Bâ aye tongana ti so Nzapa abâ

LANGO 14 ti nze ti septembre ngu 2002 ayeke lani mbeni lango so ndo ni asala nzoni na lâ asu pendere na gbata ti New York na Amerika. Na lango ni so, azo mingi mingi so wungo ti ala asi 6 521 ti akodoro nde nde awara tele na Kota ndo ti Fango ye ti aTémoin ti Jéhovah na Patterson nga na yâ andokua ti Brooklyn na ti Wallkill. Azo mingi mingi so aga teti amissionnaire ti klase 113 ti Guiléad, Ekole ti Mandango Bible ti Société Watchtower, so ayeke wara kota mbeti ti ala. A-élève ni alondo na akodoro 14 na ala mû tanga ti anze oku so ahon ti leke tele teti kusala ti missionnaire so ala yeke gue ti sala na yâ akodoro 19 so atokua ala dä.

Carey Barber, so ngu ti lo ahon 97 na so ayeke oko ti Wabatango Bungbi ti aTémoin ti Jéhovah, ayeke lani président ti programme ni. Lo gboto lê na ndo ye ti nzoni ti Ekole ti Guiléad so aninga fadeso ndulu na angu 60 awe, na so amû maboko na azo saki mingi ti gue na kusala ti missionnaire. Ita Barber atene: “A yeke biani tâ tënë so aye ti nzoni mingi aga na peko ti fango lege so ala wara. Ngbanga ti maboko so amissionnaire ti ekole so amû, a yeke tâ biani azo ti be-ti-molenge saki mingi mingi ti ndo sese kue si amû tele ti ala na Jéhovah na ayeda na tâ vorongo ti lo nga na kusala ti lo.”

Kozo si ala ga na Ekole ti Guiléad, mingi ti a-élève ni afa so ala ye ti kono yâ ti kusala ti ala ti fango tënë. Mbeni ita-koli na wali ti lo amû ngu oko na ndo ni ti manda yanga ti Mandarin ti wara lege ti fa tënë na gbâ ti aChinois so alango na kodoro ti ala na Canada. Mbeni ita-koli na wali ti lo nga amanda ti ala yanga ti Albanais; na nda ni, ala gue na Albanie ti mû maboko na azo mingi mingi so asala nzara ti Tënë ti Nzapa kâ. Ti ga na Guiléad, ambeni élève ni nde alondo na Hongrie, Guatemala, na République Dominicaine, akodoro so ala gue lani dä ti sala kusala na ndo so a hunda awafango Tënë ti Nzapa dä mingi.

Fadeso, kozoni si ala gue na yâ aterritoire so a yeke tokua ala dä (na Afrika, na Poto ti Tö, na Bê Amerika na Amerika ti Mbongo, nga na Asie ti Tö), a wa a-élève ti ekole ni kue ti gi bango ndo ti Nzapa na yâ aye so kue ala yeke sala.

Bâ aye tongana ti Nzapa

Na peko ti atënë ti lo ti tongo nda ni, Ita Barber azia place na Maxwell Lloyd, mbeni oko ti Komite ti Filiale ti Amerika. Ita Lloyd amû diskur na ndo li ti tënë so: “I bâ aye kue tongana ti so Nzapa abâ.” Ita ni agboto lê na ndo atapande ti David na ti Molenge ti Nzapa, Jésus (1 Samuel 24:6; 26:11; Luc 22:42). Na pekoni so lo dabe ti a-élève ni so aye so ala manda teti anze oku afa na ala ti bâ aye tongana ti so Nzapa abâ ni, lo tene: “Tongana i yeke manda Bible na azo na yâ fini territoire ti i, fade i yeke mû maboko na ala ti bâ aye tongana ti so Nzapa abâ ni?” Nga na ndo wango so ala yeke mû na ambeni zo, lo wa a-élève ni tongaso: “I tene pëpe, ‘Na bango ndo ti mbi, mbi bâ so . . . ’ Ahon ti tene tongaso, i mû maboko na ala ti wara bango ndo ti Nzapa. Na salango tongaso, fade i yeke duti tâ deba nzoni teti ala so i yeke bungbi oko na ala na yâ territoire ti i.”

