Bibe ti Sala na Bê Kue Ague na Azo na Guiléad

A SIGIGI na Guiléad, Ekole ti Mandango Bible ti Société Watchtower, ti mu maboko na akoli na wali so amu tele kue na Nzapa, ti sala kusala ti missionnaire na kodoro wande. Azo wa alingbi ti ga na Guiléad? Ala so ayeke na bibe ti sala na bê kue. (Psaume 110:3) Ye so asigigi biani polele na lango 8 ti nze ti septembre, ngu 2001, tongana a-élève ti klasse 111 ni ti Guiléad awara kota mbeti ti ala.

Ambeni na popo ti a-élève ti klasse so azia la ni awe na bê ti ala kue sewa, kamarade, na kodoro ti ala mveni ti gue ti sala kusala na mbeni ndo so a hunda awakua dä mingi ahon. Na salango tongaso, ala tara tele ti ala mveni ti ba wala ala lingbi ti gbian aye na yâ fini ti ala ti sala kodoro na mbeni ndo so ayeke nde kete na ti ala. Na tapande, Richer na Nathalie aleke aye ti ala ti gue na Bolivie, Todd na Michelle ague na République Dominicaine, na David na Monique ague na mbeni kodoro ti Asie ti kangbi nzo tene ti Royaume ti Nzapa. Ambeni élève ni asala la ni kusala awe na Nicaragua, na Équateur, nga na Albanie.

A wa Christy ti manda yanga ti Espagnol na kota da-mbeti, na ye so amu maboko na lo ti leke tele ti sala angu use na Équateur kozoni si lo sala mariage. Ambeni nde nga ague na yâ ti akongregation na yâ ti kodoro ti ala mveni, so abungbi ni ayeke tambela na ambeni yanga ti kodoro nde. Na lutingo na gbele mbeni kpale nde, Saul na Priscilla afa na gigi bibe ti salango na bê kue na salango ngangu kue ti manda yanga ti Anglais nzoni ahon kozoni ti ga na Ekole ni.

Ayenga 20 ti fango lege ti kusala ti missionnaire ahon hio. Lango ti warango kota mbeti ni asi awe, na a-élève ni awara tele na akamarade nga na sewa ti ala, na mango awango ti ndara, nga na atene ti kangbingo tele so akpengba zo.

Président ti programme ni ayeke Théodore Jaracz, mbeni oko ti ala so awara kota mbeti na klasse mbasambala ni ti Ekole ti Guiléad, na so fadeso ayeke mbeni oko ti Wabatango Bungbi ti aTémoin ti Jéhovah. Atene ti lo ti tongo nda ni afa so, tongana mbeni bungbi, e gue lâ oko pepe yongoro na nda ti fango lege so a mu na a-élève ti Guiléad, so ayeke ti fa nzo tene ti Royaume na ndo sese kue. (Marc 13:10) Guiléad amu na a-élève so alingbi na ni aye so alingbi ti mu maboko na ala ti sala kusala ti fango tene na mbeni lege so ayeke kota mingi ahon ti so ala sala kozoni, nga na yâ ambage ti sese so a yeke na kota bezoin ti amissionnaire so awara fango lege. Ita Jaracz awa a-élève ni ti sala kusala nzoni na fango lege so ala wara na Guiléad teti ala yeke gue fadeso ti bungbi na amissionnaire so ayeke sala kusala na yâ akodoro 19 so a tokua ala la ni dä.

Awango so Alingbi na Ngoi ni Teti Ala so Awara Kota Mbeti

Mbeni molongo ti adiskur aga na pekoni. William Van De Wall, mbeni oko ti Komite ti filiale ti États-Unis, asala tene na ndo li ti tene “Wâ ti Dutingo Missionnaire: Mbeni Fä so A Hinga na Atâ Chrétien.” Lo gboto lê na ndo kungba ti “sala si azo aga adisciple,” so a wara na Matthieu 28:19, 20, na lo wa a-élève ni tongaso: “I mu tapande ti Jésus so asala kusala ti lo ti missionnaire na wâ nga na ngia.” Ti mu maboko na a-élève so ayeke gue ti ga missionnaire ti bata wâ ti ala na yâ kusala ti missionnaire, lo wa ala tongaso: “I bata mbeni programme so alingbi; i bata nzoni ngobo ti mandango ye ti i mveni, na ngbango lakue ti manda afini ye so andu atene ti théocratie; na i bata lê lakue na ndo anda ti tene so asala si i yeke na yâ ti territoire ti i.”

