Hon Ndo ti Aye so Akanga Lege na Guengo na Li ni ti Mo!

KUTUKUTU ti mo akale, na moteur ni angbâ ti tambela, me a ke ti gue na li ni. Mbeni kpale ti masini? Pepe, me mbeni kota tênë ayeke na gbe ti mbeni oko ti agere ni. Zingo ni ayeke gi ye kue so a hunda ti sala ti tene kutukutu ni ague na li ni.

Legeoko nga, ambeni zo so ayeke manda Bible legeoko na aTémoin ti Jéhovah ayeke na akpale so alingbi ti kanga lege na guengo na li ni ti ala na lege ti yingo. Na tapande, Jésus afa so aye tongana “gingo bê ti aye ti fadeso, na ngangu ti handa ti mosoro” alingbi ti ‘kanga tene’ ti tâ tene na ti kanga lege na guengo na li ni ti zo.​—Matthieu 13:22, NW.

Ti ambeni zo nde, a yeke asalango ye wala awokongo so alï mingi na yâ ala si ayeke kanga lege na guengo na li ni ti ala. Mbeni koli ti Japon so hiri ti lo ayeke Yutaka aye la ni mingi tene so Bible afa; ye oko, kota kpale ti lo ayeke ngia ti nginza. Lo tara fani mingi ti hon ndo ti sioni salango ye so, me lo lingbi pepe. Dutingo ngba ti ye so asala si lo glisa nginza mingi, da ota, yekiango ndo ti sewa ti lo, na nengo tele ti lo mveni. Fade lo lingbi ande ti lungula tênë ti pikango gere so na ti ga mbeni Chrétien?

Wala ba tapande ti mbeni wali so iri ti lo ayeke Keiko. Na lege ti mungo maboko ti Bible, lo lungula na yâ fini ti lo asioni ye tongana vorongo yanda, salango pitan, na tenengo peko ti aye na gbe ti ngangu ti ayingo sioni. Ye oko, Keiko atene: “Ti mbi, kpale ti kota ahon ni ayeke la ni nyongo manga. Mbi tara ti zia ni lege mingi, me mbi lingbi la ni pepe.”

Legeoko nga, peut-être mo yeke na mbeni ye so akpa mbeni kpale so a lingbi pepe ti lungula ni na ndo lege ti guengo na li ni ti mo. Atä ye ni ayeke nyen, duti na mabe so, na lege ti mungo maboko ti Nzapa, mo lingbi ti hon ndo ni.

Dabe ti mo na wango so Jésus amu na adisciple ti lo na pekoni so ala wara lege pepe ti tomba mbeni yingo sioni na tele ti mbeni zo so ayeke na kobela ti makako. Na pekoni so Jésus atomba yingo sioni so ala wara lege pepe ti tomba, lo tene na adisciple ti lo: “Tongana i yeke na mabe tongana lê ti moutarde, fade i tene na hoto so, Londo na ndo so, mo gue na ndo kâ; na fade hoto ni ague. Ye oko alingbi hon ndo ti i pepe.” (Matthieu 17:14-20; Marc 9:17-29) Biani, mbeni kpale so alingbi peut-être ti duti tongana mbeni hoto so asigigi na gbele e ayeke duti gi kete kete ye nga ye oko pepe na lê ti Wasalango e ti ngangu ahon kue.​—Genèse 18:14; Marc 10:27.

Hingango Aye so Akanga Lege na Guengo na Li Ni

Kozoni ti wara lege ti hon ndo ti akpale ti mo, a lingbi mo gi ti hinga mbilimbili akpale so. Tongana nyen mo lingbi ti sala ni? Ngoi na ngoi, mbeni zo na yâ ti kongregation, na tapande mbeni ancien wala mbeni zo so amanda Bible na mo, ayeke gboto lê ti mo ande na ndo mbeni ye. A hon ti ke mara ti wango ti ndoye tongaso, a lingbi mo sala ye na lege ti tâ be-ti-molenge ti ‘mä wango-tene na ti ga zo ti ndara.’ (aProverbe 8:33) Na ambeni ngoi nde, mo lingbi peut-être ti hinga awokongo ti mo na lege ti mandango Bible ti mo. Biani, tene ti Nzapa ayeke “na fini nga na ngangu.” (aHébreu 4:12, NW) Dikongo Bible na ambeti so aluti na ndo ni alingbi ti fa na gigi abibe, atene ti bê, na aye so apusu mo ti sala kusala ti kota ahon. A mu maboko na mo ti ba tele ti mo alingbi na andia ti Jéhovah so ayeke na nduzu mingi. A fa na gigi na a mu lege ti hinga aye so alingbi ti kanga lege na guengo na li ni ti mo na lege ti yingo.​—Jacques 1:23-25.