Na pekoni, a yeke Gerrit Lösch, mbeni oko ti Wabatango Bungbi, si amû diskur. Na salango lisoro na ndo li ti tënë “Mbi yeke na i”, lo gboto lê na ndo gbâ ti alege so na yâ ni Jéhovah atene na awakua be-ta-zo ti lo: “Mbi yeke na i”. (Genèse 26:23, 24; 28:15; Josué 1:5; Jérémie 1:7, 8). Na ngoi ti e, e lingbi ti duti na mara ti ziango bê kue tongaso na mbage ti Jéhovah tongana e ngbâ be-ta-zo. Ita Lösch atene: “I yeke gi bê ti i na tenengo so i yeke wara ande azo ti manda Bible na ala? I dabe i so Jéhovah atene: ‘Mbi yeke na mo’. I yeke gi bê ti i ti wara gbâ ti ye alingbi na ni na lege ti mitele? Jéhovah atene: ‘Fade Mbi zia ti sala na mo pëpe, na Mbi zia mo lâ oko pëpe.’ ” (aHébreu 13:5). Ita Lösch ahunzi diskur ti lo na dango bê ti a-élève ni so Jésus amû zendo ti duti na adisciple be-ta-zo ti lo na yâ kusala ti salango adisciple.​—Matthieu 28:20.

Lawrence Bowen, wafango mbeti na Guiléad, amû diskur na ndo li ti tënë so: “Fade i yeke wara nzoni dutingo ti e na yâ atara ti wâ?” Lo tene so ndali ti akota tënë so abâ gigi na Éden, ala so kue aye ti mû tele ti ala ti sala gi na Jéhovah oko ayeke tingbi na akpale nga, na ambeni ngoi, ala tingbi na atara ti wâ. Lo wa a-élève ni ti mû tapande ti Jésus so awara tâ nzoni dutingo na ziango bê kue na ndo Jéhovah nga na yengo dä na atara ti wâ so Jéhovah azia lege na ni ti si na lo si mango yanga ti Molenge ti lo alingbi kue (aHébreu 5:8, 9). A lingbi ti haka Jéhovah na mbeni zo so ayeke lungula asaleté ti lor; zo tongaso ayeke zia wâ ni alingbi na ni ti lungula na asaleté ti lor so. Me biani, mabe so a tara pekoni na wâ ayeke ga na nzoni dutingo na zo ahon lor so a lungula saleté ni. Ngbanga ti nyen? Ita Bowen akiri tënë: “Ngbanga ti so mabe so a tara pekoni na wâ alingbi ti gbu ngangu na gbele atara kue, na a yeke mû na e ye kue so alingbi, ti tene e gbu ngangu juska na ‘nda ni’.”​—Matthieu 24:13.

Mbeni wafango ye nde ti Guiléad, so ayeke Mark Noumair, ahunda: “Fade a bâ i na nzoni lê?” Diskur ti lo aluti mbilimbili na ndo atënë ti 1 Samuel 2:26, so afa so Samuel “[a]ga nzoni na lê ti L’Eternel, na lê ti azo nga.” Na pekoni so lo sala tënë ti tapande ti Samuel, Ita Noumair, so asala lani angu 10 na ndo ni na yâ kusala ti missionnaire na Afrika, atene: “I nga kue i lingbi ti ga nzoni na lê ti Nzapa tongana i duti ndulu lakue na be-biani na kusala so lo mû na i ti sala. Lo mû na i mbeni kusala ti ngele ngangu tongana missionnaire.” Na pekoni, Ita Noumair awa a-élève ti klase ni ti bâ akusala so a mû na ala tongana mbeni kungba so alondo na Nzapa na ti duti na bango ndo ti Nzapa tongana ala yeke sala ni.

