A wa azo so awara diplôme ti Galaad ti sala tënë ti ‘apendere ye’
GBÂ ti azo 6 635 ti akodoro 52 aga lani na kapa ti mungo diplôme na klase 115 ti Galaad, Ekole ti Mandango Bible ti Société Watchtower, na lango 13 ti septembre 2003.
Ala mä awango ti Bible so a mû na a-élève 48 ti klase ni ti gue na ‘apendere ye ti Nzapa’ na azo ti akodoro 17 (Kusala 2:11). A yeke na ndo so kâ si a-élève, so awara diplôme ti ala, ayeke sala fadeso kusala ti ala ti missionnaire.
Na yâ atënë ti lo ti tongo nda ni, Stephen Lett, so ayeke oko ti Wabatango Bungbi ti aTémoin ti Jéhovah na so amû li ni na ngoi ti matanga so, adabe ti a-élève ni: “Tongana i londo ti gue na ndo so a to i dä, atâa ndo wa si i gue dä wala aye wa asi na i, azo so ayeke na i ayeke mingi ahon ala so ake i.” Na salango kusala na chapitre 6 ti mbeti Use ti aGbia, Ita Lett adabe ti a-élève ni so ala lingbi ti zia bê kue na ndo mungo maboko ti Jéhovah Nzapa nga na ti gbâ ti a-ange na ngoi so ala yeke fa na azo ‘apendere ye ti Nzapa’. (2 aGbia 6:15, 16). Ambeni zo asala ngangu na aChrétien ti kozo siècle, na ambeni asala pëpe nzara ti tënë so ala yeke fa. Amissionnaire Chrétien ti laso ayeke wara nga mara ti aye so. Ye oko, ala lingbi ti zia bê kue na ndo mungo maboko ti yayu nga na ti bungbi ti Jéhovah na ndo sese.—Psaume 34:8; Matthieu 24:45.
Sala tënë ti ‘apendere ye ti Nzapa’
Na peko ti atënë ti tongo nda ni ti ita so amû li ni, Harold Corkern, ti Komite ti filiale ti Etats-Unis, asala tënë na ndo li ti tënë so: “Kungo aye so ayeke tâ na lege ni: Kelele ti kusala so aga nzoni na amû ngia.” Ita Corkern atene so beku so aga tâ tënë pëpe alingbi ti ga na vundu, tongana ti so aProverbe 13:12 afa. Ye oko, mingi ni vundu aga na lege ti aye so ayeke tâ na lege ni pëpe, so zo aku me aga tâ tënë pëpe. A lingbi azo so awara diplôme ti ala abâ ala mveni nga ambeni zo tâ na lege ni. A lingbi ala hinga so ala yeke girisa lege ande, me zia aye so amû vundu na ala ahon ndo ni pëpe, na ngoi so ala yeke sala kue ti mû maboko na azo ti gbu nda ti ‘apendere ye ti Nzapa’. Ita Corkern awa afini missionnaire ti zia bê kue na Jéhovah, “Zo ti futa ye na ala so agi Lo.”—aHébreu 11:6.
Zo so aga na peko ayeke Daniel Sydlik, mbeni oko ti Wabatango Bungbi, so asala tënë na ndo li ti tënë: “Beku ti Chrétien ayeke nyen?” Lo tene: “Beku ayeke mbeni pendere lengo so a lingbi Chrétien awara. A yeke mbeni ndia ti ye ti mbilimbili so aga na zo ti wara tâ nzoni songo na Nzapa. Ti zo so ayeke Chrétien pëpe, ti duti na beku tongana ti so e yeke na ni, ayeke ye so ayeke ngangu.” Ita Sydlik akiri afa ambage nde nde ti beku ti Chrétien so ayeke mû maboko na mbeni zo ti duti na nzoni bango ndo na gbele akpale ti gigi. “Tongana e yeke na beku, e lingbi ti luti na gbele fini ti lâ oko oko na mbeni fini ngangu ti ngbâ ti sala ye, nga na mbeni yingo so asö benda.” Beku ti mbeni Chrétien ayeke mû maboko na lo ti bâ Jéhovah tongana Nzapa so ayeke na mbeni ye ti sala, nga ti duti na ngia na salango na Lo.—aRomain 12:12.
