Lango ti mungo diplôme ni: Mbeni pendere ngoi

“E YEKE wara ye ti nzoni mingi na pendere lango so. Lâ asu nzoni. Lê ti nduzu ayeke polele. Apele ayeke pendere. Andeke ayeke toto. A leke ye kue awe ti tene e wara aye ti nzoni mingi, na e yeke kiri na vundu na bê pëpe. Jéhovah ayeke pëpe Nzapa ti mungo vundu na zo. Lo yeke Nzapa ti mungo anzoni ye.”

A yeke na lege ti atënë so si Ita Samuel Herd, mbeni oko ti Wabatango Bungbi ti aTémoin ti Jéhovah, ato nda ti kapa ti mungo diplôme na klase 117 ti Galaad, Ekole ti Mandango Bible ti Société Watchtower. A sala ni na lango 11 ti septembre 2004. Aye so ayeke lani na yâ pendere programme so ayeke awango ti mungo wâ na zo so alondo na Bible, aye so a-élève ni awara na fango tënë nga na aye so asi na ala so ayeke amissionnaire awe. Biani, a yeke lani mbeni nzoni ngoi teti azo 6 974 so abungbi na Ndokua ti Mandango ye ti Watchtower na Patterson (New York), nga na andokua so ayeke na Brooklyn nga na Wallkill. Ala ti Brooklyn nga na Wallkill abâ ye ni na télévizion.

Atënë ti mungo wâ na a-élève ni

John Kikot, membre ti Komite ti filiale ti Amerika atene atënë ti mungo wâ na zo so aluti na ndo li ti tënë: “Ngbâ ti bata ngia ti mo tongana missionnaire.” Lo fa so a hinga a-élève ti Galaad teti ngia ti ala, tongana ti so a bâ lani na ngoi ti mungo diplôme ni. Fango ye ti Mbeti ti Nzapa so ala wara na ekole ni aga na ala ngia, nga a leke ala fadeso ti mû maboko na ambeni zo ti wara mara ti ngia so. Tongana nyen? Na bingo tele ti ala kue na yâ fango tënë tongana amissionnaire. Jésus atene: “Ngia ayeke na zo so amû ye, ahon ngia ti lo so akamata ye.” (Kusala 20:35). Tongana afini missionnaire so amû tapande ti Jéhovah, “Nzapa so ayeke na ngia”, so ayeke ndulu ti mû ye nga so lo yeke mû tâ tënë na azo, ala lingbi ande ti bata ngia ti ala.​—1 Timothée 1:11, NW.

Use zo so amû tënë ayeke mbeni oko ti Wabatango Bungbi, David Splane, so li ti tënë ti lo ayeke: “Tongana nyen ti mä tele na azo?” Biani, a yeke nzoni na a nzere mingi ti duti beoko, me a hunda nga ti tene mo “ga ye kue na popo ti azo kue.” (1 aCorinthien 9:22; Psaume 133:1). Ita Splane afa so na yâ kusala ti ala ti missionnaire, a-élève so awara diplôme ti ala ayeke tingbi na azo mingi: azo ti territoire, amba ti ala amissionnaire, aita ti fini kongregation so a zia ala dä nga na aita ti filiale so ayeke bâ lege ti kusala ti fango tënë nga na fango ye. Lo mû anzoni wango na ndo lege ti sala si songo ti ala na azo aduti lakue nzoni: Hingango yanga ti kodoro ni, kpengo angobo ti salango ye ti ndo ni, kpengo ti yôro tele na yâ ti aye so abâ gi amba ti ala missionnaire nga mango yanga ti ala so amû li ni. ​—aHébreu 13:17.

Ota zo ni ayeke Lawrence Bowen, so ayeke mbeni wafango ye na Ekole ni. Lo hunda tënë so: “Bibe ti mo ayeke tongana ti Nzapa?” Lo dabe ti a-élève ni so azo so ‘afâ ngbanga na lege ti ye so lê abâ’ ake ti yeda na Jésus tongana Messie (Jean 7:24). Teti so e yeke mbilimbili-kue pëpe, a hunda ti tene e kue e sala hange ‘ti bi bê tongana azo pëpe’, me ti duti na ‘bibe ti Nzapa’. (Matthieu 16:22, 23). Même azo so akpengba na lege ti yingo, a lingbi ala ngbâ ti leke bibe ti ala. Lekengo bibe ti e fadeso alingbi ti gue na e ti wara aye ti yingo so e zia na gbele e ahon ti tene e wara kpale, legeoko tongana mbeni bateau so alingbi ti lï ngu. Mandango Bible lakue na bango akota tënë ni kue ayeke mû maboko na e ti duti na ‘bibe ti Nzapa’.

