Tënë ti “asaint” agbu bê ti azo laso

“Mo dabe mo na ngoi so azo aye lani ti mä pëpe tënë ti azo so asala nzoni kusala? A bâ a tene bibe so asala lani ye oko pëpe na ndo azo ti Amerika kutu 4,2 so abâ na televizion lungo kuâ ti Mama Teresa na lango 13 ti septembre. Ngbele ye na kuâ ti lo na lango 5 ti septembre, azo atokua gbâ ti ambeti na Vatican ti tene a diko lo oko ti asaint. Mingi ti azo apensé so fade a yeke sala tongaso.”​—Sun-Sentinel, Amerika, 3 Octobre 1997.

MAMA Teresa ayeke lani mbeni mamere. Azo mingi ayeke bâ kusala ti lo ti mungo maboko na azo ti mawa tongana fä ti tâ dutingo ti nzoni-kue. Na yâ ambeni lege ti vorongo nde, a yeke wara nga azo so a gonda ala teti akota ye so ala sala na yâ fini ti ala. Me peut-être a-église ti ala ahinga ala pëpe tongana ti so Église Catholique ti Rome ayeke diko azo asaint.

Ngbele ye so lo ga Pape, Jean Paul II adiko azo ndulu na 450 asaint. Wungo so ahon wungo ti azo so tanga ti apape kue ti siècle 20 adiko ala asaint.a Ngbanga ti nyen azo angbâ lakue ti mû tele ti ala tongaso na “asaint”, atâa so aCatholique ahinga mingi ti ala nzoni pëpe?

Lawrence Cunningham, mbeni wafango ye na ndo lege ti vorongo na Kota Da-mbeti ti Notre Dame, atene: “Bibe so atene peut-être fini so ayeke nzoni-kue ayeke dä na yâ sese so, agbu bê ti azo mingi. Asaint afa so lege ti sala mbeni kota ye na yâ fini ayeke dä, même laso.” Nga, a tene so “asaint” ayeke na mbeni lege so ayeke nde ti ga ndulu na tele ti Nzapa. Tongaso, ala lingbi ti tene nzoni tënë ti azo so ade na fini na Nzapa. Tongana a wara aye so angbâ ti mbeni “saint” wala mbeni mbage ti tele ti lo, azo ayeke voro ni na bingo bê so mbeni ngangu ayeke sigigi na yâ ni.

Catéchisme ti kota bungbi ti Trente, so a sigigi na ni na siècle 16 ti kiri ti fa kota tënë ti mabe ti aCatholique, atene: “E yeke na raison ti tene na nda ni so ti yekia asaint ‘so alango na yâ Seigneur,’ ti hunda na ala ti tene nzoni tënë ti e na Nzapa, na ti voro ambeni ye ti tele ti ala nga na fuku ti tele ti ala so angbâ na peko ti so a gbi ni, ayeke kiri na gloire ti Nzapa na peko oko pëpe. Nde na so, yeke na yeke, tongana beku ti Chrétien ni ayeke wara ngangu na ayeke kpengba, nga so lo mveni aye ti manda peko ti nzoni salango ye ti asaint, gloire ni so ague na Nzapa ayeke kono gi konongo.” (Catéchisme ti kota bungbi ti Trente, 1905 [Angl.]). Biani, atâ Chrétien aye ti duti na mbeni fini so ayeke nzoni, ti pusu ndulu na Nzapa na lege ni, na ti wara mungo maboko ti lo (Jacques 4:7, 8). Me, tongana a bâ Tënë ti Nzapa, azo wa ayeke biani asaint? Kusala ti ala ayeke so wa?

[Kete Tene na Gbe Ni]