Anzoni ye ti peko ti wokongo terê na gbe ti azo so amû li ni

TONGANA e ye ti tene a leke e ti sara ye so bê ti Jéhovah aye, a yeke kota ye mingi ti tene e woko terê na gbe ti Jéhovah, Kota Gbia ti dunia kue. E yeda so Molenge ti lo ayeke Mokonzi ti congrégation ti aChrétien. Nga na yâ ti ambeni mbage ti fini ti e, e yeke mä yanga ti azo so ayeke mû li ni. Mara ti wokongo terê tongaso ayeke ga na aye ti nzoni na zo kue so a hunda na lo ti sara ni.

² Tënë ti wokongo terê na gbe ti azo so amû li ni abâ gigi lani na yaka ti Éden. A wara ni na yâ ti acommandement so Nzapa amû na Genèse 1:28 nga na 2:16, 17. Anyama adoit ti kpe mbeto ti azo so a zia ala na ndö ti ala ti komande ala; nga Adam na Ève adoit ti sara ye so bê ti Nzapa aye nga ala doit ti woko terê ti ala na gbe ti komandema ti lo. Ti mä yanga ti Nzapa, tongana Mokonzi, ayeke ga na siriri na ayeke sara si aye kue atambela nzoni. Angu mingi na pekoni, a sara tënë ti mango yanga ti ala so ayeke mû li ni na 1 aCorinthien 11:3. Bazengele Paul atene: “Mbi ye si ala hinga so mokonzi ti akoli kue ayeke Christ, mokonzi ti wali ayeke koli na mokonzi ti Christ ayeke Nzapa.” Ye so afa so, tongana a zia Jéhovah nde, zo oko oko kue ayeke na mbeni zo so ayeke na li ti lo, so a lingbi lo mä yanga ti lo.

³ Mingi ti azo laso ake ti yeda na tënë ti komandema nga ti mä yanga ti azo so ayeke na komandema. Ngbanga ti nyen? Kpale ni kue alondo na yaka ti Éden na ngoi so kozo babâ na mama ti e asoro lani na bê ti ala wani ti zi terê ti ala na gbe ti komandema ti Nzapa (Gen. 3:4, 5). Ye oko, ala wara pëpe liberté ahon ti so ala yeke na ni fade. Nde na so, ala tï na gbe ti ngangu ti sioni ange so ayeke Satan Zabolo. Kozo kpengbango-li so ala sara so afâ kamba ti songo so ayeke na popo ti azo na Nzapa (aCol. 1:21). Ye ti peko ni ayeke so laso mingi ti azo angbâ lakue na gbe ti ngangu ti Zo ti sioni so.—1 Jean 5:19.

⁴ So e manda tâ tënë ti Bible nga e sara ye alingbi na ni, e sigi na gbe ti ngangu ti Satan. So e yeke aTémoin so e mû terê ti e na Jéhovah nga e wara batême awe, e yeda so lo yeke Kota Gbia ti e. Nga e yeda so lo yeke lo so ayeke na “ndö ti aye kue” tongana ti so Gbia David atene lani (1 Chron. 29:11). Biani e sara terê ti e kete, e tene: “Jéhovah ayeke Nzapa. Lo la lo sara e, na e yeke ti lo. E yeke azo ti lo nga ataba ti ndo ti tengo pere ti lo.” (Ps. 100:3). E yeda so Jéhovah ayeke kota na lo lingbi ti tene e woko terê ti e na gbe ti lo na yâ ti aye kue, ngbanga ti so lo la lo sara aye kue (Apoc. 4:11). So e yeke awakua ti tâ Nzapa, e yeke mû peko ti Jésus Christ so azia na e tâ nzoni tapande ti wokongo terê na gbe ti Nzapa.

⁵ Nyen la Jésus amanda lani na lege ti apasi so lo bâ na sese ge? A-Hébreu 5:8 akiri tënë, atene: “Atâa so lo yeke molenge ti Nzapa, lo manda mango yanga na lege ti apasi so lo bâ.” Biani, atâa so lo tingbi na aye ti ngangu, Jésus angbâ lani gï ti woko terê ti lo na gbe ti Babâ ti lo ti yayu. Na ndö ni, lâ oko Jésus asara mbeni ye gï na li ti lo tongaso ape; aye so lo fa lani alondo na lo wani ape nga lo gi gloire ti lo wani ape (Jean 5:19, 30; 6:38; 7:16-18). Na ngoi ti fango tënë ti Jésus na sese, a nzere lani na lo mingi ti sara ye so bê ti Babâ ti lo aye, atâa so sarango tongaso asara si azo ake lo nga ala sara ye ti ngangu na lo (Jean 15:20). Atâa so kue, Jésus angbâ gï ti woko terê ti lo na gbe ti Nzapa. Jésus asara “terê ti lo kete” même juska lo wara “kuâ na ndö ti keke ti pasi.” Na wokongo terê ti lo na bê ti lo kue na gbe ti Jéhovah, lo sara si anzoni ye mingi aga na pekoni, na tapande a zi lege na azo ti wara ande fini ti lakue lakue, a sara si a yâa iri ti Jésus ni wani na nduzu nga a mû gloire na Babâ ti lo.—aPhil. 2:5-11; aHéb. 5:9.