Wallace Liverance, wakuasu ti Ekole ti Galaad, awa a-élève ni ti “Ngbâ lakue ti tambela na lege ti yingo.” (aGalate 5:16). Lo fa tongana nyen Baruc, wakuasu ti Jérémie, aga ndulu kue ti kaï ti tambela na lege ti yingo. Na mbeni ngoi, Baruc awoko na lo to nda ti gi ti wara akota ye teti lo mveni (Jérémie 45:3, 5). Na pekoni Ita Liverance afa so ambeni zo azia ti mû peko ti Jésus na ake tâ tënë ti yingo, so ayeke kota ye mingi teti salut. A yeke lani ngbanga ti so ala gbu pëpe nda ti ye so lo yeke fa, na bê ti ala aso teti so ala wara pëpe na ngoi ni so aye ti mitele so ala yeke ku (Jean 6:26, 27, 51, 66). Ye wa amissionnaire, so kusala ti ala ayeke ti gboto lê ti azo na mbage ti Wasalango ye nga na ye so lo leke ti sala, alingbi ti manda na lege ti atondo so? A wa a-élève ti tene ye so agbu bê ti ala ayeke pëpe ti wara kota ndo, ti tene azo agonda ala, wala ti mû mbeni kusala ti Chrétien ti wara ye na pekoni.
Mark Noumair, wafango ye na Galaad, ahunda tënë so: “Fade mo yeke duti zo so amû ye wala zo so akamata ye?” Lo gboto atënë ti lo na yâ aJuge 5:2, so na yâ ni a gonda ambeni zo ti Israël teti ala mû ala mveni ti sala kua tongana aturugu ti Barak. A gonda a-élève ti Galaad teti bibe so ala fa ti yeda na hiringo ndo ti Barak ti Kota, Jésus Christ, ti bi tele ti ala mingi ahon ti kozo na yâ bira ti yingo. A lingbi aturugu ti Christ agi ti nzere na zo so amû ala na kusala ti turugu. Ita Noumair adabe ti a-élève ni: “Tongana e to nda ti bi bê ti nzere gi na e mveni, e yeke kaï ti tiri na wato ni. . . . Kota ye na yâ kusala ti missionnaire ayeke mo pëpe. A yeke Jéhovah, kota yanga-ti-komande ti lo, nga gango tâ tënë ti ye so lo ye. E sala kusala ti missionnaire, pëpe ngbanga ti so e ye ti tene Jéhovah azia ngia na bê ti e, me e sala na lo teti so e ndoye lo.”—2 Timothée 2:4.
Na pekoni, Lawrence Bowen, wafango ye na Galaad, amû li ni na yâ mbage so atene ‘Bata ala nde na lege ti tâ tënë.’ (Jean 17:17). Lo tene so a-élève ti klase 115 ayeke awakua ti Nzapa so a zia ala nde. Na ngoi so ala yeke lani na ekole, ala mû mbage nga na fango tënë, na gingo ti wara azo ti bê ti mbilimbili so aye tâ tënë. Legeoko tongana Jésus nga na akozo disciple ti lo, a-élève ni “asala tënë ti bê” ti ala mveni pëpe (Jean 12:49, 50). Na wâ, ala fa tâ tënë so a sû na gbe ti yingo na so amû fini. Ahakango peko ti ye, nga na salango tënë ti aye so asi na a-élève ni, afa na gigi kota ngangu so Bible asala na ndo azo so ala tingbi na ala.