Na pekoni, zo so amu diskur ayeke Guy Pierce, mbeni oko ti Wabatango Bungbi. Lo sala lisoro na ndo li ti tene “I Ngbâ Lakue ti Leke ‘Ngangu ti Bibe ti i.’” (aRomain 12:1, NW) Lo mu awango so alingbi na ni na a-élève ti klasse ni so ayeke gue ti wara kota mbeti, lo wa ala ti sala kusala na ngangu ti bibe so Nzapa amu na ala. Lo tene: “I ngbâ lakue ti gbu li ngangu na ndo ye so Jéhovah ayeke fa na e na lege ti Tene ti lo. Fade ye so ayeke bata i.” (aProverbe 2:11) Ita Pierce awa nga a-élève ni ti luti pepe ahon ndo ni na ndo bango ndo ti ala mveni na mbeni lege so asala si ala yeke kanga lege na “ngangu ti bibe” ti ala. Biani, adango bê so alingbi na ngoi ni ayeke duti ande ye ti mungo maboko mingi tongana a-élève ni ayeke sala kusala tongana amissionnaire.

Na pekoni, président ni atisa mbeni oko ti awafango ye na Ekole ti Guiléad ni, Lawrence Bowen, ti sala tene na ndo li ti tene “I Leke na Bê ti I ti Hinga Mbeni Ye nde Pepe.” Lo fa so ndali ti kusala ti lo ti missionnaire na Corinthe, bazengele Paul ‘aleke na bê ti lo ti hinga mbeni ye nde pepe . . . gi Jésus Christ, lo so a fâ lo na keke ti pasi.’ (1 aCorinthien 2:2, NW) Paul ahinga so ngangu ti kota ahon kue na ndagigi, yingo ti nzoni-kue, ayeke mu maboko na tokua so a fa na yâ Bible kue: fango na gigi mbilimbili ti kota yanga-ti-komande ti Jéhovah na lege ti Hale ti zendo ni. (Genèse 3:15) A wa a-élève 48 so ayeke gue ti wara kota mbeti ti duti tongana Paul na Timothée na ti duti amissionnaire so alë lengo, na so angbâ ndulu na “tapande ti nzo tene.”​—2 Timothée 1:13.

Ndangba diskur ti molongo ti adiskur ti tongo nda ni ayeke na ndo li ti tene “I Yekia Matabisi ti I so Ayeke Nde, so Alondo na Nzapa.” Wallace Liverance, secrétaire ti Ekole ti Guiléad, amu maboko na ala so ayeke gue ti wara kota mbeti ti ba so amatabisi ti kusala so ayeke afä ti nzobe ti Nzapa so zo alingbi na ni pepe, me a yeke pepe mbeni ye so ala yeke na droit ti wara, wala so ala yeke si dä na lege ti ngangu ti ala mveni. Na fango tapande ti bazengele Paul, ita Liverance atene: “Lege so Jéhovah asoro na Paul ti ga bazengele teti amara ayeke la ni pepe na lege ti akusala, si a lingbi ti ba so Paul awara droit na kusala so na lege ti angangu ti lo mveni, wala so lo lingbi na ni lo mveni. A ga pepe na lege ti angu mingi so lo sala na yâ kusala, wala aye so lo hinga mingi na yâ fini. Na bango ndo ti azo, a lingbi ti ba so sorongo Barnabas ayeke duti fade na lege ni mingi ahon. A luti la ni pepe na ndo kode ti zo ni mveni; a lingbi ti tene so Apollos ayeke na kode ti tenengo tene mingi ahon Paul. A yeke la ni fä ti nzobe ti Nzapa so zo alingbi na ni pepe.” (aEphésien 3:7, 8) Ita Liverance awa ala so ayeke gue ti wara kota mbeti, ti sala kusala na matabisi ti ala ti kusala ti mu maboko na ambeni zo ti ga andeko ti Nzapa na ti wara ye ti nzoni na lege ti “matabisi ti Nzapa . . . , fini ti lakue lakue na yâ Christ Jésus Seigneur ti e.”​—aRomain 6:23.