Wallace Liverance so ayeke mbeni wafango ye na Ekole ti Galaad ako nda ti mbage ti kapa ni so. Li ti tënë ti lo aluti na ndo Esaïe 55:1 so atene “Mo yeke vo ande nyen?” Lo wa a-élève ni ti “vo” dengo bê, tâ ngia na aye ti batango zo so alondo na yâ tokua ti prophétie ti Nzapa so andu ngoi ti e. Prophétie ti Esaïe ni ahaka atënë ti prophétie ti Nzapa na ngu, vin na dulait. Tongana nyen a lingbi ti vo ni “na nginza pëpe, wala [na] ngele pëpe”? Ita Liverance afa so a yeke na lege ti dengingo mê na aprophétie ti Bible nga na ziango na place ti abibe na asalango ye so ayeke ti sese so, abibe nga na asalango ye so anzere na Nzapa (Esaïe 55:2, 3, 6, 7). Salango tongaso ayeke mû ngangu na afini missionnaire na yâ kusala ti ala na kodoro wande. Azo so ayeke mbilimbili-kue pëpe abâ ti ala so tâ ngia ayeke ga na lege ti salango ngangu ti duti nzoni na lege ti mitele. Wamungo diskur ni awa ala tongaso: “Yeda na tënë so pëpe. Duti na mara ti bibe so pëpe. Sala kue ti zia mbeni ngoi nde ti manda Tënë ti prophétie ti Nzapa nzoni. Ye so alingbi ti dë bê ti mo, ti mû ngangu na mo nga ti mû na mo tâ ngia na yâ kusala ti mo ti missionnaire.”

A-élève ni asigigi na fango tënë lakue. Na gbe ti fango lege ti Mark Noumair, mbeni wafango ye na Galaad, so asala mbage so li ti tënë ni ayeke: “Kamene ti nzo tënë asala e pëpe”, mingi ti a-élève ni akiri ahaka peko ti aye so ala wara na fango tënë (aRomain 1:16). A nzere mingi na azo so aga ti mä tongana nyen awakua so ayeke na akode mingi afa tënë da na da, na ndo ti lege nga na ando ti dengo buze. A-élève so ahinga ambeni yanga ti kodoro nde amû li ni na fango tënë na azo so ayeke tene ayanga ti kodoro nde nde na yâ aterritoire ti kongregation so a zia ala dä. Ambeni asala kusala nzoni na ambeti ti mandango na Bible so aTémoin ti Jéhovah asigigi na ni, na ngoi ti afini vizite nga na ngoi so ala to nda ti a-étude na da ti azo. “Kamene” ti fango nzo tënë asala ala pëpe.

Ita William Nonkes, so ayeke sala kua na Biröo ti Kusala, ahunda tënë na amissionnaire so akpengba na yâ kusala ni so alondo na Burkina Faso, Lettonie na Russie. Ala mû anzoni wango so aluti na ndo li ti tënë “Na ndoye, Jéhovah ayeke futa abe-ta-zo.” Mbeni oko ti aita-koli so a hunda tënë na ala awa a-élève ni ti dabe ti ala na aturugu ti Gédéon 300. Turugu oko oko ayeke lani na mbeni kusala so amû maboko na songo benda ti Gédéon na yâ bira ni (aJuge 7:19-21). Legeoko nga, amissionnaire so angbâ na yâ kusala ti ala ayeke wara futa.

