Sewa ti aita so ayeke beoko

TETI angu 1 500 tongaso, Jéhovah Nzapa asara ye na mbage ti azo ti Israël tongana mara so iri ti lo ayeke na ndö ti ala. Na pekoni, Jéhovah abi lê ti lo “na mbage ti azo ti amara ti soro na popo ti ala mbeni bungbi ti azo ndali ti iri ti lo.” (Kus 15:14). Azo ni so ayeke duti ande aTémoin ti lo, ala yeke beoko na lege ti apensé ti ala nga na asarango ye ti ala atâa ala yeke na ndo wa. A yeke bungbi ala na lege ti kua so Jésus amû na adisciple ti lo. Lo tene: “Tongaso ala gue, ala sara si azo na popo ti amara kue aga adisciple. Ala batize ala na iri ti Babâ, ti Molenge na ti yingo vulu. Ala fa na ala ti bata aye kue so mbi mû yanga na ala ti sara.”—Mat. 28:19, 20.

² So mo mû terê ti mo na Jéhovah nga mo wara batême awe, mo ga mbeni disciple ti Jésus Christ. Mo yeke fadeso na yâ ti mbeni sewa ti aChrétien ti yâ ti dunia kue so abungbi oko na so azia lege pëpe na tënë ti mara, ti kodro wala ti nginza ti kangbi ala (Ps. 133:1). Ye so asara si mo ye aita ti mo aChrétien so ayeke na yâ ti congrégation nga mo ne ala. Ambeni ita ni so laso ayeke akota kamarade ti mo na yâ ti congrégation ayeke azo so kozo mo lingbi lâ oko ape ti ga nduru na ala ndali ti mara ti ala, ngobo ti ala wala hingango ndo ti ala. Mo yeke fa tâ ndoye ti aita so ayeke kamba so abungbi e ngangu ahon songo so ayeke na popo ti azo ti kodro, ti a-eglize wala ti afami.—Marc 10:29, 30; aCol. 3:14; 1 Pi. 1:22.

ALA CHANGÉ AYE NA YÂ TI BANGO NDO TI ALA

³ Tongana a yeke ngangu na ambeni ita ti zi na yâ ti li ti ala kengo zo senge senge ndali ti mara ti lo, tënë ti poroso wala ambeni bango ndo nde tongaso, ala lingbi ti bâ tapande ti aJuif so aga lani aChrétien na ngoi ti abazengele, so azi na yâ ti li ti ala asioni bango ndo so ala yeke na ni lani na ndö ti azo kue so mara ti ala ayeke nde. Lani, na ngoi so Jéhovah ahunda na Pierre ti gue na da ti Corneille, so ayeke mbeni turugu ti Rome, Jéhovah aleke lo ndali ti kua so lo yeke gue ti sara.—Kusala chapitre 10.

⁴ Na yâ ti mbeni vision, a tene na Pierre ti fâ ambeni nyama ti te, anyama ni so na lege ti Ndia ti Moïse ayeke sioni. Me tongana Pierre ake, mbeni go so alondo na yayu atene na lo: “Ye so Nzapa asara si aga nzoni awe, zia ti iri ni sioni ye.” (Kus. 10:15). Ye so Nzapa afa na Pierre la amû lani lege na lo ti leke bango ndo ti lo na ndö ti kua so lo yeke gue ti sara, so ayeke ti gue ti bâ mbeni koli so ayeke ti mbeni mara nde. Me na peko ti so Pierre ayeda ti sara ye so Jéhovah afa na lo, Pierre atene na ala so ayeke mä lo lani, lo tene: “Ala hinga nzoni mingi so ndia amû lege pëpe na mbeni Juif ti sara songo wala ti ga nduru na mbeni zo ti mara nde. Me Nzapa afa na mbi so a lingbi mbi bâ mbeni zo tongana sioni ye wala ye ti saleté pëpe. Ndani la, tongana a tokua ndo na mbi, mbi ke pëpe, me mbi ga.” (Kus. 10:28, 29). Na pekoni, Pierre abâ tâ na lê ti lo tongana nyen la Jéhovah afa so lo yeda na Corneille nga na azo ti da ti lo.