Na peko ti diskur so, Marc Noumair, mbeni wafango ye nde ti Ekole ti Guiléad, amu li ni na yâ mbeni lisoro ti wâ so lo sala na ambeni élève na ndo li ti tene “Lekengo Tele Aga na Aye ti Nzoni.” (aProverbe 21:5) Atapande so a mu afa so tongana mbeni wafango tene aleke tele ti lo nzoni teti kusala ti fango tene, mbilimbili tongana lo leke bê ti lo, fade lo yeke duti na tâ bingo bê na ndo azo. Fade lo yeke gi bê ti lo pepe na atene so lo ye ti tene. Nde na so, fade lo yeke sala atene nga na aye so ayeke mu maboko na azo ni na lege ti yingo. Ita Noumair atene: “Ye so ayeke kelele ti dutingo mbeni missionnaire so alë lengo,” na fango tapande ti ye so asi na lo mveni tongana lo yeke la ni missionnaire na Afrika.

Kusala ti Missionnaire: Mbeni Kua so Amu Ngia na Bê

Ralph Walls na Charles Woody ahunda tene na ambeni missionnaire so aninga na yâ kusala, na so aga nga na Kota Ndo ti Fango Ye ti Patterson teti mbeni fango lege so ayeke nde. Alisoro ti hundango tene ni afa so a yeke ndoye teti azo si aga na ngia na yâ kusala ti missionnaire. A yeke ye ti dengo bê teti a-élève ni nga teti azo ti sewa ti ala, na akamarade ti ala so ayeke na popo ti azo so aga, ti mä tene ti amissionnaire so aninga na yâ kusala ti ala, tongana ala yeke fa ngbanga ti nyen kusala ti missionnaire ayeke mbeni kua so amu ngia na bê.

John E. Barr, so ayeke mbeni oko ti Wabatango Bungbi, amu kpengba diskur ti lango ni, so li ti tene ni ayeke “Sala Fini Bia na Jéhovah.” (Esaïe 42:10) Ita Barr afa so tene “fini bia” asigigi fani gumbaya na yâ Bible. Lo hunda tene so: “Fini bia so aye ti tene nyen?” Na pekoni, lo kiri tene: “Tene so angoro ni afa so a yeke he mbeni fini bia ngbanga ti afini maïngo ti aye na yâ lege so Jéhovah ayeke sala kusala na kota yanga-ti-komande ti lo.” Lo wa mingi a-élève ni ti ngbâ lakue ti bungbi go ti ala oko ti he na abia ti sepela teti Royaume ti Nzapa so ayeke hon na ngangu na gbe ti komandema ti Gbia Messie, Christ Jésus. Ita Barr afa so fango ye so ala wara na Guiléad amu maboko na ala ti gbu nda ti ambage nde nde ti “fini bia” so mingi ahon ti kozo. “Ekole ni agboto lê mingi na ndo bezoin so i yeke na ni ti ‘he bia’ ti sepela na Jéhovah legeoko na aita ti i ti koli na ti wali na ndo kue so i yeke gue dä; i ngbâ lakue ti lë dutingo beoko na ambeni zo na yâ aterritoire ti i.”

Na pekoni so a mu na a-élève ni akota mbeti ti ala, mbeni oko ti a-élève ti klasse ni amu tene na place ti atanga ni ti diko mbeni lettre so afa tâ kiringo singila ti ala teti fango lege so ala wara na Guiléad.

Mo lingbi ti kono yâ ti kusala ti mo teti Nzapa na ti sala si alë lengo mingi ahon? Tongana a yeke tongaso, sala ngangu tongana ti so a-élève so asala. A yeke ye so a mu maboko ti sala si ala lingbi na kusala ti missionnaire. A yeke duti ye ti kota ngia tongana mbeni zo abi tele ti lo na ngia na yâ kusala ti Nzapa na bibe ti salango na bê kue.​—Esaïe 6:8.

[Encadré na lembeti 25]

AYE TI HINGA NA NDO KLASSE NI

Wungo ti akodoro so a-élève ni alondo dä: 10

Wungo ti akodoro so a tokua ala dä: 19

Wungo ti a-élève ni: 48

Wungo ti ngu ti zo oko oko: 33.2

Wungo ti ngu so zo oko oko asala na yâ tâ tene: 16.8

Wungo ti ngu so zo oko oko asala na yâ kusala ti ngoi kue: 12.6

[Foto na lembeti 26]

Ala so Awara Kota Mbeti na Klasse 111 ti Guiléad, Ekole ti Mandango Bible ti Société Watchtower

Na yâ bungbi ti a-iri so a fa na gbe ni ge, a fa numéro ti amolongo ni ti londo na devant ti kiri na peko, nga na ndo molongo oko oko, a fa iri ti azo ni ti londo na gati ti gue na mbage ti koti.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.