NA YÂ TI AYE WA LA E YEKE WOKO TERÊ TI E NA GBE TI AZO SO AMÛ LI NI?

⁶ Tongana e woko terê ti e na gbe ti Nzapa na sarango ye so bê ti lo aye, e yeke kpe agingo bê nga na aye ti vundu so ayeke si na azo so ake ti yeda na droit ti Jéhovah ti komande dunia kue. Wato ti e, Zabolo, ayeke gi lakue ti te e. Me tongana e ke Zabolo nga e sara terê ti e kete na gbe ti Jéhovah nga e woko terê ti e na gbe ti lo na bê ti e kue, a yeke zi e na maboko ti Zo ti sioni so.—Mat. 6:10, 13; 1 Pi. 5:6-9.

⁷ Na yâ ti congrégation ti aChrétien, e yeda so Christ la ayeke na li ni nga so lo mû komandema na “ngbâa be-ta-zo so ayeke sara ye na ndara”. Ye so ayeke sara ye mingi na ndö ti bango ndo ti e nga na sarango ye ti e na mbage ti amba ti e. Tongana e woko terê ti e na gbe ti Nzapa, ye so ayeke pusu e ti sara ye alingbi na aye so Bible afa na yâ ti aye kue so e yeke sara ti voro na lo. Ye so andu kua ti e ti fango tënë, guengo na abungbi nga na mungo mbage ti e dä. A ndu nga songo ti e na a-ancien nga sarango ye alingbi na aye so bungbi ti Jéhovah aleke.—Mat. 24:45-47; 28:19, 20; aHéb. 10:24, 25; 13:7, 17.

⁸ Tongana e woko terê ti e na gbe ti Nzapa ayeke ga na siriri, nzoni duti nga aye ayeke tambela nzoni na yâ ti congrégation ti aChrétien. Anzoni sarango ye ti terê ti Jéhovah asigi polele na yâ ti sarango ye ti awakua ti lo (1 aCor. 14:33, 40). Aye so asi na e na yâ ti bungbi ti Jéhovah apusu e ti tene mara ti tënë so Gbia David atene giriri. Na peko ti so lo bâ kangbi so ayeke na popo ti awakua ti Jéhovah nga na asioni zo, terê ti David anzere, ni la lo tene: “Ngia ayeke na azo so Nzapa ti ala ayeke Jéhovah!”—Ps. 144:15.

⁹ Na yâ ti sewa, “mokonzi ti wali ayeke koli”. Na oko ngoi ni, lo so ayeke na li ti koli ayeke Christ, na lo so ayeke na li ti Christ ayeke Nzapa (1 aCor. 11:3). A lingbi awali awoko terê ti ala na gbe ti akoli ti ala, nga amolenge amä yanga ti ababâ na amama ti ala (aÉph. 5:22-24; 6:1). Na yâ ti sewa, tongana zo oko oko amä yanga ti zo so ayeke na li ti lo, siriri ayeke ga na pekoni.

¹⁰ A yeke nzoni akoli akomande na lege ti ndoye, ala sara ye tongana ti Christ (aÉph. 5:25-29). Tongana akoli agi pëpe ti komande na ngangu nga tongana ala kpe pëpe ti sara akua ti ala, a yeke nzere ande na awali ti ala nga na amolenge ti ala ti woko terê na gbe ti ala. A sara wali ti mû maboko na koli ti lo nga ti duti zo so alingbi na lo (Gen. 2:18). Tongana lo kanga bê lo mû maboko na koli ti lo nga lo ne lo, koli ni ayeke ye lo mingi na lo yeke mû gonda na Nzapa (1 Pi. 3:1-4). Tongana akoli na awali abata wango ti Bible so ahunda ti woko terê na gbe ti ala so amû li ni, ala yeke zia nzoni tapande na amolenge ti ala na ndö ti tënë ti wokongo terê na gbe ti Nzapa.

¹¹ Ti woko terê ti e na gbe ti Nzapa andu nga bango ndo so e yeke na ni na ndö ti “akota zo ti komande”, so “Nzapa azia si ala duti na ando nde nde so alingbi na ala.” (aRom. 13:1-7). So aChrétien ayeke nduru ti bata ndia ti kodro ti ala, ala yeke futa impôt, so ti tene ala yeke mû na “César aye so ayeke ti César, me na Nzapa aye so ayeke ti Nzapa.” (Mat. 22:21). Na ndö ni, a lingbi aye so a leke ti fa tënë na yâ ti territoire kue ague oko na andia ti batango asango na ndö ti azo. Tongana e woko terê na gbe ti akota zo ti kodro nga e mä yanga ti ala na yâ ti aye kue so ague nde pëpe na andia ti Jéhovah, lege ayeke zi na e ti mû ngangu ti e ti sara na kota kua ti fango tënë ti Royaume ti Nzapa.—Marc 13:10; Kus. 5:29.

¹² Ti woko terê na gbe ti ala so amû li ni andu ambage ti fini ti e kue. Na lê ti e ti mabe, e bâ lango so azo kue na yâ ti dunia ayeke woko terê na gbe ti Jéhovah Nzapa (1 aCor. 15:27, 28). So tâ anzoni ye si ayeke ku azo so ayeda na droit ti Jéhovah ti komande dunia kue, na so ayeke ngbâ ande ti woko terê ti ala na gbe ti lo teti lakue lakue!