⁵ Saul ti Tarse, mbeni Farizien so ahinga mbeti mingi, abâ nga lani so a yeke kota ye ti tene lo sara terê ti lo kete nga lo sara songo na azo so giriri lo peut ti sara songo na ala ape. Ala fa même ambeni ye na lo ti tene lo sara (Kus. 4:13; aGal. 1:13-20; aPhil. 3:4-11). E lingbi ti imaginé tongana nyen la azo ni achangé abango ndo ti ala, azo tongana Sergius Paulus, Dionysius, Damaris, Philémon, Onésime nga na ambeni zo ni so ayeda na nzoni tënë na ala ga adisciple ti Jésus Christ.—Kus. 13:6-12; 17:22, 33, 34; Phm. 8-20.

E BATA BEOKO SO E YEKE NA NI NA AITA TI E TI DUNIA KUE

⁶ Kite ayeke dä ape so ndoye so aita ti congrégation afa na mbage ti mo amû lani maboko na mo ti ga nduru na Jéhovah nga na bungbi ti lo. Mo bâ lani polele ndoye so a hinga na atâ disciple ti Jésus Christ. Lo tene: “Mbi yeke mû na ala mbeni fini commandement: Ala ndoye terê na popo ti ala. Legeoko tongana ti so mbi ndoye ala, zia ala nga ala ndoye terê na popo ti ala. A yeke na lege ti ye so si azo kue ayeke hinga ande so ala yeke adisciple ti mbi: tongana ala yeke na ndoye na popo ti ala.” (Jean 13:34, 35). Nga, na ngoi so mo ga ti hinga so ndoye so ayeke na popo ti aita ti congrégation ti mo ayeke tâ ndoye so ayeke na yâ ti sewa ti aita ti dunia mobimba, mo kiri mo ye Jéhovah nga na bungbi ti lo mingi. Mo bâ na lê ti mo tongana nyen la prophétie ti Bible so aga tâ tënë, so a tene na ngoi ti nda ni a yeke bungbi azo ti voro Jéhovah na yâ ti siriri nga na beoko.—Mi. 4:1-5.

⁷ Na bango gbâ ti aye so aga na kangbi na popo ti azo laso na yâ ti dunia, zo wa la alingbi même ti pensé so mbeni lâ a yeke bungbi azo, so alondo “na popo ti amara kue, akete mara kue, azo ti kodro kue, ayanga ti kodro kue” ndo oko? (Apoc. 7:9). Bâ gï kangbi so ayeke na popo ti azo so alango na akodro so aye ague na li ni dä mingi nga na azo so angbâ ti ala gï na angobo ti giriri. Bâ tënë ti mandako so ayeke na popo ti azo ti abungbi ti nzapa, atâa so mara ti ala nga na kodro ti ala ayeke oko. Teti so tënë ti kodro la agbu bê ti azo mingi, a sara si kangbi ayeke na popo ti azo ndali ti tënë ti poroso mingi ahon ti kozo. Nga, tongana mo bâ kota kangbi so ayeke na popo ti azo so ayeke na mosoro na ala so ayeke na ni ape nga na gbâ ti aye so ayeke kangbi azo, biani ti bungbi azo ti amara nde nde, ti ayanga ti kodro nde nde nga azo so dutingo ti ala ayeke nde nde ti ye terê na popo ti ala nga ti duti na siriri ayeke mbeni miracle so gï Nzapa so ngangu ti lo ahon angangu kue la alingbi ti sara ni.—Zach. 4:6.