Na tapande, peut-être a yeke na yâ ti salango ye ti mbeni wamandango Bible ti bi bê na ndo aye ti pitan. Lo lingbi peut-être ti ba so sioni ayeke dä pepe ti sala tongaso, na tenengo na yâ bê ti lo so biani lo yeke sala ye oko pepe ti sioni. Na ngoi ti mandango Bible ti lo, lo tï na ndo atene ti Jacques 1:14, 15: “Ye so ahanda zo ti sala siokpari ayeke nzala ti tele ti lo mveni so agbu lo na ahanda lo. Na nda ni, tongana nzala so ame ngo awe, a dü siokpari; na siokpari, tongana a ga kota awe, adü kui.” Fadeso, lo ba biani kota kpale so salango ye tongaso lakue alingbi ti duti teti guengo na li ni ti lo! Tongana nyen lo lingbi ti lungula ye ti kangango lege so?​—Marc 7:21-23.

Hongo ndo ti Aye ti Kanga Lege

Peut-être na lege ti mungo maboko ti mbeni Chrétien biazo, wamandango Bible ni alingbi ti gi nda ti ambeni ye na ndo ni na yâ ti Tene ti Nzapa, na salango kusala na Index des publications de la Société Watch Tower.a Na tapande, li ti tene “Pensées” afa na mbeni wadikongo ye molongo ti ambeti so a sigigi na ni na ndo lege ti hon ndo ti asioni bingo bê. Ambeti so azi nda ti aversê ti Bible tongana aPhilippien 4:8 so atene: “Ye so ayeke biani, ye so ayeke ye ti voro, ye so ayeke mbilimbili, ye so ayeke na sioni kete pepe, ye so ayeke nzoni, tene so ayeke tene ti nzoni, tongana nzoye na tene ti singila ayeke dä, i bi bê ti i na ye so.” Biani, a lingbi a lungula asioni bibe na a zia na place ni anzoni bibe so akpengba zo!

Na ngoi ti gingo nda ti aye ti lo, kite ayeke pepe so wamandango ye ni ayeke ba ande ambeni kpengba-ndia ti Bible nde so fade ayeke mu maboko na lo ti kpe ti sala si kpale ni aga kota ahon. Na tapande, aProverbe 6:27 na Matthieu 5:28 agboto mê na ndo ziango lege na aye so amu nzala ti ye ti pitan ti lï na yâ bibe ti mbeni zo. Wasungo psaume asambela tongaso: “Zi lê ti mbi na tele ti ye so ayeke senge senge.” (Psaume 119:37) Biani, gi dikongo atene ti Bible so alingbi pepe. Wandara atene: “Zo ti mbilimbili agi bê [“agbu li,” NW] ti lo.” (aProverbe 15:28) Na gbungo li pepe gi na ndo ye so Nzapa ahunda, me nga na ndo ngbanga ti nyen lo hunda ye so, wamandango ye ni alingbi ti wara mbeni gbungo nda ti ye so alï mingi na ndo ndara nga salango ye na lege ni ti alege ti Jéhovah.

Na nda ni, a lingbi zo so ayeke sala ngangu ti hon ndo ti ye so akanga lege na guengo na li ni ti lo aduti ndulu ti gi mungo maboko ti Jéhovah. Teti biani, Nzapa ahinga lege so a leke na e nzoni, so e yeke mbilimbili-kue pepe, so a sala e na pupu-sese. (Psaume 103:14) Asambela so amu lakue na Nzapa teti warango mungo maboko, tongana a gue legeoko na akota ngangu so e sala ti ke ti tï na yâ abingo bê na ndo aye ti pitan, ayeke ga ande biani na mbeni tâ nzoni lengo: mbeni nzoni yingo-ti-hinga so ane na ye ti sioni pepe.​—aHébreu 9:14.

