngoi so mo yeke diko na kota go ye so a mû na mo ti diko. Bâ mo mveni ngoi so mo sala na ni. A lingbi mo diko ye ni na loro mingi si mo hunzi ni na yâ ti ngoi so a mû? Na ndo atënë so ayeke kota ye pëpe, sala tënë na loro, me ngbâ ti luti kete nga ti kiri na peko loro ti salango tënë ti mo ti gboto lê na ndo angbongboro tënë. Tara pekoni fani mingi. Na ngoi so salango tënë ti mo ayeke sua nzoni ahon ti kozo, a yeke duti ande ngangu pëpe ti leke yâ ti ngoi ti mo.

Mo yeke mû mbeni mbeti so mo sû aye na ndo ni ti sala na tënë? Ti sala si mo sala devoir ti mo na yâ ti ngoi ni, a hunda na mo pëpe ti sû aye ahon ndo ni dä, si a ga mo bâ mo tene mbeni mbeti ti diko ni. Na ngoi so mo sala kua na ndo Ye ti manda 25, mo manda lani kode so ayeke nzoni mingi. Bata na li atënë oku so: (1) Leke anzoni tënë, me a hon ndo ni pëpe. (2) Zia si angbongboro tënë ni aduti polele na yâ ti li ti mo, me bata pëpe abungbi ti atënë ni kue. (3) Zia na ndo ti plan ti mo ngoi oke mo ye ti sala na kusala teti mbage oko oko ti devoir ti mo, wala a lingbi ngoi oke ahon awe tongana mo si na ambeni tënë. (4) Na ngoi so mo yeke leke tele ti mo, bi bê na anzene nzene tënë so mo lingbi peut-être ti zi ni tongana mo bâ so mo yeke hon ande ngoi ni. (5) Tara peko ti devoir ti mo.

Tarango tele ayeke kota ye. Na ngoi so mo yeke tara tele ti mo, bâ ngoi ndali ti mbage oko oko ti devoir ni. Tara peko ti devoir ti mo fani mingi juska ti tene devoir ni kue alingbi na yâ ti ngoi so a mû. Gi pëpe ti yôro gbâ ti atënë na yâ ni. Sala ti tene mbeni kete ngoi angbâ ngbanga ti so salango devoir na gbele azo alingbi ti ninga ahon ti so mo tara pekoni mo mveni.

Kangbingo yâ ti ambage ni. Nzoni salango ye na yâ ti ngoi ague oko mingi na kangbingo na lege ni yâ ti ambage ti mbeni devoir. Mû mingi ti ngoi ni ndali ti kota mbage ni. Angbongboro tënë ni ayeke na ndo so. A yeke nzoni akozo tënë ni ayo alingbi na ni ti sala ye alingbi na aye ota so a sala tënë ni na Ye ti manda 38. A lingbi kota mbage ti devoir ni ayo ahon ndo ni pëpe si ngoi angbâ mingi pëpe ndali ti mbeni nzoni hunzingo ti tënë, ti lingbi na Ye ti manda 39.

Ngangu so mo sala ti sala ye na yâ ti ngoi ayeke sala ande si devoir ti mo aduti pendere mingi, na a yeke fa so mo yekia azo so ayeke na mbage na programme ni, nga kongregation ni kue.