⁸ Me mara ti beoko tongaso ayeke mbeni ye ti bango li ape, tongana mo wara lani batême ti ga Témoin ti Jéhovah, mo lï na yâ ti sewa ti aita so. Fadeso, so mo nga kue mo yeke wara nzoni na lege ti beoko ni so, mo yeke na kua ti mû maboko ti bata ni. Mo yeke bata ni na sarango ye alingbi na atënë ti bazengele Paul so ayeke na aGalate 6:10, so atene: “Tongana e wara lege ti sara ni, zia e sara ye ti nzoni na azo kue, me mbilimbili na ala so ayeke aita ti e na yâ ti mabe.” E yeke sara nga ye alingbi na wango so: “Ala sara mbeni ye na gingo yanga wala na fango terê pëpe, me ala sara terê ti ala kete na ala bâ amba ti ala tongana azo so ayeke kota ahon ala; na ziango lê ti ala gï na ndö ti aye ti ala wani pëpe, me nga na ndö ti aye ti amba ti ala.” (aPhil. 2:3, 4). Tongana e sara kue ti bâ aita ti e aChrétien tongana ti so Jéhovah abâ na ala, na e luti pëpe na ndö ti awokongo ti ala, e yeke ngbâ ti duti na siriri nga na ngia na yâ ti songo ti e na ala.—aÉph. 4:23, 24.

E PENSÉ NA AMBA TI E

⁹ Tongana ti so bazengele Paul afa na lege ti mbeni tapande, kangbi ayeke pëpe na popo ti azo so ayeke na yâ ti congrégation me ala kue ayeke pensé na mba (1 aCor. 12:14-26). Peut-être e yo mingi na ambeni ita ti e so ayeke na yâ ti sewa ti aita so ayeke na yâ ti dunia kue; atâa so kue, e yeke pensé na nzoni duti ti ala. Tongana a yeke sara aye ti ngangu na ambeni ita ti e, a yeke mû vundu mingi na tanga ti e aita ni kue. Tongana ambeni ita ayeke na yâ ti yere wala ambeni kpale nde asi na ala, ndali ti mango terê pëpe na popo ti azo, ndali ti bira, ndali ti yengingo ti sese wala sukungo ti ngu, tanga ti aita ni ayeke gi lege kue ti mû maboko na ala na lege ti yingo nga na lege ti mitele.—2 aCor. 1:8-11.

¹⁰ A lingbi e kue e sambela ndali ti aita ti e lâ na lâ. Ambeni ita ti e ayeke tingbi na atara so alingbi ti pusu ala ti sara ye ti sioni. Ambeni alingbi ti bâ pasi ndali ti ambeni kpale so e kue e lingbi ti hinga ni. Ye oko, ti ambeni, azo ti place ti kua ti ala wala azo ti da ti ala so ayeke aTémoin ape ayeke kanga lege na ala, me azo mingi ahinga ni ape (Mat. 10:35, 36; 1 aThes. 2:14). Me tënë ni abâ e kue teti so e yeke mbeni sewa ti aita na yâ ti dunia kue (1 Pi. 5:9). Na popo ti e a yeke wara nga ambeni ita so ayeke sara kua ti Jéhovah ngangu, ala yeke mû li ni na yâ ti kua ti fango tënë nga na ti acongrégation. A yeke wara nga aita so ayeke bâ ndo na ndö ti kua ti fango tënë na yâ ti dunia kue. Aita ti e kue abezoin ti tene e sambela ndali ti ala, na asambela ti e ayeke fa na gigi so e yeke pensé na ala mingi nga e ndoye ala, même tongana mbeni ye nde so e lingbi ti sara ndali ti ala ayeke dä ape.—aÉph. 1:16; 1 aThes. 1:2, 3; 5:25.