Zia si Bê ti Mo Anze Pepe

Atä kpale so mo yeke tiri na ni, hinga so ngoi na ngoi, a lingbi ti si so mo kiri mo tï na yâ awokongo so. Tongana a si tongaso, a yeke na lege ni ti tene bê ti mo anze kete na mo wara vundu. Ye oko, dabe ti mo na atene ti aGalate 6:9: “A lingbi bê ti e anze pepe na salango kusala ti nzoni; teti na ngoi so alingbi, fade e fâ lengo ni ti nzoni, tongana bê ti e anze pepe.” Ambeni wakua so asala na bê kue na Nzapa, tongana David na Pierre, asala aye so abuba yango-iri ti ala. Me ala zia pepe. Ala yeda na tâ be-ti-molenge na wango, ala gbian aye so a hunda ti gbian, na ala ngbâ ti fa tele ti ala tongana akota wakua ti Nzapa. (aProverbe 24:16) Atä aglisango lege ti David, Jéhovah ahiri lo “zo so bê ti Mbi aye lo, na fade lo sala ye kue so Mbi ye.” (Kusala 13:22) Legeoko nga, Pierre ahon ndo ti awokongo ti lo na lo ga mbeni colonne na yâ kongregation ti aChrétien.

Azo mingi laso awara lege tongaso nga ti hon ndo ti aye ti kangango lege. Yutaka, so a sala tene ti lo kozo awe, ayeda ti manda Bible. Lo tene: “Mungo maboko na deba nzoni ti Jéhovah na yâ akapa oko oko so mbi yeke hon ni ti gue na li ni amu maboko na mbi ti hon ndo ti kpale ti mbi ti salango ngia ti nginza. Mbi wara ngia mingi ti ba gango tâ tene ti atene ti Jésus na yâ fini ti mbi: so na lege ti mabe, a lingbi nga ti lungula ‘ahoto.’ ” Na pekoni, Yutaka aga serviteur ti mungo maboko na yâ kongregation.

Ka ti Keiko, so ayeke la ni ngba ti nyongo manga, ayeke tongana nyen? Ita-wali so amanda ye na lo awa lo ti diko a-Réveillez-vous! nde nde so asala tene ti dutingo ngba ti nyongo manga. Même Keiko asû tene ti 2 aCorinthien 7:1 na yâ ti kutukutu ti lo tongana dango bê ti lâ oko oko ti duti na sioye oko pepe na lê ti Jéhovah. Ye oko, lo lingbi pepe ti zia ni. Keiko adabe ti lo: “Bê ti mbi aso na tele ti mbi mveni. Tongaso, mbi to nda ti hunda mbi mveni ye nyen mbi ye biani: Mbi ye ti sala na Jéhovah, wala na Satan?” Tongana lo mu desizion so a yeke Jéhovah si lo ye ti sala na lo, lo sambela ngangu ti wara mungo maboko. Lo tene: “Tongana ye ti dongo bê teti mbi, mbi wara lege ti zia nyongo manga na salango akota ngangu mingi pepe. Mbi yeke gi na vundu teti so mbi zia ni hio pepe.”

Mo kue mo lingbi ti hon ndo ti aye so akanga lege na guengo na li ni ti mo. Tongana mo sala ngangu mingi ahon ti tene bibe ti mo, anzala ti bê ti mo, atene ti mo, na akusala ti mo ague legeoko na andia ti Bible, fade mo yeke duti na bibe ti nengo tele ti mo mveni nga ti ziango bê na ndo mo. Bê ti a-ita ti mo ti koli na ti wali ti yingo, nga na azo ti sewa ti mo, ayeke duti nzoni na akpengba tongana ala bungbi legeoko na mo. Ye ti kota ahon kue ayeke so fade mo yeke kpengba songo ti mo na Jéhovah Nzapa. Lo mu zendo so fade lo ‘lungula na lege ti azo ti lo tênë so ala pika gere ti ala dä’ tongana ala yeke kpe na gbe ti ngangu ti Satan. (Esaïe 57:14) Na mo lingbi ti duti na beku so tongana mo sala ngangu kue ti lungula na ti hon ndo ti aye so akanga lege na guengo na li ni ti mo na lege ti yingo, fade Jéhovah ayeke hiri gbâ ti deba nzoni na ndo mo.

[Kete Tene na Gbe Ni]

[Foto na lembeti 28]

Jésus amu zendo so na lege ti mabe, fade a yeke hon ndo ti aye ti kangango lege so ayeke tongana ahoto

[Foto na lembeti 30]

Dikongo Bible akpengba ngangu ti e ti hon ndo ti awokongo ti e na lege ti yingo