“Ga ye kue na popo ti azo kue” ayeke li ti tënë ti mbage so Samuel Roberson, mbeni wafango ye na ambeni ekole so a yeke sala na Patterson, amû ni. Na yâ ni lo hunda tënë na ambeni ita osio so ayeke amembre ti Komite ti Filiale ti Sénégal, Guam, Liberia na Madagascar. Amissionnaire kue 170 ayeke sala kusala na yâ ti akodoro so. A-élève so awara diplôme ti ala amä tongana nyen aKomite ti Filiale ayeke mû maboko na afini missionnaire ti leke dutingo ti ala ti lingbi na akusala so a mû na ala. Na mingi ni, a ndu hingango angobo ti salango ye so a yeke bâ ni pëpe na Poto nga na Amerika. Na tapande, na ambeni kodoro, a yeke bâ ka akoli na même aita ti kongregation so ayeke gbu maboko ti mba tongana akamarade na ngoi so ala yeke tambela legeoko. Na ambeni ndo so ayeke na gbe ti filiale ti Guam, a yeke mû na azo akobe so a yeke te ka ni lakue pëpe. Me ambeni zo agbian dutingo ti ala ti lingbi na ni, na afini missionnaire alingbi nga ti sala tongaso.

Guy Pierce, mbeni ita ti Wabatango Bungbi, asala mbage so li ti tënë ni ayeke: “Duti be-ta-zo na ‘Royaume ti Seigneur ti e.’ ” Lo mû dango bê so na azo so aga: “Nda ti aye so Jéhovah aleke ayeke dä. Lo yeke na mbeni ye so lo leke na bê ti lo ti sala ndali ti aye so lo leke. Ye so lo leke ti sala ngbanga ti sese so agbian pëpe. A yeke gue gi ti ga tâ tënë. Ye oko ti kanga lege na ni ayeke dä pëpe.” (Genèse 1:28). Ita Pierce awa azo kue ti duti be-ta-zo na mango kota yanga-ti-komande ti Nzapa atâa akpale so alingbi ti londo ndali ti siokpari ti kozo koli, Adam. Ita Pierce amû wango so: “E yeke na ngoi ti fango ngbanga. Ngoi angbâ na e gi kete ti ndu azo so ayeke na bê ti mbilimbili na ti mû maboko na ala ti hinga tâ tënë. Sala kusala nzoni na angoi so mo yeke na ni ti ndu azo na nzo tënë ti Royaume.” Azo so aduti be-ta-zo na mungo maboko na Royaume ti Nzapa alingbi ti ku ti wara mungo maboko ti lo.​—Psaume 18:26.

Ti ko nda ti programme ni, président ni adiko balao nga atënë so afiliale ti sese kue atokua. Na pekoni lo mû na a-élève ni adiplôme na mbeni oko ti ala adiko lettre so ala sû ti fa kota singila ti ala teti fango lege so ala wara. So a yeke kongo nda ti ye so alingbi tâ na mbeni pendere ngoi tongaso so azo so aga ayeke girisa ni pëpe.

[Kete tënë na lembeti 23]

AYE TI HINGA NA NDO KLASE NI

Wungo ti akodoro so a-élève ni alondo dä: 11

Wungo ti akodoro so a tokua ala dä: 22

Wungo ti a-élève ni: 48

Ngu ti ala oko oko angoro na tele ti ngu: 34,8

Ngu ti mingi ti ala na yâ tâ tënë: 18,3

Ngu ti mingi ti ala na yâ kusala ti ngoi kue: 13,4

[Foto na lembeti 24]

Klase 117 ti Galaad, Ekole ti Mandango Bible ti Société Watchtower

Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na koti.

(1) Thompson, E.; Norvell, G.; Powell, T.; Kozza, M.; McIntyre, T. (2) Reilly, A.; Clayton, C.; Allan, J.; Blanco, A.; Muñoz, L.; Rustad, N. (3) Guerrero, Z.; Garcia, K.; McKerlie, D.; Ishikawa, T.; Blanco, G. (4) McIntyre, S.; Cruz, E.; Guerrero, J.; Ritchie, O.; Avellaneda, L.; Garcia, R. (5) Powell, G.; Fiskå, H.; Muñoz, V.; Baumann, D.; Shaw, S.; Brown, K.; Brown, L. (6) Shaw, C.; Reilly, A.; Peloquin, C.; Münch, N.; McKerlie, D.; Ishikawa, K. (7) Münch, M.; Peloquin, J.; Kozza, T.; Avellaneda, M.; Allan, K.; Ritchie, E.; Norvell, T. (8) Cruz, J.; Baumann, H.; Clayton, Z.; Fiskå, E.; Thompson, M.; Rustad, J.