Mango Yanga: Mbeni Kpengba Ye ti Manda na Ngoi so Zo Ade Molenge?
“ABABÂ na Mama Aye Azo so Ayeke Gbu Li, Pepe Amolenge so Amä Gi Yanga Senge.” Tene so ayeke mbeni li ti tene ti mbeni mbeti-sango. Tene ti tondo so aluti na ndo aye ti peko ti mbeni gingo nda ti ye so a sala ni na Nouvelle-Zélande, so afa so “gi azo 22 na popo ti azo 100 si abi bê so a lingbi a fa mango yanga na amolenge na yanga-da.” Gingo nda ti ye ni afa nga so ababâ na mama laso abi bê so a yeke kota ye mingi ahon ti fa na amolenge amara ti ye tongana anzoni salango ye, warango lege ti sala ye ti bê ti ala, nga yongo akungba.
Na ngoi so zo aye ti duti gi teti lo oko na ti lë bê ti kion, a yeke pepe ye ti dongo bê ti ba so mingi ti azo ayeke na bango ndo ti kite na ndo mango yanga na fango ni na amolenge. Me a lingbi a ba mango yanga na ngoi so zo ade molenge gi tongana mbeni ngbele ye so ngoi ni ahon awe? Wala a yeke na popo ti akpengba ye ti manda so amolenge alingbi ti manda ni na ti wara ye ti nzoni dä? Mingi ahon, tongana nyen Jéhovah Nzapa, Lingu ti sewa, ayeke ba mango yanga ti ababâ na mama? Na ambeni ye ti nzoni wa aga na peko ti mara ti mango yanga tongaso?—Kusala 17:28; aEphésien 3:14, 15.
“So Ayeke Mbilimbili”
Bazengele Paul asû na mbeti na kongrégation ti aChrétien ti Éphèse ti kozo siècle:“Amolenge, i mä yanga ti babâ na mama ti i beoko na Seigneur, teti so ayeke mbilimbili.” (aÉphésien 6:1, NW) Tongaso, kozo nda ti tene teti mara ti mango yanga tongaso ayeke so a gue legeoko na ndia ti Nzapa na ndo ye so ayeke mbilimbili. Tongana ti so Paul asû na mbeti, “so ayeke mbilimbili.”
Na yâ molongo ti tene so, e ba so Tene ti Nzapa afa peko ti wango-tene so ababâ na mama ayeke mu na lege ti ndoye teti lekengo amolenge tongana mbeni ye ti pendere, “mbeni ye ti pendere teti li ti mo nga mbeni pendere lenge teti go ti mo,” nga tongana mbeni ye “so ayeke nzoni na yâ Seigneur.” (aProverbe 1:8, 9, NW; aColossien 3:20) Nde na ni, kengo yanga ti ababâ na mama ayeke ga na sioni ngbanga ti Nzapa.—aRomain 1:30, 32.
“Si Mo Duti Nzoni”
Paul afa mbeni nzoni ye nde so mango yanga alingbi ti ga na ni tongana lo sû na mbeti: “ ‘Yekia babâ nga na mama ti mo’; so ayeke kozo komandema so ayeke na zendo: ‘Si mo duti nzoni na mo ngbâ ngu mingi na ndo sese.’ ” (aÉphésien 6:2, 3, NW; Exode 20:12) Na yâ alege wa mango yanga ti ababâ na mama alingbi ti ga na ye ti nzoni na zo?
Kozoni kue, a yeke tâ tene pepe so ababâ na mama ahon amolenge ti ala na lege ti ngu nga na ye so ala manda na yâ fini? Atä so a lingbi ti ba so ala hinga ye mingi pepe na ndo a-ordinateur wala ambeni ye nde so afa ni na ekole, ala hinga ye mingi na ndo dutingo na fini nga lutingo na gbele akpale ti gigi. Na mbeni mbage, gbungo li na lege ni so aga na lege ti dutingo biazo atia apendere. Tongaso, na ndo mungo adesizion, ala yeke sala ye fade fade na gbungo li oko pepe, na fani mingi ala yeke tï na gbele sioni ngangu so amba ti ala ayeke sala na ndo ala, mingi ni ayeke teti sioni ti ala mveni. A yeke na lege ni si Bible atene: “Ye ti buba akanga na ndo ti bê ti molenge-koli.” Yorö ni ayeke nyen? “Keke ti fa lege ayeke ye so fade atomba ni yongoro na lo.”—aProverbe 22:15, NW.