Awango nga na kode ti ambeni zo amû ngangu
Anthony Pérez nga na Anthony Griffin, ti Biröo ti Kusala ti filiale ti Etats-Unis, ahunda tënë na aita ti Komite ti filiale ti ambeni kodoro. Akoli so asala lisoro na ndo akpale so a lingbi afini missionnaire ahon ndo ni, nga na lege ti ye so ala mveni amanda, ala mû wango so alingbi biani. Ambeni kpale ni ayeke kangbi so ayeke na popo ti angobo ti salango ye, kota ndowa na yâ ti ngu oko kue, wala alege ti vorongo nga aye ti poroso, so ayeke nde na ti so a-élève ni ahinga. Ye wa alingbi ti mû maboko na afini missionnaire ti luti na gbele afini ye so? Ndoye teti Jéhovah, nga teti azo, bango ndo pëpe na peko, nga salango ye na gbungo li. Mbeni ita ti komite ti filiale atene: “Azo na yâ kodoro so a to e dä aduti na fini na yâ ni a sala angu mingi mingi kozoni na e. E lingbi biani ti duti dä, nga ti leke salango ye ti e ti lingbi na ni. Na ngoi kue so e wara akpale, e bâ ala tongana aye so alingbi ti sala si salango ye ti e aga nzoni mingi. I zia bê na sambela nga na ndo yingo ti Jéhovah, na i yeke bâ tâ tënë ti atënë ti Jésus so: ‘Mbi yeke na i.’ ”—Matthieu 28:20.
Samuel Herd, oko ti Wabatango Bungbi, aga na kapa ni na kota mbage ti lo na lege ti diskur ti lo, “Ngbâ lakue ti sala tënë na ndo apendere ye ti Nzapa.” Sango yingo vulu na ndo adisciple ti Jésus na Pentecôte ti ngu 33 amû ngangu na ala ti sala tënë na ndo ‘apendere ye ti Nzapa’. Ye wa alingbi ti mû maboko na afini missionnaire laso ti sala tënë na mara ti wâ tongaso na ndo Royaume ti Nzapa? A yeke gi oko yingo vulu so. Ita Herd awa a-élève so ayeke wara adiplôme ti ala ti tene ‘yingo ti ala aza nzoni’, ti tene tele ti ala anzere mingi teti ando so a tokua ala dä, na zia ala girisa lâ oko pëpe ti sala nzo kusala na aye so a fa na ala (aRomain 12:11). Ita Herd atene: “Bible ayeke mbeni pendere ye ti Nzapa. Zia a bâ ngele ti lo tongana senge ye lâ oko pëpe. Tokua ti lo ayeke na fini. A yeke ndu tâ gi amama ti tënë ni. I sala kusala na ni ti leke aye nzoni na yâ fini ti i. Zia a gbian lege so i yeke gbu na li ti i. I bata ngangu ti i ti gbungo li na mandango Tënë ti Nzapa, na dikongo ni, nga na gbungo li na ndo ni . . . I zia na gbele i, na i leke na bê ti i, ti mû aye so i manda na Galaad ti ngbâ lakue ti sala tënë ti ‘apendere ye ti Nzapa.’ ”
Na peko ti dikongo abalao ti azo ti ndo nde nde ti sese, nga na mungo adiplôme ti ala, mbeni oko ti ala adiko lettre ti klase ni so afa singila ti bê ti ala teti aye so ala manda. Nga, Ita Lett ahunzi ngoi ti ngia so na fango peko ti 2 Chronique 32:7 nga ti Deutéronome 20:1, 4. Na ziango kamba na popo ti andangba tënë ti lo na atënë ti lo ti tongo nda ni, lo hunzi tongaso: “Tongaso, i aita so i wara diplôme ti i, zia i dabe i so, na ngoi so i yeke gue, na ngoi so i yeke tambela na yâ bira ti yingo na afini ndo so a to i dä, Jéhovah ayeke tambela ande legeoko na i. Zia i girisa lâ oko pëpe so azo so ayeke na i ayeke mingi ahon ala so ake i.”
[Encadré na lembeti 25]
AYE TI HINGA NA NDO KLASE NI
Wungo ti akodoro so a-élève ni alondo dä: 7
Wungo ti akodoro so a tokua ala dä: 17
Wungo ti a-élève ni: 48
Ngu ti ala oko oko angoro na tele ti ngu: 33,7
Ngu ti mingi ti ala na yâ tâ tënë: 17,8
Ngu ti mingi ti ala na yâ kusala ti ngoi kue: 13,5
[Foto na lembeti 26]
Klase 115 ti Galaad, Ekole ti Mandango Bible ti Société Watchtower
Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na koti.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.