Atene so Azo Ahunda

Daniel ayeke la ni na ndo wa tongana a tara mabe ti aHébreu ota na gbele kota yanda so Neboukadnetsar aleke na yâ be-nyama ti Doura?

Bible afa ni pepe, na tongaso, zo oko laso alingbi pepe ti fa ndo so Daniel ayeke la ni dä na ngoi ti tara so.

Ambeni zo atene so ndo ti Daniel tongana kota zo, wala amatabisi so lo wara na gbele Neboukadnetsar ayeke la ni kota ahon ti Shadrak, Méshak, na Abed-Négo, na tongaso, a hunda pepe na Daniel ti gue na be-nyama ti Doura. Daniel 2:49 afa biani so teti mbeni ngoi, lo wara mbeni ndo so ayeke kota ahon ti afon lo ota. Me e lingbi pepe ti tene so a yeke ye so si azi lo na gbe ti bungbingo na atanga ti azo na gbele yanda ni.

Na tarango ti fa ngbanga ti nyen Daniel ayeke la ni dä pepe, ambeni zo atene so peut-être lo gue na mbeni tambela teti mbeni kusala ti kodoro ni, wala tele ti lo aso na tongaso lo lingbi pepe ti ga. Ye oko, Bible afa tongaso pepe. Atä ye so asi, a lingbi la ni pepe ti kasa salango ye ti Daniel, teti tongana fade a yeke tongaso, kite ayeke pepe so akota zo ti Babylone so ayeke na kota bê ayeke sala kusala na ni ti bi tene na li ti lo. (Daniel 3:8) Kozoni na ye so, nga na pekoni, Daniel afa tele ti lo mveni tongana mbeni be-ta-zo, so aduti na be-biani na Nzapa atä atara so lo luti na ngbele ni. (Daniel 1:8; 5:17; 6:4, 10, 11) Tongaso, atä Bible afa pepe ngbanga ti nyen Daniel ayeke la ni dä pepe na yâ be-nyama ti Doura, e lingbi ti tene na bê kue so lo duti be-ta-zo na Nzapa na belengo mabe ti lo oko pepe.​—Ezéchiel 14:14; aHébreu 11:33.