Anzoni ye ti peko ti mango yanga angbâ pepe gi na ndo songo na popo ti ababâ na mama na molenge ti ala. Ti tene bungbi ti azo atambela nzoni nga alë lengo, a lingbi azo asala kusala maboko na maboko, na ye so ahunda mango yanga. Na tapande, na yâ mariage, a yeke dutingo ndulu ti yeda na tene ti mbeni zo, me pepe hundango ye lakue teti mo mveni wala bingo bê oko pepe na ndo tene ti bibe ti ambeni zo si ayeke ga na siriri, nzoni mango tele na tâ ngia. Na ndokua, mango yanga tongana zo ti kua ayeke ye so a hunda ti tene kusala kue wala ngangu kue awara nzoni lengo. Na yâ salango ye ti zo na mbage ti andia na kpengba-ndia so yanga-ti-komande amu, mango yanga ayeke zi lo gi pepe yongoro na sioni fango ngbanga, me nga a yeke ga na mbeni nzoni dutingo na batango tele.—aRomain 13:1-7; aEphésien 5:21-25; 6:5-8.
Fani mingi, apendere so ake yanga-ti-komande ayeke ga azo so alingbi pepe na yâ bungbi ti azo. Nde na ni, ye so zo amanda na ndo mango yanga na ngoi so lo de molenge alingbi ti ga na futa ti nzoni na yâ fini ti lo kue. So tâ ye ti nzoni mingi ti manda ye so na ngoi so zo ade molenge!
Kota Futa Teti Mango Yanga
Mango yanga ayeke ga pepe gi na songo ti ngia na yâ sewa nga ambeni deba nzoni nde so aninga na yâ fini ti zo kue, me nga a yeke zia na sese gunda so na ndo ni a lingbi ti leke songo ti kota ahon kue: songo na popo ti mbeni zo na Wasalango lo. Tongana “Kota Wasalango ye” so ayeke “lingu ti fini,” Jéhovah Nzapa alingbi na lege ni ti tene e mä yanga ti lo kue.—Zo-ti-fa-tene 12:1, NW (12:3, Bible ti Sango); Psaume 36:9, NW (36:10, Bible ti Sango).
Tene “mango yanga” na yâ alege nde nde kue so asala ni asigigi fani mingi na yâ Bible. Na ndo ni, a sala tene fani ngbangbo mingi ti andia ti Nzapa, ayanga so lo mu, akomandema ti lo, afango ngbanga ti lo, na afango ye ti lo, na ala kue ahunda mango yanga. A zia e na yâ kite oko pepe so Nzapa aba mango yanga tongana ye so ahunda ti wara yengo da ti lo. Biani, mango yanga ayeke kota ye mingi ti leke songo na Jéhovah. (1 Samuel 15:22) Mawa ni ayeke so nzala ti bê ti zo ague pepe na mbage ti mango yanga me kengo yanga. Bible atene: “Suma ti bibe ti bê ti zo ayeke sioni, a to nda ni tongana lo de pendere.” (Genèse 8:21) Tongaso, a lingbi ti manda mango yanga gi pepe na ngoi so zo ade molenge, me nga na ngoi ti fini ti lo kue. Salango tongaso ayeke ga na mbeni kota futa.
Dabe ti mo so, tongana ti so bazengele Paul asû na mbeti, ndia ti mä yanga ti ababâ na mama aga na zendo so yâ ni ayeke use: “si mo duti nzoni na mo ngbâ ngu mingi na ndo sese.” A kiri ayeda na zendo so na aProverbe 3:1, 2: “Molenge ti mbi, mo glisa wango-tene ti mbi pepe, me zia bê ti mo angbâ ti bata komandema ti mbi. Fade ye so amu na mo lâ mingi, Na fini teti ngu mingi, na siriri.” Kota futa teti ala so amä yanga ayeke dutingo na tâ songo na Jéhovah teti laso nga na fini ti lakue lakue na yâ mbeni fini sese ti siriri.—Apocalypse 21:3, 4.
[Afoto na lembeti 30, 31]
Mango yanga aga na songo ti ngia na yâ sewa, na ndokua, nga na Jéhovah