¹¹ Na bango awusuwusu kue so ayeke si na yâ ti dunia na lâ ti nda ni so, a lingbi aTémoin ti Jéhovah aduti nduru ti mû maboko na mba. Na ambeni ngoi, a hunda ti leke gbâ ti aye na lege ti mitele ti mû maboko na aita so ambeni kpale tongana ngu so asuku amû ndo wala yengingo ti sese asi na ala. Na ndö ti tënë so, akozo Chrétien azia nzoni tapande mingi. Tongana adisciple so ayeke na Antioche adabe ti ala na wango so Jésus amû lani, ala tokua aye ti mitele na aita ti ala ti Judée, na ala sara ni na ngia (Kus. 11:27-30; 20:35). Ambeni ngoi na pekoni, bazengele Paul awa aChrétien ti Corinthe ti mû mbage na yâ ti kua ti mungo maboko na aita so kpale asi na ala, so a yeke sara ni lani na yâ ti wusuwusu pëpe (2 aCor. 9:1-15). Na ngoi ti e, tongana ambeni ye ti ngangu asi na aita ti e, bungbi ti Jéhovah nga na ambeni Chrétien ayeke sara ye hio ti mû ye na aita so ye amanke ala.

A ZIA E NDE TI SARA YE SO JÉHOVAH AYE

¹² A leke bungbi ti e ti aita ti yâ ti dunia kue so ayeke beoko ti sara ye so Jéhovah aye. Na ngoi ti e so, ye so Jéhovah aye ayeke ti tene a fa nzoni tënë ti Royaume na yâ ti dunia kue tongana tënë ti témoin na amara kue (Mat. 24:14). Na ngoi so e yeke sara kua ni so, ye so Jéhovah aye ayeke ti tene sarango ye ti e ague oko na andia ti lo na ndö ti nzoni sarango ye so ayeke na nduzu mingi (1 Pi. 1:14-16). A lingbi e kue e duti nduru ti woko terê na gbe ti mba nga ti sara si kua ti fango nzoni tënë ague na li ni (aÉph. 5:21). Ngoi so e yeke dä so ayeke pëpe ngoi ti tene e gi ye gï ndali ti e wani, me a yeke biani ngoi ti zia Royaume ti Nzapa na kozo ndo na yâ ti fini ti e mingi ahon ti kozo (Mat. 6:33). Tongana e bata ye so na li na ngoi so e yeke sara kua maboko na maboko ndali ti nzoni tënë ayeke sara si e duti na ngia laso nga ayeke sara si e wara ande aye ti nzoni so ayeke ninga kpu na kpu.

¹³ E so e yeke aTémoin ti Jéhovah, e yeke nde na tanga ti azo, a zia e nde tongana mbeni mara so ayeke nzoni-kue nga so ayapu na kua ti Nzapa (Tite 2:14). Vorongo so e yeke voro na Jéhovah asara si e yeke nde. E yeke sara kua maboko na maboko na aita ti e ti yâ ti dunia kue nga e yeke tene gï yanga ti kodro oko, so ayeke tâ tënë so ayeke na yâ ti Bible, nga e yeke sara ye alingbi na tâ tënë ni so. Jéhovah asara tënë ni lani depuis na lege ti prophète ti lo Sophonie, lo tene: “Mbi yeke changé ande yanga ti kodro ti amara na mbeni yanga ti kodro so ayeke nzoni kue, si ala kue alingbi ti di iri ti Jéhovah, na ala kue asara kua na lo maboko na maboko.”—Soph. 3:9.

¹⁴ Na pekoni, Jéhovah amû yingo ti lo na Sophonie ti fa dutingo ti sewa ti aita ti dunia kue, so aga tâ tënë laso, lo tene: “Tanga ti azo ti Israël so angbâ ayeke sara ande ye ti sioni pëpe; ala yeke tene ande mvene pëpe, wala a yeke wara tënë ti handango zo na yanga ti ala pëpe. Ala yeke te ye na ala yeke lango, zo oko ayeke zia mbeto na yâ ti ala pëpe.” (Soph. 3:13). So e hinga tâ tënë so ayeke na yâ ti Bible, nga e changé pensé ti e na fadeso sarango ye ti e kue ague oko na andia ti Jéhovah, a sara si e sara kua beoko. E yeke sara aye so, na bango ndo ti zo, zo alingbi ti sara ni ape. Tâ tënë, e yeke mbeni mara so ayeke nde, awakua ti Nzapa, so ayeke mû gonda na lo na ndö ti sese kue.—Mi. 2:12.