Na ngoi so ekole ni ayeke tambela, a-élève ni awara alege mingi na anda ti yenga ti fa na azo ti ndo ni ‘akota kusala ti Nzapa’ so a fa ni na yâ Bible (Kusala 2:11). Biani, ala wara lege ti sala tënë ti aye so na ayanga nde nde bale-oko. Na yâ diskur so li ti tënë ni ayeke: “ ‘Akota kusala ti Nzapa’ apusu azo ti sala ye”, Wallace Liverance, mbeni wafango mbeti ni nde ti Guiléad, ahunda tënë na ambeni élève so afa aye so asi na ala. Lo tene: “Yingo ni apusu ala so ayeke na da-nduzu na lâ ti Pentecôte ti sala tënë ti ‘akota kusala ti Nzapa’. Oko bibe so angbâ lakue ti sala kusala laso na popo ti awakua be-ta-zo ti Nzapa kue.” A pusu même ambeni zo ti manda afini yanga ti kodoro ti wara lege ti fa tënë na azo gbâ ni ahon ti kozo.

Anzoni wango ti bâ aye tongana ti so Nzapa abâ

Na peko ti adiskur ti tongo nda ni, Gary Breaux na William Young, so ayeke sala kusala na Béthel ti Amerika, ahunda tënë na a-ita ti akomite ti filiale nde nde ti akodoro so amissionnaire ayeke dä laso, nga a hunda tënë na mbeni ita-koli na wali ti lo so asala lani angu 41 na yâ kusala ti missionnaire. Mbeni tënë ti ala ayeke so: “Ala so ahunda ti wara aye mingi pëpe ayeke ngbâ a ninga. Ala zia lê ti ala mingi na ndo nda ni so ala ga na kodoro ni. Ala hinga so ala ga ti fa nzo tënë na ti mû maboko na azo ti hinga Jéhovah.”

David Splane, mbeni oko ti Wabatango Bungbi, ahunzi programme ni na lege ti mbeni diskur so li ti tënë ni ayeke: “I yeke gue na yongoro ndo pëpe!” Lo ye ti tene nyen biani, teti a yeke tokua ande a-élève 46 so na yâ ambage ti sese nde nde? Lo tene: “Atâa ndo so i yeke dä, tongana i ngbâ be-ta-zo, i yeke duti lakue na yâ da ti Nzapa.” Biani, aChrétien be-ta-zo kue, atâa ndo so ala duti dä na lege ti mitele, ala yeke sala kusala na yâ mbeni mbage ti kota temple ti Nzapa na lege ti yingo, wala da ti lo, so abâ gigi na ngoi ti batême ti Jésus na kozo siècle (aHébreu 9:9). A yeke tâ ye ti dengo bê mingi teti ala so aga, ti hinga so Jéhovah ayeke ndulu na awakua be-ta-zo ti lo kue na sese! Legeoko tongana ti so Jéhovah abi bê lani mingi na Jésus na ngoi so lo de na sese, Lo bi bê nga na e kue nga na kusala so e yeke sala na Lo, atâa ndo so e yeke dä. Ni la, na ndo tënë ti vorongo Nzapa, e yo mingi pëpe na aita ti e nga na Jéhovah na Jésus.

Na pekoni so a fa peko ti abalao so alondo na mbage nde nde ti sese, ando so a yeke tokua a-élève ni dä, nga tongana a diko lettre so a-élève ti klase ni asû ni ti fa bê ti kiri singila ti ala teti fango lege so ala wara na Guiléad, président ni ako nda ti programme ni na anzoni tënë. Lo wa afini missionnaire ni ti ngbâ lakue ti sala nzo kusala na ti wara ngia na yâ kusala ti Jéhovah.​—aPhilippien 3:1.

[Encadré na lembeti 23]

AYE TI HINGA NA NDO KLASE NI

Wungo ti akodoro so a-élève ni alondo dä: 14

Wungo ti akodoro so a tokua ala dä: 19

Wungo ti a-élève ni: 46

Ngu ti ala oko oko angoro na tele ti ngu: 35

Ngu ti mingi ti ala na yâ tâ tënë: 17.2

Ngu ti mingi ti ala na yâ kusala ti ngoi kue: 13.7

[Foto na lembeti 24]

Ala so awara kota mbeti na klase 113 ti Guiléad, Ekole ti Mandango Bible ti Société Watchtower

Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na mbage ti koti.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.